“Bank Standard”ın “Premier” əmanəti: fərqli münasibət, xüsusi xidmət

Vətəndaşların sərbəst vəsaitlərinin cəlb edilməsi istiqamətində Azərbaycan bankları arasında rəqabət getdikcə güclənir. Əhalidən yeni vəsaitlər cəlb etmək üçün banklar təklif etdikləri depozit məhsullarının şərtlərini daha cəlbedici etmək, xidmətin keyfiyyətini yüksəltmək, nəhayət, müxtəlif təşviqedici kampaniyalar keçirməklə mövcud və potensial müştərilərin diqqətini cəlb etməyə çalışırlar. Ölkənin özəl bank sektorunun lideri “Bank Standard” son zamanlar bu istiqamətdə atdığı addımları ilə seçilir. Ötən ilin sonundan etibarən təqdim olunan yeni “Premier” əmanəti bankın depozit portfelinin inkişafına yönəldilmiş tədbirlərin əsas tərkib hissəsidir. “Premier” depozitinin şərtləri və fərqləndirici xüsusiyyətləri haqqında “Bank Standard”ın idarə heyətinin sədri Səlim Kriman “Xalq qəzeti”nin suallarına cavab verir:

– Əvvəlcə “Premier” depoziti haqqında ümumi məlumat verməyiniz xahiş olunur.

– “Premier” depoziti “Bank Standard”ın depozit məhsulları arasında həm faiz dərəcələri, həm də digər şərtləri ilə fərqlənir. Bu əmanət 3 aydan 3 ilədək yerləşdirilə bilər. Faiz dərəcələri isə valyuta növündən, habelə müştərinin seçdiyi müqavilə müddətindən asılı olaraq 16,5%- dək dəyişir. Müxtəlif banklar tərəfindən yerli maliyyə bazarında təklif olunan depozit məhsullarının faiz dərəcələri ilə müqayisədə bu, həqiqətən yüksək və müştəri üçün çox sərfəli faiz dərəcəsidir. Bundan bəhs edərkən həm də “Bank Standard”ın nüfuzu və etibarı kimi mühüm amili unutmaq olmaz.

“Premier” əmanət hesabı Azərbaycan manatı, ABŞ dolları və Avro valyutalarında açıla bilər. “Premier” hesabı bu valyutalardan birindən azı 10 000 şərti vahid məbləğı ilə açılır. Faiz gəliri hər ay müştərinin seçimindən asılı olaraq ona ödənilə, ya da əsas məbləğin üstünə əlavə edilə bilər. Bank dilində buna “kapitallaşdırma”, xalq dilində isə bəzən “faizə faiz” deyirlər.

Bunlarla yanaşı “Premier”in digər depozitlərdə olmayan elə xüsusiyyətləri var ki, “azaldılmaz qalıq” bunların başlıcasıdır. Söhbət müqavilə müddəti ərzində hesabda qorunub saxlanması vacib olan minimal qalıqdan gedir. İlk baxışda məhdudiyyət kimi gözə görünən bu şərt əslində hesab sahibinə əla imkanlar və geniş fəaliyyət azadlığı verir. “Premier” sahibi azaldılmaz qalığı qoruyub saxlamaq şərtilə istədiyi vaxt hesabdan istədiyi məbləğdə pul vəsaiti götürə bilər. Mühüm cəhət ondan ibarətdir ki, hesabda o ana qədər yığılmış faiz gəliri toxunulmaz qalır. Digər tərəfdən isə, müştəri istədiyi vaxt “Premier” hesabına pul artıra bilər. Buna heç bir məhdudiyyət qoyulmur.

– Bu barədə bir az ətraflı danışa bilərsinizmi?

– Ən yaxşısı bir misalla onu təhlil edək. Tutaq ki, sizin 70 000 manat məbləğində pul vəsaitiniz var. Siz bu vəsaitlə “Premier” depoziti açmaq istəyirsiniz. Əvvəlcə müqavilə müddətini seçməlisiniz. Deyək ki, məlum səbəblərdən sizi qane edən 18 aylıq müddətdir. Adətən faiz gəlirini müəyyən etmək üçün bu kifayət edir. Amma “Premier” depozitini açmaq üçün əlavə olaraq sizə uyğun olan “azaldılmaz qalıq” seçməlisiniz, 10 min, ya da 50 min manat məbləğində. Müvafiq olaraq hesabınızın faiz gəliri 13,5, ya da 14,5% təşkil edəcək. Burada hər şey aydındır: daha yüksək azaldılmaz qalıq daha yüksək gəlir gətirir. Bundan əlavə, əgər müştəri qoyduğu məbləği və ona hesablanan faizləri 3 il ərzində hesabda saxlasa, onda aylıq kapitallaşma ilə onun illik faiz gəliri əmanət müddətinin sonuna 21,17% təşkil edəcək.

– Azaldılmaz qalıq nə kimi üstünlüklər verir?

– Təhlil etdiyimiz misalda hesabınızda 70 min manat vəsait var. 10 min manatlıq azaldılmaz qalıq o deməkdir ki, hesabınızda bu məbləği mühafizə etmək şərtilə siz qalan 60 min manatı istədiyiniz vaxt hesabdan götürə bilərsiniz. Belə halda o vaxta qədər faktiki olaraq yığılmış faiz gəliri sizə qalır və “Bank Standard” sizin hesabınıza qarşı heç bir cərimə sanksiyası tətbiq etmir. Bu isə çox böyük sərbəstlik deməkdir. Azaldılmaz qalıq məbləğini 50 min manat həddində müəyyən etdikdə siz daha az miqdarda məbləği hesabdan cəriməsiz götürmək imkanı müqabilində daha yüksək faiz gəliri əldə edirsiniz. Seçim sizindir!

– “Premier” depoziti yüksək gəlirli insanlar üçündürmü?

– “Orta və yüksək gəlirli” desək daha doğru olar. Üstəlik, bu məhsulun bir də regionlar üçün nəzərdə tutulmuş növü var. Bakıda regionlara nisbətən gəlir səviyyəsinin daha yüksək olduğunu nəzərə alaraq ölkənin digər şəhərlərində “Premier” məhsulunun limitini 5 min şərti vahid kimi müəyyənləşdirib azaldılmaz qalıqları müvafiq olaraq 5 və 25 min şərti vahid səviyyəsinə endirmişik. Faiz dərəcələri isə dəyişməz qalır.

– Bu yaxınlarda “Premier” sahibləri üçün şəxsi menecerin ayrılması barədə elan edilib.

– Bu müştəri xidmətlərini təkmilləşdirmək və onun keyfiyyətini artırmaq üçün “Bank Standard” tərəfindən atılmış bir addımdır. “Premier” depozitini seçməyimiz isə heç də təsadüfi deyil. “Premier” depoziti fərqli olmaq istəyən, fərdi xidmət arzusunda olan müştərilər üçün nəzərdə tutulub.

“Premier” sahibləri şəxsi menecer tərəfindən ayrılmış xüsusi bölmədə növbədənkənar qəbul edilirlər. Müştərilər öz şəxsi menecerləri ilə istənilən vaxt mobil telefonla əlaqə qurub tələblərini çatdıra bilərlər. Eyni zamanda, şəxsi menecerlər “Premier” sahiblərinə onların diqqətini cəlb edə biləcək bütün məlumatları çatdıracaqlar.

Hələlik şəxsi menecer xidməti yalnız baş ofisdə göstərilir. Yaxın gələcəkdə bu xidmət müxtəlif filiallarda da göstəriləcək.

– “Premier” depoziti öz sahiblərinə daha nə vəd edir?

– “Premier” sahiblərinə pulsuz “VISA Gold” və ya “MasterCard Gold” kartı təqdim olunur. Bundan əlavə, “Premierçi” müştərilərimiz hesablarındakı məbləğin 80%-inə qədər həcmində kredit xətti əldə etmək imkanına malikdirlər.

İlin sonuna kimi “Premier” depoziti sahiblərinə təqdim olunan əlavə xidmət paketinin genişləndirilməsi planlaşdırılır. Bu, əsasən depozit sahiblərinə imtiyazlı xidmət göstərilməsi ilə bağlıdır. Planlarımızda “Premierçi”lər arasında uduşlu aksiyaların keçirilməsi də var.

“Premier” depoziti haqqında ətraflı şəkildə həftənin bütün günləri 24 saat xidmət göstərən zəng mərkəzinin 497 20 90 nömrəli telefonundan, ya da www.premier.az saytından öyrənmək olar.

Səlim Kriman.

Xalq qəzeti.-20090.-3 mart.-S.8.