Ölkənin sosial-iqtisadi inkişafı insanların rifahını gündən-günə yaxşılaşdırır

Oktyabrın 24-də dövlət başçısı kimi yenidən and içən Prezident İlham Əliyev tədbir iştirakçıları qarşısında nitq söyləyərkən bir çox məqamlardan əhatəli şəkildə söz açdı. Mən əhalinin sosial müdafiəsi sahəsini təmsil etdiyimə görə cənab Prezidentin bilavasitə bu istiqamətdə həyata keçirilmiş tədbirlər və perspektivdə nəzərdə tutulan layihələr barədə söylədiyi fikirləri daha maraqla izlədim. Həmin nitqi dinlədikdən sonra bir daha əmin oldum ki, “Azərbaycan dövləti Azərbaycan xalqının sosial-rifahının yaxşılaşdırılması üçün mümkün olan bütün tədbirləri həyata keçirir” — deyən ekspertlər tamamilə haqlıdırlar. Çox şadam ki, dövlətin bu sahədəki siyasətinin həyata keçirilməsində bizim nazirliyin və bizim mərkəzin də xidməti kifayət qədər olmuşdur.

Əlbəttə, ən mühüm məsələlərdən biri əhalinin aztəminatlı təbəqəsinin sosial müdafiəsini təmin etməkdir. 2008-ci ilin 9 ayı ərzində Şəki rayonu üzrə ünvanlı dövlət sosial yardımı almaq üçün rayon əhalinin sosial müdafiəsi mərkəzinə 2894 ailə müraciət etmişdir. Qanunvericilikdə nəzərdə tutulmuş sənədləri düzgün hazırlayan və mərkəzə təqdim edən 2894 ailənin sənədləri ünvanlı sosial yardım və sosial müavinətlər sektorunun məsləhətçiləri tərəfindən qəbul edilmişdir.

Sənədləri qəbul edilən 2894 ailənin sənədlərinə ünvanlı dövlət sosial yardımı təyin edən komissiya tərəfindən baxılmış, 2893 ailəyə sosial yardım təyin edilmişdir. Hal-hazırda 1874 ailənin 8470 ailə üzvünə 171422.67 manat məbləğində ünvanlı dövlət sosial yardımı təyin edilərək ödənilir. Hər bir nəfər ailə üzvünə təyin edilən ünvanlı dövlət sosial yardımının orta aylıq məbləği Şəki rayonu üzrə 20.24 manat, hər bir ailəyə düşən ünvanlı dövlət sosial yardımının orta aylıq məbləği 91.47 manat təşkil etmişdir. Müqayisə üçün bildiririk ki, 2007-ci ilin yanvar ayında hər bir ailəyə düşən ünvanlı dövlət sosial yardımının orta aylıq məbləği 38,63 manat, hər bir ailə üzvünə düşən ünvanlı dövlət sosial yardımının orta aylıq məbləği isə 9,45 manat olmuşdur. Müddət ərzində 1 ailəyə ailənin orta aylıq gəliri hər bir ailə üzvü üçün ehtiyac meyarı məcmusundan yuxarı olduğu üçün ünvanlı dövlət sosial yardımı təyin edilməsindən imtina edilmişdir.

Ünvanlı dövlət sosial yardımı təyin edilən ailələrdən 16 ailə müharibə əlillərinin, 418 ailə digər səbəbdən əlil olanların ailələri, 39 ailə isə məcburi köçkün ailələridir. 158 ailə isə 1 yaşadək uşağı olan aztəminatlı ailələrdir.

Məlumat üçün bildiririk ki, Azərbaycan Respublikası Əmək və Əhalinin Sosial Müdafiəsi Nazirliyi tərəfindən “Aztəminatlı ailələrin yoxsulluq vəziyyətindən çıxarılması məqsədilə uyğun vasitələrin müəyyən edilməsi üçün sorğu anketi” hazırlanmış və 2007-ci ilin yanvar ayından həmin anketin tətbiqinə başlanılmışdır. Artıq 980 ailəyə qeyd edilən sorğu anketləri doldurulmuşdur.

Hesabat dövründə valideynlərini itirmiş və valideyn himayəsindən məhrum olmuş uşaqların 25 nəfər qəyyumunun hər birinə ayda 25 manat olmaqla müavinət təyin olunmuş və 9 ay ərzində həmin məqsəd üçün 2620 manat vəsait xərclənmişdir. Yeni uşağın doğulması ilə əlaqədar birdəfəlik müavinət almaq üçün mərkəzə 1489 nəfər müraciət etmiş, onların hər birinə 35 manat məbləğində müavinət təyin olunaraq ödənilmişdir. Bu məqsəd üçün 52562 manat vəsait xərclənmişdir. 2008-ci il sentyabrın 1-dən hər uşaq üçün 50 manat birdəfəlik müavinət ödənilir.

Şəki rayonu ərazisində yaşamış, Azərbaycanın Milli Qəhrəmanı adı verilmiş 1 nəfərin ailəsinə hər ay 600 manat, əməkdar fəxri adlarına layiq görülmüş 7 nəfərin hər birinə hər ay 30 manat, “Şəhid ailəsi üçün Azərbaycan Respublikası Prezidentinin təqaüdü”nün təsis olunması ilə əlaqədar 268 şəhidin 394 ailə üzvünə hər şəhid üçün hər ay 100 manat məbləğində hesablanaraq müddət ərzində ödənilmişdir. Bu məqsədlə 9 ay ərzində 249987.21 manat vəsait xərclənmişdir.

Kommunal, nəqliyyat və digər güzəştlərə görə Azərbaycan Respublikasının ərazi bütövlüyü uğrunda döyüş əməliyyatlarında iştirak edib müharibə veteranı adı almış 500 nəfərin hər birinə müavinət təyin olunaraq hər ayda 25 manat məbləğində ödənilmişdir. Başqa ölkələrin ərazisində gedən məhəlli müharibələrdə və hərbi münaqişələrdə hərbi birləşmələrin tərkibində iştirak etmiş 130 nəfərin hər birinə ayda 25 manat məbləğində müavinət təyin olunaraq ödənilmişdir. 51 nəfər əmək pensiyası almaq hüququ olmayan şəhid ailəsi üzvlərinin hər birinə 12 manat məbləğində müavinət təyin olunaraq müddət ərzində ödənilmişdir. Bu məqsədlə 9 ay ərzində 98447.68 manat vəsait xərclənmişdir.

Şəki Bələdiyyəsinin 20 aprel 2007-ci il tarixli iclasının qərarına əsasən rayon Əhalinin Sosial Müdafiəsi Mərkəzinə inzibati binanın tikilməsi məqsədi ilə şəhərin M.Rəsulzadə prospekti ilə A.Məmmədov küçəsinin kəsişdiyi ərazinin şimal-qərbində 780 kvadratmetr torpaq sahəsi ayrılmışdır. Ayrılmış torpaq sahəsində 2 mərtəbəli inzibati idarə binasının tikintisinə başlanılmış və may ayında həmin bina Şəki Rayon Əhalinin Sosial Müdafiəsi Mərkəzinin istifadəsinə verilmişdir.

2006-cı ildə II qrup Qarabağ müharibəsi əlili, Baş Göynük kənd sakini Nağıyev Nüsrət Samit oğlu üçün, 2007-ci ildə II qrup Qarabağ müharibəsi əlili, Daşüz kənd sakini Əliyev Əhməd Məmməd oğlu üçün və II qrup Qarabağ müharibəsi əlili, Baş Layısqı kənd sakini Ağammədov Elşən Əlheydər oğlu üçün fərdi mənzillər tikilərək onların istifadəsinə verilmişdir.

2008-ci ildə isə I qrup Qarabağ müharibəsi əlili Aslanov Eyvaz Məmməd oğluna və II qrup Qarabağ müharibəsi əlili Məmmədov Araz Rafiq oğluna Oka markalı minik avtomobilləri verilmişdir.

Bu il, eyni zamanda, I qrup Böyük Vətən müharibəsi əlili, 103 yaşlı Məmmədov Mənəf Məmmədbağır oğluna möhtərəm Prezidentimiz cənab İlham Əliyevin adından Oka markalı minik avtomobili, 1 ədəd soyuducu və 1 ədəd televizor hədiyyə verilmişdir.

Sonda bir faktı təkrarlamaq istəyirəm. Belə ki, 2007-ci ildə Şəkidə hər şəxsə düşən ünvanlı sosial yardım 9,45 manat idisə, bu il həmin göstərici 20,24 manat olmuşdur. Fərq iki dəfədən də çoxdur. Gələn il bu fərqin daha da böyüyəcəyi şəksizdir.

Ölkə rəhbərliyi tərəfindən sosial sahədə aparılan uğurlu islahatların həyata keçirilməsi, sosial-iqtisadi inkişafın sürətlənməsi, insanların həyat səviyyəsinin yüksəldilməsi istiqamətlərində üzərimizə düşən vəzifələrin öhdəsindən layiqincə gəlməyə çalışacağıq.

Məhəmməd NƏSİBOV,

Şəki Rayon Əhalinin Sosial

Müdafiəsi Mərkəzinin direktoru

Xalq qəzeti.-2008.-26 noyabr.-S.2.