Latviya ilə əməkdaşlıq sazişi imzalandı

Dünən Ekologiya və Təbii Sərvətlər Nazirliyində keçirilən tədbirdə nazir Hüseynqulu Bağırov Latviyanın ətraf mühit naziri ilə ətraf mühitin mühafizəsi sahəsində əməkdaşlıq sazişi imzalamışlar.

Ekologiya və Təbii Sərvətlər Nazirliyinin mətbuat xidmətindən aldığımız məlumata görə tədbirdə Latviya Respublikasının ətraf mühit naziri Raymonds Veyonisinlə yanaşı nazirin müşaviri Viestrus Silenieks, katib Quntis Pukitis, nazirliyin məsləhətçisi İndulis Emsis iştirak ediblər.

Nazir Hüseynqulu Bağırov öncə ətraf mühitin mühafizəsi və bu sahədəki problemlərin həllindən danışıb: “Ətraf mühitin mühafizəsi, tullantıların idarə edilməsi, biomüxtəlifliyin mühafizəsi, ətraf mühitin monitorinqi, su ehtiyatlarının idarə olunması və iqlim dəyişmələri bu günün ən aktual mövzusudur. Bildiyiniz kimi, bunların həll olunması üçün gündəlik nəzarət lazımdır. Allahın yaratdığı əsrarəngiz təbiəti qorumaq hər birimizin vətəndaş borcudur. Bu işdə müxtəlif təbəqələli insanların köməyi vasitəsi ilə problemlərin həllində bir yol tapmalıyıq.

Ekologiya və Təbii Sərvətlər Nazirliyi Almaniya, Danimarka, Balkan ölkələri və qonşu ölkələrlə bu sahənin qorunması üçün sazişlər imzalayıb. Bu öləkələr arasında Latviyanın adını xüsusi qeyd etmək istəyərdim. Azərbaycanı Latviya ilə mədəniyyəti, keçmiş tarixi, indiki oxşar problemləri bu ölkə ilə möhkəm əlaqələri qorumağa sövq edir. Məhz bununla əlaqəli Latviya Respublikasının ətraf mühit naziri cənab Raymonds Veyonisin, ətraf mühit nazirinin müşaviri cənab Viestrus Silenieks, ətraf mühit nazirinin katibi cənab Quntis Pukitis, Ətraf Mühit Nazirliyinin məsləhətçisi cənab İndulis Emsis Bakıya təşrif buyurub. Latviya ilə xoş münasibətlərimizə inanaraq bildirmək istəyirəm ki, münasibətlər ölkələrimiz arasındakı problemləri birgə həll etməyə yardımçı olacaq.

Latviya Azərbaycan ölkəsi kimi ağrılı-acılı günlər yaşayıb. Azərbaycan ölkəsi olaraq biz belə hissi daha tez anlayırıq. Ekologiyadan əlavə çaylarımızdakı axan suların bizim ərazimizə çirkli halda gəlib çatması bizim ölkədə su problemi yaradır. Bununla əlaqəli Ekologiya və Təbii Sərvətlər Nazirliyi tərəfindən çox effektverici, əlverişli proyekti çayların təmizlənməsi üçün hazırlanmışdır. Çay ətrafı bölgələrdə yaşayan 924 minə yaxın əhalinin 224 minə yaxını hazırda təmiz içməli suyu əldə edə bilir. Latviya ölkəsi ilə bu gün saziş imzalayırıq. Sazişin əsas məqsədi ölkələr arasındakı tanışlıq, ekologiyadakı çirkli hava durumunu aradan qaldırmaq, çirkli suyun təmizlənməsi və bu kimi işlər üçün əlverişli olacaq. Mən inanıram ki, bu saziş ölkələr arasındakı bağlılığı daha da möhkəmləndirəcək”.

Sonra isə latviyalı nazir çıxış edərək, hər iki ölkə arasındakı münasibətlərdə qarşılıqlı əlaqələrdən və ətraf mühit problemlərindən danışdı.

Sonda hər iki ölkənin nazirləri ətraf mühitin mühafizəsi sahəsində əməkdaşlığa dair sazişə imza atdılar.

M.MÜKƏRRƏMOĞLU

Xalq qəzeti.- 2009.- 26 iyun.- S. 8.