Milli təhsilimizin inkişafına layiq uğurlar əldə edilir

 

Ölkəmizdə son illər bütün istiqamətlərdə olduğu kimi təhsil sahəsində də böyük uğurlar əldə edilib. “Təhsil Azərbaycanın davamlı inkişaf strategiyasının ən öncül istiqamətlərindən biridir” — ifadəsinin müəllifi olan möhtərəm Prezidentimiz İlham Əliyev ölkəmizə rəhbərlik etdiyi dövrdə bu sistemin inkişafını təmin edəcək 16 Dövlət Proqramı imzalamışdır. Təhsilə dövlət qayğısı sayəsində ölkəmizdə təhsil müəssisələri şəbəkəsi təkmilləşdirilmiş, onun maddi-texniki bazası möhkəmləndirilmiş, təhsilin səviyyəsi müasir standartlara uyğunlaşdırılmışdır.

 

Milli təhsilimizin böyük tərəqqisində millət vəkili, YUNESKO və İSESKO-nun xoşməramlı səfiri Mehriban xanım Əliyevanın rəhbərlik etdiyi Heydər Əliyev Fondunun böyük fəaliyyəti olmuşdur. Fondun təşəbbüsü ilə son illər Azərbaycanda yüzlərlə yeni, müasir tələblərlə cavab verən məktəblər inşa edilmiş, köhnə təhsil müəssisələri isə əsaslı təmir edilərək zəruri maddi-texniki baza ilə təchiz edilmişdir. Təhsilimizin davamlı inkişafına yönəlmiş bu irimiqyaslı işlər, təhsil işçilərinin daim qayğı ilə əhatə olunması və onların maddi-rifah halının yaxşılaşdırılması öz növbəsində təhsilimizin səviyyəsini yüksəldir və bu sahədə yeni uğurların əldə olunmasına şərait yaradır.

Möhtərəm dövlət başçımız İlham Əliyev təhsil islahatlarının dərinləşdirilməsi və müəllimlərin fəaliyyətinin stimullaşdırılması məqsədilə ölkəmizdə “Ən yaxşı müəllim” və “Ən yaxşı ümumtəhsil məktəbi” müsabiqələrinin keçirilməsi barədə sənədlər imzalamışdır. Həmin müsabiqələr təhsil ictimaiyyəti tərəfindən böyük maraqla qarşılanmış, bu sahədə çalışan insanlarımızın gələcək fəaliyyəti üçün mühüm zəmin yaratmışdır.

“İlin ən yaxşı ümumtəhsil məktəbi” müsabiqəsinin qalibləri arasında Bakının Nəsimi rayonundakı A. Şaiq adına 54 nömrəli orta məktəb də vardır.

1976-cı ildən fəaliyyət göstərən bu təhsil ocağı şəhərimizin nümunəvi məktəblərindən biridir. Təsadüfi deyildir ki, 1984-cü ildə məktəbdə olan ümummilli liderimiz Heydər Əliyev “Bu, yaxşı məktəb imiş ki, məni buraya dəvət ediblər” – ifadəsini işlətmişdi.

Məktəbdə təcrübəli pedaqoji kollektiv fəaliyyət göstərir. Şagirdlərin bilik səviyyəsi və hazırlığı dəfələrlə respublika və şəhər səviyyəli müxtəlif müsabiqə və tədbirlərdə yüksək qiymətləndirilib. Məktəbli idmançılar da ayrı-ayrı növlər üzrə keçirilən yarışlarda daim qaliblər sırasında olurlar.

Bizimlə söhbət zamanı məktəbin direktoru Sahibə Abbasova bildirdi ki, burada 1511 şagirdə 113 ixtisaslı müəllim dərs keçir. Müəllimlərdən üçü vaxtilə SSRİ-nin qabaqcıl maarif xadimi adına, yeddisi Azərbaycanın “Qabaqcıl maarif xadimi” döş nişanına, iki nəfər isə “Əməkdar müəllim” fəxri adına layiq görülmüşdür. Tanınmış pedaqoq Rimma Hənifəyeva isə Prezident təqaüdçüsüdür.

Səriştəli pedaqoqların fəaliyyətinin nəticəsidir ki, məktəbin məzunları ali məktəblərə qəbul prosesində yüksək nailiyyətlər nümayiş etdirirlər. Bu il 54 nömrəli məktəbi bitirmiş məzunlardan 62-si ali məktəblərə qəbul olunmuşdur. Onlardan 7-si 600-dən çox bal toplamışdır. Vüsal Mehrəliyevin balı isə 695 olmuşdur.

Sahibə müəllimənin sözlərinə görə, şagirdlərin faktiki biliklərinin üzə çıxarılması məqsədilə mütəmadi olaraq monitorinqlər keçirilir və onların nəticələri pedaqoji şurada müzakirə olunur. Təhsilin keyfiyyətinin artırılması, müəllimlərin peşəkarlığının və şagirdlərin dünyagörüşünün yüksəldilməsi məqsədilə fənn gecələri, açıq dərslər, dəyirmi masalar və s. tədbirlər keçirilir. Məktəbdə olan 41 kompyuter internet şəbəkəsinə qoşulmuşdur. Məktəddə fransız dili, idman və “Təbiət sevənlər” dərnəkləri fəaliyyət göstərir.

“Xüsusi istedada malik uşaqların yaradıcılıq potensialının inkişafı üzrə Dövlət Proqramı (2006-2010-cu illər)” çərçivəsində xüsusi istedadı ilə fərqlənən 30 şagirdin adı istedad bankına daxil edilmişdir.

Məktəbdə mütəmadi olaraq hərbi-vətənpərvərlik mövzusunda tədbirlər, “Şahin cəsurlar”, “Sağ cinah uğrunda” və digər yarışlar keçirilir. Şagirdlərdən Həlimə Əliyeva Heydər Əliyevin 85 illiyinə, Nadirə İsazadə isə Mir Cəlal Paşayevin 100 illiyinə həsr edilmiş inşa müsabiqələrinin qalibləri olmuşlar.

Məktəbli idmançılar son illər müxtəlif səviyyəli spartakiadalarda, mini futbol, boks, güləş, şahmat yarışlarında qalibiyyət sevinci yaşamışlar.

Ulu öndərimiz Heydər Əliyevin “Təhsil millətin gələcəyidir” ifadəsini özünə örnək bilən məktəb kollektivi bundan sonra da nümunəvi təhsil ocağı adını özündə saxlamaq niyyətindədir.

 

 

Ayaz HƏMİDOĞLU

 

Xalq qəzeti.- 2009.-13 oktyabr.- S. 7.