Yasamal rayonu inkişaf və tərəqqi yolunda

Azərbaycan Respublikası regionlarının sosial-iqtisadi inkişafı Dövlət Proqramının qarşıya qoyduğu vəzifələrin müvəffəqiyyətlə icra olunması sosial sahədə qarşıda duran problemlərin həlli üçün etibarlı zəmin yaradıb. Son beş ildə ölkəmizin bütün rayon və şəhərlərinin siması tamamilə dəyişmiş, bütün sahələr üzrə sürətli inkişaf yaranmış, beynəlxalq standartlara cavab verən çoxlu sayda yeni müəssisələr açılmışdır. Bunun nəticəsi olaraq 766 min yeni iş yeri açılmış, yoxsulluğun səviyyəsi 49 faizdən 13,2 faizə enmiş, insanların sosial-rifah halı tamamilə dəyişmiş, həyat səviyyəsi xeyli yüksəlmiş, əmək haqları, sosial müavinətlər, pensiyalar, tələbələrin təqaüdləri bir neçə dəfə artırılmış, dövlət büdcəsi 10 dəfədən artıq çoxalmışdır. Bütün bunlar möhtərəm Prezidentimiz İlham Əliyevin düşünülmüş daxili və xarici siyasətinin nəticəsidir.

Bu günlərdə Bakının Yasamal rayonunda keçirilən 2008-ci ilin sosial-iqtisadi inkişafının yekunlarına həsr olunmuş hesabat yığıncağında rayon icra hakimiyyətinin başçısı İbrahim Mehdiyevin çıxışında bütün bunlar öz əksini daha ətraflı tapdı. Hər şeydən əvvəl Yasamal rayonunun sakini kimi gündəlik qarşılaşdığım səliqə-sahman, yenidənqurma, bərpa, abadlıq işləri barədə söhbət açmaq istərdim. Yəqin ki, rayonun digər sakinləri də mənimlə böyük məmnuniyyətlə razılaşarlar. Bakının mərkəzi hesab edilən Yasamal rayonunun üç il əvvəlki görünüşü ilə indiki görünüşü arasında çox böyük fərq var. Bu mənzərə hər birimizin gözləri qarşısındadır. Rayon sakinlərinin ən çox razılıq etdiyi və məmnun qaldıqları məsələlərdən biri onların rayon rəhbərliyi tərəfindən qəbul edilərək diqqətlə dinlənilməsi, qarşılaşdıqları problemlərin dərhal həll edilməsidir. Rayonda insanları ən çox narahat edən işsizlik probleminin aradan qaldırılması üçün ciddi tədbirlər həyata keçirilmiş və son bir il ərzində 2794 yeni iş yerləri açılmışdır. Son beş ildə isə yeni iş yerlərinin sayı 16502 olmuşdur.

Əhalinin problemlərini daha yaxından öyrənmək məqsədi ilə rayon icra hakimiyyətinin başçısı İbrahim Mehdiyev rayonun idarə və müəssisə rəhbərlərinin iştirakı ilə 32 səyyar qəbul keçirmişdir. Həmin qəbullarda 5 min nəfərdən çox rayon sakini iştirak etmiş, onlar tərəfindən 527 müraciət edilmişdir. Bu müraciətlərlə bağlı yerindəcə operativ göstərişlər verilmiş və həmin göstərişlərin icrası ciddi nəzarətə götürülmüşdür. Hesabat məruzəsində bildirildi ki, ümumiyyətlə, rayon sakinlərinə böyük diqqət və qayğı göstərilmiş, rayon icra hakimiyyətinə müraciət edənlər ümidsiz qayıtmamışlar. Son bir il ərzində rayon icra hakimiyyətinə daxil olmuş 3230 müraciət “Vətəndaşların müraciətlərinə baxılması qaydası haqqında” Qanuna müvafiq olaraq baxılmış, mənzil, maddi yardım, torpaq sahəsinin ayrılması, pasport qeydiyyatı, məcburi köçkünlərin problemləri, qəyyumluq və digər vacib məsələlər müsbət həll edilmişdir. İl ərzində 493 nəfər rayon icra hakimiyyəti başçısının qəbuluna gəlmiş, 2038 nəfər isə rayon rəhbərliyi tərəfindən vətəndaşların fərdi qaydada qəbulunun təsdiq olunmuş cədvəlinə uyğun olaraq qəbul edilmişdir.

İ. Mehdiyev qeyd etdi ki, rayon sakinləri ölkənin ictimai-siyasi həyatında fəal iştirak etmiş, dövlət başçımızın demokratik proseslərin inkişafına böyük önəm verməsi, Azərbaycanın Avropaya və dünya birliyinə sürətlə inteqrasiya olunmasında böyük səy göstərməsi insanların gələcəyə olan inamını daha da artırmışdır. Hesabat ilinin ən yaddaqalan siyasi hadisəsi olan 2008-ci il oktyabrın 15-də keçirilmiş Azərbaycan Respublikasına prezident seçkilərində rayon sakinləri böyük mütəşəkkillik nümayiş etdirmiş, ümummilli lider Heydər Əliyev siyasətinə və bu siyasətin ən layiqli davamçısı möhtərəm Prezidentimiz İlham Əliyevə ümid etdiklərini, inandıqlarını və güvəndiklərini bir daha təsdiqləmişlər. Bu seçkilərin nəticələri əyani şəkildə göstərdi ki, təkcə Yasamal rayon sakinləri deyil, bütövlükdə Azərbaycan xalqı möhtərəm Prezidentimizin son beş ildə həyata keçirdiyi siyasəti dəstəkləyir. Əsası ümummilli lider Heydər Əliyev tərəfindən qoyulmuş bu siyasət ictimai-siyasi sabitliyin, sülhün və firavanlığın təmin edilməsinə yönəlib. Xalqın böyük inam bəslədiyi və inandığı möhtərəm Prezidentimizə respublikamızın bütün bölgələrində olduğu kimi, Yasamal rayonunda da seçicilərin mütləq əksəriyyəti səs verərək ona parlaq qələbə qazandırmışdır. Seçicilərin fəallığının artırılmasında rayon icra hakimiyyətinin apardığı məqsədyönlü işlər öz bəhrəsini vermişdir. Azərbaycanda demokratik, azad və ədalətli, şəffaf prezident seçkilərinin keçirilməsi beynəlxalq müşahidəçilər tərəfindən də yüksək qiymətləndirilmişdir. Fakt üçün bildirmək istərdim ki, Yasamal rayonu ərazisində 159 min 424 seçicidən 105 min 87 nəfəri səsvermədə iştirak etmişdir. Seçicilərin 91,98 faizi möhtərəm Prezidentimiz İlham Əliyevə səs vermişdir. Bu parlaq qələbə bir daha təsdiqlədi ki, ümummilli lider Heydər Əliyev siyasətinin, bu siyasətin ən layiqli davamçısı möhtərəm Prezidentimiz İlham Əliyevin alternativi yoxdur. Xalqın ulu öndər Heydər Əliyev siyasi kursuna, bu kursun öyrənilməsinə olan hədsiz istəyi və marağını nəzərə alan rayon rəhbərliyi yüksək tələblərə cavab verən Heydər Əliyev məktəb-muzeyinin tikintisini qısa vaxt ərzində başa çatdırmışdır. Ümummilli liderin əziz xatirəsinin əbədiləşdirilməsi, onun iradəsinin gələcək nəsillərə çatdırılması baxımından böyük əhəmiyyəti olan məktəb-muzeydə Heydər Əliyevin həyat və fəaliyyətinin müxtəlif dövrlərini əks etdirən fotoşəkillər və eksponatlar nümayiş etdirilir. Buradakı kitabxana və kompyuter otaqları gənclərin ulu öndərin zəngin irsindən yararlanmasına kömək edəcək. İ. Mehdiyev böyük fərəh və qürur hissi ilə yığıncaq iştirakçılarının diqqətinə çatdırdı ki, ümummilli lider Heydər Əliyevin adını daşıyan bu məbədgah özünün tikinti-memarlıq üslubu və tərtibatına, tikinti-quraşdırma işlərinin uğurlu konstruktiv həllinə, texniki təchizatına, təqdim edilən məlumat-tematika rəngarəngliyinə görə ictimaiyyətin diqqətini cəlb edib. Artıq rayonun məktəbliləri, yeniyetmə və gəncləri kütləvi surətdə ulu öndər Heydər Əliyev məktəb-muzeyini ziyarətə gəlirlər.

Rayonda aparılan abadlıq və yenidənqurma işləri daim diqqət mərkəzində saxlanılır. Ötən bir il ərzində rayon ərazisində 35 yaşayış məhəlləsində geniş abadlıq işləri aparılmış, nümunəvi həyətlər yaradılaraq sakinlərin istifadəsinə verilmişdir. Bu məhəllələrdə sakinlərin istirahəti üçün zəruri olan hər cür şərait yaradılıb. Günlüklər, oturacaqlar, çoxsaylı müxtəlif uşaq-əyləncə elementləri quraşdırılmış, 540 ədəd ağac, 3900 ədəd dekorativ gül kolları əkilmiş, 2360 kvadratmetr sahədə yaşıllıq zolağı salınmışdır. Vaxtilə Nazim Hikmət küçəsi ilə Mətbuat prospektinin kəsişməsində salınmış sahəsi 1,7 hektar olan və uzun müddət baxımsız qalaraq tamamilə istifadəsiz vəziyyətə düşmüş park xüsusi layihə əsasında müasir səviyyədə yenidən qurulmuşdur. Burada yaraşıqlı fəvvarələr və şəlalələr kompleksi yaradılmış, monumental kürsü üzərində Azərbaycanın dövlət bayrağı ucaldılmışdır. Parkda hər cür hava şəraitinə davamlı 254 oturacaq qoyulmuş, 8,5 min kvadratmetr sahədə çəmənlik salınmış, xarici ölkələrdən gətirilmiş 3500-dən çox müxtəlif ağac və gül kolları əkilmişdir. Qeyd olundu ki, əraziyə yüksək keyfiyyətli mərmər döşənmiş, ən müasir işıqlandırma sistemi və 20 kvadratmetrlik monitor quraşdırılmışdır. Yeni salınmış parkda sakinlərin istirahəti üçün hər cür şərait yaradılmışdır. Ərazinin görkəminə xələl gətirən yaşayış binasının dam örtüyü, fasad hissələrində yenidənqurma və əsaslı təmir işləri aparılmışdır. Rayon ərazisindəki möhtəşəm tikintilərin açılış mərasimində Azərbaycan Prezidenti İlham Əliyevin şəxsən iştirak etməsi rayon sakinlərində fərəh və qürur hissi doğurmuşdur. Bundan sonra rayonda səliqə-sahman, abadlıq işləri daha geniş vüsət almışdır.

Rayon ərazisində qayda-qanuna ciddi riayət olunması, qanunsuz tikililərin, küçə ticarətinin qarşısının alınması istiqamətində ciddi tədbirlər həyata keçirilmişdir. Qeyd edim ki, metronun “20 Yanvar” və “İnşaatçılar” stansiyalarının çıxışlarındakı ərazilərdə uzun illər baş alıb gedən qanunsuz küçə ticarəti metrodan istifadə edən sərnişinlərlə bərabər sakinlərin narazılıqlarına səbəb olmuş, sanitar-gigiyena qaydalarının tələbləri səviyyəsində saxlanılmasına imkan vermirdi. Bu problem də gərgin əmək sayəsində öz həllini tapdı. Bununla yanaşı, rabitə kollecinin yataqxanasının ərazisində sanitar-gigiyenik qaydalara tamamilə zidd olan, epidemioloji cəhətdən təhlükə mənbəyinə çevrilmiş kafe, mağaza, ət köşkləri və mal tövlələri sökülərək ərazi təmizlənmiş, ətrafda səliqə-sahman yaradılmışdır.

İ. Mehdiyev rayonda təhsilin, mədəniyyətin və səhiyyənin inkişafına xüsusi diqqət yetirildiyini qeyd etdi. “Yeniləşən Azərbaycana yeni məktəb” proqramı çərçivəsində yeni məktəb binaları tikilmiş, bir sıra məktəblərdə isə əsaslı təmir işləri aparılmışdır. Şagird sıxlığının aradan qaldırılması və təhsilin keyfiyyətinin yüksəldilməsi məqsədi ilə akademik Zərifə Əliyeva adına məktəbin tikintisi başa çatdırılmış, 60 nömrəli məktəbin binası yenidən tikilmiş, 53 nömrəli məktəbdə 300 şagird yerlik yeni korpus istifadəyə verilmiş, bir neçə orta məktəbdə və uşaq bağçalarında əsaslı təmir və yenidənqurma işləri aparılmışdır. İncəsənət Gimnaziyasına məxsus ərazidə Milli Konservatoriyanın yeni binasının Heydər Əliyev Fondu tərəfindən inşasına başlanılması Fondun prezidenti, Milli Məclisin deputatı, YUNESKO və İSESKO-nun xoşməramlı səfiri Mehriban xanım Əliyevanın təhsilin inkişafına qayğısının təzahürüdür. Bu diqqət və qayğının nəticəsidir ki, 2006-2007-ci tədris ilində rayon məzunlarının 40 faizi tələbə adını qazanmış, 63 nəfər isə 600-dən çox bal toplamışdır. Onlardan 6 nəfəri Azərbaycan Respublikası Prezidentinin təqaüdçüsü sıralarına daxil edilmişdir. 10 müəllim “İlin ən yaxşı müəllimi”, 2 məktəb isə “İlin ən yaxşı məktəbi” nominasiyasının qalibi olmuşdur.

Qeyd edildi ki, hesabat dövründə sənaye müəssisələri tərəfindən 871 milyon 663 manatlıq və ya əvvəlki ilin müvafiq dövrü ilə müqayisədə 1,4 faiz çox sənaye məhsulu istehsal edilmiş və xidmətlər göstərilmişdir. İstehsalın ümumi həcmində məhsul istehsalının payı 66,2 faiz, xidmətlərin payı isə 33,8 faiz təşkil etmişdir. Rayonun iqtisadi və sosial sahələrinin inkişafı üçün bütün maliyyə mənbələrindən əsas kapitala 440 milyon 939 min 400 manat məbləğində investisiya yönəlmişdir ki, bu da ötən illə müqayisədə 2 dəfə çoxdur. Bu, işçilərin sayının artmasına da səbəb olmuşdur. Belə ki, hesabat ili ərzində işçilərin sayı əvvəlki illə müqayisədə 6072 nəfər artaraq 73825 nəfərə çatmışdır. Orta aylıq əmək haqqının səviyyəsi isə əvvəlki ilə nisbətən 25,5 faiz artaraq 336,2 manat olmuşdur. İmkansız ailələrə diqqət və qayğı göstərilməsi də unudulmamışdır. “Ünvanlı dövlət sosial yardımı haqqında” Qanunun tətbiq edilməsi ilə əlaqədar ötən il 3 min 619 ailəyə sosial yardım təyin edilmişdir.

Ötən il ərzində rayonda görülmüş abadlıq və yenidənqurma işlərindən çoxlu faktlar gətirmək olar. Bu işlər yenə də davam etdirilir və əvvəlki illərlə müqayisədə daha sürətlə aparılır. 2009-cu ilin ən mühüm hadisəsi hesab ediləcək 18 mart referendumuna ciddi hazırlıq işləri görülür. Mərkəzi Seçki Komissiyasının təqvim planına uyğun olaraq görülən işlər referendum zamanı seçicilərin mütəşəkkil iştirakına yönəldilib. Ötən seçkilərdə olduğu kimi, 18 mart referendumunun da mütəşəkkil şəkildə keçirilməsi üçün bütün imkanlardan səmərəli istifadə olunur.

Hesabat məruzəsi ətrafında çıxış edən Bakı Metropoliteninin rəisi Tağı Əhmədov, YAP Yasamal rayon təşkilatının sədri professor Fikrət İsmayılov, rayon prokuroru Həsrət Pirməmmədov, Dövlət Pedaqoji Kollecinin direktoru, professor Nurlana Əliyeva, Azərbaycan İctimai-Siyasi Universitetinin rektoru, professor Rasim Nəbiyev, Rayon Mənzil-Kommunal Təsərrüfatı Birliyinin rəisi Akif Hacıyev və professor İzzət Rüstəmov rayonda görülmüş işləri yüksək qiymətləndirdilər.

Azərbaycan Respublikası Prezidentinin İcra Aparatının regional idarəetmə və yerli özünüidarəetmə orqanları ilə iş şöbəsinin baş məsləhətçisi Tağı Tağıyev yığıncaqda çıxış edərək son illər respublikamızda görülən işlərdən, dövlət başçımızın bu sahədəki gərgin əməyindən söhbət açdı.

Sonda Yasamal Rayon İcra Hakimiyyəti Başçısı Aparatının şöbə müdiri Rafiq Həmidov yığıncağın qərar layihəsini oxudu.

Əliqismət BƏDƏLOV

Xalq qəzeti.-2009.-3 mart.-S.5.