“Ən yaxşı ümumtəhsil məktəbi”nin kollektivi yeni dərs ilində də bu nailiyyəti saxlamaq niyyətindədir

Bu il 50 “ən yaxşı ümumtəhsil məktəbi” adını qazanmış qaliblər sırasında Bakının Xətai rayonundakı 17 saylı təhsil ocağının da adı var. Söz yox ki, bu nailiyyətin qazanılmasında kollektivin gərgin əməyinin, təhsil islahatını dönmədən həyata keçirmə əzminin əhəmiyyətli rolu olmuşdur. “Ən yaxşı ümumtəhsil məktəbi” nominasiyasında qalib olan 17 saylı məktəbin direktoru Bədəl Bədəlovla söhbətimizin əsasında da məhz qazanılmış nailiyyətlərin səbəbləri dayanır.

Bədəl müəllim ilkin olaraq bu səbəblər sırasında ölkədə təhsilə göstərilən dövlət qayğısını qeyd etdi. Dedi ki, bu gün hər bir təhsil işçisi üçün ulu öndər Heydər Əliyevin təhsil sahəsindəki ideyalarını həyata keçirmək başlıca vəzifədir. Ümummilli lider çox haqlı olaraq deyirdi: “Təhsil mürəkkəb bir sahədir. Təhsil sahəsi nə sənayedir, nə kənd təsərrüfatıdır, nə də ticarətdir. Bu cəmiyyətin xüsusi, intellektual cəhətini əks etdirən sahədir”. Doğrudan da, təhsil mürəkkəb olmaqla yanaşı, həm də ölkənin gələcəyinə təminat yaradan bir sahədir. Ona görə də çox hörmətli Prezidentimiz, ulu öndər Heydər Əliyev siyasətinin uğurlu davamçısı cənab İlham Əliyev təhsili Azərbaycanın davamlı inkişaf strategiyasının ən öncül istiqamətlərindən biri adlandırmışdır. Və bu gün ulu öndərin başladığı təhsil islahatının həyata keçirilməsi üçün cənab Prezident çox ciddi və davamlı tədbirlərin reallaşmasını təmin edir.

Son beş ildə məktəblərimiz tanınmaz dərəcədə dəyişmişdir. Dövlət başçımızın həyata keçirdiyi uğurlu tədbirlər, imzaladığı fərman və sərəncamlar məktəblərimizin tamamilə yeniləşməsinə stimul yaratmışdır. Təsəvvür edin ki, bu müddət ərzində bilavasitə təhsillə bağlı 16 Dövlət Proqramı qəbul olunmuş və onların əksəriyyəti öz real həllini tapmış və tapmaqdadır. Ölkədə 1600-dən çox yeni məktəb və mövcud məktəblərə əlavə korpuslar tikilmişdir. Məktəb tikintisinin genişlənməsində YUNESKO və İSESKO-nun xoşməramlı səfiri, Heydər Əliyev Fondunun prezidenti, Milli Məclisin deputatı Mehriban xanım Əliyevanın xidmətləri xüsusilə qeyd olunmalıdır. Bu gün, demək olar ki, ölkəmizin əksər bölgələrində Heydər Əliyev Fondunun vəsaiti hesabına inşa edilmiş yeni məktəblər müəllimlərin və şagirdlərin istifadəsinə verilmişdir. Son illər yeni dərsliklərin nəşrinə diqqət artırılmış, təhsilin məzmununda əsaslı yeniləşmə yaranmışdır. Ən başlıcası isə məktəblərimizə informasiya texnologiyaları gətirilməyə başlanmışdır. 2004-cü ildə cənab Prezidentin imzaladığı sərəncama uyğun olaraq məktəblərimizdə hər 33 şagirdə 1 kompyter nisbəti həll olunmuş, artıq bu sahənin inkişafına dair ikinci Dövlət Proqramı qəbul olunmuşdur. “1 şagirdə 1 kompyuter” layihəsinin reallaşması istiqamətində işlər davam etdirilir.

Son illər ümumtəhsil məktəblərində həyata keçirilən islahatlar yeni mərhələyə qədəm qoymuşdur. Bakı şəhər məktəblərində əvvəlki sıxlıq yoxdur. Təhsil Nazirliyinin, Bakı Şəhəri üzrə Təhsil İdarəsinin həyata keçirdiyi davamlı tədbirlər öz müsbət nəticəsini vermişdir. Ən əsası budur ki, məktəblərimizdə təhsilin məzmun yeniləşməsi istiqamətində ciddi iş aparılmağa başlanılmışdır. Ötən tədris ilindən başlanan kurrikulum islahatı məhz bu məsələyə xidmət edir. Bu il ikinci siniflər də bu islahata qoşulmuşdur. Təhsilin uşaqların maraq dairələri nəzərə alınmaqla qurulması islahatın əsas məqsədidir.

— Söz yox ki, məktəbinizin müsabiqədə qalib çıxmasında ötən dərs ilinin yekunları da əsas rol oynamışdır. Hansı nailiyyətləri qeyd etmək istərdiniz — sualını Bədəl müəllim belə cavablandırdı: — Nailiyyətlər çoxdur. Təkcə ötən il deyil, səkkiz illik göstəricilərə görə məktəbimiz yeddi dəfə respublikanın ən yaxşı nəticə göstərən təhsil ocaqlarından olub. Məktəbimizin bütün məzunları attestat ala bilib. Hələ ötən il TQDK-nın məlumatına əsasən 2008-ci ilin qəbul imthanlarının nəticələrinə görə bizim məktəb Bakı şəhərinin 20 ən yaxşı məktəbi sırasında 15-ci yerə çıxmışdır. Bu il də ali məktəblərə qəbul sahəsində nailiyyətlərimiz var. Məzunlarımız yüksək ballarla ali və orta ixtisas məktəblərinə qəbul olmuşlar.

Bədəl müəllim ötən tədris ilində şagirdlərin təlim-tərbiyəsi ilə bağlı aparılmış işlərdən danışdı. Dedi ki, məktəbdə ötən illərlə müqayisədə əlaçılar və 4-5 qiymətlərlə oxuyanların sayı artmış, keyfiyyət faizi xeyli yüksəlmişdir. Məktəbdə il boyu işgüzar psixoloji iqlim olmuşdur ki, bu da məktəb, şagird və müəllim kollektivinin var gücü ilə çalışmasının əsas stimulu olmuşdur.

İl ərzində məktəbdə bütün fənlər üzrə açıq dərslər təşkil olunmuş, dəyirmi masalar keçirilmişdir. Milli kurrikulumun öyrənilməsi və tətbiqi il boyu diqqət mərkəzində saxlanılmışdır. Məktəbin I sinif müəllimlərinin silsilə açıq dərsləri keçirilmişdir. Kurrikulumun tətbiqi sahəsində xeyli uğurlar qazanılmışdır.

Məktəb şagirdlərinin müxtəlif fənn olimpiadalarında iştirakı da uğurlu olmuşdur. Olimpiadaların rayon turunda məktəbin 4 nəfər şagirdi 1, 5 nəfər şagirdi II və 6 nəfər şagirdi isə III yerləri tutmuşlar. Şəhər turuna çıxmış şagirdlərin 2 nəfəri II və 3 nəfəri isə III yeri tutmuşdur. Ayrı-ayrı fənlərin tədrisinə gəldikdə isə rus bölməsində ana dili, biologiya, tarix, riyaziyyat, Azərbaycan bölməsində Azərbaycan dili və ədəbiyyatı, kimya, riyaziyyat fənlərinin tədrisi vəziyyəti qənaətbəxş olmuşdur. Dərs ili ərzində fənlərin tədrisi vəziyyətinin yoxlanılması göstərdi ki, məktəbin təcrübəli müəllimlərindən G.Ələkbərova, V.Neverova, E.Əsgərova, M.Rəhimova, G.Məmmədova və başqaları bu gün əvvəlki həvəslə çalışır, şagirdlərin təlim-tərbiyəsində, gənc müəllimlərin pedaqoji ustalığının artırılmasında var qüvvələrini sərf edirlər.

2008-2009-cu dərs ilində məktəbdə bir sıra tədbirlər keçirilmişdir. Belə ki, noyabrın 28-dən dekabrın 9-dək qeyri-hökumət təşkilatı olan “Heydər Əliyev İrsinin Araşdırma Mərkəzi” ilə birlikdə Heydər Əliyevin anım 10 günlüyü keçirilmişdir. Dekabr ayında Mikayıl Müşfiqin 100 illiyi münasibəti ilə ədəbi-bədii kompozisiya təşkil olunmuş, Azərbaycanın xalq şairləri Nəriman Həsənzadə və Gülhüseyn Hüseynoğlunun iştirakı ilə “Müşfiq-100” dəyirmi masası və bədii gecə təşkil olunmuşdur. Dekabr ayında “Dünya Azərbaycanlılarının Həmrəyliyi Günü"nə həsr edilmiş həftəlik keçirilmişdir. Yanvar ayında 20 Yanvar faciəsinə həsr olunmuş “Qanlı Yanvar” mövzusunda dəyirmi masa təşkil edilmişdir. III-VIII siniflərin iştirakı ilə ədəbi-bədii kompozisiya göstərilmişdir. May ayında görkəmli Azərbaycan bəstəkarı Şəfiqə Axundovanın anadan olmasının 85 illiyi münasibəti ilə “Azərbaycan Qadınlar Cəmiyyəti” qeyri-hökumət təşkilatı ilə birlikdə tədbir keçirilmişdir.

İdman sahəsində IX sinif şagirdi Yevgeniya Jitkokova Bakıda keçirilən Bədii Gimnastika üzrə Avropa çempionatında gümüş medal qazanmışdır. Bundan başqa məktəbin XI sinif şagirdi Tərlan Namazov Yeniyetmələr arasında Parus üzrə Asiya Çempionatının bürünc mükafatını almışdır. IX sinif şagirdi Hümbət Məmmədli sərbəst güləş üzrə respublika çempionu olmuşdur. Məktəblilərin 2009-cu il spartakiadasında beş idman növü üzrə məktəb şagirdləri diplomlara layiq görülmüşdür. İstedadlı şagirdlərin aşkara çıxarılması məqsədi ilə keçirilmiş Bilik yarışının I və II şəhər turunda müəyyən uğurlar olmuşdur. 3 şagirdimiz II, 2 şagirdimiz isə III yeri tutmuşlar.

Müasir audio və video vasitələrindən istifadə il boyu diqqət mərkəzində saxlanılmışdır və bütün dərslərdə Təhsil Nazirliyi tərfəfindən verilmiş metodiki filmlərdən istifadə olunmuşdur. Məktəbin 30 nəfər müəllimi kompyuter hazırlığı kurslarından keçmiş və ilk kompyuter vərdişlərinə yiyələnmişlər. Hal-hazırda məktəbdə Təhsil Nazirliyi tərəfindən “İntel” tədris kursları təşkil olunmuş və 34 nəfər müəllim bu kurslardan keçir. Məktəbin internetə çıxışı təmin olunmuş, e-mail və elektron poçtu yaradılmışdır.

2009-2010-cu tədris ilinə hazırlıq məqsədilə məktəb təsərrüfatı sahəsində də müəyyən işlər görülmüşdür. Məktəbin dam örtüyü və istilik sistemi əsaslı təmir olunmuşdur. Bütün dəhlizləri və sinif otaqları cari təmir olunmuşdur.

Əlbəttə, yeni dərs ili təzəcə başlasa da, məktəb kollektivi gələcək nailiyyətin təməlini elə indidən qoymağa başlamışdır. Biz çalışırıq ki, dövlət rəhbərinin təhsilə qayğısına öz əməli işimizlə cavab verək.

M.MÜKƏRRƏMOĞLU

Xalq qəzeti.- 2009.- 2 oktyabr.- S. 7.