Abadlıq-quruculuq işləri geniş vüsət alır

Yazın gəlişi ölkənin təsərrüfat sahələrinin işində böyük canlanmaya səbəb olub. İndi respublikamızın bütün şəhər və rayonlarında genişmiqyaslı tikinti-quruculuq və abadlıq işləri aparılır, səliqə-sahman yaradılır. Görülən işlər isə sadəcə olaraq kampaniya xarakteri daşımır, şəhər, qəsəbə və kəndlərimizin simasının daha da yaxşılaşdırılmasına, baxımlı olmasına xidmət edir. Bu da təsadüfi deyil. Çünki ölkə Prezidentinin tikinti-quruculuq və abadlıq işlərinin zövqlə, günün tələbləri səviyyəsində aparılmasına dair göstəriş və tövsiyələri tərəssüfat subyektlərinin üzərinə böyük məsuliyyət qoyur. Məhz buna görədir ki, son zamanlar ölkədə aparılan abadlıq-quruculuq və yenidənqurma işləri zövq oxşayır, şəhər, kənd və qəsəbələrin simasına əlavə yaraşıq gətirir. Bu baxımdan paytaxtın Nizami rayonunda görülən işlər, həyata keçirilən tədbirlər də diqqəti cəlb edir.

Son illər abadlıq-quruculuq və yenidənqurma işləri rayon icra hakimiyəti rəhbərliyinin ən çox diqqət yetirdiyi məsələlərdəndir. Onu da qeyd etmək lazımdır ki, həyata keçirilən bu cür tədbirlərdə rayonun təsərrüfat subyektləri, ayrı-ayrı idarə, müəssisə və təşkilatları ilə yanaşı, sakinlər də yaxından iştirak edirlər. Artıq rayonda şənbə-bazar iməcilikləri ənənəvi xarakter alıb. Həftəsonu keçirilən iməciliklər zamanı rayonun bütün küçə və meydanlarında, park və xiyabanlarda, ayrı-ayrı məhəllələrdə səliqə-sahman işləri aparılır, ağac və dekorativ bəzək kolları əkilir, mövcud yaşıllıqlara qulluq göstərilir. Yeri gəlmişkən, Nazirlər Kabinetinin 2009-cu ilin ilk rübünün yekunlarına həsr olunmuş iclasında ölkə Prezidenti İlham Əliyevin paytaxtda yaşıllıqların salınması ilə bağlı konkret göstərişi bu məsələdə qarşıya yeni vəzifələr qoyur.

Rayonun ən iri yaşayış sahəsi sayılan Keşlə qəsəbəsinin siması da son zamanlar xeyli dəyişmişdir. Ərazisi 37,4 kvadratkilometr, əhalisi isə qeydiyyatsız yaşayanlarla birlikdə təqribən 40-45 min nəfər təşkil edən Keşlə Bakının ən qədim yaşayış sahələrindəndir. Hazırda irili-xırdalı 300-dək müəssisənin fəaliyyət göstərdiyi qəsəbə, həm də paytaxtın iri sənaye zonalarından sayılır. Ötən il qəsəbədə genişmiqyaslı abadlıq-quruculuq və yenidənqurma işləri aparılmış, sakinlərin üzləşdikləri sosial problemlərin əksəriyyəti aradan qaldırılmışdır. Belə ki, 2008-ci ildə əhalinin qaz, elektrik enerjisi, içməli su ilə təminatı xeyli yaxşılaşmış, sakinlərə göstərilən poçt-rabitə xidmətinin səviyyəsi yüksəlmişdir. Azərbaycan Respublikasının Prezidenti İlham Əliyevin müvafiq sərəncamı ilə təsdiq olunmuş “Bakı şəhərinin qəsəbələrinin sosial-iqtisadi inkişafının sürətləndirilməsinə dair Tədbirlər Proqramı”nda Keşlə qəsəbəsi üzrə nəzərdə tutulmuş işlərin uğurla yerinə yetirilməsi isə bütövlükdə sakinlərə göstərilən kommunal xidmətlərlə yanaşı, təhsil, səhiyyə və digər sahələrin də işinə müsbət təsir göstərmişdir. Ötən il qəsəbədaxili yolların asfaltlaşdırılması, ensiz küçələrin genişləndirilməsi, səkilərin yaradılması, müasir avtobus dayanacaqlarının quraşdırılması sakinlərin dərin razılığına səbəb olmuşdur. 2008-ci ilin sentyabr ayında Keşlə qəsəbə nümayəndəliyi üçün inşa olumuş üçmərtəbəli inzibati bina istifadəyə verilmiş, burada işçilərin fəaliyyəti üçün hər cür şərait yaradılmışdır. Bundan əlavə, qəsəbədə 570 yerlik xeyir-şər evi, poçt şöbələri üçün yeni binalar, seçki məntəqələri və s. obyektlər istifadəyə verilmişdir.

Yeri gəlmişkən, ötən il Azərbaycan Həmkarlar İttifaqları Konfederasiyasının 15 illiyinə həsr olunmuş “Mənim həyatım, mənim işim, mənim təhlükəsiz əməyim” devizi ilə ölkəmizin 500-dək kənd və qəsəbə icra nümayəndəliyi arasında keçirilmiş respublika baxış müsabiqəsində ikinci yeri tutan Nizami Rayon İcra Hakimiyyətinin Keşlə qəsəbə nümayəndəliyi xüsusi diplomla təltif edilmiş və nümayəndəliyə televizor hədiyyə edilmişdir.

Qəsəbədə aparılan abadlıq-quruculuq və yenidənqurma işləri, kommunal sahədə həyata keçirilən tədbirlər bu gün də davam etdirilir. Nizami Rayon İcra Hakimiyyəti rəhbərliyinin yaxından köməyi və diqqəti sayəsində bütün işlər yüksək səviyyədə və operativ surətdə həyata keçirilir ki, bu da sakinlərin dərin razılığına səbəb olur. Qəsəbənin elektrik təchizatının daha da yaxşılaşdırılması məqsədilə son zamanlar Pəhləvan Fərzəliyev və Mikayıl Əliyev küçələrində yeni transformatorlar quraşdırılmış, köhnə işıq dirəkləri yeniləri ilə əvəz olunmuşdur. Hazırda isə Nizami Abdullayev və Abdulla Mirzəyev küçələrinin axşam və gecə saatlarında işıqlandırılmasını təmin etmək üçün müasir dirəklər basdırılır. Bundan əlavə, Sabir və Puşkin küçələrində yaşayan sakinlərin “mavi yanacaq”la təminatının yaxşılaşdırılması üçün yeni qaz xətti çəkilmiş, bu işlər hazırda da davam etdirilir. Qəsəbənin kanalizasiya şəbəkəsinin yenidən qurulması istiqamətində də lazımi işlər görülür. Uzunluğu 3 kilometr olan mərkəzi kanalizasiya xəttinin Keşlədən keçən 700 metrlik hissəsinin çəkilişi bu yaxınlarda tamamlanmışdır. Bununla da, uzun illər kanalizasiya sistemi olmayan Qafqaz küçəsində bu problem öz həllini tapmışdır.

Keşlə sakinlərinin içməli su ilə təminatının yaxşılaşdırılması da rayon icra hakimiyyətinin xüsusi diqqət yetirdiyi məsələlərdəndir. Bu yaxınlarda qəsəbədəki Qurban Sadıq küçəsində 1500 metrlik yeni su xəttinin çəkilişi başa çatdırılıb. Bundan əlavə, köhnə su boruları yeniləri ilə əvəz olunub. Qəsəbə nümayəndəliyi tərəfindən sakinlərin sosial problemlərinin həlli ilə bağlı da lazımi işlər görülür. İlin əvvəlindən üç şəhid ailəsinin evinin dam örtüyünün dəyişdirilməsi üçün onlara lazımi materiallar verilib.

Xalqımızın ən sevimli bayramı olan Novruzu yüksək səviyyədə qarşılamaq üçün qəsəbədə böyük abadlıq işləri görülmüş, küçə və yollarda səliqə-sahman yaradılmış, bardürlər rənglənmiş, ağacların gövdələri ağardılmışdır. Bununla yanaşı, bayram günlərində qəsəbə sakinlərinin istirahətinin təşkili üçün lazımi tədbirlər həyata keçirilmiş, konsert proqramı təşkil olunmuşdur.

Qəsəbədə yaşıllaşdırma tədbirlərinin həyata keçirilməsi, küçə və prospektlər boyunca xeyli sayda ağac və bəzək kolları əkilmişdir. Təkcə Babək prospekti boyunca 4 minədək ağacın əkilməsi burada yaşıllaşdırma işlərinə böyük diqqət yetirilməsindən xəbər verir.

Sakinlərə göstərilən telefon rabitəsinin keyfiyyətinin yaxşılaşdırılması istiqamətində son zamanlar xeyli iş görülmüş və bu tədbirlər hazırda da davam etdirilir. Bu yaxınlarda isə Yafər Səfərov küçəsində yeni elektron tipli ATS istifadəyə veriləcək.

Son zamanlar qəsəbədaxili yolların asfaltlaşdırılmasına diqqət getdikcə artırılır. Təkcə ötən il ərzində rayonun daxili imkanaları hesabına qəsəbənin A.Mirzəyev, M.Ağayev, N.Abdullayev, K.Əfkari, Yenikənd, İ.Həbibov, Y.Səfərov, 1-ci və 2-ci Köndələn küçələrinə ümumilitkdə 50 min kvadratmetr asfalt örtüyü salınmışdır. Yaxın günlərdə isə digər küçələrə də asfalt örtüyünün vurulmasına başlanılacaq. Bütün bu tədbirlər paytaxtın qədim və iri yaşayış sahələrindən olan Keşlə qəsəbəsini daha abad, daha yaraşıqlı bir guşəyə çevirəcək.

Mirbağır YAUQBZADƏ

Xalq qəzeti.- 2009.- 1 may.- S. 5.