Masallı: sosial siyasət fərəhli nəticələr verir

Ölkəmizdə əhalinin sosial müdafiəsi istiqamətində həyata keçirilən tədbirlərin nəticələri fərəhlidir. Bu ilin əvvəlində Azərbaycan Prezidenti İlham Əliyevin söylədiyi fikirlər gələcəyə daha nikbin baxmağımıza əsas verir: “Biz sosial siyasətimizi bundan sonra da davam etdirəcəyik. Bütün sosial proqramlar icra olunur. 2008-ci ildə minimum əməkhaqqı və minimum pensiyaların baza həddi 50 faiz artmışdır və indi Azərbaycanda orta əməkhaqqı 335 dollar, orta pensiya 120 dollar səviyyəsindədir. Bu, yaxşı göstəricidir”.

Ölkəmizin qazandığı nailiyyətlərdə, sözsüz ki, Dövlət Sosial Müdafiə Fondunun da öz payı vardır. Fond üzrə ötən il və bu ilin beş ayında plan-proqnoz tapşırıqlarını artıqlaması ilə yerinə yetirən yerli qurumlardan biri də Masallı rayon şöbəsidir. Ülvi Nemətovun bacarıqla rəhbərlik etdiyi şöbə məcburi dövlət sosial sığortası, əmək pensiyası sahəsində idarəetməni və dövlət sosial sığorta sistemində fərdi uçotu bir yerli icra hakimiyyəti orqanı kimi uğurla həyata keçirir.

Ülvi Nemətovun bu barədə dedikləri:

— Azərbaycan Respublikası regionlarının 2009– 2013-cü illərdə sosial-iqtisadi inkişafı Dövlət Proqramında göstərilir ki, sosial təminat sahəsində dövlət siyasətinin ən mühüm istiqamətlərindən biri sosial müavinətlərin ünvanlılığının təmin edilməsindən, əlillərə, müharibə veteranlarına, gənc ailələrə, əhalinin ən az təminatlı hissəsinə xüsusi diqqət yetirilməsindən ibarətdir. Əhalinin sosial müdafiəsinin gücləndirilməsi məqsədilə dövlət proqramında bir sıra tədbirlərin həyata keçirilməsi nəzərdə tutulmuşdur.

Şöbəmiz öz fəaliyyətində Azərbaycan Respublikasının qanunlarını, o cümlədən “Sosial sığorta haqqında”, “Əmək pensiyaları haqqında”, “Dövlət sosial sığorta sistemində fərdi uçot haqqında” qanunları, Azərbaycan Respublikası Prezidentinin fərman və sərəncamlarını rəhbər tutur.

Şöbənin məcburi dövlət sosial sığorta vəsaitləri Dövlət Sosial Müdafiə Fondunun vahid sistemində cəmləşdirilir. Şöbənin gəlir və xərcləri proqnozu fondun büdcəsinin gəlir və xərclər göstəricilərinə uyğun olaraq təsdiq olunur.

Şöbəmiz tərəfindən 5 ay üzrə proqnoz tapşırıqları büdcədən maliyyələşən təşkilatlar üzrə 1231,6 min manata qarşı 1704,3 min manat və ya 138,4 faiz, qeyri-büdcə təşkilatları və fiziki şəxslər üzrə 369,1 min manata qarşı 369,4 min manat və ya 100,1 faiz, ümumilikdə isə 1600,7 min manata qarşı 2073,7 min manat və ya 129,5 faiz yerinə yetirilmişdir.

Regionların sosial iqtisadi inkişafına dair Dövlət Proqramının yerlərdə uğurla həyata keçirilməsi nəticəsində rayonumuzda da çoxlu yeni iş yerləri yaradılmışdır. Belə ki, 6 saylı Ərazi Vergilər İdarəsinin məlumatına əsasən, beş ayda 267 yeni iş yeri açılmışdır. Onlardan 11 nəfəri hüquqi şəxslərdə çalışanlar, 196 nəfəri fiziki şəxslər, 50 nəfəri fiziki şəxslərlə müqavilə əsasında işləyənlər, 10 nəfəri payıbəlli torpaqdan istifadə edən şəxslərdir. Yeni yaradılmış iş yerlərində çalışanlar tərəfimizdən məcburi dövlət sosial sığortasına cəlb olunmuşlar.

Şöbədə hazırda 27116 nəfər əmək pensiyaçısı uçotdadır. Onlardan 17667 nəfəri yaşa görə, 7804 nəfəri əlilliyə görə və 1645 nəfəri ailə başçısını itirdiyinə görə əmək pensiyası alanlardır. Hazırkı vəziyyətə 167 nəfərə yaşa görə, 84 nəfərə əlilliyə görə və 33 nəfərə ailə başçısını itirdiyinə görə əmək pensiyası təyin olunmuşdur.

“Əmək pensiyasının sığorta hissəsinin indeksləşdirilməsi haqqında” Azərbaycan Respublikası Prezidentinin 2009-cu il 9 fevral tarixli sərəncamı əsasında, yaşa görə əmək pensiyası alan 3617 nəfərin əmək pensiyasının sığorta hissəsi 14,4 min manat, əlilliyə görə əmək pensiyası alan 6543 nəfərin əmək pensiyasının sığorta hissəsi 12,1 min manat, ailə başçısını itirdiyinə görə əmək pensiyası alan 2092 nəfər ailə üzvünün əmək pensiyasının sığorta hissəsi 6 min manat və cəmi 12252 nəfər əmək pensiyaçısının pensiyasının sığorta hissəsi 32,5 min manat artırılmışdır. Azərbaycan Respublikası Prezidentinin 2009-cu il 27 aprel tarixli sərəncamı əsasında “1941–1945-ci illər Böyük Vətən müharibəsinin 64-cü ildönümü ilə əlaqədar 79 nəfər müharibə iştirakçısının hər birinə 150 manat 586 nəfər müharibə iştirakçılarının dul qalmış qadınlarına və 384 nəfər arxa cəbhə iştirakçısının hər birinə 100 manat məbləğində birdəfəlik yardım ödənilmişdir.

Yeri gəlmişkən, Masallı Rayon İcra Hakimiyyəti rəhbərliyinin, şəxsən Qəzənfər Ağayevin yaxından köməkliyi sayəsində pensiyaçıların öz pensiyalarını plastik kartlarla bankomatlar vasitəsilə almalarından ötrü DSMF rayon şöbəsi lazımi işləri layiqincə yerinə yetirə bilmişdir. Masallıda pensiya ödənişi “Kapitalbank”ın 6 bankomat aparatı vasitəsilə rahat həyata keçirilir. Rayon mərkəzində 2, Ərkivan və Boradigah qəsəbələrində, habelə Şərəfə və Yeddioymaq kəndlərində isə 1 bankomat əmək pensiyaçılarına və əhaliyə xidmət göstərir. Bankomat sisteminə cəlb edilmə Masallıda 100 faiz təmin edilmişdir.

Şöbədə vətəndaş müraciətlərinə həssaslıqla yanaşılır. Adamlar ehtiramla qarşılanır, ərizə və şikayətlərə, daxil olan xidməti məktublara vaxtlı-vaxtında baxılır. Bundan ötrü “Dövlət qulluqçularının etik davranış qaydaları haqqında” Qanunun tələblərinə ciddi riayət olunur. Ötən beş ay ərzində Dövlət Sosial Müdafiə Fondundan 78, rayon icra hakimiyyətindən 3, digər idarə, müəssisə və təşkilatlardan 109, vətəndaşlardan 21 xidməti məktub və ərizə qəbul edilərək vaxtında icrası təmin olunmuşdur.

Biz şöbədə olarkən dövlət qulluqçusu pensiyası alan Əliniyaz Əkbərov, Ağamməd Nuriyev və Böyük Vətən müharibəsi veteranı, müvafiq şuranın sədri Atabala Hacıyev Masallıda onlara göstərilən diqqət və qayğıdan razılıqlarını bildirdilər:

— Rayonumuz son illər sürətlə inkişaf edir. İstər icra hakimyiyətinin başçısı Qəzənfər Ağayev və aparatın işçiləri, istərsə də icra hakimiyyəti orqanları, o cümlədən DSMF rayon şöbəsi əllərindən gələni edirlər ki, camaatın hər cür rahatlığı təmin olunsun.

— Buraya nə vaxt gəlsəm, mehriban, gülərüz və işgüzar adamların əhatəsinə düşürəm. Heç kəs diqqət və qayğısını əsirgəmir. Bu, adamı fərəhləndirir. Dövlət qulluqçuları məhz belə olmalıdırlar.

— Sağ olsunlar, biz qocaları hər zaman səbrlə, təmkinlə dinləyir, həvəslə qanunu başa salır və kömək edirlər. Bu qaydanı rayonda Qəzənfər müəllim qoyub, yerlərdə isə ciddi riayət edirlər. Bu şöbədə hər kəs işini peşəkar səviyyədə görür, bizə ən yüksək insanpərvərlik münasibəti bəsləyir. Çox razıyam...

Əlbəttə, başqa cür ola bilməz. Əgər ölkə rəhbərliyi daim öz siyasətində insan amilinə önəm verirsə, sosial yönümlü iqtisadi siyasət yürüdürsə, yerlərdə də bu, öz əksini beləcə tapmalı, vətəndaşların maddi və mənəvi rifahı hərtərəfli təmin olunmalıdır. Bu baxımdan Masallı nümunəsi əsl örnəkdir.

DSMF-nin Masallı şöbəsi tam kompyuterləşdirilib, mütərəqqi “Server” sistemi də tezliklə tətbiq ediləcək. Şöbə üçün rayonda yeni, müasir inzibati bina tikilib və yaxın vaxtlarda istifadəyə veriləcəkdir. Bundan sonra faydalı iş əmsalı daha da yüksələcək, vətəndaşlara xidmətin səviyyəsi bir qədər də artacaqdır.

Əli NƏCƏFXANLI,

“Xalq qəzeti”nin bölgə müxbiri

Xalq qəzeti.- 2009.- 23 iyun.- S. 5.