3 May Ümumdünya Mətbuat Azadlığı Günüdür

Azərbaycan mətbuat azadlığı prinsiplərinə sadiqdir

Azərbaycan Mətbuat Şurasında 3 May Ümumdünya Mətbuat Azadlığı Günü"nə həsr olunmuş toplantıda demokratik cəmiyyətin başlıca təsisatlarından olan azad mətbuat prinsiplərinə ölkəmizin sadiqliyindən, bu sahədə son illərdə əldə olunmuş uğurlardan və göstərilən səylərdən ətraflı söhbət açıldı.

Şuranın sədri Əflatun Amaşov 1993-cü ildən dünyanın demokratik ölkələrində hər il əlamətdar gün kimi qeyd olunan 3 May Ümumdünya Mətbuat Azadlığı Gününün yaranma tarixi — Parisdən Sofiyayadək keçilən yol barədə məlumat verdi. O bildirdi ki, azad sözün şərəfinə elan olunmuş bu gün dünyanın qütblərə bölünməsinin, “soyuq müharibə” marafonunun başa çatmasının, yer kürəsinin vahid informasiya məkanına çevrilməsi məramının yekunu olaraq ərsəyə gəlmişdir.

XX əsrin son onilliyində dünyada yaranmış siyasi reallıqlar nəzərə alınaraq, 1990-cı ilin fevralında Parisə toplaşan Qərb və Şərq jurnalistləri azad mətbuat prinsiplərinin maneəsiz yayılması, bəşəri bəlalara qarşı birgə mübarizə lüzumunu təsdiqlədilər. 1991-ci il mayın 3-də bu məramı ifadə etmiş sənədi — Namibiyanın Vinduk şəhərində qəbul olunmuş Bəyannaməni YUNESKO dəstəklədi və həmin günü “Ümumdünya Mətbuat Azadlığı Günü” kimi qeyd etmək təklifini Birləşmiş Millətlər Təşkilatına ünvanladı. BMT-nin Baş Məclisinin qərarı ilə 1993-cü ildən həmin tarix “Ümumdünya Mətbuat Azadlığı Günü” elan olundu.

Azərbaycanın dövlət müstəqilliyi qazanması və demokratik cəmiyyət qurmağa başlaması ilə eyni vaxta düşən bu proses ölkəmizdə də fəal dəstəklənmişdir. Mətbuat azadlığı prinsiplərini rəsmən elan edən Azərbaycan dövləti azad sözün cəmiyyət həyatında üstün yer tutması, maneəsiz yayılması üçün zəruri addımları atmışdır. Kütləvi informasiya vasitələri üzərindən dövlət nəzarəti götürülmüş, mətbu sözə tətbiq olunan senzura ləğv edilmişdir. Yeni tipli medianın formalaşması və möhkəmlənməsi üçün dəfələrlə ciddi tədbirlər həyata keçirilmişdir.

Toplantıda çıxış edən AMŞİ İdarə Heyətinin üzvlərindən — “Azərbaycan” qəzetinin baş redaktoru, millət vəkili Bəxtiyar Sadıqov, APA informasiya agentliyinin rəhbəri Vüsalə Mahirqızı, “Turan” informasiya agentliyinin direktoru Mehman Əliyev son dövrdə ölkəmizdə mətbuat azadlığı ilə bağlı əldə olunan irəliləyişdən, KİV-in iqtisadi əsaslarının möhkəmləndirilməsi yönündə zəruri tədbirlərdən söz açdılar. Natiqlər jurnalistlərin həbsdən azad edilməsini, Mətbuata Dövlət Yardımı Fondunun yaradılmasını son 1 ilin mütləq uğuru kimi dəyərləndirdilər, ilkin mənbədən informasiya əldə etmək, jurnalist peşəkarlığını yüksəltmək yönündə həlli vacib məsələlərə toxundular.

“Xalq cəbhəsi” qəzetinin baş redaktoru Elçin Mirzəbəyli və digər çıxış edənlər azad mətbuat prinsiplərinə məhəl qoymayan nəşrlərə, jurnalistlərin peşə-əxlaq kodeksini pozan təsadüfü yazarlara qarşı ictimai qınağı gücləndirməyin və qanunun tələblərinin sərtləşdirməyin zəruri olduğunu qeyd etdilər.

Azərbaycan Respublikası Ombudsman aparatı ictimaiyyətlə əlaqə şöbəsinin rəhbəri Zemfira Məhərrəmli mətbuat azadlığının insan hüquqları anlayışı ilə sıx bağlılığını vurğuladı, bu sahədə ölkə KİV-i ilə qurulan sıx əlaqədən danışdı, mətbuat azadlığı günü münasibətilə ombudsman Elmira Süleymanovanın təbrikini media təmsilçilərinə çatdırdı.

Sonda Amerika Birləşmiş Ştatlarının Azərbaycandakı səfirliyinin ictimaiyyətlə əlaqə üzrə müşaviri Teris Devidson ümumdünya mətbuat azadlığı günü ilə bağlı ölkəsinin mövqeyini açıqladı, demokratiyanın geniş mətbuat azadlığı olmadan mümkünsüzlüyünü vurğuladı. Müşavir 3 may münasibətilə səfir Ənn Dersinin Azərbaycan jurnalistlərinə müraciətindəki əsas mülahizələri də məclis iştirakçılarının nəzərinə çatdırdı.

Mərasimdə aprelin 30-da Azərbaycan Dövlət Neft Akademiyasında törədilmiş terror aktının qurbanlarının xatirəsi ehtiramla anıldı. Ekstermal şəraitdə, fövqəladə vəziyyətdə jurnalistlərin çevik və operativ fəaliyyti ilə bağlı məsələlərə də toxunuldu.

Tahir AYDINOĞLU

Xalq qəzeti.- 2009.- 2 may.- S. 3.