Ölkənin sosial-iqtisadi inkişafı səhiyyə sisteminin də tərəqqisinə zəmin yaradır

Mingəçevir səhiyyəsi bu imkanlardan daha çox bəhrələnir

Azərbaycan Respublikasının Prezidenti İlham Əliyevin imzası ilə təsdiqlənmiş, ölkə ictimaiyyəti tərəfindən uğurla icra edilən dövlət proqramları çoxsaylı uğurlarla tarixə yazılır. Bu gün cəmiyyət həyatının elə bir sahəsi yoxdur ki, orada inkişaf, tərəqqi, infrastrukturun müasirləşdirilməsi qeydə alınmasın. Nəinki ölkəmizdə və regionda, eləcə də bütün dünyada ürək açıqlığı ilə etiraf edilir ki, böyük dövlət qurucusu olan Heydər Əliyevin siyasi kursunun davam etdirilməsi Azərbaycanı inkişaf etmiş ölkələr sırasına aparır. Biz səhiyyə işçiləri böyük fəxr və iftixarla qeyd edirik ki, müasir Azərbaycan səhiyyəsi də respublikamızın ümumi inkişafı fonunda iti sürətlə yeniləşir, müasir standartlar səviyyəsinə qaldırılır.

Mən hərdən 2003-cü ilin oktyabrından sonrakı dövrün ictimai-siyasi proseslərini xatırlamağı xoşlayıram. Xüsusən, həmin tarixdən sonra cənab İlham Əliyevin bölgələrə səfərləri barədə qəzetlərdən oxuduğum, televiziyalardan seyr etdiyim materiallar belə deməyə əsas verir ki, Azərbaycan səhiyyəsi özünün həqiqi inkişaf mərhələsini məhz son 6 ildə yaşayır. Diqqət yetirin, bu müddətdə elə bir ay olmaz ki, Prezident İlham Əliyev hansısa bölgəyə səfər etməsin. Üstəlik, mən xatırlamıram ki, Prezidentimiz hansısa bölgəyə səfəri zamanı ən azı bir səhiyyə müəssisəsinin açılışında və ya təməlqoyma mərasimində iştirak etməsin. Bu gün artıq paytaxtla yanaşı Gəncədə, Sumqayıtda, Naxçıvanda, Lənkəranda, Şəkidə, Qubada və bir çox başqa şəhərlərdə ən müasir diaqnostika mərkəzləri və bütün texniki imkanları olan xəstəxanalar vardır. Sevindirici haldır ki, 14 tibb müəssisəsini özündə birləşdirən Mingəçevir Şəhər Mərkəzi Xəstəxanası da dövlətin qayğısı, Səhiyyə Nazirliyinin və şəhər icra hakimiyyətinin daimi diqqəti ilə gündən-günə müasirləşir.

Şəhərimizdə 6 dispanser, Mərkəzi şəhər xəstəxanası, “Ana və uşaq” müalicə-sağlamlıq mərkəzi, doğum evi, 2 saylı böyüklər və uşaqlar üçün poliklinika, tələbə poliklinikası, uşaq nevroloji sanatoriyası, nəhayət, təcili və təxirəsalınmaz tibbi yardım stansiyası vardır. Bütün bu müəssisələr şəhər mərkəzi xəstəxanasının nəzdində fəaliyyət göstərirlər. Şəhərimizdə məskunlaşmış qaçqın və məcburi köçkünlərlə birlikdə 120 mindən artıq əhaliyə tibbi xidmət göstərən müəssisələrimizdə 2220-dən çox işçi çalışır.

Son zamanlar Mingəçevir səhiyyəsində dəyişikliklər daha sürətlə gedir. Məsələn, bu il tibb müəssisələrinin daxili imkanları hesabına tələbə poliklinikasının qarşısında “Tibb işçiləri parkı” yaradılmış və ulu öndər Heydər Əliyevin anadan olmasının 86-cı ildönümü günündə parkın açılışı olmuşdur. Mərkəzi xəstəxananın həyətində mini park salınmış, fəvvarə quraşdırılmış, həyətyanı sahədə yaşıllaşdırma işləri aparılmış, həyətin görkəmi dəyişdirilmişdir. Xəstəxana həyətində olan tratuarların əksəriyyəti yeni beton tökmələrlə əvəz edilmiş və rənglənmişdir. Xəstəxanada yeni bir bölmə – diaqnostik müayinə kabinetləri istifadəyə verilmiş, burada bir çox yeni avadanlıqlar yerləşdirilmişdir. “Ana və uşaq” müalicə-sağlamlıq mərkəzinin həyətində abadlıq işləri aparılmış, reanimasiya şöbəsində təmir işləri başa çatdırılmışdır. Doğum evində, təcili tibbi yardım stansiyasında və digər tibb bölmələrində də müxtəlif təmir və abadlıq işləri aparılmışdır.

Müasir dövrdə səhiyyə işçilərinin qarşısında duran ən mühüm vəzifələrdən biri də yaz-yay mövsümündə infeksion xəstəliklərin yayılmasının qarşısının vaxtında alınmasıdır. Bu məqsədlə mərkəzi şəhər xəstəxanasının rəhbərliyi Gigiyena-Epidemiologiya Mərkəzi, Taun Əleyhinə Stansiya və Profilaktik Dezinfeksiya İdarəsi ilə birlikdə kompleks tədbirlər planı tərtib etmiş və həyata keçirmişdir. Şəhər icra hakimiyyəti rəhbərliyinin göstərişlərinə əsasən “quş qripi” əleyhinə tədbirlər planı hazırlanmış, quduzluğun profilaktikası məqsədilə hələ ilin ilk günlərində “donuz qripi”nin profilaktikasının təşkil edilməsi üçün isə may ayında müvafiq əmrlər imzalanmışdır. İnfeksion şöbələrdə vəba, quş və donuz qripi əleyhinə palatalar təşkil edilmiş, həmin palatalar tələb olunan dərman vasitələri, avadanlaıqla təmin edilmişdir. Bütün bu məqsədlərlə ilin birinci yarısında təxminən 80 min manata qədər vəsait xərclənmişdir.

Təbii ki, səhiyyə xidmətinin yüksəldilməsinin ən mütərəqqi və vacib yollarından biri dərman təminatının yaxşılaşdırılması və xəstələrin təlimata uyğun qidalandırılmasıdır. Şəhər icra hakimiyyətinin yaxından köməkliyi ilə dərman təminatında kifayət qədər müvəffəqiyyətimiz var. Məsələn, ötən ilin ilk 6 ayında bu məqsədlə 81 min 185 manat xərcləmişdiksə, bu ilin müvafiq dövründə həmin göstərici 93 min 425 manat olmuşdur. Ərzaq təminatı üçün xərclədiyimiz vəsait də müvafiq olaraq 65 min 545 manatdan 70 min 379 manata qədər artmışdır.

Azərbaycan Respublikası Prezidentinin 2009-cu ili “Uşaq ili” elan etməsindən sonra həm Səhiyyə Nazirliyində, həm də Mingəçevir Şəhər İcra Hakimiyyətində “tədbirlər planı” hazırlanmışdır. Şəhərin səhiyyə ictimaiyyəti hər iki “tədbirlər planı”nın uğurla icra edilməsində fəallıq göstərmiş, bütün məktəb və məktəbəqədər tərbiyə müəssisələrində uşaqlar arasında dərin tibbi müayinələr aparılmışdır. Aşkarlanan xəstələrin nəzarətə götürülməsi və onların müalicəsi təmin edilmişdir. Həmin “tədbirlər planı”na uyğun olaraq aztəminatlı və köçkün ailələrindən olan uşaqların pulsuz müayinəsi və müalicəsi təmin edilmiş, infeksion xəstəliklərin profilaktikası məqsədilə immunlaşdırma prosesi daim nəzarətdə saxlanılmışdır. Hemofiliyalı və talassemiyalı uşaqlara xüsusi diqqət yetirilir.

Bir faktı xüsusilə qeyd etmək yerinə düşərdi. Bu ilin may ayında Bakı şəhərində cənab Prezident İlham Əliyevin iştirakı ilə açılmış “Talassemiya mərkəzi” bu qəbildən olan uşaqların bütün respublikada müalicəsi və nəzarətdə saxlanılması üçün mühüm əhəmiyyət kəsb edən milli mərkəz olmuşdur. Onu da əlavə edim ki, Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban xanım Əliyeva da talassemiyalı uşaqlara qayğı göstərilməsi üçün mühüm təşəbbüslərlə çıxış edərək cəmiyyətin böyük hörmətini qazanmışdır.

Ölkənin mühüm sənaye şəhərlərindən olan Mingəçevirin əhalisi ilə yanaşı regionun bir sıra şəhər və rayonlarından gələn insanlar da bizim səhiyyə müəssisələrimizdə keyfiyyətli müayinə və müalicə xidməti ala bilirlər. Bunu bizim kadrlarımızın səviyyəsi və yaradılmış zəngin maddi-texniki baza təmin edir. Dövlətin yaratdığı imkanlara biz öz yaxşı işimizlə cavab veririk. Bizim yaxşı fəaliyyətimiz isə dövlət tərəfindən yüksək qiymətləndirilir. Məsələn, ötən il Azərbaycan səhiyyəsinin 90 illiyi münasibətilə bir nəfər mingəçevirli həkim “Tərəqqi” medalına layiq görülmüşdü. Şəhərimizin 60 illik yubileyi münasibətilə isə həkimlərimizdən 3 nəfərinə “Əməkdar həkim” adı verilmişdi. Bu il – növbəti “Səhiyyə İşçiləri Günü” münasibətilə daha bir həkimimiz “Tərəqqi” medalı ilə təltif edildi. Səhiyyə Nazirliyi və Mingəçevir Şəhər İcra Hakimiyyəti də əməkdaşlarımızın xidmətini daim qiymətləndirir, onları “Fəxri fərman”lara və digər mükafatlara layiq görürlər.

Öz vəzifə borclarını layiqincə yerinə yetirən Mingəçevir səhiyyəsinin bütün təmsilçiləri həm şəhərimizin, həm də ölkəmizin həyatındakı istənilən ictimai-siyasi proseslərdə fəallıq nümayiş etdirirlər. Çünki bu Vətən, bu ölkə, bu dövlət bizimdir. Vətənimiz daha abad, ölkəmiz daha firavan, dövlətimiz daha qüdrətli olduqca biz də daha xoşbəxt oluruq. Məşhur təbiblər söyləyiblər ki, xoşbəxtlik hər kəsin öz əlindədir.

Muxtar PAŞAYEV,

Mingəçevir Şəhər Mərkəzi Xəstəxanasının baş həkimi

Xalq qəzeti.- 2009.- 2 oktyabr.- S. 4.