Gələcəyimizin təminatçıları

Azərbaycan Respublikasının Prezidenti İlham Əliyevin imzaladığı Sərəncama əsasən, ölkəmizdə hər il 23 may günü Ekologiya və Təbii Sərvətlər Nazirliyi işçilərinin peşə bayramı kimi qeyd olunur.

Ölkəmiz müstəqillik əldə etdikdən sonra məhz ulu öndər Heydər Əliyevin ekologiya və ətraf mühitin mühafizəsi sahəsinə qayğıkeş münasibəti nəticəsində onun imzaladığı 2001-ci il 23 may tarixli sərəncamla Ekologiya və Təbii Sərvətlər Nazirliyi yaradılmışdır.

Son bir neçə ildə ekoloji vəziyyətin sağlamlaşdırılması, ətraf mühitin mühafizəsi sahəsində ölkə Prezidentinin rəhbərliyi altında ardıcıl, məqsədyönlü işlər görülmüş, uzun illər ərzində yığılaraq müstəqil Azərbaycana miras qalmış ekoloji problemlər təhlil edilərək, onların kompleks həllinə yönəlmiş 5 Milli və Dövlət Proqramı təsdiq edilmiş, ekologiya və ətraf mühitin mühafizəsi sahəsində hüquqi baza təkmilləşdirilmişdir.

Ətraf mühitin mühafizəsi, insanların sağlam təbii mühitdə yaşaması və təbii sərvətlərdən xalqın rifahının yaxşılaşdırılması naminə istifadəsi məsələsi hazırda aparılan sosial-iqtisadi islahatlarda mühüm yer tutmaqla yanaşı, son zamanlar bilavasitə ekoloji problemlərin həlli sahəsində həyata keçirilən tədbirlər bu sahənin ölkəmizdə prioritet məsələlər sırasına qaldırılmasının parlaq nümunəsidir.

Əvvəllər bir Milli Parkı belə olmayan Azərbaycanda son 5 ildə Xüsusi Mühafizə Olunan Təbiət Ərazilərinin ümumi sahəsi 750 min hektara, yəni ölkə ərazisinin 8,7 faizinə catdırılaraq 8 Milli Park, 4 Qoruq, 3 Yasaqlıq yaradılmış, 5 mövcud qoruğun ərazisi genişləndirilmiş, 3 Təbiət Abidəsi təşkil edilmişdir.

Respublika Prezidenti İlham Əliyevin imzaladığı “Xəzər dənizinin çirklənmədən qorunması üzrə bəzi tədbirlər haqqında” və “Əhalinin ekoloji cəhətdən təmiz su ilə təminatının yaxşılaşdırılması ilə əlaqədar bəzi tədbirlər haqqında” sərəncamlardan irəli gələn məsələlərin həlli istiqamətində beynəlxalq standartlara cavab verən modul tipli lokal təmizləyici qurğular alınmış, Abşeron yarımadasının şimal hissəsinin 61 km-lik sahil zolağında quraşdırılaraq istismara buraxılmışdır. Kür və Araz çaylarının suyundan istifadə edən ölkənin xeyli yaşayış məntəqəsində Beynəlxalq Səhiyyə Təşkilatının standartlarına cavab verən su təmizləyici qurğular quraşdırılaraq əhalinin istifadəsinə verilmişdir. Hazırda bu işlər davam etdirilməkdədir.

Ölkə Prezidentinin imzaladığı “Magistral avtomobil yollarının mühafizə zolaqlarının yaşıllaşdırılması haqqında” sərəncama uyğun olaraq, Atbulaq – Hacıqabul qəsəbəsi avtomobil yolunun 28 km məsafəsinin hər iki tərəfində müxtəlif cinslərdən olan 100 min ağac əkilmiş, eləcə də tenderdə qalib gəlmiş Bolqarıstan şirkəti ilə bağlanmış müqavilə üzrə sifariş olunmuş 22638 ədəd müxtəlif çeşiddə dekorativ ağac və kol bitkilərinin bir hissəsi respublikaya gətirilərək həmin ərazidə əkilmişdir.

Milli meşəbərpa və meşəsalma proqramının tələblərinə uyğun olaraq, 10740 hektar sahədə meşəbərpa və meşə əkini tədbirləri həyata keçirilmişdir. İl ərzində 30,5 mln. ədəd müxtəlif çeşiddə əkin materialı yetişdirilmiş, 63,2 hektar ərazidə toxum səpilmiş, 5 tondan artıq ağac və kol cinslərinin toxumları tədarük olunmuşdur. Yetişdirilmiş əkin materiallarından meşə əkini, ətraf şəhər və qəsəbələrin, magistral şosse yolları kənarlarının, çay və su hövzələri ətraflarının yaşıllaşdırılması nəzərdə tutulur. Magistral yol boyu yaşıllaşdırma işlərinə də böyük diqqət ayrılmışdır. Belə ki, Zığ–Aeroport yolu boyu 144 hektar ərazidə torpaq hamarlama işləri yekunlaşdırılaraq, yaşıllıqsalma işlərinə başlanmışdır. Aparılan yaşıllaşdırma tədbirləri nəticəsində 180000 ədədə qədər müxtəlif növ ağac əkilmişdir ki, bunlardan da 139000-i zeytun, Eldar şamı və akasiyadan ibarətdir. Su hövzələrində bioloji resursların artırılması və mühafizəsi istiqamətində müvafiq tədbirlər həyata keçirilmişdir. Belə ki, balıqartırma müəssisələri tərəfindən 422,3 milyon ədəd müxtəlif növ vətəgə əhəmiyyətli balıq körpələri süni və təbii yolla artırılıb müəyyən edilmiş su hövzələrinə (nərəcinsli balıq körpələri 12,453 mln, qızıl balıq -166,05 min, çəkikimilər 403,88 mln, bitki ilə qidalanan ağ amur körpəsi – 5,8 milyon ədəd) buraxılmışdır.

Hidrometeoroloji müşahidə şəbəkəsinin bərpası, inkişafı, yeni texnologiyaların tətbiqi və tərtib olunan hidrometeoroloji proqnozların keyfiyyətinin yaxşılaşdırılması istiqamətində bir sıra tədbirlər həyata keçirilmişdir. Belə ki, Şəki, Ələt, Xınalıq, Mərəzə, Altıağac, Qəbələ, Ağsu stansiyaları üçün yeni binalar tikilmiş, Neftçala, Çilov, Ələt, Tərtər, Xınalıq, Xaldan, Kırız, Mərəzə, Altıağac, Ağsu stansiyalarının meteomeydançaları müasir standartlara uyğun yenidən qurulmuşdur. Finlandiyanın istehsalı olan 16 ədəd kompleks avtomat meteoroloji stansiyanın 13 ədədi istismara verilmişdir. Bu avtomatik stansiyalar internetdən məlumatları alır və müşahidə məlumatlarını birbaşa mərkəzə ötürə bilir.

Təbiətin sağlam sabahının təminatçıları olan Ekologiya və Təbii Sərvətlər Nazirliyi işçilərinin peşə bayramı günündə onları təbrik edir, yaşadığımız təbiətin qorunmasında, ətraf mühitin mühafizəsində onlara yeni uğurlar arzulayırıq.

M. MÜKƏRRƏMOĞLU

Xalq qəzeti.- 2009.- 23 may.- S. 5.