Bakı həm də mədəniyyətimizin paytaxtıdır

Ulu öndər Heydər Əliyevin Azərbaycan mədəniyyətinin inkişafına göstərdiyi diqqət və qayğı bu gün möhtərəm Prezidentimiz İlham Əliyev tərəfindən davam etdirilir. İndi ölkəmizdə mədəniyyət sahəsində bir sıra dövlət proqramları uğurla həyata keçirilir. Xüsusi olaraq ölkənin paytaxtı Bakının və onun ətraf qəsəbələrinin mədəni həyatının canlanması son illər daha aydın nəzərə çarpır. 2009-cu ildə Bakının İslam Mədəniyyətinin Paytaxtı elan olunması bunun əyani nümunəsidir. Bakı Şəhər Mədəniyyət və Turizm İdarəsinin rəisi Əlikram Əliyevlə söhbətimizin mövzusu da bu gün Bakının mədəni həyatındakı yeniliklərlə tanışlıqdır.

— Əlikram müəllim, son illər dövlətimizin mədəniyyət siyasətinin uğurlu nəticələri göz qabağındadır. Sizcə, bu inkişaf, ilk növbədə, hansı amillərlə bağlıdır?

— Gəlin bir anlığa yaxın tarixə qayıdaq. SSRİ-nin dağılması ərəfəsində — yəni 1987-ci ildən 90-cı illərin əvvəllərinə qədər ölkədə bir durğunluq əmələ gəlmişdi. Mədəniyyət sahəsində də başqa sahələrdə olduğu kimi, bir boşluq yaranmışdı. Məhz bu illərdə mədəniyyət xadimlərinin bir qismi xarici ölkələrlə köçdü, mədəniyyət abidələrimiz baxımsız vəziyyətə düşdü, kinoteatrlar, kitabxanalar fəaliyyətsiz quruma çevrildi, teatrların fəaliyyəti dayandı və s. Amma ümummilli lider Heydər Əliyevin hakimiyyətə gəlişi hər şeyi öz yoluna qoydu. Ölkədə mədəniyyətə münasibət əsaslı şəkildə dəyişdi. Müharibənin dayanması, ölkədə sabitliyin bərqərar olması, iqtisadiyyatın tədricən yüksəlməsi mədəniyyət sahəsində islahatların başlanmasına zəmin yaratdı. Mədəniyyət müəssisələrinin fəaliyyəti bərpa olundu, mədəniyyət xadimlərinə Prezident təqaüdü, mükafatlar, fəxri adlar verildi. Beləliklə, mədəni həyatımızda tədricən inkişaf başlandı. Heydər Əliyev siyasi kursunun çox layiqli davamçısı İlham Əliyevin hakimiyyətə gəlişi ilə mədəniyyətin inkişafı sahəsində yeni dövr başlandı. Baxın, teatr, kino, kitabxana və muzey işi, tarixi və mədəniyyət abidələrinin qorunması, turizmin inkişafı ilə bağlı bir-birinin ardınca dövlət proqramları qəbul edən cənab Prezident mədəniyyəti prioritet sahə kimi daim diqqət mərkəzində saxladı. Göründüyü kimi, bütün bu amillər ölkənin mədəni həyatının zənginləşməsinə təsir göstərmiş və Bakı da ölkənin paytaxtı olmaqla mədəni yeniliklərin mərkəzinə çevrilmişdir.

— Bakının da mədəni həyatı, demək olar ki, tamamilə yeniləşdi.

— Bəli, Bakı tanınmız dərəcədə dəyişdi. 1993-cü ildən başlayaraq Bakının mədəniyyət müəssisələri əsaslı şəkildə yenidən qurulmağa başladı. Azərbaycan Dövlət Filarmoniyası ilkin olaraq təmir edilib tamaşaçıların ixtiyarına verildi. Musiqili Komediya Teatrı, Rus Dram Teatrı, Gənc Tamaşaçılar Teatrı, Opera və Balet Teatrı, Yaşıl Teatr, Kukla Teatrı tamamilə yeniləşdi. Artıq tamaşaçıların da marağı artmağa başladı. Bakının digər mədəniyyət müəssisələri, kitabxanalar, mədəniyyət sarayları, klublar öz işlərini yenidən qurmağa başladı. Mənim Bakı Şəhər Mədəniyyət və Turizm İdarəsinə rəhbər təyin edildiyim bir ilə yaxın müddət ərzində çox işlər görməyə çalışdıq. Kitabxanalara informasiya texnologiyalarının gətirilməsi, xalq yaradıcılığına diqqətin artırılması, uşaq mədəniyyət və incəsənət müəssisələrinin yenidən qurulmasını və s. həyata keçirə bildik. Bizim idarəyə 2 qoruq, 7 ev-muzeyi, 85 kitabxana, 40 mədəniyyət evi, 7 mədəniyyət və istirahət parkı, 1 heyvanat parkı, 32 musiqi, 6 incəsənət məktəbi daxildir.

Bu böyük bir kollektivin çalışdığı təşkilatdır və Bakının mədəni həyatında onların müstəsna rolu vardır. Onu deyə bilərəm ki, vaxtaşırı tədbirlər keçirir və tamaşaçılar da bu tədbirləri böyük ruh yüksəkliyi ilə qarşılayırlar. Çalışırıq ki, şəhər əhalisinin asudə vaxtının mənalı keçməsini, istirahətlərinin təşkilini təmin edək. Çox hörmətli Prezidentimizin sərəncamı ilə 2009-cu il “Uşaq ili” elan olunmuşdur. Bu məqsədlə bir sıra tədbirlər hazırlamışıq və il boyu onlar həyata keçiriləcəkdir.

Bakı ölkənin paytaxtı olduğundan mədəniyyət sahəsində hər hansı yenilik də ilkin olaraq buradan başlanır. Ona görə də Bakının mədəni həyatı bölgələr üçün nümunə olmalıdır. Bu yaxınlarda nazirliyin Lənkəranda keçirilən kollegiya iclasında nazir Əbülfəs Qarayev tapşırıq verdi ki, Bakı regionlarla sıx əlaqədə işləməlidir.

— 2009-cu ildə Bakı İslam Mədəniyyətinin Paytaxtı elan olunub. Bu, söz yox ki, sizin məsuliyyətinizi daha da artırır.

— Sözsüz, belədir. Bakının İslam Mədəniyyətinin Paytaxtı elan edilməsi nəinki bu şəhərin, bütün respublikanın mədəniyyətinin böyük nailiyyətidir. Ona görə ki, Bakıda Azərbaycanda yaşayan bütün xalqların, o cümlədən regionların mədəniyyətləri birləşmişdir. Mədəniyyət və turizm naziri Əbülfəs Qarayevin sərəncamı ilə Bakının İslam Mədəniyyətinin Paytaxtı elan olunması ilə bağlı xüsusi tədbirlər planı hazırlanmışdır və artıq bu tədbirlər mütəmadi olaraq həyata keçirilməkdədir. Həmin tədbirlər planında bizim idarəyə bir neçə layihəni reallaşdırmaq həvalə olunub. İlk layihəmiz Qala Etnoqrafik Qoruğunda keçirilmiş islam mövzusunda əl işləri sərgisi böyük məmnunluqla qarşılandı. İslam dəyərlərinin bizim sənət əsərlərində əks olunması əslində diqqəti çəkən mövzudur. Orada daha bir layihəni gerçəkləşdirdik. 2000-ə yaxın əhalinin buraya getməsini təşkil etdik ki, bu da daxili turizmin inkişafına yeni töhfə oldu. Doğrudan da, bu tədbir çox böyük rezonans doğurdu. İnsanlar arasında isti bir münasibət yaranmışdı. Biz imkan yaratmışdıq ki, sənətkarlar öz əl işlərini sata da bilsinlər.

İkinci layihəmizin reallaşması iyul ayında nəzərdə tutulub. Layihə belə adlanır: “İslam ölkələrinin folklor rəqs kollektivlərinin beynəlxalq festivalı”. Artıq bu sahədə sənədlər hazırlanıb. Bu yaxınlarda biz ölkəmizdəki səfirliklərə müraciət edəcək və festival barədə konkret məlumatları verəcəyik. 20 ölkədən folklor — rəqs kollektivinin dəvət olunmasını nəzərdə tutmuşuq. III layihəmiz isə KİV nümayəndələri ilə bağlıdır. Noyabr ayında “Bakı İslam Mədəniyyətinin Paytaxtı” mövzusunda topladığımız yazılar müsabiqəyə veriləcək və qaliblər mükafatlandırılacaq. Uşaq rəqs kollektivlərinin beynəlxalq festivalını da keçirməyi planlaşdırmışıq. Bundan başqa, iyunun 1-nə Uşaqların Beynəlxalq Müdafiəsi Günü ilə bağlı xüsusi tədbir hazırlamışıq ki, bu da bizim Uşaq ilinə töhfəmiz olacaq. Bu tədbiri Yaşıl Teatrda keçirməyi qərara almışıq.

Digər layihələrimiz də var. Kitabxanaların informasiya texnologiyaları ilə təmin edilməsi ilə bağlı layihə həyata keçirilmək üzrədir. M. Qorki adına kitabxanada artıq informasiya mərkəzi yaratmışıq.

— Yəqin ki problemləriniz də var. Hansı məsələlər bu gün sizi daha çox narahat edir?

— Bir məsələni xüsusi olaraq qeyd etmək istəyirəm. Bu gün mədəniyyət sistemində kadrların böyük qismi yaşlı nəsildir. Bilirsiniz bu insanlar uzun illər mədəniyyət sistemində çalışmışlar, hətta fəxri ad alanlar da var. Açığını deyim ki, onların bəziləri bu günün tələbləri ilə ayaqlaşa bilmirlər. Onlar tərəfindən heç bir yeni təşəbbüs irəli sürülmür. Bu da müəyyən çətinliklər yaradır. İnformasiya texnologiyaları ilə işləməyi bacarmırlar. Bunsuz isə, əlbəttə, bu gün çox çətindir.

Bakı Şəhər Mədəniyyət və Turizm İdarəsinin strukturunda olan təşkilatların maddi bazası da kifayət qədər yaxşı deyildir. Bilirsiniz, bizim idarə ikili tabeçilikdədir. Ona görə də müəyyən problemlər yaranır. 30 faiz maliyyələşmə bizdən gedir, qalanlar isə yerli icra hakimiyyətlərinin payına düşür. Ona görə də yerlərə nəzarət etmək bəzən çətinləşir.Biz hələ də kitabxanalarımızı kompyuterlərlə tam təmin edə bilməmişik.

Mədəniyyət və Turizm Nazirliyi, Bakı Şəhər İcra Hakimiyyəti bizə daim köməklik göstərir, hansı problemlə bağlı müraciət ediriksə, tezliklə həll olunur.

Kollektivimiz çalışır ki, Bakının mədəni həyatını daha da inkişaf etdirsin, əhalinin istirahətinin və asudə vaxtının daha maraqlı keçməsini təmin etsin.

Son olaraq onu da bildirmək istəyirəm ki, Bakının mədəni həyatının daha da zənginləşməsində Heydər Əliyev Fondunun xüsusi xidmətləri var. Fondun prezidenti, Milli Məclisin deputatı, YUNESKO-nun və İSESKO-nun xoşməramlı səfiri Mehriban xanım Əliyevanın təşəbbüsü ilə həyata keçirilən layihələr şəhərimizin mədəni həyatında müstəsna rol oynayır.

Mehdi MÜKƏRRƏMOĞLU

Xalq qəzeti.- 2009.- 19 may.- S. 5.