Azərbaycan Yazıçılar Birliyi - 75

Şeirin səsi

Azərbaycan Yazıçılar Birliyində ilk və yaddaqalan maraqlı layihə cərcivəsində müxtəlif nəsilləri təmsil edən 8 istedadlı Azərbaycan şairinin müəllif ifası ilə audiodiskinin təqdimatı keçirildi.

Tədbirin təşkilatçısı və aparıcısı şair Səlim Babullaoğlu bildirdi ki, təqdim olunan diskin arxa üzündə yazıldığı kimi bu layihə şair və yazıçı Əjdər Olla poeziyamızın yeni və istedadlı simalarından olan Rəbiqə Nazimqızının işgüzar təşəbbüsü nəticəsində meydana gəlib.

Qrupun müzakirəsindən sonra diskin bütün tərtibatı, təşkilatçılığı və digər texniki məsələlər “Sel” Modern Teatrına həvalə olunmuşdu. Əjdər Ol, Elxan Zal, Fərhad Mete, Rəbiqə Nazimqızı, Qismət, Əli Əlioğlu, Feyziyyə və Səlim Babullaoğlunun şeirlərindən (hər bir şairdən iki-üç şeir olmaqla) ibarət olan bu disk “Nur” Prodakşının bazasında buraxılmışdır. Şeirlər tematik olaraq fərqlidir, eyni zamanda müəlliflər öz ifalarında qiraət bacarıqlarını ortaya qoyublar. Müəllif qiraətləri gənc gitaraçı Leyla Quliyevanın ifa etdiyi maraqlı musiqi parçalarının müşayiəti ilə təqdim olunub. Üst-üstə diskə 18 şeir toplanıb.

Disklərin bir hissəsi həm də DVD formatında- görüntülər də olmaqla hazırlanıb. Amma əksər hissə audioformatdadır. Bu layihənin həm əziz, həm də üzücü bir tərəfi də var. Studiyada səsləri yazandan bir həftə sonra istedadlı şair, çox maraqlı bir insan olan Fərhad Mete avtomobil qəzası nəticəsində həlak oldu.

Metenin itkisi hamı üçün ağır oldu. Bu hadisədən sonra qərara gəlinib ki, disk Fərhadın xatirəsinə ithaf edilsin - Fərhadın səsini və görüntüsünü yaşadan qiymətli və əziz xatirə kimi.

A.ÜLVİ

Xalq qəzeti.- 2009.- 3 oktyabr.- S. 8.