Ağdam: təhsilin problemlərinin həllinə böyük diqqət göstərilir

Azərbaycan təhsil sistemi mütərəqqi yeniliklərlə müşayiət olunan yeni mərhələyə qədəm qoymuşdur. Respublikamızda təhsil müəssisələrinin maddi-texniki bazasının möhkəmləndirilməsi, yeni məktəblərin tikilməsi, mövcud məktəblərin əsaslı təmir edilməsi, müəllimlərin əmək haqqının vaxtaşırı artırılması, onların fəxri adlarla təltif edilməsi və s. təhsil sahəsinə dövlət səviyyəsində göstərilən diqqət və qayğının bariz nümunəsidir.

Bu il “Təhsil haqqında” qanunun qəbul edilməsi, qəza vəziyyətində olan ümumtəhsil müəssisələrinin yenidən qurulması işlərinin davam etdirilməsi ilə bağlı Prezident İlham Əliyevin sərəncamı, bununla əlaqədar rayon ərazisində qəza vəziyyətində olan məktəblərin qeydiyyata götürülməsi, ötən il iki müəllimimizin “əməkdar müəllim” adına layiq görülməsi rayonumuzun təhsil işçilərini daha böyük qüvvə ilə işləməyə ruhlandırmışdır.

Rayon əhalisinin köçkünlük şəraitində yaşamasına baxmayaraq təhsil şöbəsinin işçiləri və təlim-tərbiyə müəssisələrinin rəhbərləri müxtəlif bölgələrdə məskunlaşan məktəbyaşlı uşaqların təhsildən kənarda qalmaması, ümumi icbari təhsilin həyata keçirilməsi üçün səylərini əsirgəməmişlər. Rayon təhsil şöbəsi üzrə məktəblərin sayı 149, sinif komplekti 1815, şagirdlərin sayı isə 2140 nəfərdir. Onların təlim-tərbiyəsi ilə 4123 nəfər müəllim məşğul olur. Məktəbəqədər müəssisələrin sayı 32, uşaqların sayı 1520 nəfərdir. Məktəbdənkənar müəssisələrin sayı isə 5-dir.

Milli təhsilimizin inkişaf proqramları rayonda ardıcıl həyata keçirilir. Respublikamızda yeni ümumtəhsil məktəblərinin tikintisi, mövcud məktəblərin əsaslı təmiri və müasir tədris avadanlıqları ilə təmin olunmasına dair dövlət proqramının yerinə yetirilməsi ilə bağlı 2003-cü ildən rayonumuzda 29 məktəb yenidən tikilmiş, 2 məktəb əsaslı təmir edilmişdir. 16 məktəb üçün 1886 yerlik 81 yeni sinif otağı şagirdlərin istifadəsinə verilmişdir. İşğal olunmamış ərazidə fəaliyyət göstərən 28 ümumtəhsil məktəbinin 24-ü əsaslı təmir edilmiş və yenidən tikilərək müasir tələblərə uyğun vəziyyətə salınmışdır. Həsənxanlı kənd orta, I Baharlı kənd əsas, I Yüzbaşılı kənd orta məktəblərinin yenidən tikilməsi üçün sənədləşmə aparılmış, torpaq sahələri ayrılmışdır.

Rayonda məktəbəqədər tərbiyə müəssisələrinin binaları yararsız olduğuna, otaqları ordu hissələri və köçkün ailələri tutduğuna görə daxili işlər naziri Ramil Usubovun köməyi ilə Quzanlı qəsəbəsində 120 yerlik, Xındırıstan kəndində isə 100 yerlik uşaq bağçısı tikilib istifadəyə verilmişdir.

Azərbaycan Respublikasında ümumtəhsil məktəblərinin avadanlıqlarla təmin olunmasına dair inkişaf proqramının (2005-2009-cu illər) həyata keçirilməsi ilə əlaqədar son 3 ildə 366 parta, 780 stul, 20 stol, 95 şkaf alınıb zəruri ehtiyacı olan məktəblərə verilmişdir. Təhsil Nazirliyinin ayırdığı dərsliklər, Respublika Prezidenti Administrasiyasından verilən latın qrafikası ilə çap olunmuş bədii ədəbiyyat məktəb kitabxanalarını zənginləşdirmişdir. I-XI sinif şagirdləri üçün 170 adda 178090 nüsxə dərslik, latın qrafikası ilə çap olunmuş 216 adda 76045 nüsxə bədii ədəbiyyat, 18 nüsxə uşaq ensiklopediyası, 50 nüsxə Azərbaycan Milli Ensiklopediyası da ümumtəhsil məktəblərin kitab fonduna əlavə olunmuşdur.

Ümumtəhsil məktəblərinin informasiya və kommunikasiya texnologiyaları ilə təminatı proqramının həyata keçirilməsi istiqamətində də müvafiq iş aparılmışdır. 2005-ci ildən başlayaraq qeyri-hökumət təşkilatlarından 113 ədəd, 2007-ci ildə isə Təhsil Nazirliyi xətti ilə 253 kompyuter dəsti alınaraq quraşdırılmışdır. Rayon üzrə 68 məktəbdə hər 33 şagirdə 1 kompyuter düşür. Hazırda rayon məktəblərində kompyuterlərin sayı 366-a çatmışdır. Proqramın yerinə yetirilməsi üçün 51 məktəbimizin kompyuterə ehtiyacı var.

4 ildir ki, istedadlı uşaqlarla aparılan işləri daha da yaxşılaşdırmaq məqsədilə müxtəlif bölgələrdə olimpiadalara hazırlıq mərkəzləri yaradılmışdır. Bu mərkəzlərə ən qabaqcıl, öz işinin bilicisi olan, səriştəli müəllimlər dəvət edilmişdir. Nəticədə, şagirdlərimiz fənn olimpiadalarının respublika turunda fərqləndirici yerlər tuta bilmişlər. 2009-cu ildə 5 saylı orta məktəbin XI sinif şagirdi İmdad Məmmədov riyaziyyat üzrə III yer tutmuşdur. O bu il Azərbaycan Dövlət Neft Akademiyasına qəbul olmuşdur. Respublika səviyyəsində keçirilən bir sıra müsabiqələr də səmərəli təşkil edilmiş, uğurlu nəticələr əldə edilmişdir.

Ümummilli lider Heydər Əliyevin anadan olmasının 86 illiyinə həsr edilmiş inşa müsabiqəsinə rayonun bütün şagirdləri cəlb edilmişdir. Rayon müsabiqəsinin qalibi, 2 saylı köçkün orta məktəbin XI sinif şagirdi Rəna Abışova respublika turunda xüsusi diploma layiq görülmüşdür. Azərbaycan Xalq Cümhuriyyətinin 91-ci ildönümünə həsr olunmuş inşa yazı müsabiqəsində isə 108 orta və əsas məktəbdən 200-dən çox şagird iştirak etmişdir. 146 saylı köçkün orta məktəbin XI sinif şagirdi Lamiyyə Məmmədova, 5 saylı köçkün orta məktəbin XI sinif şagirdi İmdad Məmmədov bu müsabiqədə qalib olmuşlar.

Prezident İlham Əliyevin 4 sentyabr 2007-ci il tarixli “Ən yaxşı ümumtəhsil məktəbi” və “Ən yaxşı müəllim” mükafatının təsis edilməsi haqqında sərəncamının icrası ilə əlaqədar 32 saylı orta məktəbin fizika müəllimi Leyla Bağırova və 35 saylı orta məktəbin ingilis dili müəllimi Hüzurə Ağayeva “İlin ən yaxşı müəllimi” müsabiqəsində iştirak etmiş, onların adı 100 qalib müəllimin içərisində ilk 10 nəfərin siyahısına düşmüşdür.

Müəllimlərimizin elmi-metodik hazırlığının yüksəldilməsi, qabaqcıl təlim-metodlarının və texnologiyalarının tətbiqi təcrübəsinin öyrənilməsi də diqqət mərkəzindədir. Hər ay 3-4 nəfər müxtəlif ixtisas müəllimi xüsusi istedadlı uşaqlarla işləmək istiqamətində yenilikləri öyrənmək üçün Bakı şəhərində ixtisasartırma kurslarından keçir.

2009-2010-cu dərs ilində respublikanın ümumtəhsil məktəblərinin I siniflərində yeni fənn kurikulumlarının tətbiqi ilə əlaqədar 5 günlük təlim kurslarının keçirilməsini təmin etmək üçün hərtərəfli hazırlıq işləri aparmışdır. Təhsil şöbəsində xüsusi fəaliyyət planı hazırlanmış, rayonun işğal olunmamış ərazisində, Bərdə, Tərtər, Ağcabədi rayonları ərazilərində fəaliyyət göstərən məktəblərin I sinfində dərs deyəcək 206 nəfər sinif, informatika və xarici dil müəllimləri 4 qrupda 5 günlük təlim kurslarından keçmişlər. Ümumilikdə, 149 ümumtəhsil məktəbindən 271 nəfər I sinifdə dərs deyəcək müəllim kurs keçmiş, onlara müvafiq sertifikatlar verilmişdir.

Bütün məktəblərimizdə, hər bir sinifdə “Qarabağın qan yaddaşı” kitabçası hazırlanmış, orada hər bir bölgəmizin işğal tarixi, ərazisi, tarixi abidələri və s. haqqında məlumatlar toplanmışdır. Hər il olduğu kimi, 2009-cu ilin “Yeni il” və Novruz bayramları ərəfəsində də məktəblilərin rayon ərazisində olan hərbi hissələrin əsgərləri ilə görüşü keçirilmişdir. Fiziki tərbiyə və vətənpərvərlik tərbiyəsi apardığımız işlərin mərkəzində dayanır. Gənclərin çağrışaqədərki hazırlığı fənninin tədrisi səviyyəsini yüksəltmək üçün nəzəri və praktiki məşğələlərin keyfiyyəti artırılmışdır.

Hərbi kabinetlərdə Azərbaycanın, həmçinin Ağdamın milli qəhrəmanları haqqında stentlər, hərbi rütbələr haqqında məlumatlar asılmışdır. Nümunəvi xidməti olan gənc hərbçilərlə də görüşlər keçirilir, söhbətlər aparılır. Məktəbdənkənar tərbiyə müəssisələrində şagirdlərin yaradıcılıq qabiliyyəti kifayət qədər yaxşılaşdırılmışdır. Uşaq gənclər idman məktəbinin fəaliyyəti olimpiya idman kompleksində bərpa edilmişdir, Uşaq gənclər şahmat məktəbinin şagirdləri respublika birinciliklərində iştirak edərək öz qüvvələrini sınamış, bu yarışlarda müvəffəqiyyət əldə etmişlər. Məktəbli formasının tətbiqi ilə əlaqədar bütün məktəblərdə valideyn iclasları keçirilmiş, təbliğatı işlər aparılmış, nəticədə rayonun bütün məktəbliləri vahid formaya keçmişdir.

Bu il rayonun 117 orta ümumtəhsil məktəbini bitirən 1193 məzundan 600 nəfəri Tələbə Qəbulu üzrə Dövlət Komissiyasına sənəd vermişdi. 195 nəfər I turda ali məktəblərə qəbul olmuşdur. 110 məzunumuz II tura sənəd vermiş, 13 nəfər ali məktəblərə, 76 nəfər isə orta ixtisas məktəblərinə qəbul olmuşdur. Ali məktəblərə qəbul olanların sayı 208 nəfər olmuşdur ki, bu da sənəd verənlərin 35 faizi deməkdir. 20 nəfər 500-dən, 5 nəfər isə 600-dən çox bal toplamışdır. 33 saylı məktəbin məzunu Nigar Əhmədzadə 655 bal, 88 saylı məktəbin məzunu Qərənfil Allahverdiyeva isə 630 bal toplayaraq Azərbaycan Tibb Universitetinə qəbul olmuşlar. Ali məktəblərə qəbulun nəticəsi təhlil edilmiş, hər bir məktəbin fəaliyyətinə qiymət verilmişdir. Ən yüksək nəticəni, 42 saylı məktəb – 9 nəfər, 88 saylı məktəb – 8 nəfər, 73 saylı məktəb – 8 nəfər, 71 saylı məktəb – 7 nəfər, 35 saylı məktəb – 8 nəfər, 32 saylı məktəb – 7 nəfər, qazanmışdır.

Bu günlərdə təhsil naziri Misir Mərdanov Qarabağ bölgəsində olarkən rayonumuzun da məktəblərində oldu, uğurlarımızla və problemlərimizlə maraqlandı, tövsiyələrini bildirdi. Nazir qeyd etdi ki, dövlətimizin təhsilə göstərdiyi böyük diqqət və qayğının hədəfi təlim-tərbiyənin səviyyəsini qabaqcıl dünya standartlarına çatdırmaq, müstəqil ölkəmiz üçün bilikli və bacarıqlı nəsil yetişdirməkdir.

Bu mühüm vəzifəni layiqincə yerinə yetirmək üçün rayonumuzun təhsil işçiləri mövcud çətinliklərə baxmayaraq səy və bacarıqlarını əsirgəmirlər. Lakin bəzi üzdəniraq qüvvələr ölkəmizdəki inkişaf və yeniləşməyə daim qara eynəklə baxdıqları kimi, köçkünlük şəraitində yaşayıb-çalışan müəllimlərimizin şərəfli əməyi, kollektivimizin fəaliyyəti barədə də müxtəlif qəzetlərdə dedi-qodular yayırlar. Əslində isə rayonumuzun təhsil uğurları ildən-ilə artır, mənəvi-siyasi iqlim daha da sağlamlaşır, sabitləşir. Həqiqət budur ki, son illərdə məktəblərimiz sürətlə təzələnir, yeniləri tikilir. Maddi-texniki baza müasirləşir. Problemlər ardıcıl həllini tapır. Bərdə şəhərində köçkünlük şəraitində yaşayan təhsil şöbəsi üçün də yeni ikimərtəbəli bina tikilir. Tədrisin keyfiyyətini yüksəltmək üçün qabaqcıl təlim üsulları inamla tətbiq olunur.

Bütün bunlar onu deməyə əsas verir ki, Ağdamın pedaqoji kollektivləri öz ənənəsinə sadiq qalaraq, bundan sonra da ölkəmiz üçün həyatın bütün sahələrində layiqli övladlar yetişdirəcək, dövlətimizin təhsilə göstərdiyi qayğı və diqqəti üzağardan işləri ilə cavablandıracaqlar.

Elmira ŞÜKÜROVA,

Ağdam Rayon Təhsil Şöbəsinin müdiri,

Respublikanın əməkdar müəllimi

Xalq qəzeti.- 2009.- 18 noyabr.- S. 5.