Azərbaycanın alternativ enerji mənbələri hərəkətə gətirilir

Xalqımızın ümummilli lideri Heydər Əliyevin təşəbbüsü ilə 1981-ci il oktyabrın 20-də Azərbaycan İstilik Elektrik Stansiyasının birinci blokunun istismara verilməsi ilə müstəqil respublikamızın energetika təhlükəsizliyinin əsası qoyulmuşdur. Ötən illər ərzində Azərbaycanda dayanıqlı elektrik energetikası sistemi yaradılmış, energetika sahəsinin inkişafına xüsusi qayğı və diqqət göstərilmişdir. Prezident İlham Əliyev Azərbaycan energetiklərinin ölkə iqtisadiyyatının inkişafındakı xidmətlərini nəzərə alaraq hər il oktyabr ayının 20-sinin “Energetiklər Günü” peşə bayramı kimi qeyd olunması ilə bağlı 2004-cü il oktyabrın 13-də xüsusi sərəncam imzalamışdır. Azərbaycanın iqtisadi həyatına mühüm töhfələr verən ölkə energetikləri, hər il olduğu kimi, bu dəfə də peşə bayramlarını yüksək nailiyyətlərlə, xoş ovqatla qeyd edirlər.

Dünən “Azərenerji” Açıq Səhmdar Cəmiyyətinin prezidenti Etibar Pirverdiyev Energetika Günü ilə əlaqədar kütləvi informasiya vasitələrinin nümayəndələri üçün mətbuat konfransı keçirdi. Ölkəmizin elektroenergetika sisteminin yaxın keçmişi, bu günü və gələcəyi ilə bağlı jurnalistlərə məlumat verən E.Pirverdiyev bildirdi ki, dünyanı bürüyən maliyyə böhranına baxmayaraq, cari ilin doqquz ayında Azərbaycanın elektrik energetikası sistemində bir sıra vacib işlər görülmüş, mühüm layihələr həyata keçirilmişdir. Qeyd olundu ki, 2008-ci ilin sonlarında 300 meqavatlıq Səngəçal elektrik stansiyası istifadəyə verildikdən sonra bu ilin ötən dövründə 105 meqavatlıq “Şahdağ” elektrik stansiyası istismara buraxılmış, sistem əhəmiyyətli elektrik verilişi xətləri çəkilmiş, yarımstansiyalar inşa edilmişdir. Prezident İlham Əliyevin uzaqgörən siyasəti nəticəsində son illər ölkənin generasiya güclərinin davamlı şəkildə artdığını diqqətə çatdıran E.Pirverdiyev bildirdi ki, hazırda elektroenergetika sisteminin qoyuluş güclərinin həcmi 6 min meqavata çatdırılmışdır. Gələn ay isə ölkənin elektroenergetika sahəsinin ən mühüm infrastruktur obyektlərindən sayılan 520 meqavatlıq Sumqayıt Elektrik Stansiyasının istismara buraxılacağını bildirən natiq qeyd etdi ki, indi ölkəmiz özünü elektrik enerjisi ilə tam təmin etməklə yanaşı, böyük ixrac potensialı da yaratmışdır. Hazırda elektrik enerjisinin ixrac edilməsi üçün infrastruktur imkanları artırılır. Bununla belə, “Azərenerji” sistemində kəmiyyətdən çox keyfiyyətə fikir verildiyindən elektrik stansiyalarında şərti yanacaq sərfinin azaldılması, elektroenergetika sisteminin dayanıqlığının təmin edilməsi istiqamətində mühüm işlər görülür. Belə ki, hazırda ölkənin sistem əhəmiyyətli elektrik xətlərinin, paylayıcı şəbəkələrin yenidən qurulması məqsədilə Asiya İnkişaf Bankından uzunmüddətli kredit vəsaitləri cəlb olunub. Bundan əlavə, yaxın illərdə bütün elektrik ötürücü xətlərinin yeniləşdirilməsi nəzərdə tutulur.

E.Pirverdiyev onu da qeyd etdi ki, ölkə Prezidenti İlham Əliyevin tapşırığına əsasən alternativ enerji mənbələrindən istifadə etmək məqsədilə mövcud potensialın öyrənilməsi və onun hərəkətə gətirilməsi istiqamətində “Azərenerji” ASC-də konkret işlərə başlanılıb.

“Azərenerji” ASC-nin prezidenti qeyd etdi ki, ölkənin qərb regionunda indiyədək 160 min kart tipli sayğac quraşdırılıb ki, bu da elektrik enerjisinə qənaətlə yanaşı, yığımın səviyyəsinin də xeyli artmasına səbəb olub. Ölkə regionları üzrə yığım səviyyəsinin 90 faizə çatdığını diqqətə çatdıran E.Pirverdiyev bildirdi ki, hazırda əhali qrupundan olan abunəçilərlə bu sahədə heç bir problem yoxdur. Bununla belə, bir sıra dövlət təşkilatlarında da yığımın səviyyəsinin artması müşahidə olunur.

Növbəti payız-qış mövsümünə hazırlıqla bağlı görülmüş işlərdən bəhs edən “Azərenerji” ASC-nin prezidenti bildirdi ki, bu il ölkə əhalisinin elektrik enerjisi ilə təminatında heç bir problem olmayacaq. Regionlarda tikilmiş modul tipli elektrik stansiyaları bölgələrin elektrik enerjisi ilə tam təminatına imkan yaradır.

Sonra “Azərenerji” ASC-nin prezidenti E.Pirverdiyev kütləvi informasiya vasitələri nümayəndələrinin çoxsaylı suallarına ətraflı cavab verdi.

Axırda 2009-2010-cu tədris ilində ali məktəblərin energetika ixtisaslarını seçən və 500-dən yuxarı bal toplayan gənclərə, eləcə də elektrik energetika mövzusunu daha yaxşı işıqlandıran mətbuat orqanları və jurnalistlərə mükafatlar verildi.

Mirbağır YAQUBZADƏ

Xalq qəzeti.- 2009.- 21 oktyabr.- S. 7.