Bakıdakı 160
saylı klassik gimnaziyada birincilər üçün unudulmaz Əlifba
bayramı münasibətilə təşkil edilmiş
musiqili-ədəbi gecə uşaqlara əsl bahar sevinci
yaşatdı. Məktəbin Azərbaycan bölməsinin
birinci sinif şagirdlərinin iştirakı ilə düzənlənən
tədbirində bayram əhval-ruhiyyəsi hakim idi.
Al-əlvan geyimlər,
divarları bəzəyən rəsmlər, bayram təbrikləri,
şən musiqi sədalarının yaratdığı
xoş aura təkcə körpələri deyil, valideyinləri,
müəllimləri, tədbirin digər qonaqlarını da
öz sehirli ağuşuna almışdı.
Birincilərin sinif rəhbəri
Ulduz müəllimə isə sevinclə yanaşı,
qürur hissi də keçirirdi. Bəs necə, axı
növbəti birincilərə qələm tutmağı
öyrətmiş, onlara əlifbanı
tanıtmışdı. Artıq bu uşaqlar
yazıb-oxumağı bacarır, təhsildə ilk
addımlarını atırdılar. Şübhəsiz ki, gələcəkdə
onların hər biri şəxsiyyət kimi formalaşacaq, cəmiyyətə
layiqli vətəndaşlar olacaqlar. Bu yolda onlara ilk
addımları atmağı öyrədən müəllimənin
iftixar hissi keçirməyə haqqı var.
Uşaqlar səhnədə
bir-birindən maraqlı nömrələr göstərir,
gözəl avazla şeirlər deyir, milli və müasir rəqsləri
məharətlə ifa edirdilər.
Musiqidən dərs deyən
Pərvanə müəllimənin, balacalara rəqs etməyi
öyrədən Lalə müəllimənin səyləri hədər
getməmişdi. Leylanın, Əlinin, Nəzrinin, Faiqin,
Aytacın, Dənizin ifasında milli rəqslərimiz, bal rəqsi,
Şərq rəqsi, müasir Qərb rəqsləri
tamaşaçıların zövqünü oxşadı. Məşhur
filmlərdən götürülmüş musiqi nömrələri
isə alqışla qarşılandı. Sevinclərinin həddi-hüdudu
olmayan körpələr ilk dərs illərini başa
vurmalarını beləcə coşğuyla qeyd etdilər.
Aida AYSA
Xalq qəzeti.- 2009.- 1 may.-
S.7.