Cəlilabad: Tərəqqinin yeni mərhələsinə kecid ücün etibarlı zəmin yaradılıb

Muğan düzündə, Mişarçayın sahilində yerləşən Cəlilabad şəhərinin səliqə-sahmanı hələ Ələt-Astara magistral yolundan nəzərə çarpır. Buradan bir qədər irəli gedib sağa dönür və alaqapıdan keçib Heydər Əliyev prospekti ilə şəhərə daxil olursan. Rənglənmiş barılar, abad həyətlər, yeni tikilmiş inzibati binalar diqqət çəkir. Mərkəzə yaxınlaşanda daha böyük abadlıq-quruculuq işləri göz önündə sərgilənir.

Ötən ilin sentyabrında Cəlilabada gələn Prezident İlham Əliyev rayonun sosial-iqtisadi inkişafından razılığını bildirib: “...Burada işlər böyük zövqlə, səliqə ilə aparılır. Biz görürük ki, bu parklar, burada əkilən ağaclar necə gözəldir. Bu, xüsusi diqqət tələb edir və mən çox şadam ki, burada yerli rəhbərlik də çox fəal işləyir. Əslində, bizim uğurlarımızın səbəbi bundadır”. Dövlətimizin başçısı bildirib ki, Cəlilabadın simasında Azərbaycanda son illərdə gedən işlərin nəticələri görünür. Görülmüş işlər isə çoxdur. İllik hesabat yığıncağında bu barədə maraqlı bir video-film nümayiş etdirildi. Ondan öncə isə əsaslı təmir edilmiş mədəniyyət evinin geniş foyesində rayonda istehsal olunan kənd təsərrüfatı məhsullarının, uşaqların əl işlərinin sərgisi böyük maraq doğurdu. Burada təhsil, idman, mədəniyyət sahələrində qazanılan uğurlara da geniş yer verilmişdi. Hər şeydən görünürdü ki, 2008-ci il Cəlilabadda uğurlu işlərlə əlamətdar olub.

Rayon icra hakimiyyətinin başçısı Əziz Əzizov əhatəli hesabat məruzəsində ötən il ölkə üzrə nəzərdə tutulmuş bütün proqramların uğurla icra edildiyini, o cümlədən Cəlilabadda böyük irəliləyişə nail olunduğunu faktlarla əsaslandırdı. Beş ildə rayonda kənd təsərrüfatı məhsulları istehsalının 4,6 dəfə artması, ötən il 152,4 min ton taxıl, 1792 ton üzüm, 112,2 min ton kartof, ümumilikdə 120,2 milyon manatlıq məhsul əldə edilməsi aqrar sahənin sürətli inkişafını göstərir.

Cəlilabadda sənaye istehsalı da artan dinamika ilə gedib. Ümumi daxili məhsulun həcmi 2003-cü ilə nisbətən 1,5 dəfə, əvvəlki illə müqayisədə 17,7 faiz artaraq 330 milyon manata çatıb. Sənaye məhsulunun həcmi isə 2,1 milyon manatlıq olub ki, bu da beş il əvvəlkindən 3,5 dəfə çoxdur. Beş ildə 57 istehsal və 383 xidmət obyekti istifadəyə verilib.

Rayonda tikinti-təmir işləri geniş vüsət alıb. Keçən il rayon maliyyə idarəsi, DSMF rayon şöbəsi, “Bank Respublika”nın filialı, “Kred-Aqro” qeyri-bank kredit təşkilatı üçün inzibati binalar, Günəşli kəndində 480, Xəlilabad kəndində 360 və Qarakazımlı kəndində 240 şagird yerlik məktəb binaları tikilərək istifadəyə verilib. Bundan başqa, 3 dairə seçki komissiyasının inzibati binaları, oftalmoloji xəstəxana və 4 saylı orta məktəb əsaslı təmir olunub. Üç kilometrlik Heydər Əliyev prospekti genişləndirilib və yenidən asfaltlaşdırılıb, yeddi küçəyə çınqıl döşənib, iki küçədə müasir işıqlandırma sistemi qurulub. İl ərzində 19 kilometrlik Cəlilabad-Soltankənd yolunun təmiri başa çatdırılıb, 21 kilometrlik Qarazəncir-Dərəli yolunun dörddə-biri əsaslı təmir edilib.

Əziz Əzizov daha sonra bildirdi ki, Prezident İlham Əliyev 2007-ci ilin aprelində Cəlilabada səfəri zamanı Cəlilabad-Yardımlı yolunun çəkilməsi barədə Nəqliyyat Nazirliyinə göstəriş vermişdi. Həmin tapşırığa əsasən yolun layihə-smeta sənədləri hazırlanıb və Cəlilabadın Sərhədabad kəndinədək olan 7 kilometrlik hissəsinə yüksək keyfiyyətli asfalt döşənib. Bu il yolun çəkilişi davam etdiriləcək. Cəlilabad rayonu üzrə 40, Yardımlı rayonu üzrə isə 25 kəndi birləşdirən həmin yolun istifadəyə verilməsi nəticəsində nəqliyyat xidmətinin səviyyəsi yüksələcək və əhalinin rahatlığı təmin olunacaq. Dövlətimizin başçısı ötən il sentyabrın 7-də rayona səfəri zamanı bu məsələnin mühüm önəm daşıdığını vurğulayıb: “Cəlilabad-Yardımlı yolu tikilib qurtardıqdan sonra kəndlərdə yaşayan insanların həyat səviyyəsi xeyli dərəcədə yaxşılaşacaq, mərkəzi yollarla əlaqə yaxşılaşacaqdır. Bu kəndlərə daha çox insanlar gedib iş görəcəklər. Müxtəlif biznes imkanları yaranacaqdır”.

Dövlətimizin başçısı Cəlilabad şəhərində Heydər Əliyev muzeyinin və yeraltı keçidin açılışında iştirak edib. Heydər Əliyev seyrəngahı və akademik Zərifə Əliyeva adına şəhər orta məktəbi ilə tanış olub. Olimpiya-idman kompleksində və müalicə-diaqnostika mərkəzində tikintinin gedişi ilə maraqlanıb. Cənab İlham Əliyev rayon ictimaiyyətinin nümayəndələri ilə görüşü zamanı Cəlilabadda həyata keçirilən tədbirləri yüksək qiymətləndirib... Bütün bunların hesabat məruzəsində yer alması təbii bir qürur və məmnunluq hisslərindən irəli gəlir. Məruzəçi qeyd etdi ki, ölkə başçısının işimizə verdiyi yüksək qiymət bizi yeni uğurlara ruhlandırmaqla yanaşı, məsuliyyət hissimizi də qat-qat artırıb.

Hazırda Cəlilabad şəhərində hər biri 260 yerlik iki məktəb binası, əlil və şəhid ailələri üçün 16 və 32 mənzilli iki yaşayış binası, əhalinin sosial müdafiə mərkəzi, Daşınmaz Əmlakın Dövlət Reyestri Xidmətinin rayon şöbəsi üçün inzibati binalar, Gənclər istirahət zonası tikilir. Rayon mərkəzinin və digər yaşayış məntəqələrinin memarlıq görünüşünə xələl gətirən tikililərin sökülməsi və ya müasir üslubda təmir olunması davam etdirilir. Əsas küçələrdəki bütün bəsit obyektlər sökülüb, 24 kommunal binanın dam örtüyü və pəncərələri dəyişdirilib, divarları suvanıb.

Cəlilabadda yeni obyektlərin tikilməsi hesabına yüzlərlə işsizin məşğulluğu təmin edilib. Regionların sosial-iqtisadi inkişafı üzrə Dövlət Proqramının və əlavə tədbirlərin yerinə yetirilməsi nəticəsində beş il ərzində 22192, o cümlədən ötən il 1620 iş yeri açılıb. Rayon üzrə ümumi məhsul buraxılışında qeyri-dövlət bölməsinin xüsusi çəkisi 98 faizə çatıb. Şəhərdə 6 saylı ərazi vergilər idarəsinin kompyuter mərkəzi istifadəyə verilib. Şübhə yoxdur ki, hazırlanmaqda olan “2009-2015-ci illər üçün sahibkarlığın inkişafı Dövlət Proqramı” iş adamlarına daha geniş perspektivlər yaradacaq. Bank filialları tərəfindən ötən il sahibkarlara 14,5 milyon manatlıq kredit verilib ki, bu da əvvəlki ildəkindən xeyli çoxdur. Yeni tikilən bank filiallarının fəaliyyətə başlaması ilə iş adamlarının kredit götürmək imkanları daha da artacaq.

Cəlilabad rayonunun rəhbərliyi təhsilin inkişafına kömək etməyi daim diqqətdə saxlayır. Burada yeni məktəb və sinif otaqlarının tikintisi, mövcud təhsil ocaqlarının təmiri, məktəblərin maddi-texniki bazasının möhkəmləndirilməsi prioritet vəzifə sayılır. Son beş ildə regional inkişaf proqramı və Heydər Əliyev Fondunun təşəbbüsü ilə bu sahədə əhəmiyyətli işlər görülüb. Əgər 1980-2002-ci illərdə Cəlilabadda cəmi 8 məktəb inşa edilmişdisə, 2003-cü ildən sonrakı beş ildə 23 məktəb tikilib. Ötən il ali məktəblərə sənəd vermiş 630 abituriyentdən 162-si tələbə adı qazanıb ki, onların da 32-si 500-dən yuxarı bal toplaya bilib. Hər iki göstərici əvvəlki ildəkindən yüksəkdir. Bu, təhsil işçilərinin səmərəli fəaliyyətinin real yekunudur. İndi Cəlilabadda hər 33 şagirdə bir kompyuter düşür, ümumi təhsil sistemi şəbəkəsində yeni informasiya mühiti formalaşıb. Bəzi müəllimlər dövlət mükafatlarına və fəxri adlara layiq görülüb.

Səhiyyə, mədəniyyət, gənclərlə iş və idman sahələrində əldə edilən nailiyyətlərdən danışan məruzəçi bu sahələrin həlli vacib vəzifələrini də diqqətə çatdırdı. Əhalinin sosial müdafiəsi məqsədilə atılan addımların əhəmiyyətini xüsusi qeyd etdi. Fikrini konkret faktlarla əsaslandıran Əziz Əzizov uğurların başlıca səbəbi kimi ölkənin artan iqtisadi qüdrətinə və onun sosialyönümlü olmasına istinad elədi.

Əhalinin işıq, qaz və su təchizatı, rabitə xidmətinin səviyyəsi də ötən il yüksəlib. Hazırda Cəlilabad şəhər ATS-i tam elektronlaşdırılıb. Bələdiyyələrlə iş təkmilləşib, onlar kəndlərin sosial-iqtisadi inkişafı, abadlıq-quruculuq və yerli əhəmiyyətli digər məsələlərin həllində fəallıq göstəriblər. Kənd yollarının təmiri, su xətlərinin çəkilməsi sahəsində bələdiyyələr işgüzarlıqlarını artırıblar. Məruzə ətrafında müzakirələr də maraqı keçdi. Natiqlər çalışdıqları sahələrin uğurlarından bəhs etdilər, çatdıra bilmədikləri bəzi işlərlə bağlı çətinlikləri açıqladılar, təkliflər verdilər. Onların hər biri ölkə rəhbərliyinin Cəlilabada xüsusi münasibətindən, Prezident İlham Əliyevin rayona diqqət və qayğısından razılıqla danışdı.

Yığıncaqda iştirak edən Milli Məclisin deputatları Mirkazım Kazımov və Aydın Həsənov, eləcə də Prezidentin İcra Aparatının məsul işçisi Mikayıl Hüseynov Cəlilabadda başlanan və uğurla davam edən abadlıq-quruculuq yürüşünü təqdir etdilər, əhalinin həyat şəraitinin yaxşılaşmasına xidmət edən tədbirlərin ardıcıl icrasını alqışladılar. Onlar eyni zamanda tərəqqinin yeni mərhələsində — qarşıdakı dövrdə həyata keçirilməli olan mühüm siyasi, sosial-iqtisadi, ictimai-mədəni tədbirləri nəzərə çatdırdılar, ölkə rəhbərliyinin daxili siyasətinin ən müxtəlif istiqamətləri barədə fikirlərini yığıncaq iştirakçıları ilə bölüşdülər.

Tədbirin sonunda Azərbaycan Prezidenti İlham Əliyevə müraciət qəbul edildi. Cəlilabadlıların bundan sonra da ölkəmizin inkişafı naminə var qüvvə ilə çalışmaq əzmində olduqları müraciətin əsas leytmotivi kimi vurğulandı.

NƏCƏFXANLI Əli

Xalq qəzeti.-2009.-4 mart.-S.7.