Politoloq Andranik Tevanyan bildirir ki, Ermənistan prezidenti bütün fəaliyyətini öz hakimiyyətini qoruyub saxlamağa yönəltmişdir

Ermənistanda keçirilən sonuncu prezident seçkilərindən xeyli vaxt keçsə də, xalq Serj Sarkisyanın prezidentliyinin legitimliyini hələ də qəbul etmir, onu hakimiyyəti saxtakarlıqla, zor gücünə zəbt etmiş şəxs kimi tanıyır. Yerli ekspert və ziyalılar, həmçinin siyasi xadimlər Serj Sarkisyanı qeyri-ciddi adam kimi qəbul edir, ölkəyə rəhbərliyi dövründə siyasi və iqtisadi sahədə heç bir irəliləyiş, uğur qazanmadığına, özündən əvvəlki prezident Robert Koçaryanın siyasətini kor-koranə davam etdirdiyinə görə ciddi tənqid edirlər.

Yerli kütləvi informasiya vasitələrinin yazdıqlarına görə, son vaxtlar Ermənistanda vəziyyət daha da gərginləşib. Ölkənin regional əməkdaşlıqdan kənarda qalması iqtisadi sahədə daha ciddi problemlər yaradıb. Ermənistan artıq beynəlxalq aləmdən təcrid olunmaq üzrədir. Bu ilin mart ayının 1-də dinc əhaliyə divan tutulmasının və bunun da nəticəsində 132 nəfərin qətlə yetirilməsinin üstünün hələ də ört-basdır edilməsi Ermənistanda insan haqlarının qorunması istiqamətində heç bir irəliləyişin olmadığından xəbər verir. Bütün bunların prezident Serj Sarkisyanın daxili və xarici siyasət sahəsində yarıtmaz fəaliyyəti ilə əlaqələndirən ölkə ziyalıları onu hərdəmxəyal adlandırırlar. Bildirilir ki, prezident çox vaxt düşünülməmiş addımlar atır, sözünün üstündə durmur, bir məsələ barəsində bu gün bir, sabah isə başqa fikir səsləndirir. Ermənistanda əhalinin çoxu Serj Sarkisyan hakimiyyətinə inanmır. Qeyd olunur ki, prezidentin əsas fəaliyyəti saxtakarlıqla və zorakı yollarla qəsb etdiyi hakimiyyəti bütün vasitələrlə qoruyub saxlamağa yönəldilib.

Ermənistan Siyasi Araşdırma İnstitutunun direktoru, politoloq Andranik Tevanyan “Noyan Tapan” qəzetinə verdiyi müsahibəsində Serj Sarkisyanın prezidentlik fəaliyyətinə münasibət bildirərkən deyib ki, bu adam sanki dövlət başçısı olduğunu unudub. Onun ölkənin bütün sahələr üzrə inkişafı barədə heç bir konsepsiyası yoxdur. Serj Sarkisyanın yalnız bir amalı var: nəyin bahasına olursa-olsun hakimiyyəti bir müddət əlində saxlasın. Buna görə də yalan vədlər verir, xalqı aldadır, dediyinin üstündə durmur. Tevanyan deyib: “Fikir verin, üç ölkənin prezidentlərinin imzaladığı Moskva Bəyannaməsindən sonra Serj Sarkisyan Moskvadan Ermənistana yox, birbaşa Fransaya getdi. Bəyannaməni imzalamasından heç bir gün keçməmiş Fransada ayrı söz dedi. Sanki unudub ki, Dağlıq Qarabağ münaqişəsinin nizamlanması istiqamətində gələcəkdə aparılan danışıqlarda yalnız Ermənistan və Azərbaycan prezidentlərinin iştirak etməsinə imza atıb. Fransada isə deyir ki, Dağlıq Qarabağın prezidenti də danışıqlarda iştirak etməlidir. İndi siz deyin, xalq bunun hansına inansın? Təbii ki, Moskva bəyannaməsinə inanmalıdır. Çünki ortalıqda tutarlı fakt — üç ölkə prezidentinin imzaladığı sənəd var”.

Politoloq bildirib ki, dövlət başçısına yalan danışmaq yaraşmır. Prezident ciddi, qətiyyətli olmalı, ətraflı düşünəndən sonra qərar verməli, bu gün dediyini sabah danmamalıdır. Bütün bunlar isə bizim prezidentimizdə yoxdur. O, sözünə davam edərək deyib ki, Serj Sarkisyan əvvəlcə erməni-türk tarixçilərindən ibarət komissiya yaradılması təklifini irəli sürür, sonra isə özü bu təklifin əleyhinə çıxır. Elə Dağlıq Qarabağ probleminin nizamlanması istiqamətində dediklərinin əleyhinə çıxan ilk şəxs də özü oldu.

A.Tevanyan Serj Sarkisyanın münaqişənin nizamlanması ilə əlaqədar bir qədər əvvəl səsləndirdiyi fikri jurnalistlərin diqqətinə çatdırıb: O, deyir ki, Azərbaycan Qarabağa investisiya qoya bilər. Bundan sonra qarabağlılar Azərbaycanın tərkibində birgə yaşaya bilərlər. Heç üstündən bir gün keçməmiş deyir ki, Qarabağ heç vaxt Azərbaycanın tərkib hissəsi ola bilməz. Bu, dövlət başçısına yox, qeyri-ciddi şəxslərə malik düşüncə tərzidir.

A.Tevanyan Ermənistan-Türkiyə münasibətlərinə də toxunarkən Serj Sarkisyanın hərəkətlərinin anlaşılan olmadığını deyib. Onun qənaətinə görə, Türkiyə Prezidenti Abdulla Gülün Ermənistana səfərindən Ermənistan heç nə qazanmadı. Bu səfərdən nə qazandısa, Türkiyə və onun prezidenti qazandı. Politoloqun fikrincə, bundan sonra Türkiyə Ermənistanla sərhədlərini açmaq üçün irəli sürdüyü şərtləri çətinlik çəkmədən qəbul etdirə biləcək. O qeyd edib ki, Türkiyənin Ermənistan qarşısında qoyduğu şərtlərdən biri, deyərdim ki, ən başlıcası Azərbaycanın ərazi bütövlüyünün Ermənistan tərəfindən rəsmən tanınmasıdır. Bunun isə nə demək olduğu hamımıza çox yaxşı məlumdur. Politoloq deyib ki, Ermənistan bu şərti artıq qəbul etmək məcburiyyətindədir. Çünki dünyanın əksər ölkələri, tanınmış beynəlxalq qurumları, həmçinin yaxşı günlərdə imzalanmış Moskva bəyannaməsi də bunu ciddi tələb kimi irəli sürüb. Serj Sarkisyanın bu tələbi qəbul etməkdən başqa ayrı yolu yoxdur. O, diplomatik uğursuzluğunu etiraf etmək üzrədir.

“Şamanak-Yerevan” qəzetinin siyasi şərhçisi Arkadi Abramyan prezidentlə müxalifət partiyaları nümayəndələrinin görüşünü şərh edərkən yazıb ki, Serj Sarkisyan müxalifət nümayəndələrini müxtəlif yollarla ələ alaraq diplomatik məğlubiyyətini ört-basdır etməyə çalışıb. O, görüş zamanı tamamilə dəyişilib və özünü elə aparıb ki, sanki Moskva bəyannaməsinə imza atan onun özü olmayıb. Qəzet yazır ki, hər halda Yerevanda hamıya bəllidir ki, Moskva bəyannaməsi Ermənistanın növbəti diplomatik məğlubiyyətidir. İndi S. Sarkisyan Türkiyə ilə əməkdaşlığa və sərhədlərin açılmasına can atır. Bununla da “erməni soyqırımı” haqqındakı söhbətlərə də birdəfəlik son qoyulacaq. Siyasi şərhçi yazır: “Baxmayaraq ki, Serj Sarkisyan sözdə ”erməni soyqırımı" barədə danışır, əməlləri isə bu mövzunun birdəfəlik qapadılmasına yönəlib. Bunu onun hərəkətləri də təsdiqləyir. Ümumiyyətlə, fikrini tez-tez dəyişən, ziddiyyətli fikirlər söyləyən bir adamın ölkəni idarə etməsi mümkün deyil. Ermənistan hazırda belə bir vəziyyətlə üzləşib. Siyası şərhçi bunun çox pis nəticə verəcəyinə əminliyini bildirib və Serj Sarkisyanın fəaliyyətini yarıtmaz, özünü isə qeyri-ciddi şəxs adlandırıb.

Əliqismət BƏDƏLOV.

Xalq qəzeti.-2008.-27 noyabr.-S.6.