İsmayıllı: Dağlar qoynundakı inkişaf müstəqil Azərbaycanın böyük uğurlarının nəticəsidir

Hərtərəfli müasirləşmə, sosial rifah və tolerantlıq nümunəsi belə düşünməyə əsas verir

Mənə verilən məlumata görə, son beş il ərzində İsmayıllıda iqtisadiyyat təxminən üç dəfə artmışdır. Bu, onu göstərir ki, rayonun imkanlarından səmərəli istifadə olunur və Azərbaycanın bütün regionlarında olduğu kimi, burada da yaxşı nəticələr vardır.

İlham Əliyev,

Azərbaycan Respublikasının Prezidenti

Ulu öndər Heydər Əliyev kimi, Azərbaycan Prezidenti İlham Əliyevin də respublikanın müxtəlif bölgələrinə hər səfəri sadə insanlar tərəfindən yüksək qiymətləndirilir. Siyasətçilər bu səfərin siyasi əhəmiyyətindən, iqtisadçılar iqtisadi cəhətindən, biz qələm sahibləri isə gördüyümüz faktlardan, eşitdiyimiz rəqəmlərdən, şahidi olduğumuz proseslərdən yazırıq. Sadə adamları isə ilk növbədə öz rayonlarının imici, nüfuzu, şöhrəti maraqlandırır. Dövlət başçımızın İsmayıllıya səfəri zamanı bir daha bu məqamın şahidi olduq. Respublikanın əməkdar müəllimi Şəfaqət Rəsulov Prezidentin bu rayona növbəti səfərindən məmnunluğunu bu şəkildə ifadə etdi: — Bilirsinizmi mən niyə cənab İlham Əliyevin İsmayıllıya tez-tez gəlməsini arzulayıram, çünki onun ayağı dəyən istənilən rayon, kənd cənnətə dönür.

Prezidentin bütün rayon və şəhərlərə səfərindən hazırlanmış televiziya verilişlərinə baxıram. Prezident səfərlərin hamısında “mən gələn il bir də gələndə”, “növbəti səfərim zamanı daha böyük obyektlərin açılışı olacaq” və başqa ifadələr işlədir. Doğrudan da, həmin rayona bir müddətdən sonra yenidən gəlir. Bu isə ölkənin bütün regionlarının bərabər şəkildə inkişafına səbəb olur. Amma insaf naminə deyək ki, İsmayıllı rayonu, xüsusən, şəhərimiz son dörd ildə, yəni Prezidentin ötən səfərindən sonra digər rayonların hamısına nisbətən daha çox inkişaf edib. Dövlət televiziyası müxtəlif verilişlər arasında ölkənin şəhər və rayonlarından hazırlanmış kiçik görüntülər verir. Mən həmişə öz-özümə sual verirdim ki, bəs bizim rayon barədə elə görüntülər niyə verilmir? Son dörd ildə İsmayıllıda yaradılmış cah-cəlalı görəndə tam əmin oluram ki, bizim rayonun təbii gözəllikləri ilə yanaşı insan əli ilə yaradılmış gözəlliklər də həmin görüntülər sırasında daimi yer tutacaqdır.

Mican kəndinin sakini, fermer Ramin Rəsulov isə daha təəssübkeş imiş. Mənim iki il qabaq Qəbələ rayonundan hazırladığım bir qəzet materialını yada salan fermer dostum — İsmayıllıdakı əsas həmsöhbətlərimdən biri maraqlı fikirlər söylədi. Daha doğrusu, açıq-açığına “yerlibazlıq etdi”: — İki il qabaq cənab Prezident İlham Əliyev Qəbələyə səfər edəndə siz — İlqar Həsənov “Xalq qəzeti”ndə yazmışdınız ki, dövlət başçımız bölgələrə səfəri zamanı bir dəfə Ağdaşda yerli camaatla çayxanada oturub çay içmişdi. İndi, xahiş edirəm, qəzetinizin növbəti saylarından birində yazın ki, Prezident İlham Əliyev İsmayıllının İvanovka kəndində, ağac kölgəsində kənd adamları ilə oturub özü və sakinlər üçün maraqlı olan geniş bir söhbət etdi. Yazın ki, son illər İsmayıllı özünəməxsus nüfuzu və imici olan bir rayona çevrilib.

Dostum ərkyana, israrla təklif irəli sürəndə haqlı idi. Mən isə ona nisbətən iki dəfə haqlıyam — onun yada saldığı iki il əvvəlki yazını qələmə alanda da haqlı idim, indi İsmayıllının cah-cəlalı barədə söz açarkən onun təklifini yerinə yetirəndə də. Ancaq hər ikimizə nisbətən İsmayıllının misilsiz inkişafına imza atan adamlar daha çox haqlıdırlar. Onlar bir tərəfdən dövlətin və dövlət başçısının tapşırıqlarını yerinə yetirirlər, bir tərəfdən yerli əhalinin arzu-istəklərini reallaşdırırlar, o biri tərəfdən də zamanın çağırışına səs verərək milli tariximizdə öz izlərini qoymağa çalışırlar. Məsələn, 50 ildən sonra Azərbaycan tarixinin 2005-2010-cu illəri barədə söz açan, yaxud 30-40 ildən sonra Azərbaycanda Olimpiya hərəkatının tarixini qələmə alan mütəxəssislər yazacaqlar ki, Azərbaycanın dilbər guşələrindən olan İsmayıllıdakı “Olimpiya-İdman Kompleksi” Prezident İlham Əliyevin respublikaya rəhbərlik etdiyi dövrdə tikilmişdir. Yəni, tikən, quran, yaradan adamların əl izləri tarixdə yaşamaq haqqı qazanır.

Yeri gəlmişkən, dövlət başçımızın İsmayıllıya səfəri zamanı rayon icra hakimiyyətinin başçısı ilə görüşüb söhbət etmək mümkün də deyildi və biz buna cəhd də etmədik. Amma başçının müavini Rövşən Ağayev həmişəki kimi yenə də jurnalistlərin istənilən sualını cavablandırmağa hazır idi:

— Dövlət başçısının İsmayıllıya səfəri bizim üçün bir neçə cəhətdən əhəmiyyətlidir. Birinci, bu səfər o deməkdir ki, cənab dövlət başçısı İsmayıllıda həyata keçirilmiş sosial-iqtisadi yönümlü tədbirləri yüksək qiymətləndirir. İşimizdə hansısa yarımçıq cəhət olsaydı, Prezident bu rayona səfər etməzdi. İkinci, dövlət başçısının bu səfəri bizim növbəti illərdəki inkişafın təməlinin qoyulması baxımından böyük əhəmiyyətə malikdir. Cənab İlham Əliyev rayonumuzda istənilən çıxış və nitqində görülmüş işləri yüksək qiymətləndirməklə yanaşı, qarşıda duran vəzifələri də konkret şəkildə ifadə etdi. Üçüncü, bu gün dünyanın bütün guşələrində sivilizasiyalararası münasibətlər üzrə mütəxəssislər yazırlar ki, Azərbaycan dünyada ən tolerant ölkədir. Yəni, müxtəlif dinlərin və millətlərin nümayəndələri Azərbaycanda tam sərbəst yaşayır, milli-mənəvi dəyərlərini qoruyub saxlayır, mədəniyyətlərini inkişaf etdirir, ibadətlərini istənilən şəkildə yerinə yetirirlər. Prezidentin İsmayıllıya səfəri zamanı bir daha bu faktın şahidi olduq. İvanovka kəndində malakan süfrəsinə qonaq olan Prezidentin yerli əhali ilə səmimi söhbəti yəqin ki, ölkənin və regionun mətbuatında özünə yer tutacaqdır. İvanovkalılar öz həyatlarından və İsmayıllıda onlara göstərilən münasibətdən dönə-dönə razılıq etdilər. Düşünəndə ki, bu şəraitin yaradılmasında rayon rəhbərliyinin də xidməti vardır, onda bir məqamla fəxr etmək haqqımız yada düşür: Azərbaycanın bütün dünyada tolerant ölkə kimi tanınmasında bizim də payımız vardır. Yəni, İsmayıllı inkişafın və ictimai-siyasi durumun səviyyəsinə görə ölkəmizin kiçik variantını xatırladır.

İcra başçısının müavini həyata keçirilmiş tədbirlərdən, xüsusən, Heydər Əliyev Mərkəzinin yüksək səviyyədə tikilib istifadəyə verilməsi üçün həyata keçirilən uzunmüddətli tədbirlərdən, ulu öndərin adını daşıyan mədəniyyət və istirahət parkında aparılmış yenidənqurma işlərindən, akademik Zərifə Əliyeva adına parkda sakinlər üçün yaradılmış şəraitdən, dövlət başçısının səfəri zamanı istifadəyə verilən İsmayıllı Olimpiya İdman Kompleksinin imkanlarından, rayon mərkəzi ilə yanaşı, bütün kəndlərdə həyata keçirilən tikinti-quruculuq işlərindən, infrastrukturun yeniləşdirilməsindən əhatəli şəkildə söz açdı. Ancaq bir məsələ ətrafında xüsusilə dayanmağı vacib saydı:

— Siz jurnalistlər bəzən yazırsınız ki, filan şəhərdə və ya rayonda tarix yaradılır. Biz şəhər və rayon məsulları isə tarix yaratmaqla yanaşı, mövcud tarixi irsin qorunmasına da böyük diqqət ayırırıq. Məsələn, İsmayıllının geniş turizm imkanlarını nəzərə alaraq rayonumuzda mehmanxanalar tikilir. “Cavanşir Qala” adlı mehmanxananı biz İsmayıllının istənilən yerində tiksəydik, məqsədəuyğun olardı. Çünki bu rayonun hər qarışı Cavanşir yurdudur. Ancaq biz bu tikintinin məhz Talıstan kəndində — Cavanşir qalasının qalıqlarının yanında inşa edilməsinə nail olduq. Beləliklə, hər iki turizm ünvanı bir-birinə yaxın oldu. 11 mərtəbəli əsas korpusda 180 adi və lüks otaq, 500 nəfərlik konfrans mərkəzi, 2 əsas restoran, qapalı və açıq hovuz, idman zalı və digər vacib xidmət obyektləri vardır.

Həmsöhbətimiz bütün bunlarla yanaşı, sosial-iqtisadi sahəyə aid olan bəzi konkret rəqəmləri və faktları da yada salmağı unutmadı: – Azərbaycan Respublikası regionlarının sosial-iqtisadi inkişafı Dövlət Proqramının 2004-2008-ci illəri əhatə edən birinci mərhələsinin icrası çərçivəsində rayonda geniş abadlıq və quruculuq işləri aparılıb. Ümumi məhsul buraxılışı 2003-cü ilə nisbətən 2008-ci ildə 2,9 dəfə artıb. Sənaye məhsulu istehsalı 1,6 dəfə, kənd təsərrüfatı məhsullarının istehsalı isə 2,1 dəfə artıb. Tikinti-quraşdırma işlərindəki artım isə daha böyükdür – 17,3 dəfə. Təkcə bir faktı qeyd edək ki, son beş ildə İsmayıllının 15 yaşayış məntəqəsinə təbii qaz verilməsi bərpa edilib, rayon mərkəzinin qaz təminatı yaxşılaşdırılıbdır.

...Həmsöhbətimiz çoxsaylı faktlardan və rəqəmlərdən söhbət açdı. Həmin faktların bir çoxu barədə əvvəlki yazılarımızda söhbət açmışıq. Daha yeniləri barədə isə növbəti yazıda söhbət açacağıq. Çünki ilin 9 ayının yekunları barədə ənənəvi hesabat xarakterli qəzet materialımız hələ qabaqdadır. Azərbaycan Prezidentinin İsmayıllıya növbəti səfəri barədə yazını isə məhz dövlət başçısının öz ifadəsiylə tamamlayırıq: “Ümumiyyətlə, İsmayıllı rayonunun inkişafı çox sürətlə gedir”.

İlqar HƏSƏNOV,

“Xalq qəzeti”nin bölgə müxbiri

Xalq qəzeti.- 2009.- 4 noyabr.- S. 6.