ADU-da “Mən nəyi bilirəm” müsabiqəsi keçirilib

Azərbaycan Dillər Universitetinin (ADU) fransız dili fakültəsində Heydər Əliyevin anadan olmasının 86-cı ildönümünə həsr olunmuş “Que Sais-je” (“Mən nəyi bilirəm”) mövzusunda müsabiqə keçirilib. Müsabiqədə ADU-nun fransız dili fakültəsinin dekanı, filologiya elmləri namizədi, dosent Sevda Vahabova, elmi işlər və beynəlxalq əlaqələr üzrə dekan müavini dosent Cülnarə Sadıqova, tədris işləri üzrə müavin Rəfiqə Mürşüdova, fransız dilinin nitq praktikası kafedrasının müəllimi Deni Menie, fransa ölkəşünaslıq kafedrasının müəllimi Alik Hənifəyev və fransız dili fakültəsinin müəllim-tələbə heyəti iştirak edib.

Fransız dilinin leksikologiyası və üslubiyyatı kafedrasının və dosent Gülnarə Sadıxovanın təşkilatçılığı ilə keçirilən müsabiqədə fakültə tələbələrindən ibarət 6 — Liberte (Azadlıq), Miraki (Möcüzə), Archange (Baş mələk), Louvre (Luvr muzeyi), Anges (Mələk), Le Fantöme (Kabus) adlı komandalar yarışırdılar. Qalib tələbələr Fransanın Azərbaycandakı səfirliyindən ADU-ya hədiyyə olunan 10 ədəd “Le Rober” — izahlı lüğəti ilə mükafatlandırıldılar.

ADU-nun mətbuat xidmətindən aldığımız məlumata görə, müsabiqənin məqsədi Fransanın sivilizasiyası, mədəniyyəti haqqında tələbələrin hansı biliklərə malik olduqlarını öyrənmək və onların gələcəkdə keçiriləcək universitetlərarası müsabiqələrdə iştiraklarını təmin etmək idi. İntellektual yarışmada Fransanın mədəniyyətini, incəsənətini, siyasi mühitini əks etdirən suallardan istifadə olunmuşdu. Qeyd edək ki, intellektual yarışmada Miraki komandasının üzvləri savadlarını yüksək səviyyədə nümayiş etdirərək Fransanın universitetə hədiyyə etdiyi “Le Rober”adlı izahlı lüğətə sahib oldular.

Qəzənfər QASIMOV

Xalq qəzeti.- 2009.- 19 may.- S. 7.