Nəsimi rayonunda “Uşaq ili” ilə bağlı növbəti tədbir

Azərbaycan Prezidenti İlham Əliyevin sərəncamı ilə 2009-cu il ölkəmizdə “Uşaq ili” elin edilib. Nəsimi rayonunda bununla bağlı ilin əvvəlindən mütəmadi olaraq müxtəlif tədbirlər keçirilir.

Bu qəbildən növbəti tədbir “Koala” uşaq - ailəvi istirahət mərkəzində baş tutmuşdur. Rayon icra hakimiyyətinin təşkilatçılığı ilə keçirilən bu xeyriyyə tədbirində 50-dən çox valideyn himayəsindən məhrum olmuş uşaq dəvət edilmişdi.

Tədbiri Nəsimi Rayon İcra Hakimiyyəti başçısının müavini Zahid Xəlilov açaraq uşaqları salamlamış, onlara ürək sözlərini demişdir. O bildirmişdir ki, möhtərəm Prezidentimiz İlham Əliyevin sərəncamı ilə elan edilmiş “Uşaq ili” çərçivəsində Nəsimi rayonunda çoxsaylı müxtəlif tədbirlər keçirilmiş, istedadlı uşaqların üzə çıxarılması, qayğıya ehtiyacı olan və valideyn himayəsindən məhrum olmuş uşaqlara maddi və mənəvi yardım göstərilməsi istiqamətində bir sıra işlər görülmüşdür. Rayonun təhsil müəssisələrində uşaq folklor - musiqi müsabiqələri, “Mahir nişançı” güllə atıcılığı oyunları keçirilmiş və onların qalibləri diplom və qiymətli hədiyyələrlə mükafatlandırılmış, müxtəlif tamaşalar nümayiş etdirilmiş və başqa tədbirlər həyata keçirilmişdir.

Sonra uşaqlara süfrə açılmışdır. Tədbirin sonunda rayon icra hakimiyyəti tərəfindən onlara məktəbli geyimi və dərs ləvazimatları verilmişdir. Uşaqlar “Koala” uşaq - ailəvi istirahət mərkəzində vaxtlarını şən keçirmişlər.

Nəsimi rayonunda “Uşaq ili” çərçivəsində tədbirlər ilin sonuna kimi davam etdirilicəkdir.

Ayaz HƏMİDOĞLU

Xalq qəzeti.- 2009.- 14 noyabr.- S. 7.