Bombeydə antiterror əməliyyatı keçirilib

Xəbər verildiyi kimi, noyabrın 26-da axşam saatlarında Hindistanın iri turizm mərkəzlərindən olan Bombey əyalətinin Mumbai şəhərindəki mehmanxanalardan biri terrorçular tərəfindən hücuma məruz qalmışdır. Şəhərin müxtəlif yerlərində də bir neçə partlayış qeydə alınmışdır.

Son məlumatlara görə, dəhşətli terror zamanı həlak olanların sayı artıq 130-a çatıb. Həmçinin 327 nəfərin yaralandığı bildirilir. Həlak olanların 14-ü polis işçisi, 6-sı isə xarici vətəndaşlardır. Yerli polisin verdiyi xəbərə görə mehmanxanaya hücum edən terrorçulardan 4 nəfəri öldürülüb, 9-u isə tutulub.

Bu arada verilən ən son bilgiyə görə dünən Hindistan ordusunun xüsusi təyinatlı dəstələri tərəfindən şəhərdəki elitar kompleksin terrorçulardan təmizlənməsi üçün irimiqyaslı əməliyyat həyata keçirilib. Qeyd edək ki, həmin hündürmərtəbəli binada əsasən yəhudiəsilli insanlar yaşayır. Ehtimala görə binada 10-dan çox İsrail vətəndaşı girov saxlanılır.

Onu da deyək ki, bir sıra xarici telekanallar hadisə yerindən canlı reportajlar yayımlayır. Belə ki, “Sky News” teleşirkəti binanın xüsusi təyinatlılar tərəfindən necə ələ keçirildiyini nümayiş etdirən görüntüləri yayımlayıb. Həmin kadrlarda hökumət qüvvələrinin qara maskada olduqları, həmçinin terrorçular arasında çaxnaşma salmaq üçün içəriyə tüstü buraxdıqları aydın görünür. Şəhərin polis rəisinin verdiyi informasiyaya görə aralarında çoxlu xarici ölkə vətəndaşları olan girovlara xəsarət yetirməmək üçün binaya tərəf snayperlər tuşlanıb. O da məlum olub ki, baş vermiş hadisəyə görə məsuliyyəti indiyədək məlum olmayan “Dekkan mücahiddin” adlı qruplaşma öz üzərinə götürüb. Ekspertlərin fikrincə, adıçəkilən qruplaşma “Əl-Qaidə” terror şəbəkəsi ilə əlaqədardır. Terror hadisəsi ilə bağlı xalqa müraciət edən Hindistanın Baş naziri Manmohan Sinqx onları sakit olmağa çağırıb. O, bu terror aktında əli olan hər kəsin cəzalandırılacağını bildirib.

Mumbai hadisələrindən sonra dünən Hindistanda fond birjaları açılmayıb. Hakimiyyət orqanları əhalini evlərindən çıxmamağa çağırıb. Dünya ictimaiyyəti də Hindistanda törədilən dəhşətli terror aktını kəskin pisləyib. ABŞ-ın gələcək prezidenti Barak Obama, Rusiya prezidenti Dmitri Medvedev və digər dünya liderləri də hadisəylə bağlı kəskin mövqelərini ifadə ediblər.

Mahmud QƏZƏNFƏROĞLU.

Xalq qəzeti.-2008.-29 noyabr.-S.6.