“İdrak” məktəb-liseyində yubiley tədbiri

Sumqayıtdakı ilk özəl orta təhsil ocağı olan “İdrak” məktəb-liseyində gənclik şəhərinin yaranmasının 60 illik yubileyinə həsr olunmuş maraqlı ədəbi-bədii gecə keçirilmişdir.

Tanınmış alim, şair və pedaqoqların iştirak etdikləri yubiley tədbirinin aparıcıları obrazlı şəkildə “səhrada çiçək” adlandırılan Sumqayıtın yaranma tarixi və inkişafı ilə bağlı ətraflı məlumat verdilər, şəhərin bugünkü növrağı və yüksəlişindən söhbət açdılar. Məktəb-lisey xorunun ifasında Sumqayıtı tərənnüm edən ilk mahnı oxundu. Müasir təhsil kompleksi kimi tanınmağa başlayan “İdrak”ın direktoru, pedaqoji elmlər namizədi Mönsüm Alışov şəhərin inkişaf dinamikası, burada elm və mədəniyyətə, gənc nəslin təlim-tərbiyəsinə göstərilən qayğı barəsində qənaətlərini bölüşdü.O, eyni zamanda rəhbərlik etdiyi liseyin fəaliyyəti üçün Sumqayıtda hərtərəfli şərait yaradıldığını və bunun da kollektivi yeni-yeni uğurlar qazanmağa ruhlandırdığını xüsusi vurğuladı.

Fəlsəfə elmləri doktoru, professor Həsən Sadıqov Sumqayıt haqqında yazdığı və bir çox dilllərə tərcümə edilmiş elmi-sosioloji əsərlərinin bəzi məqamlarını nəzərə çatdırdı. Xatırladaq ki, gənclik illərindən taleyini Sumqayta bağlamış Həsən müəllimin həmmüəllifi olduğu “Ermənilər Sumqayıtda” adlı kitab 35 xarici ölkədə geniş yayılmışdır. Qocaman alimin çıxışı məktəb-liseyin şagirdləri tərəfindən böyük maraqla qarşılandı.

Sumqayıt mövzusuna yaradıcılığında geniş yer vermiş müəllim-şair Əvəz Mahmud Lələdağ bu həmişəcavan, gözəl şəhərlə ürəkdən fəxr etdiyini söylədi və əmək qəhrəmanlarına həsr etdiyi poemadan parçalar oxudu.

Azərbaycan Yazıçılar Birliyi Sumqayıt bölməsinin sədri Sabir Sarvan bu şəhərdə yaradıcı adamlara daim qayğı göstərildiyini nəzərə çatdırdı və qələm sahiblərinin yubileyə poetik töhfələrindən bəhs etdi. Sonra o, yubiley münasibətilə keçirilən “Ən yaxşı şeir” müsabiqəsində mükafata layiq görülmüş “Altmışında gəlin kimi” şeirini oxudu.

Yubiley tədbirində məktəb-liseyin gənc istedadlarının təqdim etdikləri musiqi klipləri, mahnı və rəqslər tamaşaçı alqışları ilə mükafatlandırıldı. Ədəbi-bədii gecə iştirakçılara unudulmaz təsir bağışladı.

Əli NƏCƏFXANLI

Xalq qəzeti.- 2009.- 18 noyabr.- S. 8.