Suraxanı rayonunda milli təhlükəsizlik orqanlarının yaradılmasının 90 illiyi qeyd olunmuşdur

Dünən Suraxanı Rayon İcra Hakimiyyətində milli təhlükəsizlik orqanlarının yaradılmasının 90 illiyi münasibətilə tədbir keçirilmişdir.

Tədbir iştirakçıları əvvəlcə MTN-nin əməkdaşı, Milli Qəhrəman Nadir Əliyev adına 282 saylı orta ümumtəhsil məktəbində qəhrəmanın adı yazılmış lövhənin önünə gül dəstələri qoymuşlar. Sonra N.Əliyevin təhsil aldığı dərs otağına MTN-nin Suraxanı rayon şöbəsi tərəfindən kompyuter hədiyyə edilmişdir.

Ulu öndərimizin Suraxanı Rayon İcra Hakimiyyətinin foyesində qoyulmuş büstünün önünə gül dəstələri düzüldükdən sonra mərasim başlanmışdır.

Tədbiri giriş sözü ilə açan rayon icra hakimiyyətinin başçısı İlqar Abbasov bildirmişdir ki, bu gün ölkəmizin milli təhlükəsizlik orqanları üzərlərinə düşən vəzifələrin öhdəsindən layiqincə gəlir, müstəqilliyimizin qorunması, möhkəmlənməsi naminə vətənpərvərlik, igidlik nümayiş etdirirlər.

Mərasimdə çıxış edən MTN-nin Suraxanı rayon şöbəsinin rəisi Vahid Zeynalov bildirmişdir ki, milli təhlükəsizlik orqanları şərəfli bir inkişaf yolu keçmişdir. 1919-cu il martın 28-də ADR-in kəşfiyyat və əks-kəşfiyyat qurumu kimi yaradılan xüsusi bölmə öz fəaliyyətinə ermənilərin Azərbaycana qarşı ərazi iddialarının və azərbaycanlılara qarşı soyqırımı siyasətinin, ölkə daxilində müxtəlif təxribatların qarşısının alınması ilə başladı. Ulu öndərimiz Heydər Əliyev təhlükəsizlik orqanlarına rəhbərlik etdiyi dövrdə xüsusi xidmət orqanlarının Azərbaycanın gələcəyinə hesablanmış milli təməllər üzərində formalaşdırılması, xalqımızın milli maraqlarının qorunması məqsədilə bir sıra mühüm tədbirlər həyata keçirdi.

Natiq daha sonra bildirdi ki, ölkəmizdə dövlət müstəqilliyi bərpa edildikdən sonra Azərbaycan Ermənistanın hərbi təcavüzü, separatizm və dövlətçiliyin itirilməsi təhlükəsi ilə, dərin siyasi-iqtisadi böhranla, qanunsuz silahlı dəstələrin və cinayətkar qrupların tüğyan etməsi ilə üzləşdi. Məhz belə bir şəraitdə ulu öndərimiz Heydər Əliyev xalqın təkidi ilə siyasi rəhbərliyə qayıtdı. Yalnız bundan sonra ölkə vətəndaş müharibəsindən xilas edildi, qanunçuluğun və ictimai-siyasi sabitliyin bərpasına nail olundu, demokratik, hüquqi dövlətin bünövrəsi qoyuldu.

Ulu öndərimiz ölkəmizin milli maraqlarının qorunmasında təhlükəsizlik orqanlarının əhəmiyyətini nəzərə almış, onların fəaliyyətinə daim xüsusi diqqət və qayğı ilə yanaşmış, eyni zamanda müstəqil Azərbaycanın milli təhlükəsizlik siyasətinin əsas prioritetlərini müəyyən etmişdir. Bütün bunlarla yanaşı, dahi şəxsiyyət xüsusi xidmət orqanlarının fəaliyyətində köklü islahatlar həyata keçirmiş, kadr potensialının daim yeniləşdirilməsi üçün Milli Təhlükəsizlik Akademiyasını təsis etmişdir.

Natiq çıxışının sonunda vurğulamışdır ki, hazırda dövlət başçımız İlham Əliyev də milli təhlükəsizlik orqanlarının fəaliyyətinə xüsusi qayğı ilə yanaşır, bu qurumun daha da gücləndirilməsi məqsədilə müvafiq tədbirlər həyata keçirir. Məhz bunun nəticəsidir ki, bu gün təhlükəsizlik orqanları Azərbaycanın siyasi-iqtisadi maraqlarının təmin olunmasında, konstitusiya quruluşunun qorunmasında, kəşfiyyat və əks-kəşfiyyat, transmilli mütəşəkkil cinayətkarlıqla mübarizə və digər sahələrdə mühüm nailiyyətlər əldə etmişdir. Bu uğurlar özünü xarici qüvvələrin ölkəmizə qarşı yönəlmiş destruktiv fəaliyyətinin qarşısının alınmasında daha çox göstərir.

Tədbirdə çıxış edən milli təhlükəsizlik nazirinin müavini, general-mayor Əli Şəfiyev milli təhlükəsizlik orqanlarının əməkdaşlarının öz fəaliyyətlərini bundan sonra da gücləndirəcəklərini, taleyüklü vəzifələrin həyata keçirilməsində fəal iştirak edəcəklərini bildirmişdir.

MTN-nin keçdiyi çətin və şərəfli yol haqqında film göstərilmiş, nazirliyin rayon şöbəsinin bir qrup əməkdaşı və veteranı fəxri fərman, habelə qiymətli hədiyyə ilə mükafatlandırılmışdır.
Mərasimə yekun vuran rayon icra hakimiyyətinin başçısı İ.Abbasov milli təhlükəsizlik orqanlarının əməkdaşlarını bir daha yubiley münasibətilə təbrik etmiş, onlara işlərində yeni-yeni nailiyyətlər arzulamışdır. Qeyd olunmuşdur ki, Prezident İlham Əliyevin söylədiyi “Mən çox sevinirəm ki, Milli Təhlükəsizlik Nazirliyi qarşısında duran vəzifələri layiqincə icra edir” fikri ölkənin milli təhlükəsizlik orqanlarının işinə verdiyi ən yüksək qiymətdir.

Vaqif BAYRAMOV

Xalq qəzeti.- 2009.- 31 mart.- S. 6.