Azərbaycan – İsveçrə əməkdaşlığı tərəflərin maraqlarına uyğun inkişaf edir

Hər iki ölkə siyasi və iqtisadi sahələrdə müstəqillik və sabitlik uğrunda mübarizə aparır. Bunları nəzərə alaraq, biz sıx təmaslar qurmuşuq. Azərbaycan dövlət müstəqilliyini bərpa etdikdən sonra həmin əlaqələri möhkəmləndirməyə başlamışıq... ölkələrimiz arasında problem yoxdur.

Hans-Rudolf MERTS,

İsveçrə Prezidenti,

Bern şəhəri, 19 oktyabr, 2009-cu il

Mən Azərbaycan Prezidentinin İsveçrəyə ilk rəsmi səfərini ikitərəfli əlaqələrimizin inkişafı istiqamətində atılmış mühüm addım hesab edirəm. Münasibətlərimiz çox uğurla inkişaf edir. Bu gün...biz dialoqumuzu davam etdiririk.

İlham ƏLİYEV,

Azərbaycan Respublikasının Prezidenti,

Bern şəhəri, 19 oktyabr, 2009-cu il

Müstəqil Azərbaycanın beynəlxalq aləmə inteqrasiyası həm zamanın tələbləri, həm də dövlətimizin öz maraqları baxımından gündən-günə genişlənir. Dünyada gedən ictimai-siyasi proseslərə çevik reaksiya vermək, milli maraqların təmin olunması üçün lazımi məqamda gərəkli addımlar atmaq isə dövlət siyasətimizin mühüm tərkib hissələrindən biri kimi öz müsbət nəticələrini verir. Beynəlxalq aləmdə daha mühüm əhəmiyyət kəsb edən enerji təhlükəsizliyinin təmin edilməsi, qlobal problemlərə qarşı birgə mübarizə, eləcə də iqtisadi münasibətlərə yenidən — müasir standartlar əsasında baxılması dövlətlərin və dövlət başçılarının əsas qayğılarına çevrilir. Bu baxımdan Azərbaycanın öz tərəfdaşları ilə qurduğu münasibətlər region və dünya ölkələri tərəfindən maraqla qarşılanır.

Bu gün respublikamızın xarici siyasətində Avropa ölkələri ilə əməkdaşlığa xüsusi önəm verilir. Çünki Avropa ölkələri Xəzərin Azərbaycan sektorundan çıxarılan karbohidrogen ehtiyatları üçün potensial bazar olmaqla yanaşı, həm də ölkəmizin əsas və yeganə problemi olan Dağlıq Qarabağ münaqişəsinin həlli istiqamətində aparılan müzakirələrdə əhəmiyyətli mövqe nümayiş etdirirlər. Azərbaycan — İsveçrə münasibətləri də məhz bu prinsiplər üzərində inkişaf etdirilir. Ötən il dost ölkənin Prezidenti Hans-Rudolf Mertsin Bakıya rəsmi səfəri, bu il oktyabrın 19-da isə Prezident İlham Əliyevin İsveçrəyə ilk rəsmi səfəri tərəflər arasında çoxdan bəri təşəkkül tapmış dostluq və əməkdaşlıq münasibətlərinin yeni müstəvidə inkişafına özünəməxsus stimul vermişdir.

Dövlət başçımızın İsveçrədə keçirdiyi ilk rəsmi görüşdə — İsveçrə Kantonlar Şurasının sədri Alain Berset ilə söhbət zamanı maraqlı bir məqamla rastlaşdıq. Cənab Alain Berset dedi ki, biz Azərbaycanla dostluq münasibətlərini yaratmaq və inkişaf etdirmək üçün əvvəlcə öz parlamentimizdə Azərbaycan parlamenti ilə dostluq qrupu yaratdıq. Bu qrupun fəaliyyəti əlaqələrin intensivləşdirilməsinə zəmin yaratdıqdan sonra isə hökumətlərarası və dövlətlərarası münasibətlərin inkişafına imkan yarandı. Sırf Avropa nümunəsi, daha çox isə İsveçrənin beynəlxalq aləmdə tutduğu mövqeyə uyğun addımdır — ölkələrarası münasibətlər əvvəlcə qanunverici orqan vasitəsilə tənzimlənir. Cənab Bersetlə görüşdə Prezident İlham Əliyevin söylədiyi “Son illərdə münasibətlərimizin inkişafında sürətli dinamika vardır ki, bu da hər iki tərəfin maraqlarına cavab verir” — ifadəsi də məhz əməkdaşlığın möhkəm təməl üzərində qurulmasının nəticəsi kimi səslənirdi.

İsveçrə Konfederasiyasının Prezidenti Hans-Rudolf Merts ilə Azərbaycan Prezidenti İlham Əliyevin nümayəndə heyətlərinin iştirakı ilə keçirilən görüşündə əməkdaşlığımızın əhatə etdiyi sahələr də konkret olaraq göstərildi. Cənab Merts məmnunluqla söylədi: “Energetika sahəsində əməkdaşlığımız genişlənir, qeyri-enerji sektorunda da layihələrimiz vardır, alternativ enerji sahəsində əməkdaşlığımızın inkişafı əhəmiyyətlidir, ölkələrimiz arasında ticarət dövriyyəsi artır, İsveçrədə Azərbaycan mədəniyyət günlərinin keçirilməsi hadisəsi əməkdaşlığın intensivləşdirilməsi baxımından əlamətdardır”. Bu fikirlərə münasibət bildirən Azərbaycan Prezidenti İlham Əliyevin söylədikləri isə qarşı tərəfdə daha böyük maraqla qarşılandı: “Enerji sahəsində əməkdaşlığımız uğurla gedir, qeyri-enerji sahəsində yaxşı imkanlar vardır və bunu inkişaf etdirmək lazımdır”. Yəni Prezident İlham Əliyev Avropa rəsmilərini daha genişmiqyaslı layihələrin işlənməsinə və icrasına çağırırdı. Təbii ki, avropalılar növbəti layihələri maraqla, diqqətlə gözləyirlər. Üstəlik, onlar yaxşı bilirlər ki, Azərbaycanın xarici siyasətinin əsas prioriteti Ermənistan-Azərbaycan, Dağlıq Qarabağ münaqişəsinin ədalətli şəkildə həll edilməsinə nail olmaqdan ibarətdir. İstehsal olunmuş neft-qazın dünya bazarına çıxarılmasına gəlincə isə, təkcə İsveçrədə deyil, Avropanın bütün ölkələrində yaxşı bilirlər ki, bu məqsədlə rəsmi Bakının qapısını döyənlər gündən-günə çoxalır. Azərbaycan dövləti isə öz təbii sərvətlərindən xalqın və dövlətin ən ağrılı problemi olan Dağlıq Qarabağ münaqişəsinin ədalətli şəkildə həll edilməsi üçün istifadə edir. Bu baxımdan Prezident İlham Əliyevin İsveçrə səfəri də digər səfərlər kimi əlamətdar idi və özünəməxsus əhəmiyyət kəsb edirdi.

Dövlət başçılarının oktyabrın 19-da Bern şəhərində keçirilən mətbuat konfransında verdikləri bəyanatlar və sualları cavablandırmaları Prezidentin bu Avropa ölkəsinə səfərinin əhəmiyyətindən xəbər verirdi. Dost ölkənin Prezidenti Hans-Rudolf Merts söylədi ki, ölkələrimiz arasında problem yoxdur: “Bizim aramızda dostluq vardır. Biz bu gün səhər görüşlərimizi bu ruhda keçirdik və ölkələrimiz arasında əlaqələrimizi eyni tərzdə inkişaf etdirmək əzmindəyik”. Azərbaycan Prezidenti isə özünün isveçrəli həmkarı ilə söhbətinin digər məqamlarından da söz açdı: “Bu gün biz regional inkişafın mühüm məsələlərini, həmçinin Ermənistan – Azərbaycan, Dağlıq Qarabağ münaqişəsinin nizamlanmasını müzakirə etdik. Mən cənab Prezidentə danışıqlar prosesində baş verən son hadisələr haqqında məlumat verdim”.

Mühüm məsələdir ki, “son hadisələr” dedikdə Ermənistanın getdikcə daha çox qeyri-konstruktiv mövqe nümayiş etdirməsi, hətta, Robert Koçaryan dövründə razılaşdırılmış bəzi məsələlərin yenidən gündəliyə gətirilməsi kimi heç bir əndazəyə sığmayan diplomatik anlaşılmazlıq nümunəsi ortaya qoyması nəzərdə tutulur. Təbii ki, bu da rəsmi Yerevanın məhz İsveçrədə, Sürixdə imzalanmış məlum protokollardan sonra yaranmış arxayınçılığının nəticəsidir. Ancaq bu protokollar nəticəsində iqtisadi böhranın girdabından çıxacağını, dirçəliş üçün nəfəs tapacağnı düşünən Yerevan xeyli tələsir. Sevinmək hələ tezdir. Çünki Azərbaycan dövləti ulu öndər Heydər Əliyevin müdrik xarici siyasətini yeridir. Prezident İlham Əliyevin İsveçrə səfəri də həmin siyasətin uğurla davam etdirilməsidir. Odur ki, Ermənistan rəhbərliyi öz diplomatik məğlubiyyətini kompensasiya etdiyini düşünərkən sadəcə özünü aldatmış olur.

İttifaq MİRZƏBƏYLİ

Xalq qəzeti.- 2009.- 22 oktyabr.- S. 1.