5 mart Bədən Tərbiyəsi və İdman Günüdür

Azərbaycan gənclik, gözəllik və sağlamlıq bayramını qeyd edir

Azərbaycan bədən tərbiyəçiləri və idmançıları, bütün idman ictimaiyyətimiz öz bayramlarını — Bədən Tərbiyəsi və İdman Gününü yüksək fəallıq şəraitində qeyd edirlər. Əhalinin asudə vaxtının təşkilində, gənc nəslin sağlam və gümrah böyüməsində, onların hərbi-vətənpərvərlik tərbiyəsində, fiziki hazırlığında, nəcib keyfiyyətlərə yiyələnməsində mühüm rol oynayan insan həyatının bu ayrılmaz tərkib hissəsi ölkəmizdə əsl inkişaf yolundadır. Dünya və Avropa çempionatlarında, Olimpiya və Paralimpiya oyunlarında, digər mötəbər yarışlarda qazanılan qələbə və medallar, respublikamızın müxtəlif bölgələrində ucaldılan bir-birindən yaraşıqlı olimpiya idman kompleksləri beynəlxalq dairələrdə də yekdilliklə etiraf olunduğu kimi, Azərbaycanı gündən-günə çiçəklənən və möhkəmlənən bir idman ölkəsinə çevirmişdir.

Bu isə təsadüfi deyil. Ölkəmizdə bədən tərbiyəsi və idman dövlətin, şəxsən Azərbaycan Prezidenti, Milli Olimpiya Komitəsinin rəhbəri cənab İlham Əliyevin gündəlik nəzarəti və daimi qayğısı ilə əhatə olunmuşdur. Bədən Tərbiyəsi və İdman Gününün təsis edilməsi də bu qayğının parlaq təzahürüdür. Sağlamlığın qorunması və möhkəmlənməsində, gənclərin fiziki inkişafında, ölkənin idman şərəfinin beynəlxalq aləmdə daha da uca tutulmasında bədən tərbiyəsinin əhəmiyyəti və rolunu nəzərə alan Azərbaycan Respublikasının Prezidenti İlham Əliyevin 2005-ci il 4 mart tarixli sərəncamı ilə hər il martın 5-i Azərbaycan Respublikasında “Bədən Tərbiyəsi və İdman Günü” kimi qeyd olunur. 5 mart Azərbaycan idmanı üçün xüsusilə əlamətdar bir gündür. 1995-ci il martın 5-də Azərbaycan Respublikasının Prezidenti Heydər Əliyevin imzaladığı fərmana əsasən əhali arasında sağlam həyat tərzinin təbliği, bədən tərbiyəsinin maddi-texniki bazasının möhkəmləndirilməsi, bu sahədə ümumxalq yardımının təşkil olunması məqsədilə gənclərin idmana marağını artırmaq və Azərbaycan idmanının beynəlxalq miqyasa çıxmasına real zəmin yaratmaq üçün Azərbaycan Prezidenti yanında İdman Fondu yaradılmışdır.

İdmanımızın bu bayram günündə ötən bir ildə keçilmiş yola nəzər salmalı olsaq, şübhəsiz, ilk növbədə XXIX Yay Olimpiya Oyunları yada düşər. Azərbaycan idmanının ən yaxşı nümayəndələrinin Pekinin olimpiya meydanlarında göstərdikləri möhkəm iradə, əsl qələbə əzmi, cüdoçu Elnur Məmmədlinin Olimpiadanın çempionu kimi fəxri kürsünün ən yüksək pilləsində təbrikləri qəbul etməsi, yunan-Roma güləşi ustaları Rövşən Bayramovla Vitali Rəhimovun gümüş mükafatları, Şahin İmranov (boks), Mövlud Mirəliyev (cüdo), Mariya Stadnik (qadın güləşi) və Xetaq Qazyumovun (sərbəst güləş) bürünc medalları Azərbaycanda idmanın inkişafı sahəsində aparılan müntəzəm və məqsədyönlü işlərin bəhrəsi idi. Olimpiadadan sonra yenə Çin Xalq Respublikasının paytaxtında keçirilən XIII Paralimpiya Oyunlarından təmsilçilərimizin vətənə gətirdikləri on medal, o cümlədən cüdoçu İlham Zəkiyevlə yadro itələyən Oluxan Musayevin qızıl müvəffəqiyyətləri idmanımız, bütün xalqımız üçün olduqca əlamətdar hadisəyə çevrildi. Bu uğurlar respublikamızın beynəlxalq aləmdə nüfuzunu daha da artırdı.

Azərbaycanda gümrahlıq və sağlamlıq məşğələləri, öz qələbələri ilə xalqımıza böyük sevinc bəxş edən idmançılarımızın ustalığının daha da artırılması daim diqqət mərkəzindədir. Onlara ən yaxşı şərait yaradılması məqsədilə paytaxt Bakı ilə yanaşı, digər şəhər və rayonlarımızda da inşa edilən olimpiya idman komplekslərində təcrübəli mütəxəssislərin rəhbərliyi altında aparılan gərgin məşqlər böyük yarışlarda sanballı qələbələr qazanılmasında başlıca şərtdir. Bu gün belə komplekslər Bakı və Gəncədə, Naxçıvan və Lənkəranda, Şəki və Qubada, Qazax və Masallıda, respublikamızın digər bölgələrində gənclərin sevimli istirahət yerinə çevrilmişdir. Yaxın vaxtlarda olimpiya komlpekslərinin, müasir idman bazalarının sayı daha da artacaqdır. Onlar Azərbaycanın hər yerində idmanın inkişafına güclü təkan verir.

Bu yaxınlarda Prezident İlham Əliyevin qəbulunda olmuş Kikboksinq Təşkilatları Dünya Assosiasiyasının prezidenti Ennio Falsonini də dövlət başçımızla söhbət zamanı ölkəmizin beynəlxalq idman aləmində artan nüfuzundan danışarkən Azərbaycanda idmanın inkişafı üçün hər cür şərait yaradıldığını xüsusi vurğulamışdır.

Mingəçevirdə inşa edilən “Kür” Olimpiya tədris-idman mərkəzi də idmançılarımıza gözəl töhfə olacaqdır. Prezident İlham Əliyev martın 3-də Mingəçevirə səfəri zamanı həmin mərkəzlə tanış olarkən gənclər və idman naziri Azad Rəhimovun dövlət başçımıza bildirdiyi kimi, burada Avropada, o cümlədən MDB məkanında bənzəri olmayan avarçəkmə bazası yaradılacaqdır.

Azərbaycanın idman ictimaiyyəti öz bayramını — Bədən Tərbiyəsi və İdman Gününü idmanımıza göstərilən böyük qayğı şəraitində qeyd edir.

BAYRAMOV, Oqtay

Xalq qəzeti.-2009.-5 mart.-S.7.