Gənclərin dostu

Fərman Rzayevi Gədəbəydə hamı tanıyır. Xüsusilə gənclər bu həlim, sadə, qayğıkeş insanla daha tez-tez görüşmək, onun nəsihətlərinə, məsləhətlərinə qulaq asmaq istəyirlər.

Rayonda elə tədbir, mərasim yoxdur ki, Fərman müəllim orada iştirak etməsin. Əvvəla, bu onunla əlaqədardır ki, Fərman Rzayevin rəhbərlik etdiyi Gədəbəy avtomobil məktəbi rayonda gənclərin hərbi-vətənpərvərlik ruhunda tərbiyə olunmasında mühüm rol oynayır. Digər tərəfdən yuxarıda qeyd etdiyimiz kimi, F.Rzayevin bütün əməli fəaliyyəti dövlətçiliklə, ölkəmizin daxili və xarici siyasətinin uğurlu təbliği ilə bağlıdır. Hələ 90-cı illərin əvvəllərində ulu öndər Heydər Əliyevin fəal təbliğatçılarından olub, dahi şəxsiyyətin həyat və fəaliyyəti ideyaları ilə rayon gəncləri qarşısında çıxışlar edib...

Gədəbəyə kimin yolu düşsə avtomobil məktəbinə baş çəkməyi unutmamalıdır. Buradakı səliqə-sahman, hərbi dərslərin, texnikanın öyrədilməsi üçün yaradılmış şərait ilk andan diqqəti cəlb edir. Müxtəlif dövri mətbuatı, siyasi, hərbi və bədii ədəbiyyatı olan kitabxanası bir çox peşəkar kitabxanalara nümunə ola bilər. Dağlar qoynunda yerləşən məktəbdə istilik sistemindən tutmuş tədris üçün lazım olan ən müxtəlif şərait yaradılmışdır. Avtomobillərin saxlanılması, texnikanın yüksək səviyyədə qorunması və onun gənclərə öyrədilməsi sahəsində çox önəmli bir təcrübə qazanılmışdır. Bütün bunlarla yanaşı məktəbdəki Heydər Əliyev muzeyi, milli qəhrəmanlarımızın keçdiyi döyüş yolunu əks etdirən, tarixi materiallarla, əşyalarla, şəkillərlə zəngin olan başqa bir muzeyə təkcə məktəbdə təhsil alan gənclər deyil, rayonun digər əmək kollektivlərindən, ümumtəhsil məktəblərindən gələnlər də az deyil.

Fərman müəllim özü şeirə, sənətə, incəsənətə bağlı adamdır. Təsadüfi deyil ki, o burada tez-tez tanınmış yazıçı və şairlərlə görüşlər keçirir, incəsənət ustalarının çıxışlarına yer ayırır, rayonun digər ağsaqqallarını dəvət edir.

Fərman Rzayev tez-tez hərbi hissələrdə olur, çağırışçı gənclərin ordu sıralarına yola salınma mərasimlərində iştirak edir, şəhid ailələrinə baş çəkir, onlara maddi və mənəvi cəhətdən dayaq olur.

Ömrünün 65-ci baharını yaşayan Fərman Rzayev deyir:

-Sürücülük məktəbini bitirən gənclərə vəsiqə verməklə vəzifə bitmir. Onların hər biri sabahın Vətən keşikçiləridir. Əvvəlcə hərbi-vətənpərvərlik ruhunda tərbiyə olunmalı, sonra isə texnikanın sirlərinə yiyələnməlidirlər. Bunları bir-birindən ayırmaq olmaz.

Rayon icra hakimiyyəti, şəxsən icra hakimiyyətinin başçısı Kamran Rzazadə hər bir işimizə, təşəbbüslərimizə dayaq olur, hərtərəfli köməklik göstərir. Bu yaxınlarda Azərbaycan Respublikasının Prezidenti cənab İlham Əliyev rayonumuzda oldu, müxtəlif obyektlərin açılışında iştirak etdi, rayon ağsaqqalları ilə görüşdü. Neçə gündür hamımız bu görüşün təəssüratı altında yaşayırıq. Sevinirik və fəxr edirik ki, belə Prezidentimiz var! Heç kimi, hüç nəyi yaddan çıxarmır. Artıq son iki il ərzində iki dəfə ucqar bir dağ rayonuna baş çəkib. Elə bu gəlişin özü böyük bir diqqət, qayğı deyilmi?! Biz də gərək elə işləyək, çalışaq ki, etimadı doğruldaq.

Hamlet QASIMOV,

“Xalq qəzeti”nin bölgə müxbiri

Xalq qəzeti.- 2009.- 26 iyun.- S. 6.