“Önündə baş əydim, əziz müəllim...”

Lənkəranda təntənə ilə qeyd edilən bayramlardan biri də Beynəlxalq Müəllimlər Günüdür. Təhsilin cəmiyyət həyatı üçün necə əhəmiyyətli bir sahə olduğunun ciddi fərqinə varan lənkəranlılar hər il oktyabrın 5-də rayonun pedaqoji ictimaiyyətini bu gözəl bayram münasibətilə təbrik edir və müəllimlərin zəhmətini layiqincə dəyərləndirirlər.

Budəfəki bayram tədbirləri də yaddaqalan oldu. Əvvəlcə təhsilə və təhsil işçilərinə böyük qayğısı ilə ürəklərdə əbədi məşəl yandırmış ulu öndər Heydər Əliyevin mərkəzi meydandakı möhtəşəm abidəsi minnətdarlıq duyğuları ilə ziyarət edildi, ümummilli liderin ölməz xatirəsi ehtiramla yad olundu. Sonra Lənkəran Şəhər İcra Hakimiyyətinin başçısı Süleyman Mikayılov və aparatın nümayəndələri gənclərin təlim-tərbiyəsində müstəsna xidmətlər göstərmiş qocaman müəllimlərin — təqaüddə olan 78 yaşlı Nağı Həsənovun və 85 yaşlı Firuzə Bəylərovanın evlərinə gedərək bayramlarını qiymətli hədiyyələrlə təbrik etdilər. Şərəfli pedaqoji fəaliyyətdə saç ağardaraq şagirdlərinin həyat yollarına çıraq tutmuş hər iki veteran müəllimin yetirmələri arasında hazırda elm və diplomatiya sahəsində, ölkənin ictimai-siyasi həyatında çalışan adlı-sanlı ziyalılarımız çoxdur. Görüşlərdə bütün bunlar iftixarla xatırlandı. Diqqət və qayğıdan təsirlənən veteran müəllimlər xoş sözlərə, mənəvi dayağa və mükafatlara görə rayon rəhbərliyinə razılıqlarını bildirdilər.

N.B.Vəzirov adına Lənkəran Dövlət Dram Teatrında düzənlənən bayram tədbiri də iştirakçılara unudulmaz təsir bağışladı. Bu münasibətlə hazırlanmış “Təhsilimiz dinamik inkişaf yolunda” filminin fraqmentləri bu sahədə şanlı ənənələrin layiqincə davam etdirildiyi Lənkəran təhsilinin uğurlarına güzgü tutdu. Qeyd olundu ki, Lənkəranda 89 ümumtəhsil məktəbi fəaliyyət göstərir. Dövlət qayğısı sayəsində və Heydər Əliyev Fondunun təşəbbüsü ilə son 3 ildə bu məktəblərin 14-ü üçün yeni bina inşa edilib. Rayon rəhbərliyi təhsilin inkişafına güclü dəstək verir. Təkcə ötən tədris ilində rayonun tarixində ilk dəfə olaraq 8 məktəbin tikilərək istifadəyə verilməsi misilsiz hadisə kimi yadda qalıb. Cari tədris ilində isə Lənkəranda daha 2 təhsil ocağının açılışı olub. Rvo kəndində 360 yerlik müasir orta məktəb binası dövlət vəsaiti hesabına, ucqar dağ kəndi olan Tuadoda isə 100 yerlik yeni bina Heydər Əliyev Fondunun hesabına tikilərək istifadəyə verilib.

Yeni dərs ilində rayona 32500 ədəd bədii ədəbiyyat, 88 min dərslik gətirilərək məktəblərə paylanıb. Rayonun təhsil ocaqlarında kompyuterlərin sayı 817-yə çatdırılıb ki, bu da hər 29 şagirdə 1 möcüzəli informatika qurğusu düşməsini təmin edib. Təhsilə artan diqqətin nəticəsi olaraq bu yay 361 məzun müxtəlif ali məktəblərə qəbul edilib, onlardan 11-i 600-dən yuxarı bal toplayıb.

Ötən ilin sentyabrında Amerika Beynəlxalq Təhsil Şurasının Azərbaycan Respublikasının Təhsil Nazirliyi ilə birlikdə FLEX proqramı çərçivəsində cari tədris ilində ABŞ-ın məktəblərində 1 il müddətinə oxumaq məqsədilə Lənkəran şəhərində keçirdiyi müsabiqədə 4 saylı orta məktəbin üç şagirdi qalib gəlib.

Təbii ki, uğurlarda müəllimlərin rolu xüsusilə böyüklür. Lənkəranda onların sayı 4210 nəfərdir. Son illərdə müəllim əməyinə verilən qiymətin nəticəsi olaraq yeddi pedaqoqa əməkdar müəllim fəxri adı verilib, üç müəllim “Tərəqqi” medalı ilə təltif edilib, doqquz müəllim isə qabaqcıl təhsil işçisi adına layiq görülüb. “Xalq kompyuteri” layihəsi çərçivəsində 69 müəllim faizsiz və güzəştli kredit hesabına fərdi kompyuter alıb ki, bu da pedaqoji kadrların İKT-yə yiyələnməsinə və tədris prosesində ondan geniş istifadə etməsinə böyük köməkdir.

Lənkəranda təhsilin uğurları ölkə rəhbərliyi tərəfindən daim yüksək qiymətləndirilir. Şəhər 10 saylı orta məktəbi Prezident İlham Əliyevin sərəncamı ilə keçirilən ölkə üzrə “Ən yaxşı ümumtəhsil məktəbi” müsabiqəsində qalib gələrək 10 min manat, şəhər 4 saylı məktəbin müəllimi Gülzar Əliyeva isə" Ən yaxşı müəllim" müsabiqəsində fərqlənərək 5 min manat məbləğində birdəfəlik pul mükafatı alıb.

Son illərdə Lənkəranda ucqar kəndlərə işləməyə gedən müəllimlərin sayı artıb. Belə ki, güzəştli şərtlərlə ucqarlarda dərs deməyə göndərilən müəllimlərin maddi təminatı məqsədilə “2005-2009-cu illər üçün Azərbaycan Respublikasının ümumtəhsil məktəbləri şəbəkəsində pedaqoji kadr təminatı üzrə inkişaf Proqramı” uğurla tətbiq edilib. Ucqarlara gedən müəllimlərə maaşlarından əlavə 200 manat verilməklə bərabər, yaşayış üçün torpaq sahəsi ayrılması və digər təminatlar dağ kəndlərində təhsilin keyfiyyətinin artırılmasına xidmət edir. Bu məqsədlə digər imtiyazlar da nəzərdə tutulub.

Müəllim gününə həsr olunmuş mərasimdə humanitar kollecin direktoru Cahangir İbrahimov, təhsil şöbəsinin müdiri, ölkə başçısının 30 sentyabr 2009-cu il tarixli sərəncamı ilə əməkdar müəllim adı almış Səmədağa Abdullayev, uşaq evinin direktoru, “Tərəqqi” medalına layiq görülmüş Ofeliya Səfərova, əməkdar müəllim Kamil Hüseynov və başqaları ürək sözlərini söylədilər.

Lənkəran Şəhər İcra Hakimiyyətinin başçısı Süleyman Mikayılov müəllimləri peşə bayramı münasibətilə təbrik edərək onlara ən xoş arzularını çatdırdı, başlıcası isə layiqli vətəndaş tərbiyəsində uğurlar dilədi. Bir qrup müəllimə qiymətli hədiyyələr, fəxri fərmanlar və çiçək dəstələri təqdim olundu.

Sonra müqəddəs peşə sahiblərinə konsert proqramı ərməğan edildi. Lənkəranlıların sevimli müğənniləri Cavad Rəcəbov, Mətanət Həsənova, Qabil Nəcəfov və başqaları nəğməli təbrikləri ilə müəllimləri bir daha sevindirdilər. 15 saylı uşaq bağçasının balaca fidanlarının çıxışı da maraq doğurdu. 4 saylı məktəbin şagirdi Bənizə Canıyeva sevimli müəllimlərinə həsr etdiyi şeiri söylədi.

Lənkəranda müəllimlərin peşə bayramı beləcə hamıda xoş ovqat yaratdı, hər kəsi duyğulandırdı.

Əli NƏCƏFXANLI

Xalq qəzeti.- 2009.- 6 oktyabr.- S. 4.