Azərbaycan inkişafın yeni mərhələsində

2003-cü il oktyabrın 15-də ilk dəfə prezident seçilən cənab İlham Əliyev ölkənin modernləşdirilməsi xəttini böyük uğurla həyata keçirir

İndi Azərbaycanın maddi-mənəvi sərvətlərini sadalayanda, ilk növbədə, onun təbii ehtiyatları - neft, qaz, pambıq və sair yada düşür. Ancaq ölkəyə şöhrət gətirən böyük alim, sərkərdə, lider, bir sözlə, şəxsiyyətlərin olduğu inkaredilməz faktdır. Azərbaycan dünyaya parlaq zəkası və şəxsi rəşadəti ilə doğma torpağına şöhrət gətirmiş bir çox böyük mütəfəkkir, filosof, şair, sərkərdə, dövlət xadimi vermişdir.

Azərbaycan dünyaya Cənubi Qafqaz regionu, bütövlükdə dünya üçün əhəmiyyəti bəlkə də hələ hamı tərəfindən tam mahiyyəti ilə dərk edilməyən Heydər Əliyev dühasını bəxş etmişdir. XX əsrin əvvəlində böyük Mustafa Kamal Atatürk Türkiyəni xilas etdiyi kimi, dahi Heydər Əliyev də Azərbaycanı tamamilə məhv olmaqdan, iflasdan xilas etdi. Bu xilaskarlıq missiyası ona Tanrının özünün xeyir-duası ilə verilmişdir, çünki Yer üzündə göylərdən xəbərsiz heç nə baş vermir...

Bu gün Azərbaycanın taleyi estafeti müdrik atasından almış Prezident İlham Əliyevin etibarlı əllərindədir. Heydər Əliyev Vətənə sədaqətlə xidmət etməyin şərəf və ağırlığını oğlunun çiyninə qoymuş, bütün ümidlərini ona bağlamışdı. Əbədiyaşar siyasi xadim Azərbaycan xalqına və dövlətinə İlham Əliyevin şəxsində misli-bərabəri olmayan qeyri-adi hədiyyə bəxş etmişdir. İndi Heydər Əliyev siyasi xəttinə, demokratiya və müstəqillik ideyalarına sadiq qalan İlham Əliyev milli, azərbaycançılıq maraqlarını ən yüksək səviyyədə təbliğ və müdafiə edir.

İlham Əliyev, sözün əsl mənasında, bütün parametrlərinə görə bütöv, fenomen şəxsiyyət, xarizmatik liderdir. Qeyri-adi təsir və nüfuz gücünə malik olmaq, insanlarla izah edilməsi mümkün olmayan səmimiyyət və anlayışlı münasibətlər yarada bilmək və digər mühüm cəhətlər Azərbaycanın dövlət başçısının simasında cəmləşmişdir. Siyasi lideri səciyyələndirən keyfiyyətlərin zənginliyi İlham Əliyev şəxsiyyətində ahəngdar şəkildə bir-birini tamamlayır. Onun liderlik qabiliyyəti ilə həm ölkədaxili, həm də beynəlxalq nüfuzunun optimal nisbətinin bir-birini tamamlaması heyrət doğurmaya bilmir.

ABŞ-ın nüfuzlu Con Hopkins Universiteti nəzdindəki Mərkəzi Asiya və Qafqaz Araşdırmaları İnstitutunun rəhbəri professor Frederik Starrın qeyd etdiyi kimi, “Prezident İlham Əliyevin ən güclü cəhətlərindən biri odur ki, onun üçün daim diqqət mərkəzində olmaq əhəmiyyətli deyildir. O, bacarıqlı, tarazlı, düşünülməmiş qərarlara yol verməyən, rəyi ilə razılaşmadığı insanlara ehtiramla yanaşan bir şəxsiyyətdir. Mən onun Azərbaycandakı müxalifət nümayəndələri barədə hörmətlə danışdığını dəfələrlə eşitmişəm. O, şəxsi hissləri siyasətdən ayıra bilən adamdır. Bunların hamısı çox məsuliyyətli insana xas olan xüsusiyyətlərdir. Məncə, o, indiyə qədər ölkəsinə çox gözəl xidmət edib”.

İlham Əliyevin böyük idarəetmə təcrübəsinə malik olması, istedadı və hadisələri qabaqcadan görmək bacarığı, Azərbaycanı modernləşdirməklə Qərbin inkişaf etmiş dövlətləri sırasına çıxarmaq istəyi onu ümummilli liderin - XXI əsr Azərbaycanının qurucusunun parlaq rəmzinə çevirmişdir. Görkəmli filosof, Milli Elmlər Akademiyasının həqiqi üzvü, fəlsəfə elmləri doktoru, professor Ramiz Mehdiyev “Gələcəyin strategiyasını müəyyənləşdirərkən: modernləşmə xətti” əsərində çox dəqiq qeyd edir: “Vaxtilə Heydər Əliyev əsas funksiyanı yerinə yetirmişdir - dövlətçiliyi yaratmış və möhkəmləndirmişdir. İlham Əliyev öz prezidentliyinin birinci müddətində ölkənin geoiqtisadi amilini irəlilətmək üçün əsas işi görmüşdür. Tam əminliklə demək olar ki, gələcəkdə o, ölkənin hərtərəfli modernləşdirilməsinə yönəlmiş tədbirlər kompleksini tam həcmdə həyata keçirəcəkdir”.

İlham Əliyevin fikrincə, siyasət boş sözlərə, şüarlara deyil, məhz real, əməli işlərə əsaslanmalıdır. Azərbaycan Prezidentinin gördüyü işlərin çoxu onun bir siyasi xadim kimi yetkinliyinə, vəziyyətin mümkün inkişafını təkcə ölkə miqyasında deyil, həm də bütün geosiyasi proses çərçivəsində qabaqcadan görmək qabiliyyətinə dəlalət edir. Demək lazımdır ki, o, seçkiqabağı kampaniyanın gedişində, hakimiyyətdə olduğu müddətdə xalqa verdiyi bütün vədlərinə əməl etmişdir. İlham Əliyevin prezidentliyinin ilk beş ilində ölkə öz iqtisadi əhəmiyyətini artırmış, siyasi mühit sağlamlaşdırılmış və müstəqil dövlətin vətəndaşlarının mənəvi-əxlaqi simasının formalaşmasında yeni mərhələnin əsası qoyulmuşdur. Bu illər ərzində Prezident İlham Əliyev xalqa gələcək inkişafın cəlbedici mənzərəsini təklif etmiş, iqtisadi və siyasi tərəqqinin perspektivlərini göstərmişdir. Onun modernləşmə strategiyası millətin potensialının dərin qatlarını üzə çıxarmışdır. Uzaqgörən və bəsirətli siyasətçi olan İlham Əliyev postindustrial informasiya cəmiyyətinə keçid məsələlərinin həlli üçün cəmiyyətin yüksək intellektual-mənəvi ehtiyatlarını səfərbər etməyi qarşısına məqsəd qoymuşdur. Beynəlxalq ictimai rəydə Azərbaycanın yeni statusunun möhkəmlənməsinə kömək edən yüksək inkişaf sürətinə davamlı təkan verməklə İlham Əliyev innovasiya texnologiyaları dövrünün siyasi lideri kimi tanınmışdır.

Bir dövlət başçısı kimi İlham Əliyevin ən böyük üstünlüklərindən biri müəyyən etdiyi inkişaf yolunu düşünülmüş, əvvəlcədən müəyyənləşdirilmiş hədəflərə doğru, aydın istiqamətdə aparmasındadır. Konkret məqamda dövlətin imkanları ilə yanaşı, dünyada gedən proseslərin təhlil olunaraq nəzərə alınması, uzlaşdırılması baş verən inkişafın uzunömürlülüyü ilə yanaşı, məqsədə daha tez çatmağı da təmin edir.

İlham Əliyev hakimiyyətə gəldiyi ilk günlərdən Azərbaycana sədaqətlə xidmət etmiş, dövlət təsisatlarını möhkəmlətmiş, hakimiyyət strukturlarında islahatlar aparmış, təbii sərvətlərdən gələn gəlirlərin idarə olunması üçün səmərəli vasitələr yaratmışdır. O, gəlirlərin həcminə görə cəmiyyətin qütbləşməsinin qarşısını almaq üçün tədbirlər görmüş, ölkənin mənfəətinin əhali arasında ədalətli bölüşdürülməsini təmin etmişdir.

Elitar təfəkkürə malik bu insan cəmiyyətin bütün təbəqələri ilə sıx əlaqə yaratmaqla sübuta yetirmişdir ki, onun hakimiyyəti Azərbaycan xalqının əsl hakimiyyətidir. Dövlət başçısının müxtəlif illərdə yerli və ayrı-ayrı dövlətləri təmsil edən qurumlar tərəfindən Azərbaycanda ilin adamı elan edilməsi onun dünyada ölkəmizin mövqelərinin möhkəmləndirilməsi, Azərbaycan vətəndaşlarının rifahının yaxşılaşdırılması, döyüş qabiliyyətli ordu quruculuğu istiqamətində fəaliyyətinə, mükəmməl və tarazlaşdırılmış xarici siyasətinə verilən qiymətdir.

Respublikamızın rəhbərinin regionların inkişafına yönəlmiş fəaliyyəti çox böyük, bəlkə də, mühüm əhəmiyyət daşıyır. Prezident daim bölgələrdə olur, ictimaiyyətlə görüşür, hər kəsi diqqətlə dinləyir. Qəbul olunmuş Azərbaycan regionlarının sosial-iqtisadi inkişafı dövlət proqramlarına uyğun olaraq, bölgələrimiz sürətlə və intensiv inkişaf edir, yeni iş yerləri ilə yanaşı, müalicə-sağlamlıq ocaqları, idman və mədəniyyət kompleksləri açılır, yeni parklar, meydanlar salınır, məktəblər tikilir.

Qaçqın və məcburi köçkünlərə daim böyük diqqət və qayğı göstərilir. Dövlət Proqramına uyğun olaraq, bütün çadır düşərgələri ləğv edilmişdir. İndi qaçqınlar dövlətin onlara verdiyi rahat mənzil və evlərdə yaşayırlar. İlham Əliyev bu məsələdə də öz sözünə sadiq qalmışdır.

Prezident İlham Əliyev ölkəmizin müstəqilliyinin təminatçısıdır. Azərbaycan cəmiyyəti ardıcıl demokratikləşmə yolu ilə irəliləyir, ölkədə demokratik təsisatlar inkişaf etdirilir. Dünya birliyinə inteqrasiya xəttini seçmiş Azərbaycan hüquqi dövlət quran mütərəqqi xalqlar ailəsində öz layiqli yerini tutmuşdur.

Azərbaycanın sülhsevər xarici siyasəti ilk növbədə, onun dövlət müstəqilliyinin möhkəmləndirilməsi işinə xidmət edir. Azərbaycan dövlətinin xarici siyasətinin başlıca prinsipləri beynəlxalq hüquq normaları ilə tənzimlənən dövlətlərarası münasibətlərə hörmət etməkdən, dünya dövlətlərinin suveren hüquqlarına hörmətlə yanaşmaqdan, bütün mübahisəli məsələlərin sülh və danışıqlar yolu ilə həllindən, qarşılıqlı surətdə faydalı iqtisadi, elmi və mədəni əməkdaşlıq yaratmaqdan, dövlətlərarası əlaqələrə mane olan hər cür məhdudiyyətləri aradan qaldırmaqdan ibarətdir. Azərbaycanın xarici siyasəti dünya təcrübəsinin bütün nailiyyətlərini, sivil beynəlxalq normaları özündə ehtiva edir.

Türkiyə və Gürcüstanla sıx əməkdaşlıq şəraitində Azərbaycan həqiqətən irimiqyaslı, transkontinental layihələri gerçəkləşdirmişdir. Bu layihələr ölkənin iqtisadi inkişafının sürətlənməsində, əhalinin həyat səviyyəsinin yüksəldilməsində mühüm rol oynamaqla, regionda təhlükəsizliyin və sabitliyin təminatına çevrilmişdir.

Bakı-Tbilisi-Ceyhan əsas ixrac boru kəmərinin çəkilməsi Azərbaycan neftini Avropa bazarlarına çıxarmağa imkan vermişdir. Azərbaycan Bakı-Tbilisi-Ərzurum qaz kəmərini çəkməklə qaz idxal edən ölkədən tədricən qaz ixrac edən ölkəyə çevrilmişdir. İndi Azərbaycan enerji təchizatının digər istiqamətləri üzrə əməkdaşlıq edir. Ölkəmiz və bütövlükdə regionun Ümumavropa məkanına inteqrasiyasına xidmət edən üçüncü uğurlu layihə olan böyük İpək yolunu canlandırmağa yönəlmiş Bakı-Tbilisi-Qars dəmir yolunun tikintisinə başlanmışdır. Böyük İpək yolunun bərpası nəinki Azərbaycanı tranzit ölkəyə çevirir, həm də ixrac imkanlarını genişləndirərək, milli iqtisadiyyatın dünyaya inteqrasiyası üçün geniş imkanlar açır. Eyni zamanda, Azərbaycan təbii qazının Avropa ölkələrinə nəqlini nəzərdə tutan Nabukko kimi qlobal layihə də gündəlikdədir. Çox əhəmiyyətlidir ki, Heydər Əliyev siyasi xəttinə uyğun olaraq, Azərbaycan həm regional, həm də qlobal layihələrdə öz milli maraqlarını qoruyur.

Azərbaycanın yeni neft strategiyasının təntənəsi İlham Əliyevin Prezident kimi uğurlarından xəbər verir. Bakı-Tbilisi-Ceyhan neft və Bakı-Tbilisi-Ərzurum qaz kəmərlərinin inşası prosesində Azərbaycan rəhbərliyinin müdrikliklə nümayiş etdirdiyi qətiyyət və iradə Azərbaycanın müstəqil dövlət olaraq qarşısında dayanan strateji hədəflərə çatmasında mühüm rol oynamışdır. Bu qətiyyətin nəticəsidir ki, artıq Azərbaycan dünyanın enerji təhlükəsizliyinin əsas təminatçılarından biri olmaqla ABŞ-ın və Avropa İttifaqının strateji tərəfdaşına çevrilmişdir. Bu da, öz növbəsində, ölkəmizin beynəlxalq arenada nüfuzunun daha da yüksəlməsinə güclü təsir göstərir.

İlham Əliyevin rəhbərliyi ilə Azərbaycan yeni dünya nizamında aparıcı güc mərkəzləri arasında gedən mübarizənin mahiyyətinə uyğun balanslaşdırılmış siyasət yürüdərək, beynəlxalq aləmdə mövqelərini və milli təhlükəsizliyini möhkəmlətmişdir. Azərbaycanın geosiyasi rəqabət meydanına çevrilməsinə yol verilməmişdir. Beynəlxalq təşkilatlarda Azərbaycanın nüfuzu artmış, ölkəmizin maraqlarını təmin edən, o cümlədən Ermənistanın təcavüzkar siyasətini pisləyən bir çox sənədlər qəbul edilmişdir. Ölkəmizin Avropa İttifaqı və NATO ilə əlaqələri yeni mərhələyə daxil olmuş, GUAM, İslam Konfransı Təşkilatı və İqtisadi Əməkdaşlıq Təşkilatında Azərbaycanın sədrliyi dövründə mühüm işlər görülmüşdür. Azərbaycanın təşəbbüsü və rəhbərliyi ilə həyata keçirilən irimiqyaslı enerji və nəqliyyat layihələri dünya dövlətlərinin marağını ölkəmizə yönəltmişdir.

Azərbaycanın Avropa ilə əlaqələri artıq xüsusi əhəmiyyət kəsb etməyə başlamışdır. Azərbaycan strateji tərəfdaşı olan ABŞ ilə qlobal problemlərə və təhlükələrə qarşı mübarizə aparmaq məqsədi ilə uğurlu əməkdaşlığı davam etdirir. Rusiya ilə münasibətlər strateji tərəfdaşlıq səviyyəsinə yüksəlmişdir. Ölkəmiz İranla mütərəqqi və gələcəyə istiqamətlənmiş dialoq aparır, habelə Xəzər dənizi ilə Avropa regionu arasında körpü yaratmaq məqsədi ilə Mərkəzi Asiya dövlətləri ilə münasibətlərini inkişaf etdirir. Orta Şərq və Asiya ölkələri ilə əlaqələr yeni siyasi güc mərkəzlərilə və sürətlə artan iqtisadiyyatlara malik regionlarla iqtisadi, telekommunikasiya və digər sahələrdə qarşılıqlı faydalı əməkdaşlıq üçün perspektivlər açır.

Ölkəmizin Prezidenti Ermənistan-Azərbaycan, Dağlıq Qarabağ münaqişəsinin həlli istiqamətində çox işlər görmüşdür. Xarici müşahidəçilər dəfələrlə qeyd etmişlər ki, İlham Əliyev danışıqlar prosesinin təmkinli məcraya düşməsində mühüm rol oynamışdır. Dağlıq Qarabağ probleminin dinc yolla həllinin tərəfdarı olan Prezident, eyni zamanda, açıq-aşkar bəyan edir ki, Azərbaycanın öz torpaqlarını istənilən şəkildə, o cümlədən hərbi yolla işğalçılardan təmizləmək, ərazi bütövlüyünü bərpa etmək üçün bütün imkanları vardır.

Azərbaycan - dini tolerantlıq nöqteyi-nəzərindən dünyada ən liberal ölkədir. Burada müxtəlif millətlərin birgə yaşaması üçün müasir dövrdə ən optimal model vardır və həyata keçirilir. Respublikada xalqların mehriban ailəsində yəhudi, ləzgi, gürcü, tatar və digərləri ilə yanaşı, slavyan xalqlarının nümayəndələri - ruslar, ukraynalılar, beloruslar, polyaklar da yaşayırlar. Qeyd etmək lazımdır ki, millətindən və dinindən asılı olmayaraq bu insanlar arasında ən mehriban münasibətlər mövcuddur.

Coğrafi baxımdan Qərb ilə Şərqin qovşağında yerləşən Azərbaycan sivilizasiyalar arasındakı dialoqda fəal iştirak edərək bu məsələyə töhfə verən ilk ölkələr sırasında olmuşdur. Azərbaycan Türkiyənin və İspaniyanın təşəbbüsü ilə baş tutan Sivilizasiyalararası Alyansa qoşulan ilk ölkələrdəndir. Təqdirəlayiq hal kimi qeyd etmək lazımdır ki, ölkəmizin bu istiqamətdə fəaliyyəti Azərbaycanın birinci xanımı Mehriban Əliyevanın rəhbərliyi ilə həyata keçirilir.

Prezident İlham Əliyev sosial məsələlərin həllinə, əhalinin gəlirlərinin və alıcılıq qabiliyyətinin artırılmasına böyük diqqət göstərir. Xatırlatmaq yerinə düşər ki, ötən beş ildə Azərbaycanın dövlət büdcəsinin xərcləri 12 dəfədən çox artmışdır. Əhalinin minimum əmək haqqı 8,3 dəfə, minimum pensiyanın məbləği 4 dəfə yüksəlmişdir. Ölkəmiz 2003-cü ildən bəri yoxsulluğun səviyyəsini 49 faizdən 13 faizə endirməyə nail olmuşdur. Bütün bunlar vətəndaşların rifah halının yaxşılaşdırılmasına yönəlmiş kompleks tədbirlərin nəticəsidir.

İndi Azərbaycanın iqtisadiyyatı dinamik inkişaf dövrünü yaşayır. Aparılan genişmiqyaslı sosial-iqtisadi islahatlar, həyata keçirilən möhtəşəm layihələr Azərbaycanı bölgədə lider dövlətə, beynəlxalq aləmdə nüfuz sahibinə çevirmişdir. Son beş ildə Azərbaycan iqtisadiyyatı 2,6 dəfə, adambaşına düşən gəlir 5 dəfə artmışdır. Respublikamızda sənaye istehsalının həcmi 2,5 dəfə yüksəlmiş, sənayeləşmə prosesi geniş vüsət almış, 766 min yeni iş yeri açılmışdır. Azərbaycan öz iqtisadiyyatında qlobal iqtisadi böhranın təsirini minimuma endirməyə və hətta iqtisadi artıma nail ola bilmişdir. 2009-cu ilin ötən dövründə milli iqtisadiyyat dinamikasını saxlamış və hazırda ÜDM-in artımı 4 faiz olmuşdur. Azərbaycan hökuməti xüsusilə qeyri-neft sektorunda özəl sektorun inkişafına stimul yaradılması və ölkənin beynəlxalq bazarlarda rəqabət imkanlarının möhkəmləndirilməsi istiqamətində ticarət və investisiya mühitini davamlı inkişaf etdirmişdir. Qeyri-neft sektoru son beş ildə 16 faiz artmışdır. Düşünülmüş iqtisadi siyasət və real nəticələrə yönəlmiş islahatlar Azərbaycanın dünyanın dinamik inkişaf edən dövlətlərindən biri kimi qəbul edilməsinə səbəb olmuşdur.

Son bir ildə Azərbaycanda baş verən çox böyük dəyişikliklər, ölkədə yeridilən modernləşmə xətti uğurlu iqtisadi nailiyyətlərlə sıx şəkildə bağlıdır. Həmin uğurları beynəlxalq təşkilatlar birmənalı şəkildə etiraf edirlər. Beynəlxalq qurumların məruzələrinə görə, Azərbaycan rəqabətə davamlılıq baxımından nəinki regionda liderdir, hətta postsovet məkanında əsas dövlətlər sırasındadır. Beynəlxalq Valyuta Fondunun məlumatına görə, qarşıdakı 6 ildə Azərbaycanda adambaşına düşən gəlir dünyada ən yüksək sürətlə (252,6 faiz) artacaqdır. Belə ki, Azərbaycanda adambaşına ÜDM-in həcmi 2007-ci ildəki 3.663 ABŞ dollarından 2013-cü ildə 12.915 ABŞ dollarına çatacaqdır. Beləliklə, əgər 2003-cü ildə Azərbaycanda adambaşına milli gəlirin həcmi (888 ABŞ dolları) Ermənistandakı müvafiq göstəriciyə (873 ABŞ dolları) təxminən bərabər idisə, 2013-cü ildə Azərbaycan həmin göstərici üzrə qonşu dövləti üç dəfədən çox qabaqlayacaqdır. 2013-cü ildə Azərbaycan adambaşına ÜDM üzrə BVF-nin hesabatında təmsil olunmuş 181 ölkə arasında 56-cı yeri tutacaqdır. Azərbaycan siyahıda Avropa İttifaqı ölkələri, Şimali Amerika və Asiyanın inkişaf etmiş, Yaxın Şərqin neft hasil edən ölkələrindən sonra gələcəkdir.

Dünyanın nüfuzlu maliyyə və reytinq təşkilatları, ekspertlər Azərbaycanın sürətli iqtisadi inkişafını, ölkədə bazar iqtisadiyyatı prinsiplərinin bərqərar olduğunu, liberal iqtisadiyyat yaradıldığını xüsusi olaraq qeyd edirlər. Məhz bu göstəricilərin nəticəsidir ki, Azərbaycan həmin təşkilatların hesabatlarında öncül yerlərdən birini tutur. Təsadüfi deyildir ki, Dünya Bankı ilə onun struktur vahidi olan Beynəlxalq Maliyyə Korporasiyasının dünyada biznes mühitinə dair “Doing Business - 2009" hesabatında Azərbaycan 181 ölkə arasında bir nömrəli islahatçı ölkə elan olunmuşdur. Azərbaycan işgüzar mühitin əlverişliliyi baxımından dünya ölkələri arasında və hesabatın tərtibatı tarixində ilk ölkədir ki, ötənilki göstəricisini (97-ci yer) 64 pillə yaxşılaşdıraraq, MDB ölkələrini və Avropanın bir neçə inkişaf etmiş ölkəsini geridə qoymuş və 33-cü yerə yüksəlmişdir. Bununla da hesabatın hazırlanması tarixində ən böyük sıçrayış rekordu müəyyən edilmişdir. Hesabat müəlliflərinin qiymətləndirmə prinsipinə görə, Azərbaycan əsas parametrlər üzrə ciddi irəliləyiş nümayiş etdirmişdir. Belə ki, biznesin açılması sahəsində ölkəmiz dünyada 13-cü (keçən il 64-cü yer), işə qəbul etmələr - işdən azadetmələr üzrə 15-ci (keçən il 80-ci yer), investorların hüquqlarının mühafizəsi üzrə - 18-ci yeri (keçən il 107-ci yer) tutur. Eyni zamanda, kredit əldə etmək üzrə ölkəmiz keçən il 26-cı yerdə olduğu halda, bu il 12-ci pillədə qərarlaşmışdır. Ekspertlər hesab edirlər ki, dünya ölkələrindəki işgüzar mühitin qiymətləndirilməsi üçün istifadə olunan 10 göstərici arasında ”daşınmaz əmlakın qeydiyyata alınması sistemi" Azərbaycanda ən mükəmməl vəziyyətə gətirilmişdir. Bu göstərici üzrə bizim ölkəmiz keçən il 56-cı yeri tutduğu halda, bu il 9-cu olmuşdur.

Mütəxəssislərin qənaətinə görə, işgüzar göstəricilərin belə əhəmiyyətli dərəcədə yaxşılaşmasına biznes mühitinin liberallaşdırılması istiqamətində həyata keçirilmiş əməli tədbirlər və paralel olaraq işgüzar və əmək qanunvericiliyinə edilmiş dəyişikliklər təsir göstərmişdir. Bu uğurlarda Azərbaycan Prezidentinin 2007-ci il 30 aprel tarixli “Azərbaycan Respublikasında sahibkarlığın inkişafı ilə bağlı bəzi tədbirlər haqqında” fərmanının icrası ilə əlaqədar bəzi sahələrin tənzimlənməsi prosesinin asanlaşdırılması, o cümlədən biznesin başlanması və bir pəncərə prinsipinin tətbiqi kimi əməli tədbirlər xüsusi vurğulanmalıdır. Dövlət başçısının qarşıya qoyduğu vəzifələr uğurla həyata keçirildikcə və iri infrastruktur layihələri reallaşdıqca ölkəmizin iqtisadi qüdrəti artır, beynəlxalq aləmdəki reytinqi getdikcə yüksəlir. Müstəqil dövlətimizin sürətli iqtisadi inkişafı onun beynəlxalq aləmdəki mövqelərini daha da möhkəmləndirir.

Akademik Ramiz Mehdiyev haqlı olaraq yazır ki, Heydər Əliyevin siyasi xəttinin davamçısı olan Prezident İlham Əliyev hazırda Azərbaycanı müvəffəqiyyətlə siyasi və iqtisadi modernləşməyə doğru aparır: “İqtisadiyyatın liberallaşdırılması, ölkənin geosiyasi və geoiqtisadi çəkisinin artması, vətəndaş ilə dövlət arasında vahid birliyin, ahəngdarlığın bərqərar olması Azərbaycanı yüksələn xətlə inkişafa aparır. Prezident İlham Əliyevin apardığı siyasət nəticəsində Azərbaycan iqtisadi inkişaf sürətinə görə dünyanın aparıcı dövlətləri sırasında yer almışdır. Son illər ərzində Azərbaycan rəqabət indeksi üzrə dünyanın 60 ölkəsi içərisində, postsosialist məkanında isə ilk yerlərdə təmsil olunmuşdur. Adambaşına düşən birbaşa xarici investisiyanın həcminə görə Azərbaycan regionda lider, dünyada isə ilk onluqdadır. Şəhər və kəndlərimiz günbəgün dəyişir, regionlarımız müasirləşir, informasiya-kommunikasiya vasitələrinin səmərəli inkişafı sayəsində ölkəmiz mühüm intellektual mərkəzə çevrilir. Bunların hamısı bir daha ölkəmizin sürətli inkişafının və modernləşməsinin bariz nümunəsidir”.

Akademik Ramiz Mehdiyevin bu fikri ilə tam razılaşmaq lazımdır ki, sabit iqtisadiyyatı olmayan məkanda demokratiya da olmaz, bu, aksiomdur. Görkəmli alim-filosofun yazdığı kimi, hazırda ölkəmiz “Azərbaycan cəmiyyətinin total transformasiyası” şəraitindədir. Sabitlik modernləşmənin, dövlətin və cəmiyyətin transformasiyasının əsas şərtidir. Bu baxımdan Prezident İlham Əliyevin əsas məqsədi Azərbaycanı sabit və güclü iqtisadiyyatı olan, demokratik təsisatları səmərəli şəkildə fəaliyyət göstərən, hər bir vətəndaşının sabahına inamı olan bir dövlətə çevirməkdir. Bu, Prezident İlham Əliyevin ali amalı və məqsədidir. Bu ideoloji və inkişaf xətti Azərbaycanın bu gününü və sabahını müəyyənləşdirmiş dühanın - Heydər Əliyev şəxsiyyətinin bizə qoyduğu irsdir.

Azərbaycanın uğurları ölkə ictimaiyyəti tərəfindən yüksək qiymətləndirilir, xalqın öz Prezidentinə olan inamını, etimadını daha da artırır. Ölkəmizdə əhalinin böyük əksəriyyəti hakimiyyətin fəaliyyətini dəstəkləyir. İstər yerli, istərsə də əcnəbi təhlilçilərin fikrincə, hələ uzun illər gələcək Prezident seçkilərinin şəksiz favoriti də məhz İlham Əliyev olacaq, çünki onun xalqa deməyə sözü vardır, o, xalqa nə təklif edəcəyini bilir.

Böyük Britaniyada çıxan nüfuzlu “Financial Times” qəzetində ölkəmiz haqqında dərc edilən silsilə məqalələrin müəllifləri də bu fikirdədirlər. Onlar İlham Əliyevin Prezident olduğu 2003-2008-ci illərdə Azərbaycanın qazandığı uğurları sadalayıb qiymətləndirmişdilər. 2008-ci ildə keçirilmiş seçkilərdə isə onun qalib gəldiyi barədə məlumat verən qəzetdə seçkidən əvvəl yazılmış məqalədən sitat gətirilmişdir: “Moskvada təhsil almış, ingilis dilində (biz isə əlavə edək ki, Azərbaycan və rus dilləri öz yerində, fransız, türk dillərində də) sərbəst danışan, qərbyönümlü islahatlara sadiq olan Azərbaycan Prezidenti İlham Əliyevin qarşıdan gələn prezident seçkilərində qələbə qazanacağına şübhə edənlərin sayı çox azdır. Zəif vəziyyətdə olan müxalifətin isə onun prezident seçilməsi yolunda hər hansı problem yaradacağı gözlənilmir. Azərbaycan cəmiyyətində dəstəyi olmayan müxalifət təcrid edilmiş vəziyyətdə qalmışdır”.

Bu uğurlar Prezident seçkilərindən qalib çıxmış dövlət başçısı İlham Əliyevi növbəti beş ildə də Azərbaycanın çiçəklənməsinə, xalqın həyatının firavanlaşdırılmasına istiqamətlənmiş siyasətini davam etdirməsinə daha da ruhlandırmışdır.

ABŞ-ın Beynəlxalq Seçki Sistemləri Fondunun (İFES) Azərbaycan vətəndaşları arasında keçirdiyi sorğunun nəticələri göstərmişdir ki, Prezident İlham Əliyevin əhali arasında nüfuzu ildən-ilə artmaqda, vətəndaşların dövlətimizin başçısına olan inam və etimadları yüksəlməkdə davam edir. Təsadüfi deyil ki, sorğuda rəyi soruşulanların 85 faizi Azərbaycan Prezidentini dəstəklədiyini bildirmişdir. İFES və sosioloji sorğular üzrə ixtisaslaşmış digər təşkilatlar əvvəllər də ölkəmizdə ictimai rəyi öyrənmək üçün bir neçə dəfə sorğular keçirmiş və nəticələrə əsasən əhalinin böyük əksəriyyətinin Prezident İlham Əliyevə etimad göstərdiyi məlum olmuşdu. İFES təşkilatı, “Soros” Fondu Azərbaycanda müxtəlif aspektlərdə sosioloji sorğular keçirmişlər. Həmin vaxt Azərbaycan Prezidenti İlham Əliyevin reytinqi müvafiq olaraq 64 və 67 faiz olmuşdu. 2005-ci ilin parlament seçkiləri ərəfəsində “Rəy” Monitorinq Mərkəzinin keçirdiyi sorğuda iştirakçıların 73,4 faizi dövlət başçısı İlham Əliyevi dəstəklədiyini bildirmişdi. Parlament seçkilərinə az qalmış “Gallup İnternational” Sosioloji Tədqiqatlar Mərkəzinin keçirdiyi sorğunun nəticələrinə əsasən isə ölkə başçısının reytinqinin 77 faiz olduğu müəyyən edilmişdi.

Prezident İlham Əliyev Azərbaycanın modernləşməsi xəttini yeritməklə ilk növbədə Heydər Əliyev ideyalarını, xalqın arzu və istəklərini gerçəkləşdirir. İlham Əliyev çıxışlarının birində demişdir: “... İnsan tarixə öz əməlləri ilə düşür. Heydər Əliyev tarixin böyük bir hissəsidir. Onun əməlləri, bütün təşəbbüsləri bir məqsəd daşıyırdı - Azərbaycan xalqına xidmət etmək, ölkəmizi gücləndirmək, müstəqilliyimizi möhkəmləndirmək, ölkəmizdə demokratik cəmiyyət qurmaq. Hamımız, Azərbaycan xalqı bu siyasətə sadiqdir. Biz bu siyasəti davam etdirəcəyik. Azərbaycanda bu siyasətin alternativi yoxdur. Xalqımız da, beynəlxalq ictimaiyyət də bunu çox yaxşı bilir...

...Azərbaycan xalqına vəd etmişəm ki, Heydər Əliyevin siyasətini davam etdirəcəyəm, çünki o, yeganə düzgün siyasətdir. Bu siyasət ona gətirib çıxardı ki, Azərbaycan xaos, hərc-mərclik, vətəndaş müharibəsi vəziyyətindən quruculuq və tərəqqi, sülh və sabitlik mərhələsinə keçdi. Mən ondan çox şeyi öyrənmişəm və onun təcrübəsini, məsələlərə baxışını öyrənməklə hələ çox şeyi əxz edəcəyəm. Hər hansı bir qərar qəbul etməzdən əvvəl düşünürəm ki, bu vəziyyətdə Heydər Əliyev necə hərəkət edərdi. Çalışıram ki, mənə inanan, mənə səs verən adamlar məndən razı qalsınlar. Prezident üçün ən yüksək mükafat onun ideyalarına inamdır, bunsuz işləmək çox çətindir. Ona görə də mən çalışacağam ki, Heydər Əliyevin bütün prinsipləri həyatda öz təcəssümünü tapmaqda davam etsin..."

İndi cənab İlham Əliyevin ikinci dəfə Prezident seçilməsindən bir il keçir. Hazırda dövlət başçısı Heydər Əliyev siyasi xəttini uğurla davam etdirir, millətimizin və dövlətimizin parlaq gələcəyi naminə mətin və qəti addımları, düşünülmüş, tarazlı daxili və xarici siyasət xətti ilə Azərbaycanı layiqincə təmsil edir. Prezident İlham Əliyevin çoxşaxəli siyasi-diplomatik fəaliyyəti, Azərbaycanın siyasi-iqtisadi müstəqilliyinin daha da möhkəmlənməsi istiqamətində həyata keçirdiyi mühüm tədbirlər, qəbul etdiyi strateji proqramlar, Heydər Əliyev siyasətinin və ideyalarının ardıcıl və dönməz şəkildə gerçəkləşdirilməsi xətti Azərbaycan xalqının xoşbəxt, firavan sabahına, müstəqilliyimizin əbədiliyinə inamı qat-qat artırmışdır. Bu fəaliyyət və siyasət xalq tərəfindən bəyənilir və dəstəklənir.

Kamal ADIGÖZƏLOV,

Bakı Dövlət Universitetinin diplomatiya

və müasir inteqrasiya prosesləri kafedrasının dissertantı

Xalq qəzeti.- 2009.- 15 oktyabr.- S. 3.