Sabunçu rayonunda əhalinin sosial vəziyyəti diqqət mərkəzindədir

Ulu öndər Heydər Əliyev tərəfindən əsası qoyulmuş sosial siyasət ölkə Prezidenti İlham Əliyevin rəhbərliyi ilə uğurla davam etdirilir, ölkədə sosial ədalət prinsipi başlıca amilə çevrilir.

Ölkəmizin dinamik inkişafı sayəsində müavinətlər, pensiyalar, ünvanlı dövlət sosial yardımları, təqaüdlər ilbəil artırılır. Belə ki, indiyədək, minimum pensiya 4 dəfə, minimum əməkhaqqı isə 8 dəfə artırılmışdır. Müharibə əlillərinə, şəhid ailələrinə yaşayış evləri inşa olunub istifadəyə verilib, bu kateqoriyadan olan insanlara minik avtomobillərinin verilməsi yaxşı bir ənənə kimi qorunub saxlanılır. İndi elə il olmur ki, şəhid ailələrnə, müharibə veteranlarına yeni mənzillər verilməsin. Möhtərəm Prezidentimiz İlham Əliyev demişdir: “Biz iqitsadiyyatı inkişaf etdirməklə yanaşı, əlbəttə ki, sosial məsələlərin həlli ilə də ciddi məşğuluq. Bu bizim siyasətimizin əsas istiqamətlərindən biri olmuşdur. Bir daha bunu demək istəyirəm ki, biz xalq üçün yaşayırıq, xalq üçün işləyirik ki, Azərbaycan xalqı daha da yaxşı yaşasın. Bunu etmək üçün, əlbəttə ki, keçən beş il ərzində dəfələrlə maaşlar artırılmışdır, minimum əməkhaqqı, minimum pensiyanın səviyyəsi dəfələrlə artırılmışdır. Bunu biz növbəti illərdə də edəcəyik”.

İnsanların həyat səviyyəsinin yüksəldilməsi, yoxsulluq səviyyəsinin minimuma endirilməsi məqsədilə həyata keçirilən tədbirlər içərisində ünvanlı dövlət sosial yardımlarının verilməsi xüsusilə mühüm əhəmiyyət kəsb edir. ÜDSY-nın təyin olunduğu 3 il ərzində Azərbaycanda 800 min nəfərdən çox vətəndaş ünvanlı dövlət sosial yardım alıb. Belə ki, ailəyə 98,19 manat olmaqla hər bir ailə üzvünə 21,56 manat yardım təyin olunmuşdur.

Ünvanlı dövlət sosial yardımı haqqında qanunun həyata keçirildiyi 3 illik müddət ərzində ünvanlı dövlət sosial yardımının təyin edilməsi məqsədilə ehtiyac meyarının həddi 30 manatdan 60 manatadək qaldırılmış və müvafiq qaydalar daha da sadələşdirilmişdir.

Əhalinin aztəminatlı təbəqələri ilə işləyən bir qurum kimi Sabunçu rayon Əhalinin Sosial Müdafiəsi Mərkəzi də möhtərəm Prezidentimizin müvafiq fərman və sərəncamlarından irəli gələn vəzifələrin operativ şəkildə yerinə yetirilməsini təmin edir. İnsanların rahat yaşaması üçün öhdəmizə düşən vəzifələri yerinə yetirməyə çalışırıq. Belə ki, hər dəfə sosial artımların şamil olunduğu kontingent dəqiq şəkildə müəyyənləşdirilir, hər bir müraciətə vaxtında münasibət bildirilir.

Sabunçu rayon üzrə ünvanlı dövlət sosial yardımı 2008-2009-cu illərdə 1667 ailənin 21009 nəfər üzvünə şamil olunmuş, orta hesabla hər ailəyə 97,5 manat vəsait verilmişdir.

Ölkə Prezidentinin fərmanına əsasən 1 sentyabr 2008-ci ildən etibarən sosial müavinətlərin, o cümlədən bir yaşınadək uşağı olan aztəminatlı ailələrə ödənilən müavinətlərin məbləği artırılmışdır. Bu da Sabunçu rayonu üzrə 6000-dən çox ailəyə şamil edilmişdir. Həmçinin, respublikamızın suverenliyi və ərazi bütövlüyü uğrunda döyüşlərdə, cəbhədə olmaqla və ya döyüş əməliyyatları aparılan ölkələrdə beynəlmiləl borcu yerinə yetirməklə bağlı əlil olan 448 nəfər rayon sakininə Prezident təqaüdü təyin edilmişdir. Ümumiyyətlə dövlət rəhbəri tərəfindən aztəminatlı insanların sosial müdafiəsinin gücləndirilməsi üçün atılan addımlar əhali tərəfindən rəğbətlə qarşılanır. Sosial təminat sahəsində həyata keçirilən tədbirlər zamanı heç bir vətəndaş kənarda qalmır. Bu da dövlət başçımızın insanlara göstərdiyi diqqət və qayğının nəticəsidir.

Odur ki, xalq öz rəhbərini sevir, onun sosial-iqtisadi, siyasi kursunu birmənalı şəkildə dəstəkləyir. 2008-ci ilin 15 oktyabr tarixində keçirilən prezident seçkilərinin parlaq nəticələri bir daha bunu təsdiq edir. Hərtərəfli inkişafa dayanıqlı ictimai-siyasi sabitliyə səs verən Azərbaycan xalqı bununla bir daha ümummilli liderimiz tərəfindən başlanan yolun bizi daha böyük qələbələrə apardığına əminliyini ifadə etdi.

Məhərrəm BALAKİŞİYEV,

Sabunçu Rayon Əhalinin Sosial

Müdafiə Mərkəzinin direktoru

Xalq qəzeti.- 2009.- 28 iyun.- S. 6.