Yeni Azərbaycan Partiyası xoşbəxt gələcəyimiz uğrunda mübarizənin ön sırasındadır

Bu gün YAP-ın yaranmasının 19-cu ildönümü tamam olur

1988-ci ildən etibarən Azərbaycanda başlanan siyasi, dövlət və hakimiyyət böhranı getdikcə dərinləşirdi. Ölkəmizə düşmən olan qüvvələr daxildəki əlaltılarının köməyi ilə hərc-mərcliyi gücləndirməyə, etnik qarşıdurmalara və vətəndaş müharibəsini reallaşdırmağa can atırdılar. Bir-birinin ardınca baş verən qanunsuzluqlar, özbaşınalıq və anarxiya xalqın narazılığını daha da gücləndirdi.

Azərbaycan xalqını gözdən salmaq üçün mərkəzdən — Kremldən hazırlanmış planların həyata keçirilməsi vəziyyəti daha da ağırlaşdırırdı. Ermənistanda — öz tarixi torpaqlarında yaşayan 250 minə qədər soydaşımız ata-baba yurdlarından qovulur, xalqın haqq səsi eşidilmirdi. 1991-ci il oktyabrın 18-də Azərbaycan Respublikasının Dövlət Müstəqilliyi Haqqında Konstitusiya Aktı qəbul edilsə də, Ayaz Mütəllibov rejimi keçmiş imperiya mərkəzinə yarınmaq siyasəti yeridirdi. Azərbaycana qarşı açıq təcavüzün qarşısını almaq, soydaşlarımızın təhülkəsizliyini qorumaq, milli ordu yaratmaq əvəzinə öz hakimiyyətini qoruyub saxlamağa çalışan A. Mütəllibov və onun tərəfdarları əsasən Moskvadakı ağalarının tapşırıqlarını yerinə yetirirdilər. Ölkədə yaranmış xaos və anarxiyadan öz məqsədləri naminə istifadə edən Azərbaycan Xalq Cəbhəsi Ayaz Mütəllibovu rüsvayçılıqla hakimiyyətdən uzaqlaşdırdı və AXC-nin “meydan qəhrəmanları” hakimiyyəti ələ aldı.

AXC-Müsavat cütlüyünün hakimiyyəti dövründə yenicə müstəqilliyini qazanmış Azərbaycan uçuruma daha da yaxınlaşırdı. Səriştəsiz və naşı “siyasətçilər” hakimiyyətdə olduqları qısa müddət ərzində ölkəni fəlakət girdabına, vətəndaş qarşıdurmasına və parçalanma həddinə gətirib çıxardılar. Ölkədə iqtisadi böhran getdikcə dərinləşir, beynəlxalq aləmə inteqrasiyada heç bir irəliləyiş hiss olunmurdu. Xalqın güzəranı, həyat tərzi gündən-günə pisləşirdi. Ermənistanın torpaqlarımızı hissə-hissə işğal etməsinin və ərazi iddialarının qarşısı alınmırdı. Xarici siyasət sahəsində yol verilən kobud səhvlər Azərbaycanın dünya miqyasında təklənməsinə, inkişaf etmiş bir sıra dövlətlərlə qarşılıqlı münasibətlərinin gərginləşməsinə gətirib çıxarmışdı. Belə bir şəraitdə ölkədə yaranmış ziddiyyətli proseslərdən düzgün nəticə çıxara biləcək, xalqı bir şəxsiyyətin, liderin ətrafında birləşdirərək, müstəqilliyimizi qoruyub saxlaya biləcək, milli dövlətçiliyimizə qarşı təzyiqlərin qarşısını almağa qadir olan bir siyasi partiyanın yaradılmasına böyük ehtiyac var idi. Elə bir partiya ki, xalq onun liderinə inansın, ətrafında sıx birləşsin və Azərbaycanı müstəqil dövlət kimi yaşatsın, inkişaf etdirsin. Xalqın yeganə ümid və inam yeri o vaxt Naxçıvanda yaşayan və Naxçıvan MR Ali Məclisinə rəhbərlik edən ümummilli lider Heydər Əliyev idi. İnsanların düşüncəsinə belə bir aydın həqiqət hakim kəsilmişdi: yeni həyat, yeni zaman və Yeni Azərbaycan üçün lideri qüdrətli tarixi şəxsiyyət Heydər Əliyev olan bir siyasi partiya yaranmalıdır. Yalnız bu partiya Azərbaycanın bütün inkişaf və tərəqqi yollarını işıqlandıra və xalqı XXI əsrin aydınlığına qovuşdura bilərdi. Yaranmış ağır vəziyyətdən çıxış yolunu yalnız ulu öndərdə görən ziyalılar 1992-ci ildə ona müraciət etdilər. Müraciətdə deyilirdi: “... Möhtərəm Heydər bəy! İndiki vəziyyətdə bu çətin, məsuliyyətli işi respublikada öz öhdəsinə götürməyə gücü çatan yeganə şəxs Sizsiniz! Uzun illər əldə etdiyiniz dövlət quruculuğu təcrübəsinə əsaslanaraq, Siz qısa müddətdə Azərbaycanda geniş xalq kütləsinin əhatə eləyəcək, çox böyük güclü, nüfuzlu və işlək bir partiya yaratmağa qadirsiniz. Buna görə də Azərbaycanın, demək olar ki, bütün bölgələrində aparılan ictimai rəy sorğularının nəticələrinə və bizim təşkilat komitəsinə daxil olan minlərlə şifahi və yazılı vətəndaş təkliflərinə əsaslanaraq belə bir qənaətə gəlirik ki, yaratmaq istədiyimiz Yeni Azərbaycan Partiyasına bu gün rəhbərlik etməyə qadir olan yeganə mütləq lider Siz ola bilərsiniz. Yalnız bu halda yaranmaqda olan partiya öz qarşısına qoyduğu məqsədə çatar, respublikanın bütün zümrələrindən olan xalq kütləsini öz ətrafında birləşdirərək Azərbaycanın siyasi-iqtisadi həyatında mövcud olan boşluğu doldurar, dövlət quruculuğu işlərinə öz layiqli töhfəsini verə bilər. Əminik ki, Yeni Azərbaycan Partiyası müdrik ağsaqqalımız Heydər Əliyevin ətrafında birşləşəcək, dərin zəkalı, təmiz əxlaqlı, yüksək mədəniyyətli, müstəqil düşüncəli, milli qürurlu, peşəkar insanların siyasi partiyasına çevriləcək. Əgər bu partiyanın bünövrəsini Sizin kimi güclü dövlət xadimi qoyarsa, o, uzun illər xalqımızın bir neçə nəsli üçün də siyasi yetkinlik məktəbi olar. Biz Yeni Azərbaycan Partiyasını yeni düşüncə tərzli insanların Sizin ətrafınızda sıx birləşdiyi mütəşəkkil, güclü, aparıcı qüvvəyə malik bir partiya kimi görürük. İnanırıq ki, Azərbaycanımızın bu günü, sabahı naminə, başqa partiya, qurum və cəmiyyətlərin vətənpərvər üzvləri də həlledici anda məhz bu partiyanın mövqeyində dayanacaqlar”.

Ulu öndər Heydər Əliyev ziyalıların müraciətinə 1992-ci il oktyabrın 24-də cavab verdi. Azərbaycanın müstəqil dövlətçiliyinin, ərazi bütövlüyünün təhlükə qarşısında qalması, insanların həyatının dözülməz hala düşməsi, vəziyyətin getdikcə daha da ağırlaşması və digər dəhşətli hallarla bağlı ziyalıların ciddi narahatlığını haqlı hesab edən ümummilli lider Heydər Əliyev cavab məktubunda yaranmış vəziyyəti dərindən təhlil etmiş və nicat yollarını da göstərmişdir. Qüdrətli şəxsiyyət Azərbaycanın xilası naminə, xalqın təkidli xahişi, istəyi ilə Yeni Azərbaycan Partiyasına rəhbərlik etməyə razılıq verdi. Beləliklə, 1992-ci il noyabrın 21-də Yeni Azərbaycan Partiyasının təsis konfransı keçirildi.

YAP-ın yaradılması ilə bağlı çətinliklərdən danışarkən ulu öndər Heydər Əliyev demişdir: “1992-ci ildə Naxçıvanda ağır bir şəraitdə, böyük təzyiqlər altında biz partiyanın yaranması ilə əlaqədar xeyli işlər gördük və ilk konfrans keçirdik. O vaxt, əlbəttə ki, partiyanın yaranması yalnız ayrı-ayrı şəxslərin, bu partiyanın yaranmasında çox təşəbbüs göstərmiş insanların, o cümlədən təkcə mənim xidmətim deyildir. Yeni Azərbaycan Partiyası o vaxtkı mövcud vəziyyətdə bütün Azərbaycan xalqının mənafellərinə xidmət etmək üçün və xalqın o ağır dövründə ölkəmizin qarşısında duran məsələlərin həll edilməsi üçün zamanın tələblərinə uyğun olaraq zərurətdən yaranmış bir partiyadır. Biz partiyanı yaradarkən heç də düşünmürdük ki, qısa bir müddətdən sonra hakimyyətə gələcəyik. Baxmayaraq ki, ölkəmizdəki vəziyyət — sizin hamınıza məlum olan vəziyyət — bizim hamımızı düşündürürdü. Ona görə də bir tərəfdən, biz hesab edirdik ki, partiyanı yaradaraq, biz xalqımıza müəyyən bir xidmət göstərə bilərik. İkinci tərəfdən də, sadəcə, ölkənin belə ağır vəziyyətində bir çox insanların ümidi, istəyi, nəhayət, bu partiyanın yaranmasına gətirib çıxardı”.

Azərbaycanın müasir və gələcək tarixində, xalqımızın taleyində mühüm rol oynayan, müstəqilliyimizi əbədi, daimi edən, ölkəmizi nurlu sabaha apara biləcək Yeni Azərbaycan Partiyası yaradıldı və dünya şöhrətli siyasi xadim Heydər Əliyev bu partiyanın sədri seçildi.

Yeni Azərbaycan Partiyasının Azərbaycanın müstəqillik tarixində ən böyük missiyası Azərbaycanın ən ağır, faciəli günlərində, onun taleyinin ölüm-dirim məsələsi həll olunduğu bir vaxtda xalqla, geniş kütlə ilə onun yeganə nicatı olan Heydər Əliyev arasında ümid yeri olmasında “Heydər — Xalq” birliyinin təzahürünə çevrilməsindədir. Milli dövlətçiliyimizin yaranmasında və möhkəmlənməsində, yeni iqtisadi münasibətlərin formalaşmasında, ictimai-siyasi sabitliyin bərqərar olunmasında, demokratik cəmiyyət quruculuğunda əvəzsiz rol oynayan YAP-ın ölkənin əsas inkişaf strategiyasının istiqamətverici qüvvəsinə çevrilməsi onun lideri Heydər Əliyevin adı ilə bağlıdır. Bu partiya böyük bir tarixi zərurət nəticəsində yaranmışdır. Onun getdikcə daha çox nüfuz qazanaraq cəmiyyətin əsas aparıcı siyasi qüvvəsinə çevrilməsi də bu zərurətin ifadəsidir. Xalq müdrik şəxsiyyət Heydər Əliyevin adı ilə bağlı olan Yeni Azərbaycan Partiyasının ətrafında sıx birləşdi. Xalqın təkidli xahişi ilə ümummilli lider Heydər Əliyev yenidən hakimiyyətə gəldikdən sonra dövlətimizin əsl müstəqillik tarixi başlandı və Yeni Azərbaycan Partiyası müxalifət partiyasından iqtidar partiyasına çevrildi.

Azərbaycana ikinci dəfə rəhbərlik etdiyi dövrdə YAP-ın sədri, ümummilli lider Heydər Əliyevin həyata keçirdiyi şərəfli xilaskarlıq missiyası bütün dünyanın gözü qarşısında cərəyan etmişdir. Azərbaycan parçalanmaqdan xilas oldu, müstəqillik və demokratiya yolunda inamla irəlilədi. Müstəqil Azərbaycan dövləti gələcəyə inamla baxan güclü, qüdrətli bir dövlətə çevrildi. Ulu öndərin gərgin zəhməti, yorulmaz fəaliyyəti, siyasi iradəsi sayəsində həyata keçirdiyi nəhəng işlər müstəqil dövlətimizi dünyanın inkişaf etmiş dövlətləri ilə bir cərgəyə qoydu. Yeni Azərbaycan Partiyası demokratik siyasi partiya kimi böyük nüfuz qazandı və qısa müddət ərzində bu partiya üzvlərinin sayına görə ölkədəki digər siyasi təşkilatlar üçün əlçatmaz oldu. 1993-cü ildən başlayaraq bütün seçkilərdə böyük üstünlüklə qələbə qazanması, digər siyasi partiyaları xeyli arxada qoyması YAP-ın ən güclü, ən qüdrətli partiya olmasından xəbər verir. Ulu öndər YAP-ın ən güclü partiya olmasını müxtəlif tədbirlərdə çıxış edərkən dəfələrlə bəyan edərək deyib: “Yeni Azərbaycan Partiyası Azərbaycanın həyatında ən güclü, ən böyük intellektual səviyyəyə, ən böyük hörmətə malik olan siyasi partiyadır. Yeni Azərbaycan Partiyası Azərbaycanın bu gününün partiyasıdır, Azərbaycanın sabahının partiyasıdır, XXI əsrin partiyasıdır, üçüncü minilliyin partiyasıdır”.

Yeni Azərbaycan Partiyası Azərbaycan xalqını Heydər Əliyev idealları ətrafında səfərbər edən siyasi-ideoloji məktəbdir. Bu partiyanın siyasi strategiyasının məntiqli nəticəsi olaraq bu gün Azərbaycan siyasi həyatına Heydər Əliyev siyasi məktəbinin yetirməsi, müstəqilliyimizin və demokratiyanın qarantı olan, yeni düşüncəyə, yeni təfəkkürə malik bir gənclik qədəm qoyub. Bu gənclik Azərbaycanın siyasi həyatına yeni təfəkkür, praqmatik düşüncə və intellektual səviyyə tərzi ilə qədəm qoymuş bir liderin — möhtərəm Prezidentimiz, Yeni Azərbaycan Partiyasının sədri İlham Əliyevin ətrafında sıx birləşib. Ümummilli lider Heydər Əliyevin ideyalarını yaşadan, siyai kursunu layiqincə davam etdirən möhtərəm Prezidentimiz İlham Əliyev Yeni Azərbaycan Partiyasının aparıcı mövqelərinin daha da möhkəmləndirilməsi, cəmiyyətin demokratik düşüncəli, hərtərəfli biliyə malik sağlam qüvvələrinin milli dövlətçilik ideyaları ətrafında daha sıx birləşdirilməsi üçün çox zəruri, dəyərli işlər görür. Möhtərəm Prezidentimizin düşünülmüş siyasəti nəticəsində bu gün Azərbaycan Avropaya və dünya birliyinə böyük uğurla inteqrasiya edir. Müstəqil dövlətimizin beynəlxalq aləmdəki mövqeləri getdikcə daha da möhkəmlənir, əlaqələri genişlənir. Dövlət başçımızın düzgün müəyyənləşdirdiyi iqtisadi strategiya Azərbaycanın iqtisadi qüdrətini daha da artırıb. Hazırda müstəqil dövlətimiz iqtisadiyyatın sürət tempinə görə dünyada lider dövlətdir. Aparıcı beynəlxalq qurumların rəyinə görə, Azərbaycan dünyada ən islahatçı dövlətdir. Bütün bunlar möhtərəm Prezidentimizin rəhbərlik etdiyi Yeni Azərbaycan Partiyasının məntiqli siyasi xəttinin nəticəsidir.

... Artıq 17 ildir ki, Azərbaycanın ictimai-siyasi həyatında öz liderliyini qoruyub saxlayan və daha da möhkəmləndirən Yeni Azərbaycan Partiyasının üzvlərinin sayı beş yüz minə çatmaq üzrədir. 17 ildir ki, ölkədə keçirilən bütün seçkilərdə rəqiblərinə böyük üstünlüklə qalib gələn Yeni Azərbaycan Partiyası üçüncü minilliyin partiyasıdır. Partiyanın böyük müvəffəqiyyətlə həyata keçirdiyi strategiyası onu liderlik zirvəsindən heç vaxt endirməyəcək.

Əliqismət BƏDƏLOV

Xalq qəzeti.- 2009.- 21 noyabr.- S. 5.