23 iyun Dövlət qulluqçularının peşə bayramıdır

Dövlət qulluqçuları ölkənin dinamik inkişafına sanballı töhfələr verirlər

Qaxda peşə bayramı təntənə ilə qeyd edilmişdir

Qax rayonunda 23 iyun Dövlət qulluqçularının peşə bayramı münasibətilə tədbir keçirilmişdir. Ulu öndər Heydər Əliyevin abidəsi önünə gül-çiçək qoyulması ilə başlanan toplantını giriş sözü ilə RİH-nin başçısı Mübariz Əhmədzadə açmış və Azərbaycan Respublikasının, eləcə də rayonun bütün dövlət qulluqçularını peşə bayramı münasibətilə təbrik etmişdir.

M. Əhmədzadə Azərbaycan Respublikasında müasir dövlət qulluğu sisteminin formalaşmasının və inkişafının ümummilli liderimiz Heydər Əliyevin adı ilə bağlı olmasını bildirməklə, məhz Heydər Əliyevin ali siyasi hakimiyyətə qayıdışından sonra ölkədə xaos və anarxiyanın qarşısının alınmasından, dövlət nizamı və sabit dövlət idarəçiliyinin bərpa edilməsindən, demokratik, hüquqi dövlət quruculuğu prosesinin başlanması və onun layiqli davamçısı Prezident İlham Əliyevin rəhbərliyi ilə dövlət idarəetmə orqanlarının işinin dövrün tələblərinə uyğun yenidən qurulması, keyfiyyətli kadr korpusunun yaradılması, nazirlik və komitələrin müvafiq istiqamətlər üzrə vahid dövlət siyasətini həyata keçirən hakimiyyət orqanlarına çevrilməsi istiqamətində zəruri tədbirlərin görülməsindən danışmışdır. Sonra “Dövlət qulluqçusu və onların sosial müdafiəsi” mövzusunda məruzə olunmuşdur.

Daha sonra rayon maliyyə idarəsinin müdiri Rasim Məmmədov, RİH-in ümumi şöbəsinin müdiri Ələkbər Şahidov, Zəyəm kənd ərazi icra nümayəndəsi Səbuhi Həmzəyev, rayon statistika idarəsinin rəisi Malik İmamov və rayon polis şöbəsinin rəisi Bəylər Abbasov çıxış edərək respublikada həyata keçirilən dövlət siyasətinin əsas vəzifələrindən, dövlət qulluğu siyasətinin əsas məqsədinin ölkəmizdə səmərəli, məsuliyyətli və demokratik idarəçiliyin yaradılmasından, dövlət orqanlarının fəaliyyətində çevikliyin və şəffaflığın gücləndirilməsindən söz açmışlar. Çıxış edən natiqlər ölkəmizdə həyatın bütün sahələrində dinamik inkişaf proseslərinin getdiyi, perspektivli sosial-iqtisadi inkişaf proqramlarının icra olunduğu bir zamanda dövlət qulluqçuları qarşısında tamamilə yeni və müasir tələblər qoyulmasını vurğulamış, dövlət qulluqçularının yüksək peşəkarlıq, səriştəlilik, əxlaq və mənəviyyat nümunəsi göstərməklə öz fəaliyyəti, insanlarla rəftarı, qəbul etdiyi qərarlar və hərəkətləri ilə rəsmi orqanlara hörmət qazandırmalı, vətəndaşlara dövlət siyasətinin məqsəd və vəzifələrini təlqin etməli olmalarını bildirmişlər.

Sonda rayon icra hakimiyyətinin başçısı tədbirdə yekun söz söyləyərək rayonda dövlət qulluğu sahəsində çalışan bir neçə dövlət qulluqçusunu təbrik etmiş, onlara fəxri fərmanlar təqdim etmiş, demokratik dövlət quruculuğunda, xalqın rifahı naminə fəaliyyətlərində uğurlar arzulamışdır.

İ. HƏSƏNOV,

“Xalq qəzeti”nin bölgə müxbiri

Xalq qəzeti.- 2009.- 23 iyun.- S. 3.