Yığmamızın ikinci qələbə sevinci

Azərbaycanın qadınlardan ibarət milli həndbol komandası Çernoqoriyada keçirilən 2009-cu il dünya çempionatının seçmə mərhələsində ardıcıl ikinci qələbə sevinci yaşamışdır. Startda bolqarıstanlı rəqiblərini məğlubiyyətə uğradan həmyerlilərimiz ertəsi gün İtaliya komandası ilə oyundan sonra da meydandan qalib ayrılmışlar — 28:25.

İkinci turun digər iki görüşündə turnir sahibləri Çernoqoriya həndbolçuları Finlandiya kollektivi üzərində qələbə qazanmış — 37:24, Sloveniya idmançıları isə bolqarlardan güclü olmuşlar — 31:20.

Bu komandalar dünya çempionatının pley-off mərhələsinə yeganə vəsiqə uğrunda 2-ci qrupda mübarizə aparırlar. İki turdan sonra turnir cədvəlinə Çernoqoriya və Azərbaycan yığmaları başçılıq edirlər. Liderlərin hərəyə 4 xalı var, lakin meydan sahiblərinin komandasında vurulan və buraxılan topların fərqi daha yaxşıdır.

Dünən turnirdə istirahət günü idi. Bu axşam keçiriləcək üçüncü turda həndbolçularımız Finlandiya komandası ilə görüşəcəklər.

Xalq qəzeti.- 2008.- 28 noyabr.- S. 8.