Vətənin təhlükəsizliyini qorumaq çox şərəfli işdir

Milli təhlükəsizlik orqanlarının yaranmasının 90 illik yubileyi — milli təhlükəsizlik orqanları işçilərinin peşə bayramı günü münasibəti ilə Yasamal rayonunda keçirilən tədbir rayon icra hakimiyyətində ulu öndər Heydər Əliyevin büstünün önünə əklil qoymaqla başlandı.

Tədbiri giriş sözü ilə Yasamal Rayon İcra Hakimiyyətinin başçısı İbrahim Mehdiyev açdı.

Dövlət himni səsləndirildikdən sonra İ. Mehdiyev sözünə davam edərək dedi ki, Azərbaycanın dövlət müstəqilliyini təmin edən, xalqımızın təhlükəsizliyinin qorunmasında, ölkədə ədalətin və qanunçuluğun təmin edilməsində xüsusi yeri olan milli təhlükəsizlik orqanlarının yaranmasının 90 ili tamam olur. Yubiley münasibətilə milli təhlükəsizlik orqanlarında çalışan bütün əməkdaşları təbrik edən başçı dedi ki, Azərbaycan xalqı zaman-zaman özünün müstəqilliyinə, istiqlalına, təhlükəsizliyinə doğru irəliləyərək, çətin yol keçmişdir. Bu yol çox böyük faciələrdən keçsə də, qürur duyulacaq qədər şərəflidir. 28 mart 1919-cu ildə Azərbaycan Demokratik Respublikası dövründə Hərbi Nazirliyin Baş Qərargahının kəşfiyyat və əks-kəşfiyyat bölməsi ilə əsası qoyulan və 6 mart 1920-ci ilə qədər mövcud olan Azərbaycan Təhlükəsizlik Orqanları bir də 72 ildən sonra müstəqil dövlətin təhlükəsizlik orqanı kimi fəaliyyət göstərməyə başladı.

1991-ci il noyabrın 1-də Azərbaycan Dövlət Təhlükəsizliyi Komitəsinin maddi-texniki və kadr bazası əsasında Azərbaycan Respublikası Milli Təhlükəsizlik Nazirliyi təsis olundu. Ömrünün 25 ilini təhlükəsizlik orqanlarında işləmiş və işlədiyi müddətdə xalqına şərəflə, əzmkarlıqla xidmət etmiş ulu öndərimiz Heydər Əliyevin müstəqil Azərbaycanın xüsusi xidmət orqanlarının fəaliyyətinin müasir dövrün tələblərinə uyğunlaşdırılmasında və inkişafında da böyük və əvəzsiz xidmətləri olmuşdur. Böyük və mənalı ömrünü xalqına, Azərbaycanın möhkəmlənməsinə və yüksəlməsinə həsr etmiş Heydər Əliyev daim milli təhlükəsizlik orqanlarının fəaliyyətinə xüsusi fikir verildi. Respublika və ittifaq rəhbərliyində çalışdığı müddətdə belə Azərbaycanın xüsusi xidmət orqanlarının fəaliyyətini daim diqqətdə saxlamış, öz qayğısını bu qurumdan əsirgəməmişdir. Ümummilli lider bütün fəaliyyəti boyu bu orqana doğma münasibət göstərmiş, onun uğuruna sevinmiş, problem və çətinliklərinə biganə qalmamışdır.

İ. Mehdiyevin təklifi ilə ulu öndərimiz Heydər Əliyevin əziz xatirəsi bir dəqiqəlik sükutla yad edildi. Başçı sözünə davam edərək dedi ki, bu il mart ayının 28-də Azərbaycan milli təhlükəsizlik orqanlarının yaranmasının 90 illik yubileyidir. Bu tarixin milli təhlükəsizlik orqanları əməkdaşları tərəfindən peşə bayramı kimi qeyd edilməsi Azərbaycan xalqının ümummilli lideri Heydər Əliyevin adı ilə bağlıdır.

Ümummilli liderimiz Heydər Əliyevin siyasi kursunun layiqli davamçısı, möhtərəm Prezidentimiz cənab İlham Əliyev milli maraqların, Azərbaycanda sabitliyin, dövlət müstəqilliyinin əbədiliyinin və dönməzliyinin qorunmasında milli təhlükəsizlik orqanlarının fəaliyyətini daim yüksək qiymətləndirib. Əməkdaşların sosial müdafiəsinin gücləndirilməsi, iş şəraitinin yaxşılaşdırılması, maddi-texniki bazasının möhkəmləndirilməsi, əmək haqları və hərbi rütbəyə görə maaş artımı və sair vacib məsələlərin həlli ölkə başçısının göstərdiyi xüsusi qayğının nəticəsidir.

İ.Mehdiyev rayonda görülən işlərdə, keçirilən tədbirlərdə, qazanılan müvəffəqiyyətlərdə Milli Təhlükəsizlik Nazirliyinin Yasamal rayon idarəsinin əməkdaşlarının da əməyi olduğunu diqqətə çatdırdı. Qeyd etdi ki, idarənin rəisi Mütəllim Usubov rayonda əmin-amanlığın qorunması, dövlətçiliyimizin daha da möhkəmləndirilməsi sahəsində yorulmadan çalışır. Fərəhli haldır ki, milli təhlükəsizlik orqanları işçilərinin ötən peşə bayramı ərəfəsində MTN-nin Yasamal rayon idarəsi yeni inşa edilmiş binaya köçərək iş şəraitlərini daha da yaxşılaşdırmışdır. O, əminliklə bildirdi ki, milli təhlükəsizlik orqanlarının əməkdaşları bundan sonra da Azərbaycanın dövlət maraqlarının qorunmasında, dövlətçiliyin, dövlət müstəqilliyinin möhkəmləndirilməsində fəal rol oynayacaqdır. Bu işdə milli təhlükəsizlik orqanlarının hər bir əməkdaşına yeni-yeni uğurlar arzuladı.

Sonra çıxış üçün söz MTN Yasamal rayon idarəsinin rəisi Mütəllim Usubova verildi.

O dedi ki, təhlükəsizlik bəşəriyyətin inkişafını şərtləndirən strateji sahədir. Tarixin bütün dövrlərində təhlükəsizliyin təminatı məsələsi aktual olmuş, cəmiyyətin iqtisadi, ictimai-siyasi inkişaf səviyyəsinə uyğun olaraq müəyyən təkamül yolu keçmiş, müasir vəziyyətə çatmışdır. Təhlükəsizlik orqanlarının tarixi ayrı-ayrı xalqların və dövlətlərin keçdiyi tarixi inkişaf yolu ilə sıx bağlı olduğundan bunun öyrənilməsi olduqca vacib bir məsələdir. Bu sahənin tədqiqinin zəruriliyini şərtləndirən amillərdən biri də xalqların tarixinin mükəmməl və hərtərəfli öyrənilməsi ilə bağlıdır. Problem Azərbaycan üçün xüsusilə əhəmiyyətlidir. Çünki sovet dövründə təhlükəsizlik orqanlarının fəaliyyəti ictimaiyyətdən qapalı saxlanılıb.

Natiq bildirdi ki, xüsusi xidmət orqanları yalnız aid olduğu dövlətin və xalqın deyil, məsələyə qlobal yanaşılarsa, bəşəriyyətin təhlükəsizliyi üçün məsuliyyət daşıyır. Təhlükəsizlik orqanlarında çalışan hər bir əməkdaşla yanaşı, cəmiyyətin hər bir üzvünün dünyanın təhülkəsizliyinin təmin edilməsində öz məsuliyyətini dərk etməsi və ayıq olması zəruridir.

Bugünkü beynəlxalq terrorizmə qarşı birgə mübarizə ehtiyacı da bunu təsdiq edir.Təhlükəsizliyin təminatında dövlətlərin rolu müstəsna əhəmiyyətə malikdir. Təsadüfi deyildir ki, təhlükəsizliyin konstitusion təminatçısı hər bir ölkədə dövlət və onun başçısıdır. Təhlükəsizliyin təmin edilməsinin səviyyəsi məhz dövlətin və dövlət rəhbərinin necə təşkil etməsindən və onun icrasına nəzarətindən asılıdır. Dövlət ictimai həyatın müxtəlif sferaları, komponentləri arasında əlaqə yaradır, onların fəaliyyətinin uzlaşdırılmasına nəzarət edir, bunun nəticəsində ölkənin kompleks xarakter daşıyan milli təhlükəsizlik sistemi yaradılır. Məlumdur ki, təhlükəsizliyin təminat dinamikası müəyyən təkamül yolu keçmişdir. Təhlükəsizliyin təminatı məsələsi bir vəzifə olaraq ilk dəfə Şərqdə qoyulmuşdur.

Çıxışını Azərbaycan Respublikasının milli təhlükəsizlik orqanlarının tarixindən qısa formada bəhs etməklə davam etdirən M. Usubov daha sonra dedi ki, Azərbaycan Xalq Cümhuriyyəti öz müstəqilliyini elan etdikdən sonra dövlətin və dövlətçiliyin təhlükəsizliyini təmin etmək, yəni onu daxili və xarici təhdidlərdən qorumaq, baş verə biləcək terror-təxribat aksiyalarının qarşısını almaq, pozucu qüvvələri zərərsizləşdirmək üçün müstəqil xüsusi xidmət orqanının yaradılmasına zərurət var idi. 1919-cu il mart ayının 28-də hərbi nazir Səməd bəy Mehmandarovun və baş qərargah rəisi Məmməd bəy Sulkeviçin birgə imzaladıqları əmrə əsasən Hərbi Nazirliyin general-kvartirmeyster şöbəsinin nəzdində kəşfiyyat və əks-kəşfiyyat bölməsi yaradılır. 1920-ci il aprel ayının 28-də Azərbaycan Xalq Cümhuriyyəti süquta uğrayır. Azərbaycan milli təhlükəsizlik orqanlarının tarixində yeni dövr başlayır. Bu dövr ərzində repressiyalar, tanınmış ziyalılara qarşı ədalətsiz qərarların qəbul edilməsi halları da qeyd edilməlidir.

M.Usubov bildirdi ki, 1944-cü ilin yanvar ayından ulu öndər Heydər Əliyev təhlükəsizlik orqanlarında əməliyyat işçisi kimi fəaliyyətə başlayır, onun qətiyyəti, prinsipiallığı, dəmir iradəsi, fenomenal yaddaşı, mübarizliyi, uzaqgörənliyi, müdrikliyi, məqsədyönlülüyü, idarəçilik qabiliyyəti, geniş dünyagörüşü, təşəbbüskarlığı, qayğıkeşliyi, dinləmək mədəniyyəti və bu kimi mənəvi-əxlaqi, intellektual, emosional və iradi xüsusiyyətləri cəm halında birləşərək onu keçmiş Azərbaycan SSR DTK-nın sədri vəzifəsinə qədər yüksəltdi. Heydər Əliyevin gəlişi ilə hər şeydən əvvəl, Azərbaycan SSR DTK-nın başında səriştəli, təcrübəli və peşəkar əks-kəşfiyyatçı, təhlükəsizlik sisteminin daxili iş mexanizminə, əməliyyat heyətinin qarşısında duran vəzifələrə dərindən yiyələnən, ən başlıcası isə xalqının milli maraqlarının təminatçısı olan azərbaycanlı vətəndaş durmuşdu. Milli kökə və yaddaşa bağlı bir şəxs kimi o, 50-ci ildən başladığı azərbaycanlılaşdırma prosesini səlahiyyətləri çərçivəsində daha da inkişaf etdirdi. Məhz onun səyi nəticəsində təhlükəsizlik orqanlarında azərbaycanlı kadrların sayı xeyli artırıldı. Ümummilli lider istər DTK-ya, istərsə də sovet Azərbaycanına rəhbərlik etdiyi illərdə təhlükəsizlik orqanlarına böyük diqqət və qayğı ilə yanaşmış və aşağıdakı mühüm işləri görmüşdür:

— Milliləşmə prosesinin əsası qoyuldu, təhlükəsizlik orqanları milli kadrlarla təmin edildi.

— respublikanın bütün sahələrində olduğu kimi, təhlükəsizlik orqanlarında da milli kadrların xüsusi məktəblərdə təhsil almalarına diqqət artırıldı.

— repressiyalara məruz qalan şəxslərin reabilitasiyasına tam şərait yaradıldı, repressiya qurbanlarının ailə üzvlərinə olan ögey münasibət aradan qaldırıldı və onlar işlə təmin olundu. Məhz onun səyi nəticəsində böyük dramaturq H.Cavidin nəşi Azərbaycana gətirildi. Bu SSRİ məkanında analoqu olmayan bir hadisə idi.

— Azərbaycanın milli ziyalıları və dissidentlər imperiyanın növbəti təqib və təzyiqlərindən yaxa qurtardı.

— Milli şüurun oyanması istiqamətində əməli addımlar atıldı.

Azərbaycan ikinci dəfə müstəqilliyə nail olduğu ilk gündən dövlətin təhlükəsizliyinin təşkili, xüsusi xidmət orqanalarının yenidən qurulması, ixtisaslı kadrların hazırlanması ilə bağlı təhsil şəbəkəsinin yaradılması, dünya təhlükəsizlik sisteminə inteqrasiya istiqamətində tədbirlərin həyata keçirilməsi dövlət quruculuğunun mühüm vəzifələri kimi qarşıda durmuşdu. Azərbaycan Respublikasının 1991-ci ildə siyasi müstəqillik əldə etməsi və demokratik dövlət quruculuğu yoluna qədəm qoyması bu istiqamətdə əməli addımlar atmaq üçün geniş perspektivlər açdı. Azərbaycan Respublikası Ali Sovetinin qərarı ilə 1991-ci il noyabr ayının 1-də Dövlət Təhlükəsizlik Komitəsi Milli Təhlükəsizlik Nazirliyi ilə əvəz olundu. Lakin ölkəmizdə hüquqi dövlət quruculuğu prosesi müstəqilliyin ilk günlərindən müxtəlif problemlərin və maneələrin aradan qaldırılması ilə müşayiət olundu. “Müstəqillik yolu qədər çətin yol yoxdur” — deyən ulu öndər Heydər Əliyev eyni zamanda göstərirdi: “Əgər respublikada ictimai-siyasi sabitlik olmasa, sağlam ictimai-siyasi mühit olmasa, heç bir sosial-iqtisadi proqramdan, yaxud problemlərin həll edilməsindən söhbət gedə bilməz”.

Ümummilli liderimiz 1993-cü ilin iyununda xalqın tələbi ilə hakimiyyətə qayıtdıqdan sonra ölkədə dövlət quruculuğunun möhkəmləndirilməsi, sosial-psixoloji tənəzzülün və siyasi gərginliyin aradan qaldırılması, Azərbaycanda baş verən hadisələrin həqiqi demokratik müstəviyə keçirilməsi istiqamətində mühüm tədbirlər planı hazırlandı və həyata keçirildi. O, milli təhlükəsizlik orqanlarının xalqın və dövlətin maraqlarına xidmət edən çevik, mütəşəkkil orqana çevrilməsi naminə səylə çalışdı, bu məqsədlə bir sıra vacib fərman və sərəncamlar imzaladı. Ümummilli liderin 23 mart 1997-ci il tarixli sərəncamı ilə Azərbaycanın təhlükəsizlik orqanlarının peşə bayramı gününün Azərbaycan Xalq Cümhuriyyəti dövründə ilk xüsusi xidmət orqanımızın yaradıldığı gündən — 1919-cu il 28 mart tarixindən götürülməsi də Azərbaycan rəsmilərinin irs-varis əlaqələrinə sədaqətinin ifadəsi idi.

Mütəllim müəllim sözünə davam edərək dedi ki, ulu öndərimiz müstəqillik illərində də təhlükəsizlik orqanları üçün peşəkar milli kadrların hazırlanması məsələsinə xüsusi diqqətlə yanaşmış, 1998-ci il dekabrın 1-də Milli Təhlükəsizlik Nazirliyinin Akademiyasının yaradılması barədə sərəncam imzalamışdır. Bununla da Azərbaycanda ilk dəfə olaraq xüsusi xidmət orqanları üçün milli kadrların hazırlanması işinin təməli qoyulmuşdur. Hazırda ulu öndərimiz Heydər Əliyevin adını daşıyan Akademiya Milli Təhlükəsizlik Nazirliyi orqanları üçün kadrların ixtisaslarının artırılmasını, yüksək ixtisaslı xüsusi təhsilli mütəxəssislərin hazırlanmasını həyata keçirən ali hərbi təhsil müəssisəsidir. Böyük tarixi şəxsiyyət Heydər Əliyevin yeritdiyi siyasətlə müstəqilliyini əzmlə möhkəmləndirən, demokratik prinsiplərə əsaslanaraq sivil, hüquqi dövlət quruculuğu yolunda inamlı addımlar atan Azərbaycan Respublikası bu gün öz dövlətçilik ənənələrini daha da inkişaf etdirərək etibarlı gələcəyi üçün sarsılmaz təməl yaradır. Bu sahədə üzərinə mühüm vəzifələr düşən Milli Təhlükəsizlik Nazirliyi Azərbaycan xalqının ən böyük nailiyyəti olan dövlət müstəqilliyinin qorunub saxlanılmasında, daha da möhkəmləndirilməsində milli liderimiz olan Heydər Əliyevin ən yaxın köməkçiləri sırasında olmuş, ölkənin və xalqın təhlükəsizliyinin təmin edilməsində, sələflərinin mütərəqqi ənənələrinin həyata keçirilməsində uğurlar qazanmışdır.

Natiq qeyd etdi ki, ulu öndər Heydər Əliyevin başladığı milli dövlət quruculuğu prosesinin uğurla davam etdirilməsi nəticəsində Azərbaycan sosial-iqtisadi, ictimai-siyasi həyatın bütün sahələrində dinamik sürətlə inkişaf edir. Azərbaycan Respublikasının Prezidenti cənab İlham Əliyev bu gün ümumilli liderin müstəqillik və dövlətçilik kursunu inamla və uğurla davam etdirir. Möhtərəm Prezidentimiz cənab İlham Əliyevin böyük ruh yüksəkliyi ilə yenidən Azərbaycan Respublikasının Prezidenti seçilməsi əslində xalqımızın müasirləşmə və yeniləşmə, tərəqqi və qüdrətlənmə kursuna səs verməsi deməkdir. Azərbaycan Respublikasının Prezidenti cənab İlham Əliyev tərəfindən Eldar Mahmudov 2004-cü ildə Azərbaycan Respublikasının milli təhlükəsizlik naziri təyin edildi. Prinsipiallığı, obyektivliyi, qətiyyəti və peşəkarlığı ilə hər zaman seçilən general-leytenant Eldar Mahmudov nazir təyin edildikdən sonra milli təhlükəsizlik orqanları müasir tələblərə və çağırışlara uyğun təkmilləşdi, yeniləşdi. Bu gün milli təhülkəsizlik orqanları Ali Baş Komandanın hər bir əmrini qüsursuz yerinə yetirməyə hazır peşəkar, mobil və güclü bir struktura çevrilmişdir. Son dövrlər Milli Təhlükəsizlik Nazirliyində bütün istiqamətlər üzrə işlər daha da canlanmışdır. Peşəkarlıqla və vaxtında həyata keçirilən səriştəli tədbirlər nəticəsində ölkəmizə qarşı kəşfiyyat-pozuculuq və terror-təxribat fəaliyyətinin qarşısı alınır. Terrorçuluqla, narkotik vasitələrin qanunsuz dövriyyəsi, qeyri-qanuni miqrasiya, insan alveri və transmilli cinayətkarlığın digər təhlükəli növləri ilə mübarizədə önəmli uğurlar qazanılmışdır. Ermənistan-Azərbaycan-Dağlıq Qaradağ münaqişəsinin həlli üzrə ölkə rəhbərliyinin siyasi kursu üçün əlverişli şəraitin yaradılması bütün fəaliyyət istiqamətlərimiz üzrə prioritet təşkil edir. İndi düşmənə qarşı informasiya mübarizəsi daha düşünülmüş və planlı surətdə aparılır.

M. Usubov çıxışının sonunda rayon ictimaiyyətini bir daha əmin etdi ki, milli dövlətçiliyin qorunmasında bundan sonra da əzmlə mübarizə aparacaqlar. O, Vətənin təhlükəsizliyinin qorunmasının çox şərəfli peşə olduğunu diqqətə çatdırdı və bu şərəfli yolda canlarından keçməyə hazır olduqlarını bildirdi.

Azərbaycan Memarlıq və İnşaat Universitetinin rektoru, professor Gülçöhrə Məmmədova, YAP Yasamal rayon təşkilatının sədri, professor Fikrət İsmayılov, Bakı Metropoliteninin rəisi Tağı Əhmədov, rayon prokuroru Həsrət Pirməmmədov, rayon məhkəməsinin sədri Ələddin Cəfərov və milli təhlükəsizlik orqanları veteranı, ehtiyatda olan polkovnik Bəxtiyar Süleymanlı təhlükəsizlik orqanları işçilərinə çətin və şərəfli işlərində uğurlar arzuladılar.

Milli təhlükəsizlik nazirinin müavini general-mayor Əli Şəfiyev tədbirdə çıxış etdi.

Tədbirin sonunda milli təhlükəsizlik orqanlarının bir qrup veteranına hədiyyələr təqdim edilmiş və son beş ildə ermənilərin və digər qüvvələrin terrorçuluq əməllərinə qarşı aparılan uğurlu əməliyyatlardan bəhs edən film nümayiş olunmuşdur.

Əliqismət BƏDƏLOV

Xalq qəzeti.- 2009.- 20 mart.- S.6.