Nəsimi rayonu ünvanlı sosial yardım sahəsində müsbət təcrübəyə malikdir

Azərbaycanda sosial müdafiə sahəsinin, o cümlədən sosial yardım sisteminin dünyanın qabaqcıl təcrübəsi əsasında təkmilləşdirilməsi, bu sistemin əhaliyə daha yaxın bir sistem kimi qurulması və dövlət yardımlarının ünvanlılığının təmin edilməsi istiqamətində atılan addımlardan biri də üç il bundan öncə respublikamızda ünvanlı dövlət sosial yardımı sisteminin tətbiqinə başlanması olmuşdur.

İlk öncə bu sistemin tətbiqi üçün qanunvericilik bazası yaradılmış, “Ünvanlı dövlət sosial yardımı haqqında” Qanun qəbul edilmiş və bu qanunun tətbiqi barədə Azərbaycan Respubilkası Prezidentinin 2005-ci il 16 noyabr tarixli Fərmanı imzalanmışdır. Həmçinin Nazirlər Kabinetinin müvafiq qərarı ilə yeni yardım sisteminin tətbiqi mexanizmi üçün gərəkli olan qaydalar təsdiqlənmişdir. Əvvəlcə Bakı, Sumqayıt, Gəncə, Mingəçevir, Naftalan və Şirvan şəhərlərində, 2006-cı ilin may ayının 1-dən isə respublikanın bütün ərazisində ünvanlı yardım üçün vətəndaşlardan sənədlərin qəbuluna, həmin ilin 1 iyulundan isə yardımların təyinatına başlanılmışdır.

Əmək və Əhalinin Sosial Müdafiəsi Nazirliyi ölkədə yeni yardım sisteminin tətbiqi kimi məsuliyyətli bir işin məhz dövlətin siyasətinə, Prezidentin əhaliyə olan qayğıkeşliyinə layiq səviyyədə yerinə yetirilməsi məqsədilə ilk gündən prinsipial mövqe tutaraq məqsədyönlü tədbirlər həyata keçirmiş, yardım təyinatını həyata keçirən rayon (şəhər) əhalinin sosial müdafiəsi mərkəzləri ilə ciddi işlər aparmışdır. Onlara müvafiq təlimatlar verilmiş və vətəndaşları qəbul etmək üçün normal iş şəraiti, lazımi avadanlıqlar, kompyuter proqramı ilə təminatı işləri görülmüşdür. Nəticədə ünvanlı yardım sistemi qanununçuluğa, şəffaflıq, ədalətlilik, bərabərlik, ən başlıcası isə ünvanlılıq prinsiplərinə ciddi riayət olunmaqla icra olunmuşdur.

Ünvanlı sosial yardım sisteminin tətbiqi sahəsində görülən işlərə ilk dəfə olaraq məhz ölkə rəhbəri tərəfindən yüksək qiymət verilmişdir. Respublika hökumətinin 2006-cı ilin yarımilliyinin nəticələrinə həsr olunmuş müşavirəsində Azərbaycan Respublikasının Prezidenti cənab İlham Əliyev ölkəmizdə ünvanlı dövlət sosial yardımı sisteminin tətbiqi işlərinə də münasibət bildirərək bu sahədə qazanılmış ilkin təcrübəni müsbət dəyərləndirmişdir.

Həmçinin hökumətin 2007 və 2008-ci illərə dair fəaliyyətinin yekunlarına həsr olunmuş iclaslarda dövlət başçısı ölkədə ünvanlı dövlət sosial yardımı sisteminin uğurla icra olunduğunu vurğulamışdır. Bu yüksək qiymət nazirliyin rəhbərliyini və kollektivini sosial müdafiə işinin bütün istiqamətlərində uğurlara ruhlandırmışdır.

Onu da qeyd edək ki, ölkəmizdə ehtiyac meyarının tədricən yaşayış minimumuna yaxınlaşdırılması dövlətin əsas məqsədlərindən biridir və bu istiqamətdə mühüm addımlar atılır. Azərbaycan Respublikası Prezidenti İlham Əliyevin 25 noyabr 2008-ci il tarixli Sərəncamına əsasən, respublikamızda ehtiyac meyarının məbləğinin 2009-cu il yanvar ayının 1-dən 60 manat məbləğində təsdiq olunması qeyd olunan sahədə növbəti irəliləyişdir.

Qeyd edək ki, 2006-cı ildə ölkəmizdə ehtiyac meyarının məbləği 30 manat idi və bu məbləğ yaşayış minimumunun 51,7 faizini təşkil edirdi. Hazırda isə ehtiyac meyarının məbləği 60 manatdır və onun yaşayış minimumuna nisbəti 71,4 faizdir. Ehtiyac meyarının məbləğinin artırılması, təbii ki, ünvanlı yardımların məbləğinin də artması ilə müşayiət olunur.

Azərbaycan dövlətinin ilbəil güclənən və əhalinin rifah halının yaxşılaşdırılmasına səbəb olan sosial siyasəti bu gün Nəsimi Rayon Əhalinin Sosial Müdafiəsi Mərkəzində uğurla icra olunur. Bu məqsədlə Prezidentimizin sosial müdafiə tədbirlərinin gücləndirilməsinə xidmət edən bütün fərman və sərəncamları mərkəzimiz tərəfindən yüksək səviyyədə yerinə yetirilmiş, aztəminatlı əhali qruplarının yaşayışının yaxşılaşdırılması üçün məqsədyönlü işlər görülmüşdür.

Mərkəzimizin kollektivi bundan sonra da bütün sosial yönümlü tədbirlərdə fəal iştirak edəcək və dövlətimizin sosial siyasətini rayonumuzda layiqli səviyyədə icra etməyə çalışacaq.

Natiq HEYDƏROV,

Nəsimi Rayon Əhalinin Sosial

Müdafiə Mərkəzinin direktoru

Xalq qəzeti.- 2009.- 28 iyun.- S. 6.