Azərbaycan-Türkiyə strateji əməkdaşlığı sarsılmazdır

Azərbaycan Respublikasının Prezidenti yanında Dövlət İdarəçilik Akademiyasında Türkiyə Strateji Araşdırmalar Mərkəzinin rəhbəri Sinan Oğanın iştirakı ilə “Azərbaycan-Türkiyə strateji əməkdaşlığı: reallıqlar, perspektivlər” mövzusunda “dəyirmi masa” keçirildi.

Tədbiri giriş sözü ilə açan akademiyanın rektoru, əməkdar elm xadimi, professor Seyfəddin Qəndilov “dəyirmi masan”ın çox aktual bir mövzuya həsr olunduğunu bildirdi və Azərbaycan-Türkiyə əməkdaşlığının tarixi keçmişi, inkişaf mərhələləri və qarşılıqlı münasibətlərin müxtəlif sferalarında əldə edilmiş nailiyyətlərə diqqəti cəlb etdi. Rektor ümummilli lider Heydər Əliyevin “Bir millət – iki dövlət” kəlamını xatırladaraq, ulu öndərin Azərbaycan—Türkiyə strateji əməkdaşlığının qurulması, qorunması və inkişafında göstərdiyi müstəsna xidmətlərini ön plana çəkdi. O, cənab İlham Əliyevin prezidentliyi dövründə Azərbaycan və Türkiyə arasında strateji əməkdaşlıq münasibətlərində yeni mərhələnin başlandığını vurğuladı. Bu mərhələ hər iki dövlətin iştirak etdiyi qlobal enerji layihələrinin reallaşması, Türkdilli Dövlətlərin Parlament Assambleyasının yaradılması, habelə digər əhəmiyyətli layihələrin meydana gəlməsi ilə xarakterizə olunur.

Professor S.Qəndilov qeyd etdi ki, Azərbaycan və Türkiyə arasında formalaşmış sarsılmaz dostluq münasibətlərini gözü götürməyən qüvvələr hər vəchlə iki qardaş xalq arasında xüsusi cəhdlə təfriqə salmağa çalışırlar. Lakin, onlar heç bir zaman bu çirkin niyyətlərini reallaşdıra bilməyəcəklər. İndi həmin qüvvələrin xeyli fəallaşdığını diqqətə çatdıran natiq bu reallığı nəzərə alaraq Azərbaycan və Türkiyə arasındakı ənənəvi dostluq və qardaşlıq münasibətlərinin daha da möhkəmləndirilməsinin zəruriliyini vurğuladı.

Rektor akademiyanın qonağı olan Türkiyə Strateji Araşdırmalar Mərkəzinin rəhbəri Sinan Oğan haqqında qısa məlumat verdi. Qeyd etdi ki, Türkiyənin tanınmış siyasət adamlarından olan Sinan Oğan Mərmərə Universitetinin iqtisadiyyat və idarəetmə bölməsini bitirmiş, Moskva Dövlət Beynəlxalq Münasibətlər İnstitutunda doktorluq dissertasiyasını müdafiə etmişdir. TİKA Türk İşbirliyi və Kalkınma Agentliyi (TİKA) Azərbaycan təmsilçisi vəzifəsində çalışmışdır. Bundan başqa, Avrasiya Strateji Araşdırmalar mərkəzinin (ASAM) Qafqaz və Rusiya-Ukrayna bölməsinin rəhbəri işləməsindən, hazırda isə çox nüfuzlu Türkiyə Strateji Araşdırmalar Mərkəzinə rəhbərlik etməsini tədbir iştirakçılarına bildirdi. S.Oğanın Xarici İşlər Nazirliyinin Diplomatik Akademiyasının və İslam Konfransı Təşkilatının birgə təşkilatçılığı ilə Bakıda “Sivilizasiyalar arasında dialoq: Azərbaycandan baxış” mövzusunda keçirilən konfransda iştirak etməsi haqqında da məlumat verdi.

Türkiyə Strateji Araşdırmalar Mərkəzinin rəhbəri Sinan Oğan Azərbaycanla Türkiyə arasında formalaşmış strateji əməkdaşlıq münasibətləri haqqında geniş və əhatəli məlumat verdi. O, konkret faktlara və arqumentlərə əsaslanmaqla ikitərəfli münasibətlərin inkişaf dinamikasını açıb göstərdi, bu prosesin siyasi, iqtisadi və hərbi-təhlükəsizlik müstəvisində təhlilini apardı. Türkiyəli ekspertin qənaətinə görə, son zamanlar Ankara-Yerevan münasibətlərində normallaşma tendensiyası müşahidə olunsa da, onun yalnız bir halda məntiqi sonluğu ola bilər. Bu da Ermənistanın Azərbaycan torpaqlarının işğalına son qoyması və Dağlıq Qarabağ probleminin aradan qaldırılması nəticəsində mümkündür. Əks halda bu normallaşma “tendensiya statusu”ndan uzağa getməyəcək. O, Türkiyə-Azərbaycan strateji əməkdaşlığının əbədi olduğunu dedi.

Sonda natiq dinləyicilərin çoxsaylı suallarını cavablandırdı.

Əliqismət BƏDƏLOV

Xalq qəzeti.- 2009.- 18 noyabr.- S. 4.