Həmkarlar Ittifaqları qloballaşma şəraitində

Noyabrın 21-də Bakıda Avrasiya Qida, Kənd Təsərrüfatı, Meşə və Turizm İşçiləri Həmkarlar İttifaqı Federasiyasının "Qloballaşma şəraitində həmkarlar ittifaqları, həmkarlar ittifaqında üzvlüyün əsaslandırılması" mövzusunda seminar-treninq keçirilmişdir.

Seminar-treninqi giriş sözü ilə "Kənd-Qida-İş" Həmkarlar İttifaqı Federasiyasının sədri, Avrasiya Federasiyasının vitse-prezidenti Tofıq Quliyev açaraq, məlumat verdi ki, 12 ölkənin — Türkiyə, Azərbaycan, Rumıniya, Çernoqoriya, Bosniya və Herseqovina, Kosovo, Makedoniya, Serbiya, Orta Asiya respublikaları və Gürcüstanın təmsil olunduğu Avrasiya Qida, Kənd Təsərrüfatı, Meşə və Turizm İşçiləri Həmkarlar İttifaqı Federasiyasının 2007-ci il 31 avqustda İstanbulda keçirilən təsis qurultayından sonra qarşılıqlı əlaqələrin inkişafında böyük irəliləyiş müşahidə edilməkdədir. Qısa fəaliyyət dövründə Rumıniyanın paytaxtı Buxarest şəhərində Federasiyanın İdarə Heyətinin toplantısı, İzmir şəhərində qurumun I konqresi keçirilmiş və müxtəlif ölkələrdə silsilə seminarlar təşkil edilmişdir. Beynəlxalq təşkilatın həmkarlar ittifaqları fəallarının maarifləndirilməsi çərçivəsində növbəti tədbiri bu gün Azərbaycanda keçirilir.

Sonra Azərbaycan Həmkarlar İttifaqları Konfederasiyasının sədri, millət vəkili Səttar Mehbalıyevə söz verildi. Sədr son illər Azərbaycanın əldə etdiyi iqtisadi uğurlardan, regionda lider dövlətə çevrilməsində Prezident İlham Əliyevin həyata keçirdiyi siyasətin müstəsna rol oynamasından, hüquqi dövlət quruculuğunda həmkarların rolundan, qəbul olunan qanunlarda bu quruma geniş səlahiyyətlər verilməsindən ətraflı məlumat verdi. Avrasiya Federasiyasının qarşıya qoyduğu məqsədlərin böyük əhəmiyyət daşıdığını vurğulayan natiq seminarın işinə uğurlar arzuladı.

Seminarda Türkiyənin "TOLEYİS" Sendikasının genəl başqanı, Avrasiya Federasiyasının prezidenti Camal Bakınd da çıxış etdi. Camal Bakınd həmkarlar ittifaqlarının müasir dünyada yeri və rolu, qloballaşma dövründə onların üzərinə düşən vəzifələrdən və işçilərin əmək hüquqlarının müdafıəsində daha böyük fəallıq göstərmələrinin vacibliyindən danışdı.

Seminar işini Türkiyənin Koçaeli Universitetinin professoru Sayım Yorğun bəyin "Qloballaşma şəraitində həmkarlar ittifaqlarının fəaliyyəti, həmkarlar ittifaqı hərəkatının həmrəyliyinin və birliyinin möhkəmləndirilməsi" mövzusunda məruzələr dinlənildi və diskussiyalar aparıldı.

Seminar noyabrın 22-də işini başa çatdırdı.

İlqar RÜSTƏMOV

Rafiq SALMANOV (foto)

Xalq qəzeti.-2008.-23 noyabr.-S.4.