AMEA Geologiya İnstitutunda gənc alim və tələbələrin III Beynəlxalq elmi konfransı keçirildi

Azərbaycan Milli Elmlər Akademiyası Geologiya İnstitutunun mətbuat xidmətinin rəhbəri Səid Hüseynovun verdiyi məlumata görə, oktyabrın 5 və 6-da Azərbaycan Milli Elmlər Akademiyası Geologiya İnstitutunda gənc alim və tələbələrin “Yer elmləri sahəsində tədqiqatların yeni istiqamətləri” adlı III Beynəlxalq elmi konfransı keçirildi.

Tədbirdə Azərbaycan, ABŞ, Almaniya, Belarus, Polşa, Qazaxıstan, İran və Gürcüstandan olan 90 gənc alim və tələbə iştirak edirdi. Konfransın təşkilatçıları Geologiya İnstitutu, Azərbaycan Geoloqlarının Milli Komitəsi və Geologiya İnstitutunun Gənc Alimlər Şurası idi. “bp”-nin dəstəyi ilə keçirilən konfransdan məqsəd Yer elmlərinin müxtəlif istiqamətləri üzrə gənc alim və tələbələrin təcrübə mübadiləsini genişləndirmək, bilgilərini artırmaq, həmçinin, yeni tədqiqat mövzuları, obyektləri seçməkdir.

Konfransda “Yanar şistlərin elastiklik əmsalının təyini üsulu”, “Bakı şəhərinin seysmik təhlükəsi, dayanıqlığı və riskinin ədədi qiymətləndirilməsi”, “Azərbaycan zəlzələlərinin fraktal statistikası”, “Qobustanın palçıq vulkanlarının xəritəsinin “ArcCİS” mühitində tərtib olunması”, “Təbrizin ərazisinin kembriyə qədərki metallogeniyası, Şimali-Qərbi İran”, “Gürcüstan ərazisində seysmohidrodinamiki müşahidələr” və s. mövzularda məruzələr dinlənildi.

Beynəlxalq elmi konfransda AMEA Gənclərin İntellektual İnkişaf Mərkəzi, Azərbaycan Dövlət Neft Akademiyası və Bakı Dövlət Universitetindən nümayəndələr də iştirak edirdilər. Proqram çərçivəsində xarici qonaqlar Gənc Alimlər Şurasının işi ilə də tanış oldular. Həmçinin, oktyabrın 6-da konfransdan dərhal sonra Pirəkəşkül palçıq vulkanına ekskursiya təşkil edildi.

A.ÜLVİ

Xalq qəzeti.- 2009.- 7 oktyabr.- S. 5.