Etiraf, yaxud “mən öz şəhərimi niyə tanımadım”

Yevlaxda ümumi daxili məhsulun həcmi 250,8 milyon manat olmuşdur. Bu, ötən ilin eyni dövrü ilə müqayisədə 59,3 milyon manat, yaxud 31 faiz çoxdur

...Elə bildim ki, yol yoldaşım bu yerlərə nabələddir. Ona görə də bələdçilik etmək istədim: — Bura Yevlaxdır, — dedim, — sağa burulun, yol sizi mərkəzə aparacaq... O isə sanki mənim dediklərimi eşitmirdi. Öz-özü ilə danışırmış kimi: — Elə bilməyin ki, nabələdəm. Yox, qardaş, mən əslən yevlaxlıyam. Bilirsiniz, iş ondadır ki, indi mən öz şəhərimi tanıya bilmirəm. Bəli, bəli, tanıya bilmirəm. Halbuki burdan getdiyim cəmi 5-6 il olar... Jurnalist marağı üstün gəldi. Daha doğrusu, belə maraqlı müsahib tapdığıma görə hətta sevindim. Qərara aldım ki, bir az əvvəl tanış olduğum bu insanın, necə deyərlər, tarixçəsi ilə daha yaxından tanış olum, hardan gəlib hara getdiyini öyrənim...

Yolumuz şəhərin mərkəzinə, Heydər Əliyev prospektinə düşdü. Müsahibim o qədər sürətlə addımlayırdı ki, sözün düzü onunla ayaqlaşmaq çətin idi. Onu gördüyü mənzərələr, yeni binalar, park və xiyabanlar, bulaq və fəvvarələr sözün həqiqi mənasında, heyran etmişdi. Bunu onun gözlərindən, çöhrəsindən aydın hiss etmək mümkün idi. Dəmiryol vağzalına çatanda nəyi isə dəqiqləşdirirmiş kimi:

— 55 yeni bina saydım, — dedi.— Küçələr gör nə qədər genişləndirilib. Elə binalara, elə arxitektura nümunələrinə rast gəldim ki, bunu ancaq xarici ölkələrdə görmüşəm. Daha doğrusu, burda milliliklə, dünyəvilik üzvi surətdə birləşib. İndi bilirsinizmi, mən nə üçün doğulduğum, 50 il yaşadığım doğma Yevlaxı tanıya bilmədim. Məni qınamayın. Bu sürətə, bu gözəlliyə, bu zövqə heyran qalmışam.

Yüngülcə müsahibimin qoluna toxundum, zarafatla:

— Sizi qınamıram, eloğlu, — dedim. — İndi heç bizim özümüz də Yevlaxı tanıya bilmirik...

Sonra öyrəndim ki, həmsöhbətim Ələmdar Mustafayev 6 il bundan əvvəl münasib iş tapa bilmədiyindən ailəsi ilə köçüb Rusiyaya gedib. O vaxtdan birinci dəfədir ki, doğma şəhərinə gəlib.

— Son illər Yevlaxda görülmüş tikinti-abadlıq, quruculuq işləri, hərtərəfli inkişaf və yüksəliş barədə çox eşitmişdim. İndi gəldim, gördüm. Artıq elə bu dəqiqədən qərarımı da dəqiqləşdirmişəm: Köçüb gələcəyəm. Axı, kim belə şəhərdə yaşamaq istəməz. — Sonra da köksünü ötürüb məşhur bayatının bir misrasını pıçıldadı. — Aləm cənnətə dönsə, yaddan çıxmaz Qarabağ...

Ələmdar Mustafayevla sağollaşdıq və ayrılarkən şərtimiz belə oldu: köçüb Yevlaxa qayıdandan sonra əməlli-başlı tanış olarıq, bəlkə hələ qəzet üçün bir yazı da hazırladıq.

Yevlaxa budəfəki səfərim bax, belə bir xoş təsadüflə, isti əhval-ruhiyyə ilə başladı. Məqsədim isə ölkə Prezidenti İlham Əliyevin sədrliyi ilə Nazirlər Kabinetinin 2009-cu ilin doqquz ayının sosial-iqtisadi inkişafının yekunlarına həsr olunmuş yığıncaqda qarşıya qoyulmuş vəzifələrin müzakirəsi ilə bağlı Yevlaxda keçirilən toplantıdan yazı hazırlamaq idi.

Dinamik inkişaf davam edir

Yevlax Şəhər İcra Hakimiyyətinin başçısı Elmar Vəliyevin məruzəsində səslənən belə bir fikir yığıncağın bütün məqsəd və istiqamətini çox gözəl ifadə edirdi: “Yevlaxlılar respublika Prezidenti cənab İlham Əliyevin son 5 ildə 3 dəfə şəhərimizə səfər etməsini, keçirdiyi unudulmaz görüş və söhbətləri yüksək qiymətləndirir, dərin minnətdarlıq hissi ilə xatırlayırlar. Həmin səfərlər zamanı ölkə rəhbərinin qarşıya qoyduğu məsul vəzifələr, göstəriş və tövsiyələri fəaliyyətimizin əsas istiqamətini təşkil etmiş, bizi daha yaxşı işləməyə ruhlandırmış, bütün imkan və səylərimizi səfərbər etmişdir”.

Görülmüş işlər, əldə edilmiş konkret nəticələr isə göz qabağındadır. Yığıncaqda da qeyd edildiyi kimi, əlamətdar haldır ki, Yevlaxda son 5 ildə götürülmüş və həyatımızın bütün sahələrini əhatə edən inkişaf və yüksəliş xətti, tikinti-abadlıq və quruculuq işləri cari ilin ötən 9 ayında da eyni sürət və keyfiyyətlə davam etdirilmişdir. Şəhərsalma mədəniyyətinin ən yüksək tələblərinə cavab verən yüksək zövq və müasirlik, milli arxitektura elementlərinə ciddi əməl edilməsi bu gün Yevlaxı nəinki ölkəmizin, hətta dünyanın ən gözəl, müasir və yaraşıqlı şəhərlərindən birinə, onu regionun mərkəzinə çevirmişdir. Gəlin hesabat məruzəsində səslənən bəzi fakt və rəqəmlərə diqqət yetirək.

2009-cu ilin doqquz ayında ümumi daxili məhsulun həcmi 250,8 milyon manat olmuşdur. Bu isə 2008-ci ilin doqquz ayına nisbətən 59,3 milyon manat, yaxud 31 faiz çoxdur. Ümumi daxili məhsulun 94,5 faizi qeyri-dövlət sektorunda istehsal olunmuşdur. Bunun 7,8 milyon manatını sənaye, 68,7 milyon manatını kənd təsərrüfatı, 43 milyon manatını tikinti, 103,9 milyon manatını ticarət, 2,8 milyon manatını nəqliyyat və s. təşkil etmişdir. İstehsal olunmuş 3506,5 min manatlıq sənaye məhsulu ixrac olunmuşdur. 2009-cu ilin 9 ayında hər nəfərə 2123,3 manat ümumi daxili məhsul istehsal olunmuşdur ki, bu da 2008-ci ilin 9 ayına nisbətən 489 manat və yaxud 30 faiz çoxdur.

Aqrar sahə

Qeyd edildiyi kimi, hesabat dövründə 68,7 milyon manatlıq kənd təsərrüfatı məhsulları istehsal olunmuşdur ki, bu da əvvəlki illə müqayisədə 2,6 faiz çoxdur.

Azərbaycan Respublikasının Prezidenti cənab İlham Əliyevin 23 yanvar 2007-ci il tarixli “Kənd təsərrüfatı məhsulları istehsalçılarına dövlət dəstəyi haqqında” sərəncamına uyğun olaraq 2856 nəfər buğda istehsalçılarına 424 min manat dövlət yardımı, torpaq mülkiyyətçilərinə 80 tondan çox mineral gübrə güzəştli şərtlərlə satılmışdır. Nəticədə bu ilin məhsulu üçün 5367 hektar çox sahədə taxıl əkilmişdir ki, bundan da 4881 hektarı buğdadır. Keçən ilin müvafiq dövrü ilə müqayisədə 16814 ton taxıl istehsal olunaraq 43870 tona çatmışdır. Bu, 2008-ci ildəkindən 16814 ton çoxdur. Cari ilin məhsulu üçün 9209 nəfər kənd təsərrüfatı məhsulları istehsalçılarına 1 milyon 287,5 min manat yardım ödənilməsi üçün sənədlər hazırlanıb respublika komissiyasına təqdim edilmişdir.

Keçən ilin doqquz ayı ilə müqayisədə mal-qaranın baş sayı 271 baş, qoyun və keçilərin baş sayı 1933 baş, quşların sayı isə 323 baş artmışdır. 2009-cu ilin doqquz ayında 2008-ci ilin eyni dövrü ilə müqayisədə 79,7 ton ət, 67,4 ton süd, 117,9 min ədəd yumurta, 4 ton yun çox istehsal edilmişdir.

Rayonda mövcud hidrotexniki qurğular, meliorasiya və irriqasiya şəbəkəsi keçən əsrin 60-cı illərində tikilmişdir və istismar müddətini keçmişdir. Əsaslı təmir və bərpa işləri aparılmadığından onlar yararsız vəziyyətə düşmüşdür. Ona görə də qurunt sularının üzdə olduğu və şorlaşmaya meyilli olan torpaqlarda sahələrin məhsuldarlığı aşağıdır və qoyulmuş vəsait öz bəhrəsini vermir. Rayonda bütün meliorasiya və irriqasiya şəbəkəsi, hidrotexniki qurğular yenidən qurulmalıdır. Ona görə də cənab Prezidentin 14 aprel 2009-cu il tarixli sərəncamı ilə təsdiq edilmiş “Azərbaycan Respublikası regionlarının 2009-2013-cü illərdə sosial-iqtisadi inkişafı Dövlət Proqramı”nda bu işlərin görülməsi nəzərdə tutulmuşdur.

Tikinti, quruculuq, abadlıq

2009-cu ilin 9 ayında bütün maliyyə mənbələri hesabına şəhərdə və rayon ərazisində kapital qoyuluşunun həcmi 134,5 milyon manat olmuşdur. Bu 2008-ci ilin müvafiq dövrünə nisbətən 8,8 milyon manat və yaxud 7 faiz çoxdur.

2009-cu ilin 9 ayında kapital qoyuluşunun 102,6 milyon manatı əsas kapitala yönəldilmişdir. 2008-ci ilin müvafiq dövrünə nisbətən əsas kapitala 5,4 milyon manat və yaxud 5,5 faiz çox investisiya qoyulmuşdur.

Heydər Əliyev, Nizami prospektlərində, S.Vurğun, Zərdabi, Q.Qanrayev, C.Kərimov, Y.Misirov, Bakı, İ.Əfəndiyev, C.Cabbarlı küçələrində 9,6 kilometr avtomobil yolu asfaltlanmışdır.

C.Mustafayev, Füzuli və S.Vurğun küçələrində avtomobil yolu 4-6 metr genişləndirilməklə 16 metrə çatdırılaraq əsaslı təmir edilmiş, 4,2 kilometr yeni səki salınmışdır. C.Cabbarlı küçəsində genişləndirmə işləri aparılaraq səkilər salınmış, yaşayış binalarının ətrafında abadlıq işləri görülmüşdür.

Hazırda şəhərin şərq hissəsində — Bakı—Ələt—Qazax avtomobil yolundan Kür çayı sahilinə yeni yol salınır. Yolun kənarına üzlük daşla üzlənmiş hasar çəkilir. Ərazidə geniş abadlıq işləri görülür.

Şəhərin 14, 15, 17, 18, 25 və 310-cu məhəllələrini əhatə edən 42 ictimai yaşayış binalarının həyətində geniş abadlıq-quruculuq işləri aparılmış, qeyri-qanuni tikilmiş əlavələr sökülmüş, sakinlər üçün 6 yeni nümunəvi yaşayış məhəllələrinin salınmasına başlanmışdır.

Hesabat dövründə prospekt və küçələrdə 8864 poqonometr səki daşları düzülmüş, səkilərə 7381 kvadratmetr dekorativ piltə, 14 milyon kvadratmetr asfalt örtüyü salınmışdır.

Heydər Əliyev prospektində 58, Nizami prospektində 70, C.Mustafayev küçəsində 51, S.Vurğun küçəsində 31, C.Cabbarlı küçəsində 25, Bakıxanov küçəsində 21, cəmi 236 müasir işıqlandırma dayaqları quraşdırılmışdır.

Yevlax şəhərindən keçən İpək yolunun tikintisi başa çatmaq üzrədir. Yolun şəhərə giriş hissəsindən başlayaraq Nərimanabad kəndinədək olan 10 kilometr ərazidə 306 dirək quraşdırılmışdır. Nizami prospektinin C.Əzizov küçəsi ilə kəsişməsində aparılan abadlıq yekunlaşmaqdadır. Ərazidə açıq havada muzey tikilir. Həmin prospekdə 68 fərdi yaşayış evlərinin, S.Vurğun küçəsində 28 fərdi evin dam örtüyünə kirəmit vurulmuş, Nizami prospekti, S.Vurğun, Zərdabi və C.Cabbarlı küçələrində 101 fərdi yaşayış evlərinin 42,2 min kvadratmetr fasadları suvanmış və rənglənmişdir.

Hazırda Kür çayının sağ sahilində istirahət zonası tikilir. Əraziyə torpaq daşınmış, dəmir-beton dayaqlar quraşdırılmışdır. Şəhərdən çıxan yağış, sel və çirkab sularının Mil-Qarabağ kollektoruna axıdılması üçün nasos stansiyası tikilir, ərazidə geniş abadlıq işləri görülür. Beləliklə uzun müddət şəhər sakinlərini narahat edən problem aradan qaldırılacaqdır.

Yevlax şəhərində və rayon ərazisində geniş yaşıllaşdırma işləri aparılmış, yaz mövsümündə 395,6 min ədəd müxtəlif bəzək, dekorativ və müxtəlif növ ağaclar əkilmişdir. Şəhərin prospekt, küçə, park və xiyabanlarına 78 min ədədən çox, o cümlədən Heydər Əliyev prospektinə 52,8 min ədəd, Nizami prospektinə 18 min ədəd ağac basdırılmışdır.

Şəhərin qərb hissəsində K.Sabitov küçəsi boyunca bataqlığın qurudulması işləri davam etdirilir. Artıq 10 hektara yaxın ərazinin bataqlığı qurudulmuşdur. Ərazidə abadlıq işləri aparılacaqdır.

Ötən müddətdə yolların təmir olunmasına da xüsusi diqqət yetirilmişdir. Rayon ərazisindən keçən 20,9 kilometr respublika əhəmiyyətli, 22,1 kilometr yerli əhəmiyyətli yollar əsaslı təmir olunaraq asfaltlanmışdır.

Yuxarı Qarxun, Qoyunbinəsi, Ərəbbəsrə, Qaramanlı, Havarlı, Tanrıqulular, Xaldan, ümumən 15 kənddə 52,4 kilometr yola çınqıl daşınaraq hamarlanmışdır.

Sosial ehtiyaclar diqqət mərkəzindədir

İçməli su

Əhalinin içməli suya olan tələbatının yaxşılaşdırılması məqsədi ilə rayonun Aran qəsəbəsində və Aşağı Bucaq, Yuxarı Bucaq, Duzdaq kəndlərində su təmizləyici qurğular istifadəyə verilmişdir. Həmin kəndlərdə 29,5 kilometr su xətti çəkilmiş, 36 bulaq tikilmişdir. Ümumiyyətlə, rayonun 14 kəndində su təmizləyici qurğular quraşdırılmışdır. Şəhərdə 4,2 kilometr uzunluğunda içməli su xətləri çəkilmişdir.

Şəhərin Heydər Əliyev prospektində, Nizami prospektində, Füzuli, Bakıxanov, Axundov, E.Məmmədov, C.Kərimov, F.Xoyski, M.Rəsulzadə, H.Hacıyev, Z.Tağıyev, S.Əliyev küçələrində, 31-ci məhəllədə və digər ərazilərdə 4180 metr kanalizasiya xətləri çəkilmişdir. Ümumiyyətlə, 2004—2009-cu illərdə şəhərdə 21,1 kilometr yeni kanalizasiya xətti çəkilmiş, əlavə 4 nasos stansiyası tikilmişdir. Nəticədə əvvəllər müşahidə olunan su yığımı təhlükəsi aradan qaldırılmışdır. Hətta bu yaxınlarda normadan 6-7 dəfə çox yağan leysan yağışlar zamanı da şəhərin ərazisində demək olar ki, gölməçələr yaranmadı və bu, bir daha onu sübut edir ki, vaxtında çox düzgün tədbirlər həyata keçirilmişdir.

Elektrik enerjisi

Həyata keçirilən əsaslı tədbirlər nəticəsində elektrik hava xətlərində yenidənqurma, əsaslı təmir və bərpa işləri aparılmış, 88 kilometr kabel xətti çəkilmiş, 2959 ədəd dəmir beton dirəklər dəyişdirilmişdir. 26,2 kilometr elektrik xətləri əsaslı qurulmuş, 33,6 kilometr xətt isə təmir olunmuşdur.

Şəhərdə “Smart” tipli sayğacların quraşdırılması davam etdirilmişdir. Nəzərdə tutulan 11324 sayğacdan 10526-sı (92,7 faiz) quraşdırılmışdır. 108 ticarət, xidmət və digər obyektlərə də “Smart” tipli sayğaclar qoyulmuşdur.

2009-cu ilin 9 ayında yerli əhali üzrə elektrik enerjisinin dəyərinin ödənilməsi 101 faiz tşkil etmişdir. Cari ilin yanvar-sentyabr aylarında 2008-ci ilin müvafiq dövrünə nisbətən şəbəkə üzrə 15,1 min kv.saat enerjiyə (121 min manat) qənaət edilmişdir.

Təbii qaz

Həyata keçirilən tədbirlər nəticəsində Yevlax rayonunda 2 qazpaylayıcı stansiya tikilmiş, 1 qazpaylayıcı stansiya əsaslı təmir-bərpa edilmiş, stansiyalardan şəhərə və kəndlərə orta təzyiqli daşıyıcı xətlər çəkilmiş, kənddaxili qaz xətləri əsaslı təmir və bərpa olunmuşdur. Eyni zamanda, istehsalat müəssisələrinin təbii qaz təminatı üçün orta təzyiqli sənaye qaz xətti çəkilmişdir.

Beləliklə, Yevlax şəhərinin və rayonun 9 kəndinin təbii qaz ilə təchizatı həll edilmişdir.

9 ay ərzində əhali tərəfindən qazın dəyərinin ödənilməsinin həcmi artmışdır. Belə ki, 9 ayda 567 min manat ödəmə aparılmışdır ki, bu da keçən ilin müvafiq dövrünə nisbətən 185 min manat və ya 48,4 faiz çoxdur. Ümumi qaz istismar idarəsi üzrə ödəmələrin həcmi 9 ayda 709 min manat olmuşdur. Bu da keçən ilin müvafiq dövrünə nisbətən 203 min manat və ya 40 faiz artıqdır.

Təhsil, səhiyyə, mədəniyyət

Azərbaycan Respublikasının Prezidenti cənab İlham Əliyevin diqqət və qayğısı sayəsində rayonun təhsil müəssisələri öz yeni inkişaf, tərəqqi dövrünü yaşayır. Son illər rayonda təhsilin maddi-texniki bazasının möhkəmləndirilməsi, kadr potensialının gücləndirilməsi, təhsilin məzmununun yeniləşməsi, təlimin müasir tələblər baxımından təşkili, təhsilə münasibətdə müasir düşüncə tərzinin formalaşması istiqamətində əsaslı uğurlar əldə olunmuşdur.

Ölkə Prezidentinin 30 sentyabr 2009-cu il tarixli sərəncamı ilə şəhər 1 saylı orta məktəbin müəllimi Qiyas Quliyevə “Əməkdar müəllim” fəxri adının verilməsi, Yuxarı Qarxun kənd orta məktəbinin direktoru Ruqiyyə Əbdürrəhmanovanın “Tərəqqi” medalı ilə təltif edilməsi Yevlax ziyalılarına göstərilən diqqət və qayğının bariz nümunəsidir.

2009-cu il mart ayının 2-də ölkə Prezidenti cənab İlham Əliyevin Yevlaxa səfəri, bir sıra yeni tikilmiş müəssisələrlə yanaşı, şahmat məktəbinin açılışında iştirak etməsi, idmançıların qazandığı uğurlarla maraqlanması hər bir təhsil işçisinin məsuliyyətini daha da artırmışdır.

Respublika təhsil naziri Misir Mərdanovun, ali məktəb rektorlarının, görkəmli elm xadimlərinin, millət vəkillərinin iştirakı ilə 2009-cu ilin may ayında şəhər 8 saylı orta məktəbin əsaslı təmirdən sonra açılışı olmuşdur. Yevlax Şəhər İcra Hakimiyyətinin dəstəyi ilə icma layihəsi əsasında Nemətabad kənd uşaq bağçası və Nemətabad kənd orta məktəbinin idman zalı əsaslı təmir edilmiş, məktəbin və bağçanın həyəti abadlaşdırılmışdır. Hazırda Uşaq Gənclər İdman Məktəbinin ikinci korpusunda əsaslı təmir və bərpa işləri davam etdirilir. Cırdaxan kəndində 180 şagird yerlik məktəb binasının tikintisinə başlanılmışdır.

Məktəblərin dərslik və əyani tədris vasitələri ilə təmin edilməsi istiqamətində ardıcıl işlər görülmüşdür. Bu il 70 adda 51.178 nüsxə dərslik və vəsait, 36 adda 4854 nüsxə bədii ədəbiyyat alınmışdır. 4 fənn üzrə 612 ədəd elektron dərslik, 660 ədəd elektron dərsliklərin vəsaitləri, test kitabçaları, həmin fənlər üzrə 3200 nüsxə plakat alınmışdır. Məktəblər yeni inventarlar və avadanlıqlarla da təchiz edilmişdir. Məktəbəqədər təhsil müəssisələri üçün 37 adda 925 nüsxə plakat, 42 adda müxtəlif yaş qrupu üzrə 994 nüsxə test kitabçaları gətirilmişdir.

2008—2009-cu dərs ilində orta ümumtəhsil məktəblərini bitirmiş 929 nəfər şagirddən 707 nəfəri ali məktəblərə sənət vermiş, 226 nəfər ali məktəblərə qəbul olunmuşdur ki, onlardan 165 nəfəri 2009-cu ilin, 61 nəfəri isə əvvəlki illərin məzunlarıdır. Məzunlardan 2 nəfəri 600-dən, 19 nəfəri isə 500-dən çox bal toplamışdır.

2009-cu ildə məzunların ali məktəblərə qəbuluna görə ən yaxşı nəticəni şəhər 4, 5, 7, 8, 9, Aran qəsəbə 1 və 2 saylı, Qoyunbinəsi, Gülöyşə Hacıselli, Xaldan kənd məktəbləri göstərmişlər.

Hesabat dövründə müasir tibbi avadanlıqları ilə təchiz edilmiş şəhər uşaq xəstəxanası istifadəyə verilmiş, xəstəxananın açılış mərasimində Azərbaycan Respublikasının Prezidenti cənab İlham Əliyev və ölkənin birinci xanımı Mehriban Əliyeva iştirak etmişdir.

Rayonun səhiyyə müəssisələrində əhaliyə göstərilən tibbi xidmətin səviyyəsinin yüksəldilməsi istiqamətində tədbirlər davam etdirilmişdir. Bu ilin 9 ayı ərzində Mərkəzi şəhər xəstəxanasının mətbəxində təmir işləri başa çatmışdır. Hazırda reanimasiya və ginekologiya şöbələri üçün əsaslı təmir işləri aparılır. Xəstəxananın ayrı-ayrı şöbələri üçün 16,1 min manatlıq avadanlıq alınmışdır.

Yoluxucu xəstəliklərə qarşı mübarizə tədbirləri gücləndirilmiş, ilin 9 ayında 146 min kvadratmetr sahədə dezinfeksiya işləri aparılmışdır. Həyata keçirilən tədbirlər nəticəsində brüselloz və malyariya xəstəlikləri, qida zəhərlənməsi halları baş verməmişdir.

2009-cu ilin mart ayının 2-də Azərbaycan Respublikasının Prezidenti cənab İlham Əliyevin iştirakı ilə şəhərdə teatr binasının açılışı Yevlaxın mədəni həyatında böyük və yaddaqalan hadisə olmuşdur. Son illərdə olduğu kimi 2009-cu ilin 9 ayı ərzində də əhaliyə göstərilən xidmətin səviyyəsinin yüksəldilməsi istiqamətində bir sıra ardıcıl tədbirlər həyata keçirilmişdir.

Şəhərdə ən müasir tələblərə cavab verən elektron kitabxana tikilib istifadəyə verilmiş, 9 ay ərzində kitabxanalara 4200 nüsxə yeni bədii, elmi-publisistik kitablar verilmişdir.

Respublikanın tanınmış incəsənət ustalarının iştirakı ilə şəhərin Heydər Əliyev sarayında və xiyabanında, Xalq Teatrının binasında konsert və teatr tamaşaları, konsert proqramları təşkil olunmuşdur.

Sabaha açılan pəncərə

Bir dəfə yazmışdıq, bir də yazırıq: Yevlaxda inkişaf və yüksəlişin dinamikası aylarla, illərlə yox, az qala günlərlə, saatlarla ölçülür. Bunu son illər həyata keçirilmiş əsaslı tədbirlər, tikinti-quruculuq və abadlıq işlərinin həcmi bir daha sübut edir.

Daha bir xarakterik və nümunə olası cəhət isə ondan ibarətdir ki, Yevlaxda ilk gündən götürülmüş xətt, müəyyən edilmiş istiqamət, daha dəqiq desək, sürət və keyfiyyət azalmır, zəifləmir, əksinə daha geniş vüsət alır, həyatımızın bütün sahələrini əhatə edir.

Yeri gəlmişkən, hazırda burada tikintisi sürətlə davam etdirilən müxtəlif təyinatlı obyektlərdən bəzilərinin adlarını bir daha xatırlatmaq istəyirik: “Lalə tekstil” MMC-nin ikinci növbəsi", “Lalə kemikal” yuyucu tozlar zavodu, 235 çarpayılıq mərkəzi rayon xəstəxanası, Fövqəladə Hallar Nazirliyinin regional idarəsi, Dövlət Miqrasiya Xidmətinin qanunsuz miqrantların saxlama məntəqəsi, 5 ulduzlu otel, MTN-nin şəhər şöbəsi üçün inzibati bina, Beynəlxalq Bankın şəhər filialı, Mərkəzi Bankın ərazi idarəsi, şəhid və Qarabağ müharibəsi əlillərinin ailələri üçün 36 mənzilli yaşayış binası, Nizami prospektində açıq havada muzey kompleksi, 2 yeni şadlıq evi, baytarlıq idarəsi üçün inzibati bina, “Azərtoxum” MMC-nin müasir tipli kompleksi, Kür çayının sahili boyu yeni bulvar kompleksi... Biz hələ bu siyahıya hazırda əsaslı təmir və yenidənqurma işləri aparılan, yaxın müddətdə tikintisinə başlanacaq obyektləri daxil etmirik.

Bəli, bu gün Yevlaxda həyatın axarı gurdur. Çevik, yaradıcı, qaynar iş üslubu, təşkilat-idarəetmə məsələlərində yenilik, daha çox elmi münasibət, sağlam mənəvi-psixoloji mühit mövcuddur. Görüşdüyüm, söhbət etdiyim şəhər sakinləri bildirdilər ki, hər gün böyüyən, müasirləşən bu şəhərin sakini olduqlarından qürur və iftixar hissi keçirir, onu daha abad və yaraşıqlı görmək üçün səy, imkan və bacarıqlarını əsirgəmirlər. Heç şübhəsiz, 2004—2009-cu illərdə olduğu kimi, qarşıdakı beş ildə də Azərbaycan Respublikasının Prezidenti cənab İlham Əliyevin rəhbərliyi, gündəlik diqqət və qayğısı nəticəsində nəzərdə tutulan vəzifələr uğurla həyata keçiriləcək, həyat daha gözəl, firavan və mənalı olacaqdır...

Ziyəddin Sultanov

Xalq qəzeti.- 2009.- 3 noyabr.- S. 5.