Azərbaycanın dövlət müstəqilliyinin ildönümünə həsr olunmuş toplantı keçirilmişdir

Dünən “Xalq qəzeti”nin Mətbuat Mərkəzində Azərbaycan Sosial Rifah Partiyası (ASRP) dövlət müstəqilliyi gününə həsr olunmuş “Müstəqilliyimizin 18 ili” adlı toplantı keçirmişdir. Milli Məclisin deputatlarının, siyasi partiya və qeyri-hökumət təşkilatları təmsilçilərinin iştirak etdikləri həmin tədbirdə Azərbaycanın müstəqillik illərində əldə etdiyi beynəlxalq nailiyyətlərdən, ictimai-siyasi, sosial-iqtisadi uğurlardan geniş bəhs edilmişdir.

Tədbiri giriş sözü ilə açan ASRP-nin sədri, Milli Məclisin deputatı Xanhüseyn Kazımlı bildirdi ki, ümummilli lider Heydər Əliyevin Naxçıvanda Ali Məclisin sədri işlədiyi illər Azərbaycanın istiqlalı yolunda xüsusi mərhələ olmuşdur. Onun rəhbərliyi altında muxtar respublikada SSRİ-nin saxlanması üçün keçirilən qondarma referendum boykot edilmiş, Azərbaycan Xalq Cümhuriyyətinin üçrəngli bayrağı dövlət bayrağı kimi ilk dəfə burada qaldırılmışdır.

ASRP sədri müstəqillik illərində Azərbaycanın bütün sahələrdə əldə etdiyi çoxsaylı uğurlar barədə geniş məlumat verdi. O, toplantı iştirakçılarına müraciət edərək dedi:

- Hörmətli toplantı iştirakçıları, tədbirimizin keçirildiyi tarix, yəni 15 oktyabr günü bizim üçün çox əlamətdardır. Çünki bugünkü tarixdə cənab İlham Əliyev ikinci dəfə xalqın böyük əksəriyyətinin etimadını qazanaraq (88,73%) Prezident seçilməklə təkcə ölkə daxilində deyil, onun hüdudlarından kənarda da özünü tarixi şəxsiyyət kimi təsdiqləmişdir. Dünyanın ən böyük dövlət xadimlərindən biri kimi qəbul olunan ümummilli liderimiz Heydər Əliyevin işləyib hazırladığı böyük siyasətin layiqli davamçısı olan Prezident İlham Əliyevin öz ali missiyasını məharətlə yerinə yetirərək ölkəmizin sosial-iqtisadi və mədəni tərəqqisi istiqamətindəki olduqca faydalı və təqdirəlayiq fəaliyyəti xüsusi vurğulanmalıdır”.

ASRP sədri Türkiyə ilə Ermənistan arasında sərhədlərin açılmasına dair imzalanan protokola da xüsusi münasibət bildirərək dedi ki, “Türkiyənin Baş naziri Rəcəb Tayyib Ərdoğan istər Azərbaycan parlamentində, istərsə də Türkiyə və digər ölkələrin informasiya vasitələrində ardıcıl olaraq Azərbaycanın işğal olunmuş torpaqları azad edilməyənə qədər sərhədlərin açılmayacağını bəyan etmişdir. Mən hiss edirəm ki, o, dolayısı ilə yenə də həmin vədlərini davam etdirməkdədir. Ona görə də cənab Ərdoğanın hər iki qardaş ölkənin ortaq gələcəyinin uğurlarına dair siyasi gedişlər etdiyini müəyyənləşdirmək üçün bir qədər - yəni ən azı Türkiyə parlamentinin çağırıldığı vaxta kimi gözləmək lazım gəlir. Onun protokollar imzalanandan sonrakı çıxışları da bunu göstərir. Hamı bilməlidir ki, haqqa, ədalətə xəyanət beynəlxalq sülhü təhlükə qarşısında qoyur".

X.Kazımlı, eyni zamanda, qarşıdan gələn bələdiyyə seçkilərində Sosial Rifah Partiyasının iştirakı və aparılan hazırlıq işləri barədə məlumat verdi.

Toplantıda çıxış edən digər natiqlər müstəqilliyimizin ilk illərində Azərbaycan xalqının həlli çətin görünən problemlərlə üzləşməsini və belə bir vaxtda ulu öndər Heydər Əliyevin ali qanunvericilik orqanına sədr seçilməsinin ölkənin gələcək həyatında çox mühüm bir hadisə olmasını qeyd etdilər. Bildirildi ki, xalqın çağırışı ilə ikinci dəfə hakimiyyətə gələn ümummilli liderimiz Heydər Əliyevin yüksək dühası və siyasi uzaqgörənliyi sayəsində 1994-1995-ci illərdə dövlət çevrilişi cəhdlərinin qarşısı alındı, respublika daxilində sabitlik təmin edildi.

Tədbirdə Azərbaycanın hərtərəfli yüksəlişinə, xalqımızın milli, mədəni, tarixi ənənələrinə, ümumbəşəri dəyərlərə söykənən, sivil, demokratik cəmiyyətin yaradılmasına xidmət edən islahatların həyata keçirilməsindən, dünya dövlətlərinin ölkəmizdə gedən müsbət proseslərə marağının artmasından geniş bəhs olundu. Qeyd edildi ki, Azərbaycan xalqı 1991-ci il oktyabrın 18-də əldə etdiyi dövlət müstəqilliyini məhz ümummilli liderimiz Heydər Əliyevin rəhbərliyi altında möhkəmləndirmiş və onun yorulmaz fəaliyyəti sayəsində ölkəmiz ardıcıl inkişaf yolunu tutmuşdur.

Tədbirdə, eyni zamanda, 2003 və 2008-ci illərdə 15 oktyabr günü keçirilən prezident seçkilərində cənab İlham Əliyevin ölkə başçısı seçilməsi səbəbi ilə həmin günün xalqımızın həyatında əlamətdar bir tarix olması xüsusi vurğulanmışdır. Natiqlər ulu öndər tərəfindən qorunub saxlanılan müstəqilliyimizin bu gün Prezident İlham Əliyevin rəhbərliyi ilə daha da möhkəmləndirildiyini və onun əbədiliyinin təmin edildiyini tarixi dəlillər və arqumentlərlə izah etdilər.

Tədbir iştirakçıları oktyabrın 10-da İsveçrədə Türkiyə ilə Ermənistan arasında diplomatik münasibətlərin qurulması və inkişaf etdirilməsi haqqında protokolların imzalanması ilə əlaqədar öz fikirlərini də bildirdilər. Qeyd olundu ki, Ermənistan qoşunları Azərbaycanın işğal edilmiş torpaqlarından çıxarılmayana qədər Türkiyənin Ermənistanla münasibətlərini normallaşdırması Azərbaycanın milli maraqlarına uyğun deyil və bu, Azərbaycan ilə Türkiyə arasındakı qardaşlıq münasibətlərinə xələl gətirə bilər.

Toplantıda 23 dekabrda keçiriləcək bələdiyyə seçkilərinə də xüsusi yer verildi. Natiqlər ASRP-nin əvvəlki bələdiyyə seçkilərində hər zaman aktiv olduğu və bu seçkilərdə də yaxından iştirak edəcəyini bildirdilər. Çıxış edənlər növbəti bələdiyyə seçkilərinin Azərbaycanın tərəqqisinə, yerli özünüidarəetmə strukturunun daha da möhkəmlənməsinə müsbət töhfə verəcəyinə böyük ümid bəslədiklərini, Azərbaycanın ədalətli cəmiyyətə və qüdrətli dövlətə çevriləcəyinə əmin olduqlarını bildirdilər.

Məsaim HACIXANLI

Xalq qəzeti.- 2009.- 16 oktyabr.- S. 5.