Rusiya Yazıçılar İttifaqında görüş

Azərbaycanlı ədib Yazıçılar İttifaqının 75 illik yubiley medalı ilə təltif edilmişdir

Ötən həftə Avrasiya Yazıçılar Liqasının prezidenti, Rusiya Yazıçılar İttifaqı Moskva təşkilatının baş direktoru, müasir rus poeziyasının görkəmli nümayəndələrindən olan Vladimir Boyarinov Azərbaycanlı yazıçı-filosof, dünya kəlam məktəbinin ən görkəmli nümayəndələrindən olan Hacı Fərhad Mirzəni Moskvaya dəvət etmişdir. Dost ölkənin paytaxtında keçirilən görüşdə soydaşımızın ədəbi yaradıcılığının bu ölkədə yüksək qiymətləndirildiyi barədə bir neçə məqam vurğulanmışdır.

Qeyd edilmişdir ki, Azərbaycan, Türkiyə və Rusiya Yazıçılar Birliklərinin üzvü, Türk Dünyası Araşdırmaları Uluslararası Elmlər Akademiyasının akademiki Hacı Fərhad Mirzə SSRİ Yazıçılar İttifaqının 75 illiyi münasibətilə təsis edilmiş “Yubiley medalına” layiq görülmüşdür. İkinci məqam isə azərbaycanlı müəllifin “Mısl” nəşriyyatında çapa hazırlanan “Kəlamlar” (“Kyalam”) kitabının ön sözünün məhz Vladimir Boyarinov tərəfindən yazılmasıdır. Kitabı rus dilinə fəlsəfə elmləri doktoru, professor Əli Abbasov tərcümə etmişdir.

Vladimir Boyarinov Hacı Fərhad Mirzə ilə söhbətində qeyd etmişdir ki, 1934-cü ilin avqustunda — XX əsrin ən görkəmli yazıçılarından olan Maksim Qorkinin rəhbərliyi ilə yaradılmış (M.Qorki 34-36-cı illərdə bu ittifaqın ilk sədri olmuşdur — red.) SSRİ Yazıçılar İttifaqı Avrasiyanın kifayət qədər böyük ərazisini əhatə edən bir məkanda özünəməxsus xidmətlərə malik olmuşdur. SSRİ dağılandan sonra isə təkcə Rusiyada və ya Azərbaycanda deyil, bütövlükdə postsovet məkanında müəyyən maraqlı qüvvələrin dəstəyi ilə mənəvi dəyərlərin aşınması prosesi başlanmışdır. Təsadüfi deyildir ki, Rusiya Yazıçılarının XIII qurultayında (aprel-2009-cu il – red.) yazıçı Boris Burmistrov həyəcan təbili çalaraq televiziyaların, sarı mətbuatın və bir sıra təşkilatların mənfi təbliğatının qarşısının alınmasının vacibliyini qeyd etmişdir. Həm Moskvada, həm də Bakıda dövlət rəsmiləri bu istiqamətdə çoxsaylı tədbirlər həyata keçirsə də, ziyalıların, xüsusən, qələm sahiblərinin üzərinə böyük vəzifələr düşür: “Mən məmnunam ki, Azərbaycanlı yazıçı Fərhad Mirzənin yaradıcılığında mənəvi aşınmaların aradan qaldırılması üçün özünəməxsus mübarizə ahəngi vardır” — deyə Vladimir Boyarinov bildirmişdir.

Rusiyalı ədəbiyyat rəsmisi yubiley medalını Hacı Fərhad Mirzəyə təqdim etmiş, “Kəlamlar” kitabının böyük əhatəyə malik rusdilli oxucular məkanına təqdim edilməsindən məmnunluğunu dilə gətirmişdir. Sonra Hacı Fərhad Mirzə çıxış edərək dost ölkədə onun yaradıcılığına göstərilən böyük diqqətə və təltifə görə öz minnətdarlığını ifadə etmişdir. Soydaşımız qeyd etmişdir ki, ədəbiyyatların dostluğu dövlətlərin və xalqların dostluğuna həmişə böyük töhfə verib və yenə də verəcəkdir. Görüşdə Avrasiya Yazıçılar Liqasının üzvü, TDAUEA-nın Azərbaycan təmsilçisi, professor Elçin İsgəndərzadə də iştirak etmişdir. Qeyd edək ki, görüş 2009-cu ilin aprelində Rusiya Yazıçılar İttifaqı Moskva Şəhər Təşkilatında bilavasitə Vladimir Boyarinovun təşəbbüsü ilə yaradılmış “Boyarinov Ədəbi-Bədii Studiyası”nda keçirilmişdir.

İttifaq MİRZƏBƏYLİ

Xalq qəzeti.- 2009.- 22 noyabr.- S. 6.