Ahıllara qayğı və diqqət artırılır

Beynəlxalq Ahıllar Günü ölkəmizin bütün şəhər və rayonlarında geniş və rəngarəng tədbirlərlə qeyd olunmuşdur. Xatırladaq ki, Birləşmiş Millətlər Təşkilatının qətnaməsinə əsasən 1963-cü ildən etibarən hər il oktyabr ayının 1-i bütün dünyada ahıllar günü kimi qeyl olunur. Xalqımızın ümummilli lideri Heydər Əliyevin təşəbbüsü ilə 1993-cü ildən Azərbaycanda da bu münasibətlə geniş tədbirlər keçirilir.

Bundan əlavə, Azərbaycan Respublikasında ahıl vətəndaşların sosial müdafiəsinin yaxşılaşdırılması və onlara dövlət qayğısının artırılması məqsədilə ölkə Prezidenti İlham Əliyev 2006-cı il aprelin 17-də “Ahıl vətəndaşların sosial müdafiəsinin gücləndirilməsi üzrə Dövlət Proqramı”nın təsdiq edilməsi barədə sərəncam imzalamışdır. Ötən il sentyabr ayının 1-dən isə ölkədə əmək pensiyasının baza hissəsi 75 manata çatdırılmışdır. Bütün bunlar ölkəmizdə əhalinin bu təbəqəsinin dövlət qayğısı ilə tam əhatə olunmasını təsdiqləyir.

Dünən paytaxtın Nizami rayonunda da 1 Oktyabr – Beynəlxalq Ahıllar Günü ilə bağlı müxtəlif tədbirlər keçirildi. Rayon ərazisindəki “Star” idman kompleksində keçirilən mərasimdə icra hakimiyyəti başçısının müavini İbrahim Mehdiyev çıxış edərək ahılları və ağbirçəkləri bayram münasibətilə təbrik etdi. Bildirdi ki, rayonun 7383 nəfərdən çox ahıl və ağbirçək sakini icra hakimiyyəti rəhbərliyinin daimi diqqət və qayğısı ilə əhatə olunmuşdur. Onların mənzil-məişət şəraiti, sosial-iqtisadi vəziyyətləri, sağlamlıqları diqqət mərkəzində saxlanılır, bütün müraciətlərinə həssaslıqla yanaşılır. İ.Mehdiyev onu da dedi ki, hazırda Nizami rayonunda yaşayan 495 nəfər ahıl və kimsəsiz vətəndaşa sosial-məişət xidməti göstərilir ki, onların da 10 nəfəri yaşı 90-ı ötmüş şəxslərdir. Bundan əlavə, rayonda 30 nəfər Prezident təqaüdünə layiq görülmüş ahıl vətəndaş yaşayır. Sonda rayon icra hakimiyyəti başçısının təbriklərini çatdıran natiq bildirdi ki, ahıl vətəndaşların sosial müdafiəsinin yaxşılaşdırılması bundan sonra da diqqət mərkəzində saxlanılacaq, bu sahədə görüləcək işlərin daha səmərəli həyata keçirilməsi təmin ediləcək.

Sonra rayonun ahıl vətəndaşları arasında təşkil olunmuş stolüstü idman oyunlarının startı verildi. Müxtəlif yarışların qalibləri, eləcə də II və III yerləri tutan iştirakçılara pul mükafatları təqdim olundu. Yarışların digər iştirakçılarına isə idman geyimləri hədiyyə edildi.

Daha sonra rayon ərazisindəki “Sevinc” şadlıq sarayında ahıllar üçün bayram süfrəsi açıldı. Burada rayonda yaşayan bütün ahıl və ağbirçəklərə Nizami Rayon İcra Hakimiyyəti tərəfindən bayram sovqatı paylanıldı.

M.YAQUBZADƏ

Xalq qəzeti.- 2009.- 2 oktyabr.- S. 3.