Gənclərin dünənə ehtiramı, sabaha inamı güclüdür

Yeni Azərbaycan Partiyasının yaradılmasının ildönümü münasibətilə 2 saylı Bakı Tibb Texnikumunda keçirilən mərasimdə dövlət müstəqilliyimizin ilk iki ilində ölkəmizin üzləşdiyi tarixi çətinliklər, ümummilli lider Heydər Əliyevin xilaskarlıq missiyası diqqət mərkəzində oldu.
Tədbirdə ulu öndərin o tarixi günlərdə xalqımızın ən sağlam siyasi qüvvələrini ətrafına toplamaqla yaratdığı Yeni Azərbaycan Partiyasının sonrakı illərdə dövlətçiliyimizin möhkəmləndirilməsi yönündə fədakar fəaliyyətindən söz açıldı.

Texnikumun direktoru Dilarə Məmmədəliyeva mərasimdə iştirak edən Yasamal rayon gənclərini, tələbələri, şagirdləri və qonaqları salamladı, ulu öndər Heydər Əliyevin ideya və əməllərinin uğurla həyata keçməsi yolunda öndə gedən Yeni Azərbaycan Partiyasının cəmiyyətdəki misilsiz rolunu vurğuladı.

Gənclər təşkilatının rəhbəri Nəzakət İsgəndərova ümummilli lider Heydər Əliyevin ölkə gənclərinə göstərmiş olduğu diqqət və qayğını, onun zəkası ilə yeniləşmiş, milliləşmiş təhsil sistemimizin uğurlarını qədirbilənliklə yada saldı, tələbə və məktəblilərin ulu öndərin ideallarına sədaqət ruhunda oxuyub-çalışmalarının önəmli olduğunu söylədi.

Mərasim texnikum tələbələrinin, 2 və 6 saylı musiqi məktəbləri şagirdlərinin hazırladıqları ədəbi-bədii kompozisiya ilə davam etdi. Söylənən şeirlərdə, səslənən musiqi nömrələrində xalqımızın böyük oğlu Heydər Əliyevin parlaq siması və tarixi xidmətləri, onun siyasi mübarizə məktəbinin yetirmələrini və davamçılarını ətrafında cəmləyən Yeni Azərbaycan Partiyası vəsf olundu. Gənclər hərarətli bədii çıxışları ilə müstəqillik tariximizə ehtiramlarını, daha xoş günlərimizə dərin inamlarını sərgilədilər.

Tahir AYDINOĞLU.

Xalq qəzeti.-2008.-22 noyabr.-S.6.