Ölkəmizin davamlı iqtisadi inkişafı texniki peşə təhsilinə xüsusi diqqət yetirməyi tələb edir

Milli təhsilimizin mühüm pillələrindən olan texniki peşə təhsilinə son illər dövlət tərəfindən böyük önəm verilir. Təsadüfi deyil ki, 2007-ci il iyulun 3-də Azərbaycan Prezidenti İlham Əliyev “Azərbaycan Respublikasında texniki peşə təhsilinin inkişafı üzrə Dövlət Proqramı” qəbul edilməsi ilə bağlı sərəncam imzalamışdır. Bu sərəncam təhsilin bu pilləsinin inkişafına böyük təkan vermiş, bu sahədə uğurlar qazanılmasına stimul yaratmışdır. Ən əsası budur ki, ictimaiyyətin peşə təhsilinə münasibəti xeyli dəyişmişdir. Bu gün ölkənin bütün texniki peşə məktəblərində aparılan islahatların nəticəsi aydın hiss olunmaqdadır. Bu islahatlar rəhbərlik etdiyim 13 saylı Bakı peşə liseyinin fəaliyyətinə də öz təsirini göstərmişdir.

Onu da qeyd edim ki, peşə təhsili islahatı ümummilli lider Heydər Əliyevin başladığı və möhtərəm Prezidentimiz İlham Əliyev tərəfindən davamlı olaraq həyata keçirilən təhsil islahatının tərkib hissəsidir. 13 saylı peşə liseyinin bu islahat nəticəsində əldə etdiyi nailiyyətlərin bəziləri barədə məlumat vermək istərdim.

1974-cü ildə 79 nömrəli orta texniki peşə mktəbi adı ilə fəaliyyətə başlayan təhsil ocağının məqsədi əsasən tikilməkdə olan Bakı məişət kondisionerləri zavodu üçün ixtisaslı fəhlə kadrlar yetişdirmək idi. Bu missiyanı məktəb xeyli müddət böyük şərəflə yerinə yetirmiş, lakin zavod fəaliyyətini dayandırandan sonra məktəbin də fəaliyyətində ciddi problemlər yaranmışdır.

Təhsil Nazirliyinin, eləcə də liseyin kollektivi çevik mexanizmlər tapa bildi və ölkənin əmək bazarının tələblərinə uyğun olaraq məktəb yenidən formalaşdırıldı. Burada yeni müasir ixtisaslar üzrə qruplar yaradıldı.

Bu gün ölkənin inkişafında prioritet sahələrdən biri olan informasiya-kommunikasiya texnologiyaları üzrə ixtisaslı kadr hazırlığı məktəbin əsas istiqamətini təşkil etdi. Beləliklə, bu təhsil ocağı az bir vaxt içərisində ölkənin qabaqcıl peşə təhsili müəssisəsinə çevrildi. Hazırda peşə liseyində kompyuter üzrə operator, mühasib-fərdi kompyuter üzrə operator, mühasib-fərdi kompyuter texnikasının sazlayıcısı, çapçı ixtisasları üzrə kadrlar hazırlanır. Daha çox ehtiyac və tələbat duyulan kompyuter texnikasının sazlayıcısı ixtisası üzrə kadr hazırlığına bu ildən başlanılmışdır. Mühasib-fərdi kompyuter operatoru ixtisası üzr həm əsas, həm də orta təhsil bazasından, digər ixtisaslar üzrə isə əsas təhsil bazasından qəbul aparırıq. Bu il liseyimizə əsas təhsil bazasında 120 nəfər, orta təhsil bazasında ödənişli qruplara 45 nəfər şagird qəbul olunub.

Hazırda liseydə 400 nəfərə yaxın şagird təhsil alır. 24 qrupda komplektləşdirilmiş həmin şagirdlərin təlim-tərbiyəsi və ixtisas hazırlığı ilə 58 nəfər müəllim və 24 istehsalat təlimi ustası məşğul olur.

1997-ci ildən mən bu təhsil ocağına rəhbərlik edirəm. 12 il ərzində məktəbin fəaliyyətinin genişlənməsi, yeni ixtisasların yaradılması, təlimin keyfiyyətinin yaxşılaşdırılması üçün bir sıra əsaslı işlər görə bilmişik. Məhz təhsil islahatının tələblərini rəhbər tutaraq keyfiyyətli kadr hazırlığını təmin etmək əsas məqsədimiz olub.

Liseyin müəllimləri və şagirdləri peşə təhsili pilləsinin müəssisələri arasında keçirilən müsabiqələrdə, olimpiadalarda, digər bilik yarışlarında fəallıq göstərmişlər. Lisey 2001-ci ildə “İlin ən yaxşı peşə təhsili müəssisəsi” respublika müsabiqəsində III dərəcəli diploma layiq görülüb. Peşə məktəbləri və peşə liseyləri şagirdləri arasında 2002, 2003, 2004, 2006-cı illərdə keçirilən olimpiadalarda məktəbimizin şagirdləri fərqlənmiş, müxtəlif dərəcəli diplomlar almışlar.

Ötən dərs ilində liseyin iki müəllimi – baş usta Taleh Babayev və usta Rabil Şahbazov Təhsil Nazirliyinin göndərişi ilə Türkiyə Respublikasının İzmir şəhərində müvafiq hazırlıq kursu keçiblər. Liseyin internet saytını da onlar Türkiyədən qayıtdıqdan sonra yaratmışlar. İlk peşə təhsili müəssisəsidir ki, özünün saytı vardır (13 bp1.com) və burada liseyimiz haqqında, müəllimlərimiz, öyrədilən ixtisaslar barədə məlumatlar vardır.

Kadr hazırlığını keyfiyyətlə aparmaq üçün peşə liseyində müvafiq maddi-tiexniki baza yaradılmışdır. İlk növbədə deyim ki, məktəbimizin əsaslı təmirə böyük ehtiyacı vardır. Doğrudur, ötən dərs ilində cari təmir işləri aparılmışsa da, biz arzulayırıq ki, məktəbimiz müasir üslubda əsaslı təmir edilsin.

Son vaxtlar fənn kabinetləri və sinif otaqları yeni avadanlıqlarla təmin olunmuşdur. Açılışına hazırlaşdığımız yeni kompyuter sinfi fəaliyyətə başlayandan sonra ixtisasların daha keyfiyyətlə öyrədilməsi mümkün olacaq. Gələcəkdə isə daha bir kompyuter otağı yaratmaq fikrindəyik. Beləliklə, hər kursun öz kompyuter otağı yaradılmış olacaq. Son illər peşə liseyinə şagirdlər fəal gəlirlər. Bu da gənclərin ixtisaslara marağı ilə izah olunmalıdır.

Liseyimizin zəngin kitabxanası var. Kitabxana ümumi orta və ixtisas təhsili üzrə dərsliklərlə tam təmin olunmuşdur. Müəllimlərimiz peşə ixtisası üzrə yeni dərsliklərin yaradılmasında yaxından iştirak edirlər.

Liseyimizdə şagirdlərin vətənpərvərlik ruhunda tərbiyə olunması istiqamətində ardıcıl iş aparılır. Qarabağ uğrunda döyüşlərdə liseyin 6 məzunu şəhid olub. Onların xatirəsini əbədiləşdirmək üçün binanın I mərtəbəsindəki foyedə şəhid məzunlara həsr olunmuş xüsusi guşə yaradılıb.

Tədris korpusunun I, II və III mərtəbələrinin dəhlizlərini bəzəyən “Təhsil millətin gələcəyidir”, “Biz onlarla fəxr edirik”, “Azərbaycan idmanı gənclərin fiziki və mənəvi sağlamlığıdır” və s. adda stendlərimiz tərbiyə vasitəsi olub, gənclərin Azərbaycan dövlətinin, onun Prezidentinin təhsilə göstərdiyi qayğı və diqqətlə tanış olmalarına, idmanı sevməyə, qabaqcıllardan nümunə götürmələrinə imkan yradır.

Bu gün ölkəmizdə təhsilə göstərilən qayğı göz qabağındadır. Son dövrlər təkcə təhsil problemlərinin həllinə yönəldilən 16 Dövlət Proqramının qəbul edilməsi bu qayğının bariz inümunəsidir. Həmin proqramlar arasında peşə təhsilinin inkişafına yönəlmiş Dövlət Proqramı 2007-2010-cu illəri əhatə edir. Proqramın reallaşması istiqamətində çox böyük tədbirlər həyata keçirilib. Təhsil Nazirliyinin texniki peşə təhsili şöbəsinin müdiri Namiq Məmmədov bu yaxınlarda keçirdikləri peşə təhsili işçilərinin yığıncağında görülmüş işlər, qarşıda duran vəzifələr barədə geniş təqdimat-məruzə etdi. Məruzədə təhsilin bu sferasında son illər əldə olunan nailiyyətlər və problemlərlə yanaşı, yeni tədris ilində görüləcək işlər barədə də məlumat verdi.

Görüləsi işlər çoxdur. Rəhbərlik etdiyim 13 saylı peşə liseyinin kollektivi də bu vəzifələrin yerinə yetirilməsinə öz layiqli töhfələrini vermək üçün bütün imkanları səfərbər etmək əzmindədir.

Mövlud HACIYEV,

13 saylı Bakı peşə liseyinin direktoru

Xalq qəzeti.-2009.- 1 noyabr.- S. 5.