Sağlam körpə sağlam gələcəkdir

Hər il olduğu kimi, bu il də 17 iyun respublika səhiyyə işçilərinin peşə bayramı günü kimi ölkəmizdə geniş qeyd olunmuşdur. Xətai rayonundakı 4 saylı uşaq poliklinikasının kollektivi isə bu bayramı ikiqat sevinclə qarşılamışdır. Bu da səbəbsiz deyildi.

Həmin gün “Tac-Mahal” şadlıq evində poliklinikanın kollektivi özünün 20 illik yubileyini təntənə ilə qeyd edirdi. Tədbirdə respublikanın tanınmış elm xadimləri, səhiyyə işçiləri, Səhiyyə Nazirliyi və Bakı Baş Səhiyyə İdarəsinin əməkdaşları, Xətai Rayon İcra Hakimiyyəti başçısının müavinləri Zaməddin Əkbərov, Xeyrulla Hüseynov, eləcə də rayonun əksər tibb müəssisələrinin və poliklinikaların baş həkimləri iştirak etdirdi. Tədbiri giriş sözü ilə açan 4 saylı uşaq poliklinikasının baş həkim əvəzi, YAP Xətai rayon təşkilatının ərazi üzrə sədri Məlakət Abdulla açaraq qonaqları salamladı. Sonra o öz çıxışında respublikada ana və uşaqların sağlamlığının qorunması, sağlam və xoşbəxt böyüməsi yönümündə Azərbaycanın birinci xanımı, Mehriban Əliyevanın bir çox layihələrə imza atdığını xüsusi qeyd etdi. Bildirdi ki, rəhbərlik etdiyi poliklinikanın 86 həkimi və 102 tibb personalı da səhiyyədə aparılan islahatlarda və dövlət proqramından irəli gələn tapşırıqların yerinə yetirilməsində əllərindən gələni əsirgəməmişlər.

Bakı Baş Səhiyyə İdarəsi adından çıxış edən Aygün Əliyeva peşə bayramı və 20 illik yubiley münasibətilə 4 saylı poliklinikanın kollektivini təbrik etdi və bir qrup əməkdaşa baş idarənin fəxri fərmanlarını və qiymətli hədiyyələrini təqdim etdi. Xətai Rayon İcra Hakimiyyəti başçısının I müavini Zaməddin Əkbərov rayon icra hakimiyyətinin başçısı Razim Məmmədovun adından poliklinikanın əməkdaşlarını yubiley münasibətilə təbrik etdi, son illərdə rayonda gedən abadlıq-quruculuq işlərindən səhiyyə sahəsində aparılan islahatlardan söz açdı. Z.Əkbərov bu gün 160 min əhalisi olan Xətai rayon əhalisinə 14 ambulatoriya, 2 təcili yardım stansiyasında 800 həkim və 11000 tibb personalının xidmət göstərdiyini bildirdi və Xətai Rayon İcra Hakimiyyəti adından 4 saylı poliklinikanın kollektivindən bir qrupunu fəxri fərman və diplomlarla təltif etdi.

Milli Məclisin deputatı, yazıçı-dramaturq Hüseynbala Mirələmov da dünyanın ən müqəddəs varlığı olan uşaqların sağlamlığının qayğısını çəkən tibb işçilərini səmimi qəlbdən təbrik etdi və son illərdə Prezident İlham Əliyevin bu sahəyə də xüsusi qayğı və diqqət göstərdiyini xatırlatdı. Natiq Heydər Əliyev Fondunun, onun prezidenti, YUNESKO və İSESKO-nun xoşməramlı səfiri, millət vəkili, ölkənin birinci xanımı Mehriban xanım Əliyevanın gördüyü xeyirxah işlərdən, həyata keçirdiyi layihələrdən də ətraflı danışdı və bütün bunların Azərbaycan xalqının genefondunun sağlamlaşdırılmasına misilsiz töhvələr verəcəyinə əminlik ifadə etdi.

“Bu dilsiz, ağızsız mələklərin sağlamlığının qayğısını, zəhmətini çəkən həkimlərimizin əməyi isə heç nə ilə müqayisəyə gəlmir” deyən millət vəkili onlara ən xoş günlər və işlərində uğurlar arzuladı.

Rafiq SALMANOV

Xalq qəzeti.- 2009.- 23 iyun.- S. 7.