“Yenə qəlbimdədir mehriban səsin”

İnsan yaşa dolub ahıllaşdıqca irəlidən çox geriyə baxır. Yaşanmış illərini, ömrünün acılı-şirinli xatirələrini çözələyir. Sıraları get-gedə seyrəkləşən dost-tanışlarını yad edir. Gəlimli-gedimli, son ucu ölümlü dünyanın mənası barədə bəzən kədərli, bəzən də sevincli xatirələrə dalır...

Qəzənfər müəllimlə bugünkü söhbətimiz də belə bir ovqata köklənib. Mənalı bir ömrün 80-ci yaş zirvəsindən həmsöhbətim dünəninə boylanır. Ömür salnaməsini aram-aram varaqladıqca, istər-istəməz, məni də o əlçatmaz çağlara qaytarır.

Müsahibimi şəxsən tanımasaydım, onun keçdiyi həyat yolunun sanballı, uzun illər hüquq-mühafizə orqanlarında işləməsi, podpolkovnik rütbəsinin, çoxsaylı təltif və mükafatlarının xofu bəlkə də məni rəsmi, bir qədər “quru” söhbət ab-havasına kökləyərdi. Lakin, Qəzənfər müəllimi çoxdan tanıdığımdan bu rəsmi təqdimatın fövqündə necə mehriban, xeyirxah, şairanə bir şəxsiyyətin dayandığını bilirdim.

Həyat elə gətirib ki, bu uzun ömrün bir hissəsi gözlərim qarşısında ötüb. Və mən qəhrəmanımı müxtəlif situasiyalarda, müşahidə etmişəm... İlk tanışlığımız yaxın rəfiqəmin, o vaxtlar səhiyyə nazirinin müavini işləyən Safo xanım Rəsulbəyovanın həyat yoldaşı kimi baş tutub. Elə onda da Qəzənfər müəllimin bir ər kimi, ata kimi nə qədər mehriban, diqqətli, qayğıkeş insan olduğunu duymuşam. Sonralar gözəl insan, istedadlı həkim Safo xanımla yaxınlığımız ailəvi dostluğa çevrildikcə Qəzənfər müəllimlə təmasımız daha da artıb və mən onu çətində, darda etibarlı bir dost, işinə böyük məsuliyyətlə yanaşan, Vətənini, xalqını, elini, obasını ürəkdən sevən bir vətəndaş kimi də tanıyıb özüm üçün kəşf etmişəm. Elə bu keyfiyyətlərinə görə də ətrafındakılar Qəzənfər Aslanovu bu gün də sevir, hörmət edirlər.

Qədim Gəncə torpağında həyata göz açıb Qəzənfər müəllim. Böyüyüb boya-başa çatdıqca zirəkliyi, məsuliyyəti ilə həmyaşıdlarından seçilib. Qohum-əqraba, dost-tanış gələcəyinə böyük ümid bəsləyib. Və səhv etməyblər. 1949-cu ildə orta məktəbi əla qiymətlərlə bitirən gənc Qəzənfər elə həmin il Bakıya gələrək Azərbaycan Dövlət Bədən Tərbiyəsi İnstitutuna daxil olur. Ali təhsilini başa vurduqdan sonra o zamankı APİ-nin (hazırda ADPU) bədən tərbiyəsi fakültəsində müəllim işləməyə başlayır. Tez bir zamanda Azərbaycan Dövlət Bədən Tərbiyəsi İnstitutuna baş müəllim kimi işə dəvət olunur. Gənc mütəxəssis vəzifə pillələri ilə müvəffəqiyyətlə irəliləyir. Ancaq əldə etdiyi ilə kifayətlənmək, bir yerdə dayanmaq bu gəncin xarakterinə yad idi. 1959-cu ildə Q.Aslanov Azərbaycan Dövlət Universitetinin hüquq fakültəsinə daxil olanda çoxları təəccüb etdi. Axı, institutda böyük hörmət qazanmış bu gəncə daha nə lazımdır? Tələbələrin və işlədiyi müəllim kollektivinin sevimlisi olmaq məgər kifayət deyilmi? Ancaq, Qəzənfər müəllim üçün, görünür, bu, kifayət deyildi. 1962-ci ildən daxili işlər orqanlarında çalışmağa başlayan Qəzənfər Aslanov işə xüsusi həvəs və şövqlə girişdi. Ömrünün 30 ildən çoxunu sərf etdiyi bu işə ürəkdən bağlı olduğu üçün vəzifə pillələri ilə sürətlə irəlilədi. İlk iş yeri Səbail Rayonu Milis İdarəsinin cinayət axtarışları üzrə əməliyyat müvəkkili vəzifəsi olsa da, heç iki il keçməmiş Daxili İşlər Nazirliyinin xidməti şöbəsinə baş inspektor vəzifəsinə təyin edildi. İnsanların asayişinin qorunması işinə böyük məsuliyyətlə yanaşmağı, ciddiliyi, intizamlılığı diqqəti cəlb etdi. 1967-ci ildə Oktyabr Rayonu Milis İdarəsinə rəis müavini vəzifəsinə irəli çəkildi. 1973-cü ildən Daxili İşlər Naziriyi kollegiyasının qərarı ilə Bakı Şəhər Milis İdarəsi yanında mühafizə şöbəsinin rəisi təyin edilir. 10 ilə yaxın bu vəzifədə çalışır. 1989-cu ilin noyabrında isə öz xidməti vəzifəsini ləyaqətlə başa vurub pensiyaya çıxır. Daxili işlər orqanlarında çalışdığı 30 ilədək müddətin hər gününü, hər ayını Q.Aslanov xalqa xidmət nümunəsinə çevirmişdir. Elə ona görə də əməyi yüksək qiymətləndirilmişdir. O, müxtəlif illərdə “Milis əlaçısı”, “Əməkdə igidliyə görə” medalı, qüsursuz xidmətə görə I, II, III dərəcəli medallarla, “Əmək veteranı” medalı ilə təltif olunmuşdur. Nümunəvi xidmətinə görə Qəzənfər müəllim dəfələrlə fəxri fərman və qiymətli hədiyyələrlə mükafatlandırılmışdır. Daxili İşlər Nazirliyinin nəşrlərində və dövri mətbuatda onun haqqında çoxlu məqalə və oçerklər dərc olunmuşdur.

Gərgin əməyi özünə gündəlik iş norması kimi qəbul edən Qəzənfər müəllim dxili işlər orqanlarından pensiyaya çıxandan sonra da boş oturmamış, müəllimlik fəaliyyətini davam etdirmişdir. Qəzənfər Aslanov 1989-cu ildən bu günə qədər Azərbaycan Dövlət Bədən Tərbiyəsi və İdman Akademiyasının ictimai elmlər kafedrasında baş müəllim işləyir. O, burada da öz əməksevərliyi, dəqiqliyi və fədakarlığı ilə çoxlarına nümunədir. Onun mühazirələri tələbələrə Vətəni sevmək, həyatda fədakar olmaq kimi keyfiyyətlər aşılayır. Onun inzibati hüquq pozuntusu və inzibati məsuliyyət mövzusundakı metodik vəsaiti akademiyanın tələbələri üçün, sözün əsl mənasında, stolüstü kitabdır. İdman çoxnövçülüyü üzrə kadr hazırlığında Q.Aslanovun böyük əməyi olmuşdur. 1956-cı ildə o, Moskvada SSRİ xalqlarının I Spartakiadasında hakimlik etmiş, 1954-cü ildə isə yüngül atletika üzrə respublika dərəcəli hakim adına layiq görülmüşdür.

İnsan ömrü... Təbiətin bizə bəxş etdiyi ən böyük və əvəzsiz nemət. Onu hərəmiz bir cür yaşayır, bir cür başa vururuq. Ancaq nə qədər müxtəlif və bənzərsiz olsa da, bir şeyi yəqin bilirik: bu həyatda öz yaş zirvəsindən geriyə boylanan hər kəs dünəni ilə fəxr edə bilirsə, deməli xoşbəxt, bəxtəvər bir ömür yaşayıb və yaşayır. Yəni, təəssüflənməli, heyfsilənməli bir şey yoxdur...

Bu sözləri bütövlüklə Qəzənfər Aslanovun 80 illik mənalı ömrünə şamil etmək olar. Bu gün o, dolğun, mənalı bir ömür yaşayır. Həyatı sevən bu insana həyat da öz səxavətini göstərir. Onun “Həyat təranələri” şeirlər kitabını əlinə alan hər kəs bu qarşılıqlı məhəbbəti dərhal hiss edir. Doğulub boya-başa çatdığı şəhərinə müraciətlə deyir:

Şaxtada, tufanda, boranda, qarda,

İsidir canımı odlu nəfəsin.

Olsam da nə qədər uzaq diyarda,

Yenə qəlbimdədir mehriban səsin.

Qəlbi elə isti hisslərlə dolu olduğundandır ki, Qəzənfər Aslanov bu gün də yaşa boyun əymir. Və ömrünün 80-ci ilini gələcək 90, 100 illik yubileyləri qarşısında növbəti “dayanacaq” kimi qəbul edir. Ömrünüz uzun, canınız sağ olsun, Qəzənfər müəllim!

Svetlana NƏCƏFOVA,

əməkdar jurnalist

Xalq qəzeti.- 2009.- 26 iyun.- S. 7.