Mingəçevirlilərin sonsuz məhəbbəti

Mingəçevirdə ulu öndər Heydər Əliyevin anadan olmasının 86 illiyi ilə bağlı tədbirlər silsiləsinə şəhər icra hakimiyyəti başçısının sərəncamı ilə aprelin 13-də start verilmişdi. Ötən vaxt ərzində Kür üstündəki şəhərdə bayram əhval-ruhiyyəsi hökm sürmüşdür. Keçirilən iməciliklərdə bağ və xiyabanlara minlərlə ağac və gül kolları əkilmiş, dörd küçə başdan-başa asfaltlanmış, yaşıllıq zolaqları salınmışdır.

Məktəblərdə xüsusi dərslər, ali və orta ixtisas təhsili ocaqlarında elmi-praktik konfranslar, idman yarışları keçirilmişdir. Ulu öndərin örnək həyatının parlaq palitrası foto-stendlərdə, Heydər Əliyev guşələrində, rəsm qalereyalarında, kitabxana şəbəkələrində nümayiş etdirilmişdir. Bütün bunlar şəhər televiziyası və mətbuat vasitəsilə geniş işıqlandırılmışdır. Ümummilli lider Heydər Əliyev hakimiyyətdə olduğu bütün dövrlərdə Mingəçevirin inkişafına xüsusi diqqət və qayğı göstərmişdir. “Mingəçevirin işığı zülmət gecələri gündüzə çevirir. Şəhərlərimizin, kəndlərimizin, qəsəbələrimizin üstünə nur ələyir, burada halal əməklə məşğul olan insanlar yaşayır” – deyən Heydər Əliyev qadir insanların zəhməti ilə yaranan nur çeşməsinin əhəmiyyətini yüksək dəyərləndirmişdir. Mingəçevirin respublikanın coğrafi mərkəzində sənaye qovşağı kimi formalaşması məhz rəhbərin adı ilə bağlıdır.

Mingəçevirin inkişafında və tərəqqisində ümummilli liderimiz Heydər Əliyevin xidmətləri ölçüyəgəlməz olmuşdur. Onun diqqəti, qayğısı və şəxsi nəzarəti altında tikilib istifadəyə verilmiş Zaqafqaziyada ən nəhəng enerji müəssisəsi olan Azərbaycan İstilik Elektrik Stansiyası indi müstəqil dövlətimizin istifadəsindədir.

Hələ 1981-ci il oktyabr ayının 20-də Mingəçevirdə olarkən Yol maşınları və “Azərkabel” zavodlarının, Toxuculuq Kombinatının, Su Elektrik Stansiyasının, “Kür” Avarçəkmə Bazasının kollektivləri və şəhər ictimaiyyəti nümayəndələri ilə görüşlərində Heydər Əliyev respublikamızın 4-cü sənaye mərkəzinin gələcək inkişaf perspektivlərindən danışmış, qarşıya mühüm vəzifələr qoymuşdu. Ulu öndərin 1970 – 80-ci illərdə respublikaya rəhbərlik etdiyi birinci dövrdə Mingəçevirdə texniki rezin məmulatları, şüşə lifi, yol tikinti maşınları təmiri, “Aqrar sənaye” DBM, çörək zavodları, poliqrafiya müəssisəsi, evtikmə kombinatları inşa olunmuşdu. O dövrdə “Azərkabel”, “Yol maşınları” və “İzolit” zavodlarının ikinci növbələri, “Kür” olimpiya təlim mərkəzinin yeni korpusları istifadəyə verilmişdi. Toxuculuq kombinatının bütün əsas istehsal sahələri başdan-başa yeni texnika hesabına təzədən qurulmuşdu. Həmin illər Mingəçevirin quruculuq, inkişaf və tərəqqi dövrü kimi tarixə düşmüşdür. Şəhərdə 8130 şagird yerlik 8 orta ümumtəhsil məktəbi, 2240 yerlik 8 məktəbəqədər uşaq müəssisəsi, 1848 çarpayılıq xəstəxana, poliklinika, şahmat məktəbi, gənc texniklər stansiyası və digər obyektlər tikilmişdi.
Sosial həyatın ən mühüm göstəricisi kimi dəyərləndirilən mənzil tikintisinin həcmi 1969–81-ci illərdə əvvəlki 10 illə müqayisədə 8 dəfədən çox artmışdı. Hər il Mingəçevirdə təqribən 35-40 min kvadratmetrdən çox yeni mənzil sahəsi tikilib istifadəyə verilirdi.

Energetiklər qəsəbəsini bu gün Mingəçevirdən ayrı təsəvvür etmək mümkün deyildir. Cəmisi bir neçə ildə Heydər Əliyev dühasının işığıyla şəhərimizin bu yeni yaşayış məntəqəsində 20 minə yaxın əhali məskunlaşmışdır. Qəsəbədə cərgələnən çoxmərtəbəli yaşayış evləri, 2 ümumtəhsil ocağı, tibb məktəbi, doğum evi, poliklinika və digər tikililər Heydər Əliyevin qüdrətindən, xalqımızın qurub-yaratmaq amalından soraq verir.

Xalqımız fəxr edir ki, müasir Azərbaycan dövlətinin yaradıcısı və qurucusu Heydər Əliyevin axıra çatdıra bilmədiyi taleyüklü məsələləri, planları, işləri xalqın köməyi ilə Prezident İlham Əliyev uğurla davam etdirir. Azərbaycan bu gün özünün yeni inkişaf mərhələsini yaşayır, həyatın bütün sahələrində parlaq nailiyyətlər qazanılır. Əhalinin rifahı günbəgün yaxşılaşır. Söz yox ki, bütün bunların əsasında ulu öndər Heydər Əliyevin yaxın və uzaq perspektiv üçün müəyyən etdiyi strategiya durur. Xalqımız öz böyük övladı ilə fəxr edir, onun doğum gününü hər il ümumxalq bayramı kimi qeyd edir. Bu münasibətlə keçirilən tədbirlər Mingəçevirin ictimai-siyasi həyatını daha da zənginləşdirir.

Mayın 10-da Mingəçevir Şəhər İcra Hakimiyyəti və YAP şəhər təşkilatının birgə keçirdikləri elmi-nəzəri konfransda ulu öndərin nəsillərə örnək həyat yolu barəsində ətraflı danışıldı. Şəhər icra hakimiyyətinin başçısı Mübariz Ağayev və digər məruzəçilər Azərbaycanın dahi liderinin müstəqil dövlət quruculuğu sahəsində titanik fəaliyyətinin unudulmaz məqamlarını xatırlayaraq qeyd etdilər ki, Heydər Əliyev misilsiz dövlət xadimi, zəmanəmizin böyük siyasət adamı, xalqımızın xilaskarı, müstəqil Azərbaycan dövlətinin qurucusu kimi əbədi yaşamaq haqqı qazanmışdır. Prezident İlham Əliyevin rəhbərliyi ilə Azərbaycan yeni bir inkişaf dövrünə qədəm qoymuşdur. Son beş ildə möhtəşəm layihələr həyata keçirilib, ölkə başdan-başa simasını dəyişib. Kənd təsərrüfatının və sənayenin rəqabətə davamlı strukturları formalaşır, əhalinin sosial təminatına ayrılan dövlət xərclərinin, əmək haqlarının və yardımların həcmi artırılır. Azərbaycan Prezidenti İlham Əliyevin rəhbərliyi altında işlənib hazırlanmış regionların sosial-iqtisadi inkişaf proqramının ikinci mərhələsinin həyata keçirilməsi ilə ölkəmiz müasir dünyanın ən inkişaf etmiş dövlətləri sırasında layiq olduğu yeri tutacaqdır.

Azərbaycan Prezidenti İlham Əliyevin bu il mart ayının 3-də Mingəçevirə gəlişi zamanı keçirdiyi görüşlərdə şəhərin gələcək inkişafına xüsusi önəm veriləcəyini bəyan etməsinin təsdiqi yeni dövlət proqramında öz əksini tapmışdır. 2009–2013-cü illərdə sosial-iqtisadi inkişaf proqramına onilliklərdən bəri mingəçevirliləri narahat edən ən vacib problemlərin daxil edilməsi ölkə başçısının diqqət və qayğısının göstəricisidir. Elektrik enerjisi, su, qaz və kanalizasiya sistemlərinin yenidən qurulması, nəhəng avarçəkmə kompleksinin istifadəyə verilməsi, turizmin müasir xidmət şəbəkələrinin yaradılması, təhsil, səhiyyə və mədəniyyət obyektlərinin tikintisi, onların təmiri və texniki bazalarının möhkəmləndirilməsi Mingəçevirin regional mərkəz kimi formalaşmasına, yeni iş yerlərinin açılmasına, xidmət mədəniyyətinin yüksəldilməsinə, əhalinin güzəranının yaxşılaşdırılmasına real zəmin yaradır.

Heydər Əliyevin anadan olmasının 86-cı ildönümünə həsr olunmuş el şənliyi ümummilli liderin adını daşıyan meydanda başa çatmışdır. İlk öncə tarixi gün şərəfinə Heydər Əliyev prospektində səhiyyə işçilərinin dəstəyi ilə yaradılan yeni parkın açılış mərasimi keçirilmişdir. Sonra minlərlə mingəçevirli Heydər Əliyevin adını daşıyan park kompleksinə gəlmiş, şəhər rəhbərliyi ilə birgə ulu öndərin abidəsi önünə təzə gül-çiçək dəstələri qoymuşdur. Heydər Əliyev muzeyinin yeni tərtibatına baxış olmuşdur. İki mindən çox mingəçevirli muzeyin zəngin eksponatları ilə tanış olmuş, ulu öndərimizin keçdiyi həyat yolunun tarixi məqamlarını bir daha xatırlamışdır.

Heydər Əliyev meydanında şəhər məktəblilərinin əl işlərindən ibarət sərgi nümayiş etdirilmişdir. Mindən çox əl işində Vətənə, milli mənəvi dəyərlərə, azərbaycançılıq məfkurəsinə məhəbbət ifadə olunmuşdur. Şagirdlərin toxuduqları kiçik xalçalarda, rəsmlərdə, kətan üzərindəki əl işlərində ümummilli lider Heydər Əliyevin parlaq siması öz əksini tapmışdır... Bəli, nə qədər ki, Azərbaycan var, Azərbaycan xalqı var, Heydər Əliyev yaşayacaq, millətimiz və məmləkətimiz işıqlı gələcəyə doğru inamla addımlayacaqdır.

Naib RÜSTƏMOV,

“Mingəçevir” qəzetinin baş redaktoru,

əməkdar mədəniyyət işçisi

Xalq qəzeti.- 2009.- 14 may.- S. 9.