Azərbaycan iqtisadiyyatının inkişafında “Xalq qəzeti”nin rolu böyükdür

Bu qəzet həmişə yeni həyat uğrunda çarpışmaların önündə getmişdir.

Heydər ƏLİYEV,

Ümummilli lider

134 illik tarixə malik milli mətbuatımızda önəmli yeri olan “Xalq qəzeti” son 90 il ərzində fasiləsiz çıxmış yeganə gündəlik anadilli nəşrdir. 29 avqust 1919-cu ildə ilk nömrəsi çapdan çıxmış bu nəşr öz oxucularının görüşünə “Kommunist” adı ilə gəlmiş və bu adla 1991-ci ilədək, 1991-ci ildən etibarən isə “Xalq qəzeti” adı ilə çap olunmuşdur. Həm də Azərbaycan Respublikasının dövlət müstəqilliyini düz 56 gün qabaqlamışdır. Bəli, hər zaman öz operativ və çevik iş bacarığına malik, uzun illik təcrübə nəticəsində yüksək jurnalistlik keyfiyyətlərinə yiyələnmiş kollektivi ilə seçilmiş “Xaql qəzeti” öz müstəqilliyinə imza atmaqla dövlət müstəqilliyimizi 56 gün qabaqlamışdır.

İstər sovet dövründə, istərsə də müstəqillik illərində rəsmi dairələrin mətbu orqanı kimi nəşr edılən “Xalq qəzeti” həmişə cəmiyyətin maraqlarını əks etdirmiş, xüsusilə savadsızlığın ləğvinə, cəmiyyətdə bərabərliyin təmin edilməsinə, mədəni-kütləvi tədbirlərin geniş işıqlandırılmasına, eləcə də xalqımızın ədəbi-mədəni irsinin təbliğinə çalışmışdır. 1991-ci ildən etibarən isə, sözün əsl mənasında, dövlət müstəqilliyinin möhkəmlənməsi və Azərbaycan Respublikasının hərtərəfli inkişaf etmiş bir ölkəyə çevrilməsi üçün bir mətbu orqanın görə biləcəyindən dəfələrlə artıq iş görmüş, bu yolda yorulmadan çalışmış və genişmiqyaslı uğurlara imza atmış “Xalq qəzeti” öz yazıları ilə xalqımızın düşüncəsində “Əkinçi” ənənələrini davam etdirərək xalqımızın 90 illik tarixinin silinməz və parlaq aynasına çevrilmişdir.

Təbii ki, son dövrlər cəmiyyətin və dövlətin inkişafında mətbuatın rolu daha da güclənmişdir. Bu da ondan irəli gəlir ki, yaşadığımız qloballaşma şəraitinin özünəməxsus xüsusiyyətləri mövcuddur. Xüsusilə nəzərə alsaq ki, XXI əsr həm də informasiya əsri adlandırılır, onda müasir dövrümüzdə informasiyanın əhəmiyyətini daha aydın təsəvvür etmək olar. İstənilən inkişaf prosesində vaxtında, dəqiq və tam əldə edilmiş informasiyanın xüsusi əhəmiyyyəti vardır. Başqa sözlə desək, lazımi informasıyalara malik olmadan gələcək perspektivlərə nail olmaq qeyri-mümkündür. Bu mənada, Azərbaycan Respublikasının, onun ayrı-ayrı regionlarının sosial-iqtisadi inkişafında cəmiyyəti vaxtında və dəqiq informasiya ilə təmin edən “Xalq qəzeti”nin əhəmiyyəti danılmazdır. Ümummilli liderimiz Heydər Əliyevin sözləri ilə desək “Xalq qəzeti” mənalı yaradıcılıq yolu keçmiş, özünəməxsus üslub və sənətkarlıq xüsusiyyətləri olan nəşrlərimizdəndir. Uzun müddət “Kommunist” adı ilə nəşr edılən bu qəzet bütün Sovet dövrü ərzində Azərbaycanın ictimai, iqtisadi və mədəni həyatının güzgüsü olmuşdur...”.

Azərbaycan xalqının və dövlətinin bir əsrlik tarixini özündə əks etdirən “Xalq qəzeti” 72 il “Kommunist” adı altında çıxaraq ötən əsrin əvvəllərində dünyada baş verən hadisələri olduğu kımi işıqlandırmış, ölkədə savadsızlığın aradan qaldırılması, cəmiyyətin dolğun və dəqiq informasiya ilə təmin edilməsi, eləcə də ana dilimizin saflığı uğrunda mübarizənin ön sıralarında olmuşdur. Hələ II Dünya müharibəsi zamanı faşizmə qarşı aparılan ölüm-dirim mübarizəsində Azərbaycan xalqının igid övladlarının həm arxa, həm də ön cəbhələrdə göstərdikləri misilsiz qəhrəmanlıqları tam dolğunluğu ilə işıqlandırmışdır. Qəzet müharibədən sonrakı illərdə də öz operativliyini qoruyub saxlamış və daha gücləndirmişdir. Bu səbəbdəndir ki, istər sovet dövründə, istərsə də müstəqillik illərində bu qəzet ölkə iqtisadiyyatının inkişafında mühüm rol oynamışdır.

Ümummilli lider Heydər Əliyevin Azərbaycana ilk rəhbərliyi dövründə (1969-1982-ci illər) qəzet, sözün əsl mənasında ulu öndərin ideyalarının həyata keçirilməsində mübariz tribunaya çevrilmişdi. Onun səhifələrində neqativ hallara qarşı barışmaz mübarizə ciddi xarakter almış, respublikanın həyatında baş verən müsbət dəyişikliklər geniş təbliğ olunmuşdur. Bütün bunları nəzərə alan dahi Heydər Əliyev hakimiyyətə gəlişinin ilk dövrlərində qarşıya qoyulan vəzifələrin yerinə yetirilməsində mətbuatın gücünə inandığını bildirmiş və mətbu orqanların inkişafı istiqamətində müvafiq qərarlar qəbul etmişdir. Ulu öndər tərəfindən qəbul edilən ciddi və düşünülmüş qərarlar qəzetin nüfuzunun artmasına səbəb olmuş, eləcə də onun üzərinə daha məsuliyyətli vəzifələr qoymuşdur. Məhz ümummilli lider Heydər Əliyevin gündəlik qayğısı sayəsində xalqın qəzeti statusunu qazanmış bu mətbuat orqanı Azərbaycanda kütləviliyi ilə seçilmiş, tirajını bir neçə dəfə artıraraq özünəməxsus dəsti-xəttini qoruyub saxlamışdır.

Tarixi materiallardan aydın olur ki, qəzetin səhifələrində işıqlandırılan hər hansı təşəbbüs qısa zaman kəsiyində bütün ölkəyə yayılır və cəmiyyət tərəfindən dəstəklənərək böyük bir hərəkata çevrilirdi.

Yuxarıda qeyd etdiyimiz kimi, “Xalq qəzeti”nin ən qaynar, maraqlı və təkmilləşmə dövrü ümummilli liderimiz Heydər Əliyevin birinci dəfə Azərbaycana rəhbərlik etdiyi 1969-1982-ci illərə təsadüf edir. Həmin illərdə ölkə iqtisadiyyatının bütün sahələrində geniş quruculuq işləri aparılır, yeni müəssisələr yaradılır, eləcə də ölkədə cərəyan edən iqtisadi proseslər dərhal obyektiv işıqlandırılırdı. Ümumiyyətlə, istər SSRİ vaxtında, istərsə də müstəqillik illərində dahi Heydər Əliyevin Azərbaycana rəhbərliyi elə bir dövrə təsadüf etmişdir ki, sanki xarabalıqlar üzərində yeni bir məmləkət qurulur, sözün əsl mənasında, ölkəmiz cənnətə çevrilirdi. Vaxtilə keçmiş İttıfaqın ən geridə qalmış respublikalarından biri olan Azərbaycan məhz ümummilli lider Heydər Əlıyevin rəhbərliyi dövründə ildən-ilə öz simasını dəyişir, iqtisadiyyatını, elmini, mədəniyyətini, incəsənətini və ədəbiyyatını inkişaf etdirərək, qabaqcıllar sırasına çıxırdı. Bütün bu müsbət dəyışikliklərin baş memarı olan dahi Heydər Əliyev çox yaxşı bilirdi ki, ölkədə görülən nəhəng işlərin, həyata keçirilən möhtəşəm layihələrin müvəffəqiyyətlə reallaşması üçün xalqı səfərbər edə biləcək mətbuat orqanının mövcudluğu zəruridir.

Azərbaycan Respublikasının iqtisadi inkişafında mətbuatın, xüsusilə “Xalq qəzeti”nin əhəmiyyətini sübut edən başqa bir fikir isə qəzetin 50 illik yubileyində, yenə də ümummilli lider tərəfindən səsləndirilmişdir. Hələ bütün SSRİ-də dövlət dilinin rus dili olduğu bir vaxtda ümummilli lider Heydər Əliyev doğma Azərbaycan dilində çıxış edərək demişdir: “...Çoxlarının yaxşı yadında olar ki, bir vaxtlar Bakı fəhlələri vətənpərvərcəsinə belə bir mübariz şüar irəli sürmüşdürlər: “Neft beşilliyini iki il yarıma yerinə yetirək!” Qəzet də o zaman böyük Sovetlər ölkəsinə son dərəcə lazım olan neftlə, obrazlı desək, nəfəs alır, şanlı Bakı neftçiləri ilə birlikdə əmək növbəsində durur, neft quyuları qazmaqda, neft fontanlarını ram etməkdə onlara kömək edirdi...”

Dahi Heydər Əliyevin söylədiyi bu fikirlər “Xalq qəzeti”nin ölkənin iqtisadi inkişafındakı rolunu açıq-aydın göstərir.

Ulu öndər Heydər Əliyev tərəfindən qəzetin fəaliyyətinə verilən belə yüksək qiymət ölkədə gedən yenidənqurma proseslərini daha operativ və maraqlı işıqlandırmaqda qəzetin yaradıcı kollektivinə əlavə güc verir, onu öz işlərində daha məsuliyyətli, obyektiv və operativ olmağa sövq edirdi.

Bu günlərdə M.F.Axundov adına Mərkəzi Kitabxanada “Xalq qəzeti”nin keçmiş nömrələri ilə tanış olduq. Bu nömrələri vərəqlədikcə, 1970-80-cı illərdə Azərbaycanda tikilib istıfadəyə verilən yeni sənaye müəssisələrinin, təzə yaşayış massivlərinin, müxtəlif istiqamətləri əhatə edən yeni istehsal obyektlərinin geniş panoramına rast gəlirik. O illərdə aqrar sektorda əldə olunan nailiyyətlər, pambıqçılıq, üzümçülük istehsalında qazanılan uğurlar, sənaye, kənd təsərrüfatı, tikinti-quruculuq sahələrində irəli sürülən təşəbbüslər qəzetin baş mövzusuna çevrilmişdi. Eyni zamanda, müxtəlif vacib obyektlərdə qəzetin müxbir postları fəaliyyət göstərmiş, eləcə də ölkə iqtisadiyyatını möhkəmlətmək üçün aparılan planlı yenidənqurma işləri aidiyyatı şöbələr tərəfindən nəzarətə götürülmüdü. Keçmiş nömrələri vərəqlədikcə metro tikintisindən verilən reportajlar, kondisioner zavodunun tikintisi, yeni, daha müasir neft-kimya sənayesi müəssisələrinin inşası və s. haqqında dərc olunan materiallar diqqəti cəlb edir.

“Xalq qəzeti”ni fərqləndirən, onun ölkənin iqtisadi inkişafında əhəmiyyətini daha artıran xüsusiyyətlərdən biri də o illərin qabaqcıllarının və yenilikçilərinin təcrübəsinin ümumiləşdirilərək geniş ictimaiyyətə çatdırılmasıdır. Eləcə də bir çox vətənpərvərlik təşəbbüsləri ilk olaraq ünvanını məhz bu qəzetdə tapırdı. Bütün bunlar da stimullaşdırıcı amilə çevrilməklə əldə edilən uğurların artmasına təkan verirdi.

İstər keçmişdə, istərsə də müasir qəzet bolluğunda özünəməxsus dəst-xətti, aydın və prinsipial mövqeyi ilə seçilən, yarandığı gündən xalqın müstəqillik, azadlıq ideallarının tərənnümçüsü, təbliğatçısı kimi cəmiyyətdə böyük nüfuz qazanan, ölkədə həyata keçirilən və ya keçiriləcək bir çox iqtisadi tədbirlərin təşəbbüskarı olan “Xalq qəzeti” doğma ana dilimizdə çıxan ən uzunömürlü mətbuat orqanıdır. Eyni zamanda, qeyd etmək lazımdır ki, bir əsrə yaxın müddətdə “Xalq qəzeti” xalqımıza, Vətənimizə vicdanla xidmət edən azsaylı mətbu orqanlardan biridir və bu da qəzet kollektivinin həmişə dövlətə, dövlətçiliyə, xalqımızın tarixinə, milli-mənəvi dəyərlərinə, dilinə, dininə, adət və ənənələrinə sadiqliyinin nəticəsidir. Keçmişdə olduğu kimi, indi də qəzet istər ayrı-ayrı bölgələrdə mövcud problemlərin işıqlandırılmasında, istərsə də ölkədə və ya regionlarda sosial, iqtisadi, mədəni və s. sahələrdə əldə edilmiş uğurların geniş təbliğ olunmasında, eləcə də qarşıya qoyulmuş vəzifələrin müvəffəqiyyətlə icrasına ictimai nəzarətin həyata keçirilməsində öncül mövqedədir. Bütün bunlar isə mətbuatın dördüncü hakimiyyət adlandırılmasını şərtləndirən əsas amillərdir ki, bu yolda da “Xalq” qəzeti üzərinə düşən vəzifənin öhdəsindən layiqincə və şərəflə gəlir.

Son dövrlər “Xalq qəzeti” gündəlik ictimai-siyasi qəzet olsa da, elmi məqalələrin nəşrinə geniş yer verir. Qəzetin səhifələrində tez-tez görkəmli elm adamlarının, gənc tədqiqatçıların, müxtəlif sahələrin mütəxəssislərinin fikir və mülahizələri çap edilir. Konkret olaraq iqtisadi sferada cərəyan edən proseslər, regionların, o cümlədən ayrı-ayrı inzibati rayonların sosial-iqtisadi inkişafı, qəbul edilən Dövlət Proqramlarının icra vəziyyəti, milli iqtisadiyyatın müxtəlif sahələrinin inkişaf səviyyəsini xarakterizə edən dolğun materialların şərhinə məhz bu qəzetdə rast gəlmək mümkündür. Əlbəttə, bütün bunların əsas səbəblərindən biri mətbuata dövlət qayğısıdırsa, başqa bir səbəbi qəzet kollektivinin kifayət qədər işgüzar və təcrübəli olmasıdır. Qəzetin bütün ölkədə cərəyan edən proseslər, keçirilən tədbirlər, elmi müşavirə və konfranslar haqqında dərhal və geniş materiallar əldə etməsi kollektivin çevikliyinin bəhrəsi olmaqla yanaşı, həm də ölkənin aparıcı bir mətbu orqanının elmə, təhsilə, mədəniyyətə, iqtisadiyyata və s. göstərdiyi qayğının parlaq nümunəsidir. Ölkə iqtisadiyyatı barədə obyektiv və genişmiqyaslı təhlillər aparan, milli iqtisadiyyatın müxtəlif sahələrində həyata keçirilən tikinti - quruculuq işlərini və islahatları dolğun işıqlandıran “Xalq qəzeti” həm də iqtisadçı alimlərin mötəbər tribunasına çevrilmişdir. Qəzet həm alimlərin həyat və yaradıcılıq yolunu işıqlandırmaqla gəncləri elmə-təhsilə həvəsləndirir, həm onları unudulmağa qoymur, həm də elmi sahələrdə əldə edilən nailiyyətləri cəmiyyətə çatdıdırmaq kimi şərəfli bir işi icra edir. Müxtəlif dövrlərdə qəzetdə gedən yazılarla tanış olduqda qeyd edilənlər bir daha öz təsdiqini tapır. Qəzetin 24 may 2008-ci tarixli nömrəsində hörmətli akademiklərimiz A.Nadirov və Z.Səmədzadənin iqtisad elminin müdrik ağsaqqalı, xeyirxah insan və əsl alim olan akademik Ə.Mahmudovun anadan olmasının 85 illiyinə həsr edilmiş məqalələri dərc olunmuşdur. Məqalədə alimin elmi yaradıcılıq yolu, iqtisad elminin inkişafında, eləcə də iqtisadçı kadrların yetişdirilməsində göstərdiyi xidmətlər işıqlandırılmışdır. Məqalə ilə tanışlıqdan aydın olur ki, görkəmli alim və yüksək təşkilatçılıq qabiliyyətinə malik Ə.Mahmudov AMEA İqtisadiyyat İnstitutuna rəhbərlik etdiyi dövrlərdə iqtisadiyyatın idarə edilməsinin səmərəli sisteminin yaradılması, Azərbaycanın xalq təsərrüfatının inkişafı ilə bağlı elmi araşdırmaların aparılması, iqtisad elminin Azərbaycan xalqının mənafeyinə uyğunlaşdırılması istiqamətində cəsarətli qərarlar qəbul edərək ciddi addımlar atmışdır. Məhz bunun nəticəsidir ki, 1970-ci illərdə artıq Azərbaycanda iqtisad elminin bir neçə mühüm istiqaməti üzrə elmi məktəblər formalaşmışdır. Eyni zamanda, uzun illər akademik Əhməd Mahmudov və akademik Əlisöhbət Sumbatzadənin rəhbərlik etdiyi Müdafiə Şurasında məhz bu nəcib insanların köməyi ilə neçə-neçə azərbaycanlı gənc elmi iş müdafiə edərək alimlik dərəcəsi almış, iqtisad elminin və iqtisadiyyatın inkışafına öz töhfələrini vermişlər. “Azərbaycan iqtisad elminin müdrik ağsaqqalı, böyük alim və elm təşkilatçısı” adlı məqalədə də qeyd olunduğu kimi: “Azərbaycan iqtisad elmi möhkəm sütunlar üzərində qurulmuşdur və bu sütunların formalaşmasında akademik Əhməd Mahmudovun müstəsna xidmətləri olmuşdur. Əhməd Mahmudov və onun silahdaşlarının formalaşdırdığı, inkışaf etdirdiyi Azərbaycan iqtisad elmi yaşayır və bundan sonra da yaşayacaq. Doğma vətənımızin dirçəlişinə kömək edəcəkdir. Çünki onun əsl vətəndaş, alim akademik Ə.Mahmudov kimi ağsaqqalı olub”. Bəli, iqtisad elminin yaşamasında görkəmli alimlərimizin xidmətləri danılmazdır. Bu mənada hər zaman iqtisadçılar üçün doğma olan, öz səhifələrində elm adamlarına daim xüsusi yer ayıran və Azərbaycan Respublıkasının sosial-iqtisadi inkişafı istiqamətində elmi ictimaiyyətlə çiyin-çiyinə çalışan “Xalq qəzeti” kollektivinin xidmətləri də unudulmamalıdır. 90 illik yubileyi günlərində bu xidmətləri bir daha xatırlamaq bəlkə də qəzetin yüksək intellektual səviyyəyə malik vətənpərvər kollektivi üçün xırda bir təbrik olardı. Müxtəlif dövrlərdə Azərbaycan hökuməti tərəfindən lazımi qiymət verilmiş bu xidmətlərin elmi ictimaiyyət tərəfindən də sadəcə xatırlanması yerinə düşərdi. “Xalq qəzeti”nin elm adamlarına diqqət və qayğısının bir nümunəsi də qəzetin 8 yanvar 2006-cı il tarixli sayında işıq üzü görmüş “Zəhmətkeş alim, böyük ziyalı”adlı məqalədir. AMEA - nın müxbir üzvü, iqtisad elmləri doktoru, əməkdar elm xadimi, professor, həmkarlarının və tələbələrinin xatırində çox yüksək mədəniyyətə malik ziyalı və təvazökar insan, həmişə yenılik axtaran islahatçı alim kimi yaşayan Teymur Vəliyevə həsr edilmiş bu məqalə qəzetin iqtisad elminin inkişafında göstərdiyi xidmətlərdən biridir. Gənc alimlər, xüsusilə iqtisadçı alimlər üçün həyat və yaradıcılığı əsl nümunə və örnək olan gökəmli professor Teymur Vəliyev haqqında belə bir materialın qəzetdə işıqlandırılması gənc iqtisadçıları daha geniş miqyaslı, fundamental elmi araşdırmalar aparmağa həvəsləndirir, eləcə də ömrünün müdriklik çağlarını yaşayan bütün elm adamlarının fəaliyyətini stimullaşdırır.

“Xalq qəzeti”nin elm adamlarına, iqtisadçı alimlərə doğma münasibətinin bir nümunəsi də qəzetin 20 iyul 2008-ci il tarixli nömrəsində işıq üzü görmüş “İqtisad elmində yeni təfəkkürün görkəmli təmsilçisi” adlı məqalədir. Məqalə Azərbaycanın görkəmli iqtisadçı alimi, qısa ömür yolunda çoxsaylı elmi nailiyyətlərə imza atmış, sənayenin aparıcı qollarından olan maşınqayırma sahəsinin inkişaf etdirilməsinə dair fundamental elmi araşdırmalar aparmış Sofiq Kəlbi oğlu Hüseynova həsr olunmuşdur. Materialla tanışlıqdan sonra aydın olur ki, müxtəlif dövrlərdə ayrı-ayrı vəzifələrdə çalışan, eyni zamanda paralel olaraq elmi araşdırmalarını davam etdirən S.Hüseynov həm də “Azərbaycan Respublikası iqtisadiyyatının stabilləşdirilməsi və radikal iqtisadi islahatların həyata keçirilməsi Proqramı”nın müəllifi olmuşdur. Müstəqil iqtisadiyyatın hələ tam formalaşmadığı dövrlərə təsadüf edən bu Proqramın hazırlanması və həyata keçirilməsi sürətli iqtisadi inkışafın təmin edilməsi baxımından xüsusi əhəmiyyət kəsb edirdi. S.Hüseynovun hələ 1977-ci ildə çap etdirdiyi “Azərbaycan SSR-in sənaye qovşaqlarının formalaşması məsələləri” adlı tədqiqat işi ölkədəki təbii-iqtisadi resurs və nəqliyyat potensialından səmərəli istifadə, eləcə də məşğulluq və idarəetmə kimi problemlərin həlli baxımından sənaye qovşaqlarının əlverişli (optimal) yerləşdirilməsi, nəinki sənaye istehsalının intensivləşdirilməsini və səmərəliliyinin artırılmasını təmin etmək, həmçinin məhsuldar qüvvələrin ərazicə tarazlı inkişafına nail olmaq, sənayenin daha çox Bakı-Sumqayıt iqtisadi rayonunda təmərküzləşməsi ilə əmələ gələn makroiqtisadi ərazi disproporsiyalarını aradan qaldırmaq baxımından xüsusi əhəmiyyət kəsb edirdi.

S.Hüseynov öz elmi araşdırmalarında sənaye istehsalının qeyri-bərabər bölgüsünün yaratdığı neqativ nəticələri konkret faktlarla əsaslandırır və bu nəticələrin səmərələşdirilməsi istiqamətlərini, eləcə də respublikanın iqtisadi rayonlarının hər birində sənaye istehsalının səmərəli strukturunun formalaşdırılmasını təklif edirdi. “Xalq qəzeti”ndə dərc edilmiş həmin məqalədən də göründüyü kimi, görkəmli iqtisadçının elmi maraq dairəsi yalnız öz tədqiqat istiqaməti ilə məhdudlaşmırdı. O, regional iqtisadiyyat problemlərinin nəzəriyyə və praktikasını dərindən bilməklə bərabər, yaşadığı dövrün ən aktual iqtisadi problemləri, onların həlli barədə dərin və düşündürücü fikirlər irəli sürmək iqtidarında idi. İstər İqtisadi İslahatlar Mərkəzinin (indiki İqtisadi İslahatlar Elmi Tədqiqat İnstitutu) direktoru olan zaman, istərsə də Milli Məclisin İqtisadi siyasət daimi komitəsinin sədri olduğu zaman milli iqtisadiyyatın inkişaf perspektivləri, makroiqtisadi problemlər, o cümlədən inflyasiya, işsizlik, azad iqtisadi zonalar, qiymətlərin tənzimlənməsi, özəlləşdirmə, böhrandan çıxış yolları və s. barədə çoxsaylı məqalə, müsahibə və çıxışları əsasən “Xalq qəzeti” səhifələrində çap edilmişdir.

Bu gün sürətlə inkişaf edən müstəqil Azərbaycan Respublikasının davamlı iqtisadi inkişaf modelinin işlənib hazırlanması, həm də heç bir kənar təsirlər olmadan, milli-mənəvi dəyərlərə və dövlətçilik prinsiplərinə əsaslanaraq hazırlanması mühüm əhəmiyyət kəsb edir. Məhz bu modelin elmi-nəzəri prinsiplərinin müəyyənləşdirilməsi, milli iqtisadiyyatın bütün sahələrinin modeldə dəqiq nəzərə alınması, regionların tarazlı inkişafının təmin edilməsi və beləliklə, Azərbaycan dövlətinin iqtisadi qüdrətinin daha da artırılması üçün görkəmili akademiklərimiz Ə.Mahmudovun, Ə.Sumbatzadənin, A.Nadirovun, Z.Səmədzadənin, professor T.Vəliyevin və adları çəkilməyən digər iqtisadçı alimlərimizin elmi əsərləri çox faydalıdır. Bu alimlərin zəngin elmi yaradıcılığı ilə tanış olarkən bir həqiqəti daha dərindən dərk edirsən ki, Azərbaycan iqtisadiyyatının sürətli inkişafı iqtisad elminin yüksəlişi ilə sıx bağlıdır. Öz növbəsində elmin inkişafı qazanılmış naliyyətlərin operativ işıqlandırılması və təbliğindən çox asılıdır. Bu mənada daim elmi ictimaiyyətin köməyinə çatan, elm adamlarına doğma münasibət bəsləyən, onların tədqiqatçı kimi daha da fəallaşmasını stimullaşdıran “Xalq qəzeti”nin xidmətləri danılmazdır. Beləliklə, hər gün minlərlə oxucusu ilə görüşə gələn bir mətbuat orqanın 90 illik fəaliyyətinə qısaca nəzər salmağa, onun ölkənin iqtisadi inkişafındakı roluna aydınlıq gətirməyə çalışdıq. Əlbəttə, dördüncü hakimiyyət olan mətbuatın, o cümlədən, bir əsrə yaxın yaşı olan “Xalq” qəzetinin sosial, iqtisadi, mədəni və s. sahələrdə əldə edilən uğurlardakı payını, iqtisadi tədbir və proqramların müvəffəqiyyətlə həyata keçirilməsinə təsirini bir məqalə ilə əhatə etmək qeyri-mümkündür. Sadəcə, bu araşdırmaları aparmaqla, keçmişdə və indi olduğu kimi, gələcəkdə də birinci olması arzusu ilə “Xalq qəzeti”nin timsalında ölkənin sosial-iqtisadi inkışafında mətbuatın rolunu bir daha nəzərdən keçirməyə çalışdıq.

Xosrov KƏRİMOV,

iqtisad elmləri namizədi,

BDU-nun dosenti,

Aqil ƏSƏDOV,

iqtisad elmləri namizədi,

AMEA İqtisadiyyat İnstitutunun aparıcı elmi işçisi

Xalq qəzeti.- 2009.- 6 oktyabr.- S. 5.