Azərbaycan nümayəndə heyəti BSTA-nın Avropa Şəbəkəsi Rəhbər Komitəsinin iclasında iştirak etmişdir

Azərbaycan Respublikası Dövlət Sosial Müdafiə Fondunun ictimaiyyətlə əlaqələr sektorundan aldığımız məlumatda deyilir ki, Səlim Müslümovun rəhbərlik etdiyi nümayəndə heyəti Niderland Krallığında Beynəlxalq Sosial Təminat Assosiasiyasının (BSTA) Avropa Şəbəkəsi Rəhbər Komitəsinin iclasında iştirak etmişdir.

2004-cü ilin sentyabrında ölkəmiz Beynəlxalq Sosial Təminat Assosiasiyasının büro üzvü, 2007-ci ildə inkişaf etmiş Avropa ölkələri ilə bir sırada Assosiasiyanın Avropa Şəbəkəsinin Rəhbər Komitəsinin üzvü seçilmişdir və yüksək səviyyədə müvafiq qərarların qəbul edilməsində xüsusi rola malikdir.

Bu dəfəki iclasda qurumun fəaliyyətinin daha da gücləndiriməsi, yeni üzvlərin qəbulu, 2009-2010-cu illər ərzində keçiriləcək tədbirlər barədə müzakirələr aparılıb. İclasda qərara alınıb ki, Avropa Şəbəkəsinin ilk Forumu 2010-cu ilin may ayında Polşa Respublikasının paytaxtı Varşava şəhərində keçirilsin.

Məlumatda həmçinin bildirilir ki, Rəhbər Komitənin iclasının iştirakçıları səfər zamanı Niderland Krallığının Sosial Sığorta Bankının Zaanstad şəhər şöbəsinin işi ilə də tanış olublar. Burada həmçinin adı çəkilən qurumun yeni istifadəyə verilmiş internet saytının təqdimatı keçirilmişdir.

Səfər çərçivəsində nümayəndə heyəti “Müştəri yönümlü xidmətlərin göstərilməsi” mövzusunda ikigünlük seminarda da iştirak edib. Almaniya, Albaniya, Azərbaycan, Belçika, Finlandiya, Fransa, İngiltərə, İsveç, İsveçrə, İtaliya, Macarıstan və Niderlandın sosial sığorta və pensiya fondlarının nümayəndə heyətlərinin qatıldığı seminarda əhaliyə göstərilən sosial sığorta xidmətlərinin keyfiyyətinin artırılması üçün müxtəlif ölkələrdə istifadə olunan müasir üsullar və texnoloji həllər müzakirəyə çıxarılmışdır.

Azərbaycan nümayəndə heyəti tədbir çərçivəsində Almaniya, Belçika, Fransa və Polşanın pensiya və sığorta orqanlarının nümayəndələri ilə görüşlər keçirmişdir. Görüşlərdə Azərbaycanda həyata keçirilən pensiya islahatlarının və qurulan yeni sığorta-pensiya sistemi normalarının, Avropa ölkələrində tətbiq olunan təməl prinsiplərinə və texniki tələblərinə uyğun olduğu ifadə edilmişdir.

Z.BƏŞİRQIZI

Xalq qəzeti.- 2009.- 23 may.- S. 5.