Yaşıllıq, gözəllik, sağlamlıq

Xətai rayonunda ağacəkmə kampaniyası

Müasir dövrümüzdə ekoloji tarazlığın qorunması, ətraf mühitin sağlamlaşdırılması getdikcə daha çox aktuallıq kəsb edir. Azərbaycan Respublikasında da son illər bu sahədə xüsusi tədbirlər, mühüm layihələr həyata keçirilir. Elə ölkə Prezidenti İlham Əliyevin də böyük önəm verdiyi məsələlər sırasında ekoloji mühitin sağlamlaşdırılması xüsusi yer tutur.

Təsadüfi deyil ki, son illər Prezident İlham Əliyevin sədrliyi ilə Nazirlər Kabinetinin ölkənin sosial-iqtisadi inkişafının ayrı-ayrı dövrlərini əhatə edən yekun iclaslarında dövlət başçısı bu vacib məsələyə dönə-dönə toxunur, konkret tövsiyə və tapşırıqlar verir. Ekoloji mühitin sağlamlaşdırılmasında yeni yaşıllıqların salınmasının xüsusi əhəmiyyət daşıdığını vurğulayan Prezident İlham Əliyev qısa müddət ərzində Bakıda və paytaxtın ətrafında ən azı 3 milyon ağac əkilməsini tövsiyə etmişdi.

Son zamanlar mövsümlə əlaqədar paytaxtda, eləcə də ölkənin digər şəhər və rayonlarında bu iş xeyli intensivləşmişdir. Elə həftənin şənbə və bazar günlərində iməciliyə çıxan rayon icra hakimiyyətlərinin, idarə, müəssisə və təşkilatların kollektivləri paytaxtın ayrı-ayrı yerlərində on minlərlə müxtəlif növ ağac və bəzək kolları əkdilər. Bakının küçə və meydanlarında abadlıq-təmizlik işləri apardılar.

Nazirlər Kabinetinin cari ilin doqquz ayının sosial-iqtisadi inkişafının yekunlarına həsr olunmuş geniş iclasında Prezident İlham Əliyevin ekoloji mühitin sağlamlaşdırılması, xüsusən də 2010-cu ilin ölkəmizdə “Ekologiya ili” elan edilməsi ilə bağlı irəli sürdüyü təşəbbüs ölkəmizin hər yerində olduğu kimi, Xətai rayonunda da bu sahədə mühüm işlərin, konkret layihələrin işlənib hazırlanmasına səbəb olmuşdur. Artıq bir aya yaxındır ki, rayon ərazisində ağacəkmə kampaniyasına, yaşıllıqların salınmasına başlanılmışdır.

Ötən şənbə günü səhər saatlarından etibarən rayonda böyük qələbəlik var idi. Ümumrayon iməciliyinə çıxan rayon icra hakimiyyəti aparatının işçiləri, idarə və müəssisələrin, xidmət sahələrinin, sahibkarlıq qurumlarının nümayəndələri onlar üçün ayrılmış xüsusi sahələrdə böyük həvəslə çalışır, ağac və bəzək kolları əkirdilər. Həmin gün əsl işgüzarlıq, iməcilik ab-havası hökm sürürdü. Elə payızın mülayim, günəşli havası da ağacəkmə kampaniyasında iştirak edən sakinlərin əhval-ruhiyyəsini bir qədər də artırırdı.

Zığ şosesi 1 “B” ünvanda, yeni salınmış yerüstü piyada keçidinin yaxınlığında böyük bir ərazidə də xeyli sayda çinar, şam və söyüd ağacları əkildi. Əraziyə baş çəkən Xətai Rayon İcra hakimiyyətinin başçısı Razim Məmmədov ağacəkmə kampaniyasının gedişi ilə maraqlandı, burada bir neçə ağac əkdi. Bütövlükdə isə şənbə günü keçirilən iməcilikdə rayonun Nobel prospekti və Zığ şosesi boyunca mindən artıq çinar, söyüd, şam və palıd ağacı, çoxsaylı bəzək kolları əkildi.

Yeri gəlmişkən, bir məsələni də xüsusi qeyd etmək lazım gəlir. Belə ki, əvvəllər əkilmiş ağacların əksəriyyəti baxımsızlıq üzündən quruyub tələf olurdusa, indi bu məsələyə yanaşma tamamilə fərqlidir. Artıq əkilmiş ağaclara xüsusi qayğı göstərilməsi üçün cavabdeh təşkilatlar və ayrı-ayrı şəxslər müəyyənləşdirilir. Xətai rayonunda isə bu məsələ ilə bağlı düşünüb tapılmış orijinal bir üsulun şahidi olduq. Belə ki, rayon rəhbərliyinin göstərişi ilə hər bir ağacdan onun nə zaman və kim tərəfindən əkildiyi qeyd olunmuş xüsusi lövhəciklər asılmışdı. Bu da hər bir şəxsin əkdiyi ağacla vaxtaşırı maraqlanmasına səbəb olacaq.

Öyrənirik ki, ölkə Prezidentinin müvafiq tövsiyəsinə əsasən Xətai rayonunda ağacəkmə kampaniyasına başlanıldığı ötən bir ay ərzində rayonun Nobel və Gəncə prospektlərində, Məhəmməd Hadi və Telnov küçələrində, Zığ şosesində və başqa ərazilərdə 18 minədək ağac əkilib. Mövsümün sonunadək isə rayonda daha iki min ağacın, eləcə də çoxsaylı bəzək kollarının əkilməsi və yaşıllıq zolaqlarının salınması nəzərdə tutulur.

Son zamanlar paytaxtın Xətai rayonunun siması xeyli dəyişmiş, gözəlləşmiş, paytaxtın ən abad, ən yaraşıqlı güşələrindən birinə çevrilmişdir. Təsadüfi deyil ki, dövlət başçısı İlham Əliyev cari ilin ötən dövründə dəfələrlə bu rayonda olmuş, bir sıra obyektlərin açılış və təməlqoyma mərasimlərində iştirak etmişdir. Xətai rayonunda aparılan abadlıq-quruculuq işlərini yüksək qiymətləndirən ölkə Prezidenti bu sahədə tədbirlərin davam etdirilməsini tövsiyə etmişdir.

Yeri gəlmişkən, Nazirlər Kabinetinin 2009-cu ilin doqquz ayının sosia-iqtisadi inkişafının yekunlarına həsr olunmuş geniş iclasında Prezident İlham Əliyevin söylədiyi “İndi Bakıda “Qaraşəhər” adlandırılan sahə yoxdur. Əvvəllər olub, “Qaraşəhər” adlandırılan ərazi indi abadlaşır, parklar, yollar salınır” fikri Xətai rayonu ərazisində həyata keçirilən abadlıq-quruculuq və yenidənqurma işlərinə verilən yüksək qiymətdir. Bu, rayon sakinlərinin, burada çalışan idarə, müəssisə və təşkilatların işçilərinin sabaha inamını artırır, onların əhval-ruhiyyəsinə müsbət çalarlar əlavə edir.

Mirbağır YAQUBZADƏ

Xalq qəzeti.- 2009.- 17 noyabr.- S. 7.